Jehova i Bin Lukautim Mi Gut
MI BIHAINIM narapela kain pasin na mi kirap mekim wok bilong Jehova. Mi wanpela Maori, na mi go bikpela long wanpela hap i stap longwe long ol biktaun long hap bilong not long Nu Silan, long wanpela hap em planti Maori i stap long en. Long 1942, taim mi gat 27 krismas, wanpela taim mi raun long hos, na kasen brata bilong mi, em Ben, em i kam toktok wantaim mi. Long dispela taim mi bilong lotu Angliken.
Inap planti yia pinis Ben i bin kaunim ol buk bilong Jas Rutherford, em presiden bilong Sosaiti Was Taua long dispela taim bipo, na nau em i kisim wanpela pas i kam long nambawan ofis bilong Sosaiti Was Taua long Nu Silan. Ol i tokim em long bungim sampela man bambai ol i ken mekim Kaikai Bilong Bikpela. Na Ben i mas painim wanpela man bilong lukautim dispela bung. Ben i tokim mi: “Yu mas lukautim dispela bung.” Mi amamas, long wanem Ben i ting mi inap lukautim dispela bung, olsem na mi orait long lukautim.
Inap 40 manmeri i bung long haus bilong Ben bilong tingim i dai bilong Bikpela bilong yumi, tasol i no gat wanpela Witnes i stap. Taim mi kamap long haus bilong Ben, em i givim wanpela pepa bilong mi i gat ol tok mi mas kamapim long dispela bung. Mipela i no mekim dispela singsing ol i makim, tasol mi tokim tambu bilong Ben long beten. Nau mi kirap kolim ol tok i stap long pepa Ben i bin givim long mi. Long dispela pepa i gat ol askim na ol tok bilong Baibel bilong bekim ol dispela askim. Wanpela pasto i stap na em i wok long katim tok bilong mi, tasol ol tok bilong Baibel i stap long dispela pepa, i bekim ol askim bilong em.
Wanpela askim i stap long dispela pepa i stori long taim stret bilong mekim dispela bung. Mipela olgeta i amamas taim mipela i lukluk i go ausait na mipela lukim mun i bikpela. Mipela i save tru olsem em i de namba 14 bilong mun Nisan.
Mipela i bung inap 4-pela aua! Planti ol i gat askim, tasol dispela pepa i kam long Sosaiti i kamapim ol tok bilong Baibel na i bekim ol dispela askim. Taim mi tingim dispela samting i bin kamap bipo, mi save, Jehova i bin lukautim mi gut, maski mi no wanpela Witnes i dediket pinis; sapos Jehova i no bin lukautim mi, bai mi no inap mekim ol dispela samting. Tasol long dispela nait bilong mekim Kaikai Bilong Bikpela long 1942, mi painim pinis as bilong i stap bilong mi.
Taim Mi Liklik
Papa bilong mi i dai inap olsem 4-pela mun paslain long taim mama i karim mi long yia 1914. Mi tingim taim mi liklik yet—mi save bel hevi long ol narapela pikinini i gat papa i laikim tru ol, tasol mi no gat papa. Mama i gat bikpela hatwok tru, long wanem em i no gat man, na ol samting i kamap long taim bilong Namba Wan Pait tu i givim hevi long em.
Taim mi yangpela yet mi maritim wanpela yangpela meri, nem bilong em Agnes Cope, na em i stap olsem gutpela poroman bilong mi inap 58 yia pinis. Taim mipela marit nupela, mipela mas wok strong tru long kisim gutpela sindaun. Mi pilai spot, na mi amamas long dispela, tasol i no gat as bilong i stap bilong mi i go inap long taim mipela i bung long Kaikai Bilong Bikpela long 1942.
Autim Tok Long Ol Wanblut
Bihain long dispela, mi givim bel long kisim save long ol tok bilong Baibel, na mi wok long tokim ol kasen brata bilong mi long ol tok i stap long ol buk bilong Baibel em Sosaiti Was Taua i wokim. Long Septemba 1943, sampela Witnes Bilong Jehova bilong narapela hap ol i kam long hap bilong mipela. Ol i stori gut wantaim mipela inap 4-pela aua. Taim mi save olsem ol bai lusim mipela long tumora, mi askim ol, “Wanem samting i pasim mi long kisim baptais long nau?” Mi wantaim tupela wanblut bilong mi i kisim baptais long 1 klok samting long moningtaim.
