Jehova i No Gat Asua
“Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.”—SONG 103:13, 14.
1, 2. Abraham em husat? Olsem wanem na Lot i bin i go sindaun long hap bilong Sodom, em ples nogut?
JEHOVA i no gat asua long ol hevi i save kamap. Sapos yumi popaia na nau hevi i painim yumi long dispela samting, i no asua bilong Jehova. Yumi ken tingim samting i bin kamap 3,900 yia bipo. Abraham (Abram) em pren bilong God, na Lot em pikinini bilong brata bilong Abraham. Lot wantaim Abraham i kamap maniman. (Jems 2:23) Ol animal bilong Abraham tupela Lot i kamap planti tumas na nau ‘graun i no inap long tupela i stap wantaim.’ Na lain wasman bilong tupela long lukautim ol animal ol i no stap wanbel.—Stat 13:5-7.
2 Olsem na Abraham i tok, i gutpela sapos tupela i bruk na wanpela i go sindaun long narapela hap. Abraham i larim Lot i makim wanem hap graun Lot i laik kisim. Abraham i bikpela long Lot, olsem na i stret sapos Lot i larim Abraham i kisim hap graun i gutpela moa, tasol nogat; Lot yet i kisim, em graun i gat planti wara na i stap klostu long Wara Jordan. Long ai i olsem gutpela ples, tasol ol man bilong dispela hap ol i man nogut na ol i stap long taun Sodom na Gomora. Bihain Lot na famili bilong em i go sindaun long Sodom, na pasin nogut bilong ples inap pundaunim ol. King Kedorlaomer i daunim ol Sodom na i kisim Lot i go olsem kalabus, tasol Abraham i kam kisim bek Lot. Orait, bihain Lot i go bek gen long Sodom.—Stat 13:8-13; 14:4-16.
3, 4. Taim God i bagarapim Sodom na Gomora, olsem wanem long Lot na famili bilong em?
3 Pasin bilong ol Sodom na Gomora i nogut tru, olsem na Jehova i laik bagarapim ol, tasol em i marimari long Lot na em i salim tupela ensel bilong kisim em wantaim meri na tupela pikinini meri bilong em. Ol i lusim Sodom, na i tambu long ol i lukluk i go bek long Sodom, tasol meri bilong Lot i lukluk i go bek—ating em i tingting long ol samting bilong skin em i lusim i stap. Em nau, wantu em i tanim i kamap sol.—Stat 19:1-26.
4 Nau Lot na tupela pikinini meri i lus long planti samting! Tupela man em tupela meri i laik maritim long Sodom, nau ol i lus. Na Lot i no gat meri moa, na ol samting bilong em bilong skin i lus tu. Nau em wantaim tupela pikinini i mas i go slip long hul bilong maunten. (Stat 19:30-38) Pastaim em i ting em i bin kisim gutpela sindaun, tasol nogat—ol samting i senis na ol dispela samting i lus. Em i bin mekim sampela bikpela popaia, tasol i no olsem em i man nogut, nogat. Bihain Baibel i kolim em “stretpela man.” (2 Pita 2:7, 8) Tasol i no asua bilong Jehova na Lot i bin mekim ol dispela popaia, a?
“Husat Inap Save Long . . . Rong?”
5. Devit i ting olsem wanem long ol rong na pasin bikhet?
5 Yumi olgeta i no gutpela tumas na sin i stap long skin bilong yumi, olsem na yumi save mekim sampela popaia. (Rom 5:12; Jems 3:2) Samting yumi lukim long ai em inap giamanim yumi, olsem em i bin mekim long Lot. Olsem na Devit i tok: “Husat inap save long olgeta rong bilong em yet? Mi mekim sampela rong em mi no save long ol, olsem na yu mas rausim ol dispela rong na mekim mi i kamap klin long ai bilong yu. Mi wokman bilong yu, na yu mas was gut long mi, bai mi no ken bikhet. Yu no ken larim pasin bilong bikhet i bosim mi. Olsem na bai mi stap stret na mi no mekim bikpela rong.” (Song 19:12, 13) Devit i save em inap mekim sampela rong na em i no save long en, olsem na em i askim God long lusim tingting long sampela rong ating em i bin mekim na em i no save long en. Na sapos skin bilong em i kirapim em long mekim rong, em i laik bai God i helpim em long abrusim dispela rong. Em i no laikim pasin bikhet. Em i laik i “stap stret” na givim bel olgeta long God Jehova.