Bihain long dispela, mi raun long olgeta hap bambai mi inap autim tok long ol wanblut bilong mi. Sampela i harim tok, na mi stori wantaim ol long ol tok bilong Matyu sapta 24 long ol. Sampela i no laik harim tok, na mi kamapim ol tok Jisas i bin mekim long ol Farisi, olsem i stap long Matyu sapta 23. Tasol bihain, mi lain long gutpela pasin bilong autim tok, na mi kirap bihainim pasin isi na pasin sori bilong Papa bilong yumi long heven.—Matyu 5:43-45.
Pastaim meri bilong mi i no laik bai mi mekim wok bilong Jehova, tasol bihain em i wok wantaim mi, na long Disemba 1943 em i kisim baptais. Long dispela de taim em i kisim baptais, 5-pela moa long ples bilong mipela, em Waima, ol i kisim baptais, olsem na nau i gat 9-pela pablisa bilong Kingdom long dispela hap.
Ol Gutpela Blesing, Maski i Gat Hevi
Long 1944, ol brata bilong narapela hap ol i kam lukim mipela gen, na long dispela taim ol i lainim mipela long pasin bilong autim tok. Mipela i autim tok na ol man i lukim mipela, olsem na ol pris pasto i givim hevi long mipela. (Jon 15:20) Planti taim ol i kam tok pait wantaim mipela, na mipela toktok inap planti aua long ol as tok bilong Baibel. Tasol Jehova i helpim mipela long winim tok, na narapela long hap bilong mipela, em susa bilong mi, em i kirap mekim wok bilong Jehova.
Long Jun 1944, wanpela kongrigesen i kamap long Waima. Ol pris pasto i belhat moa yet. Ol i tambuim ol Witnes Bilong Jehova long planim sampela lain bilong ol long matmat bilong ples. Sampela taim ol man i mekim nogut tru long mipela. Wanpela taim ol i kukim ka bilong mi wantaim haus ka. Tasol Jehova i blesim mitupela, na insait long 3-pela mun tasol mi kisim wanpela trak. Na mi mekim wok long wanpela karis em hos i pulim long kisim ol famili bilong mi i go long ol miting.
Bikpela lain i kam bung wantaim mipela, olsem na mipela mas painim wanpela haus i bikpela moa bilong wokim ol miting, olsem na mipela i tingting long wokim wanpela Haus Kingdom long Waima. Em namba wan Haus Kingdom ol i bin wokim long Nu Silan. Long Disemba 1, 1949 mipela katim ol diwai, na 4-pela mun bihain, Haus Kingdom i pinis na mipela i bung wantaim bilong dediketim dispela haus, em inap olsem 260 manmeri inap sindaun long en. Long dispela taim bipo, em wanpela bikpela wok Jehova i bin helpim mipela long mekim.
Ol Narapela Samting i Makim Olsem Jehova i Lukautim Gut Mipela
Lain bilong autim tok bilong Kingdom long hap bilong not long Nu Silan ol i wok long i go bikpela, olsem na ol wasman bilong raun i kirapim mipela long i go long ol narapela hap i no gat man bilong autim tok. Long 1956 mi kisim famili bilong mi na mipela i go i stap long Pukekohe, em i stap long hap bilong saut long Oklan. Mipela i stap long dispela hap inap 13 yia.—Lukim Aposel 16:9.
Mi inap tingim tupela samting i makim tru olsem Jehova i bin lukautim mi gut. Mi wok long kaunsil, na Sosaiti i singautim mi i go long wanpela skul bilong ol elda long brens-ofis bilong Sosaiti Was Taua long Oklan inap 4-pela wik. Mi tokim bos bilong mi olsem mi laik kisim malolo inap 4-pela wik bambai mi inap i go long dispela skul. Bos i tok: “Yu ken i go. . . . Na taim yu kam bek, yu mas i kam lukim mi.” Taim mi kam bek, mi go lukim em, na em i givim mani long mi inap long pe mi inap kisim long dispela 4-pela wik mi bin kisim malolo. Olsem na famili bilong mi i no sot long sampela samting.—Matyu 6:33.
Em namba wan samting mi laik stori long en. Namba tu samting i kamap taim mitupela meri bilong mi i kirap pinis long mekim wok painia oltaim long 1968. Mipela wetim Jehova i helpim mipela, na em i bin mekim olsem. Long wanpela moningtaim, mipela kaikai pinis, na meri bilong mi i opim bokis-ais na i gat liklik hap bata tasol i stap. Meri bilong mi i tok: “I no gat sampela kaikai i stap. Olsem wanem? Nau bai yumi autim tok?” Mi tokim em: “Yes, bai yumi go autim tok.”
Long namba wan haus mipela i go long en, papa bilong haus i kisim sampela buk, na em i givim planti kiau long mipela olsem pe bilong ol buk em i kisim. Papa bilong namba tu haus i givim sampela kaukau na kumu na karot long mipela olsem presen. Na long dispela de, mipela i bin kisim tu sampela mit na bata. Tok bilong Jisas i stret tru long mipela, em Jisas i tok: “Yupela lukim ol pisin. Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long heven em i save givim kaikai long ol. Ating yupela i no winim tru ol pisin, a?”—Matyu 6:26.
Mipela i Go Long Narapela Hap
Mipela i go long Rarotonga long hap bilong Ailan Kuk. Mipela i kirap mekim wok painia salim long dispela hap long 1970. Mipela i stap long dispela hap inap 4-pela yia. Pastaim mipela i mas lainim nupela tok ples. Tasol tok ples bilong ol Maori long Nu Silan na tok ples bilong ol Maori long Ailan Kuk i wankain liklik, olsem na 5-pela wik bihain long taim mipela kamap long Rarotonga mi mekim namba wan pablik-tok bilong mi.
I no gat planti pablisa bilong Kingdom long Ailan Kuk, na i no gat wanpela hap bilong mekim ol miting. Jehova i harim beten bilong mipela na mipela painim pinis ples bilong bung. Mi toktok wantaim wanpela man i gat stua, na em i tok mipela inap baim hap graun bilong em, na insait long wanpela yia mipela wokim wanpela liklik haus na wanpela Haus Kingdom em 140 manmeri inap sindaun long en. Kirap long dispela taim mipela i kisim planti blesing i kam long Jehova.
Mipela amamas tru long gutpela pasin bilong ol manmeri bilong dispela ailan. Taim mipela i autim tok, planti taim ol i givim samting bilong dring long mipela—mipela i amamas long kisim, long wanem em wanpela ples hat. Taim mipela i kam bek long haus, planti taim mipela lukim sampela banana na popo na mango na swit muli, em sampela man i bin putim klostu long dua bilong haus bilong mipela.
Long 1971, mitupela meri bilong mi na 3-pela narapela pablisa bilong Rarotonga, mipela i go long ailan Aitutaki. Mipela painim sampela man long dispela hap em ol i laik save long Tok bilong God, na mipela kirapim 4-pela Baibel-stadi. Taim mipela i go bek long Rarotonga mipela i stadi wantaim ol long rot bilong pas. Bihain ol dispela stadi long hap bilong Aitutaki ol i bin kisim baptais, na wanpela kongrigesen i kamap long dispela hap. Long 1978, ol i wokim namba tu Haus Kingdom long Ailan Kuk. Mipela wok long planim na givim wara, na Jehova i mekim i kamap bikpela.—1 Korin 3:6, 7.
Ol i givim gutpela wok long mi bilong i go lukim 10-pela ailan long hap bilong Ailan Kuk, na sampela taim hatwok i painim mi. Wanpela taim mi go long Atiu, em wanpela hap i stap longwe inap 180 kilomita, na mi mas raun long bot inap 6-pela de, na i gat bikpela si na strongpela win. (Lukim 2 Korin 11:26.) Maski mipela i no gat planti kaikai, na sampela man i stap wantaim mi long bot ol i gat sik, tasol mi amamas, long wanem Jehova i bin lukautim mi gut, na mi kamap gut long dispela hap mi laik i go long en.
Long 1974, gavman i no orait long mipela i stap moa long Ailan Kuk, olsem na mipela i go bek long Nu Silan. Tasol taim mipela i go bek long Nu Silan, i gat 3-pela kongrigesen long Ailan Kuk.
Sampela Wok Moa na Wanpela Traim
Taim mipela i go bek long Nu Silan, i gat sampela wok moa bilong mipela i mekim. (1 Korin 16:9) Sosaiti i laik bai wanpela man i tanim ol tok bilong Wastaua na sampela buk bilong Baibel i go long tok ples bilong ol Ailan Kuk. Ol i givim dispela wok long mi, na mi mekim yet dispela wok. Bihain ol i givim wok long mi long i go lukim ol brata long Ailan Kuk, olsem mekim wok wasman sekit, na bihain mi mekim wok olsem wasman distrik long dispela hap.
Taim mi go long Ailan Kuk, wanpela taim Brata Alex Napa, em wanpela painia salim bilong Rarotonga, em i raun wantaim mi. Mipela raun long bot inap 23 de na mipela i go long Manahiki na Rakahanga na Penrin—em sampela ailan i stap long hap bilong not bilong Ailan Kuk. Jehova i kirapim ol man i gat gutpela bel na ol i givim ples slip long mipela, na ol i kisim tu planti buk samting bilong Baibel. (Lukim Aposel 16:15.) I gat planti kina long solwara bilong ol dispela ailan i gat bis pel long en, na planti taim ol manmeri i givim dispela bis pel long mipela olsem mani bilong helpim wok bilong autim tok long olgeta hap. Mipela i givim ol bis pel bilong spirit i go long ol, na ol i givim bis pel tru long mipela.—Lukim Matyu 13:45, 46.
Dispela hap em i naispela ples tru! Yu tingim! Ol traipela sak (i no save kaikai man) ol i subim wara wantaim ol pikinini na ol i stap isi! Na long apinun, ol kala i kamap long antap i gutpela tru! Tok bilong Buk Song i stret, olsem: “Olgeta de i save tokaut long dispela samting. Na olgeta nait i tokim yumi gen.”—Buk Song 19:2.
Inap 9-pela yia i go pinis, bikpela traim i painim mipela. Meri bilong mi i mas i go slip long haus sik, long wanem, wanpela rop bilong kru i bruk na blut i kamap. Ol i mas katim em, tasol dokta i tok sapos mipela i tambuim em long mekim wok long blut, orait em i no ken katim meri bilong mi. Mitupela i no orait long em i mekim wok long blut, long wanem, mipela i save sapos meri bilong mi i kisim blut, dispela samting bai brukim lo bilong Jehova.
Sik bilong meri bilong mi i go bikpela moa, na ol i putim em long ples bilong ol man i gat bikpela sik tru, na wan wan taim tasol mi inap i go lukim em. Wanpela taim mi go lukim em, na taim mi lusim em i kam ausait, dokta i bihainim mi na em i strong long mi mas orait long em i givim blut long meri bilong mi bambai em inap orait gen. Tasol mitupela meri bilong mi i bilip na wetim Jehova i helpim mitupela, na sapos mipela i bihainim lo bilong God na mipela i dai, em bilong liklik taim tasol.
Na i olsem wantu tasol meri bilong mi i wok long kamap gutpela. Wanpela taim mi go lukim em, na em i wok long kaunim buk. Na long ol de bihain em i autim tok long ol narapela sikman na nes. Nau ol i singautim mi i go long ofis bilong dokta. Dokta i tok: “Mista Wharerau, yu ken amamas! Mipela pilim olsem sik bilong meri bilong yu i orait pinis.” Mak bilong blut i go daun na i orait gen. Mitupela meri bilong mi i tok tenkyu long Jehova, na mitupela i pasim tok gen long wok strong long wok bilong Jehova.
Sosaiti i salim mi i go i stap gen long Ailan Kuk, na mi mekim wok long Rarotonga. Em wanpela gutpela wok tru mi inap mekim! Mitupela meri bilong mi i tingim dispela 50 yia pinis mipela i bin mekim wok bilong Jehova, na mitupela i amamas tru long em i bin lukautim gut mipela. Mipela i no bin sot long ol samting mipela i mas kisim bilong i stap laip. Na mipela i bin kisim planti blesing tru. Wanpela gutpela blesing tru, em planti wanblut bilong mi i bin kam insait long tok i tru. Inap 200 ol i kisim baptais pinis na ol i kamap Witnes Bilong Jehova. Wanpela bubu man bilong mi em i wok long brens-ofis long Nu Silan, na wanpela pikinini meri bilong mi wantaim man bilong em na tupela pikinini man bilong ol i raun na mekim wok long ol brens long wokim ol haus brens samting.—3 Jon 4.
Taim mi tingim ol samting bai kamap long bihain, mi save amamas long gutpela sindaun mi inap kisim taim graun i kamap gutpela ples paradais, na bai olgeta hap i kamap naispela ples tru, winim dispela ples em mama i bin karim mi long en. Mi wet long sekanim gen mama na papa bilong mi taim ol i kirap bek, na tokim ol long ofa bilong Jisas long baim bek yumi, na Kingdom, na olgeta narapela samting i makim olsem Jehova i tingim yumi.
Mi save God i lukautim mi, olsem na mi kisim wankain tingting olsem i stap long Buk Song 104:33: “Taim mi stap laip, bai mi singim ol song long Bikpela. Bai mi singim ol song bilong litimapim nem bilong God bilong mi inap long taim mi dai.”—Em stori bilong Sarn Wharerau.
[Piksa bilong Sarn Wharerau long pes 26]
[Piksa long pes 28]
Namba wan Haus Kingdom ol i bin wokim long Nu Silan long 1950