6. Song 103:10-14 i mekim gut bel bilong yumi olsem wanem?
6 Yumi lain bilong Jehova na yumi dediket pinis, yumi tu i no gutpela tumas na yumi save popaia na mekim rong olsem Lot i bin mekim. Ating yumi no tingting gut na yumi go sindaun long hap i gat ol man nogut, olsem Lot i bin mekim; o ating dua i op long yumi mekim wanpela gutpela wok bilong Jehova, tasol yumi no mekim, o kain popaia olsem. Jehova i lukim dispela samting na em i save yumi popaia tasol na i no laik bilong yumi long mekim pasin kranki, nogat. Na sapos yumi mekim bikpela rong, tasol yumi tanim bel, Jehova bai lusim tingting long rong bilong yumi. Devit i tok: “Yumi inap kisim pe nogut bilong sin bilong yumi, tasol em i no save givim dispela pe nogut long yumi. Yumi bin mekim planti pasin nogut, na em inap bekim bikpela hevi long yumi, tasol em i no save mekim olsem. Em i save laikim tru ol manmeri i save pret long em. Em i gat bikpela laik tru long ol, olsem skai i antap tru long graun. Hap bilong sankamap em i no klostu long hap bilong san i go daun. Em i longwe tru. Olsem tasol God i save tekewe sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.” (Song 103:10-14) Na ating Jehova bai mekim pasin marimari na wokim rot bambai yumi ken mekim sampela samting bilong stretim popaia yumi bin mekim, o yumi ken wok strong moa long mekim laik bilong em na litimapim nem bilong em.
No Ken Sutim Tok Long God
7. Bilong wanem hevi i save painim yumi?
7 Sapos hevi i kamap sampela man i sutim tok i go long narapela man, na sampela i sutim tok long God. Tasol Jehova i no save putim hevi long ol man. Em i mekim gutpela pasin tasol long ol. “Em i save mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu”! (Matyu 5:45) Wanpela bikpela as bilong ol hevi i olsem: Pasin bilong ol man bilong graun, em ol i save tingim ol yet tasol, na Satan yet i bosim pasin bilong dispela graun.—1 Jon 5:19.
8. Taim hevi i painim Adam em i mekim wanem?
8 I no stret sapos yumi tok em asua bilong God Jehova na hevi i painim yumi. Dispela kain tok inap bringim dai long yumi. God i bin givim planti gutpela samting long Adam, na laip tu, na gutpela ples Iden tu, olsem na Adam i mas amamas long God. (Stat 2:7-9) Tasol taim Adam i bikhet long God na em i kaikai samting i tambu, nau hevi i painim em na em i sutim tok long God na i tok: “Dispela meri yu bin givim mi olsem poroman bilong mi, em tasol i givim mi pikinini bilong dispela diwai na mi kaikai.” (Stat 2:15-17; 3:1-12) Yumi no ken bihainim dispela pasin bilong Adam.
9. (a) Sapos yumi mekim pasin kranki na nau hevi i painim yumi, yumi ken tingim wanem samting na dispela bai mekim gut bel bilong yumi? (b) Taim hevi i painim sampela man, ol i mekim wanem olsem Sindaun 19:3 i tok?
9 Sapos yumi no tingting gut na yumi mekim pasin kranki na nau hevi i painim yumi, yumi ken tingim Jehova i save long ol samting yumi no strong long en, na sapos yumi givim bel long em, bai em i helpim yumi long taim yumi gat hevi. Yumi ken amamas long dispela samting, na no ken ting em asua bilong God na dispela hevi i painim yumi. Em asua bilong yumi yet—i no asua bilong God. Baibel i tok: “Sampela manmeri i save mekim longlong pasin na bagarapim ol yet, na bihain ol i putim hevi long Bikpela na i kros long em.”—Sindaun 19:3.
10. Olsem wanem Adam i ‘bagarapim em yet’?
10 Adam i tingim em yet tasol na em i “mekim longlong pasin na bagarapim [em] yet.” Em i no givim bel moa long God Jehova. Em i lusim Jehova na em i bihainim tingting na laik bilong em yet. Em i no tenkyu na amamas long ol gutpela samting God i bin mekim long em. Taim hevi i kamap em i sutim tok i go long God, na nau em i kamap birua bilong Nambawan Bikpela God! Em i mekim rong, na dispela i bagarapim em yet wantaim famili bilong em. Dispela i mas givim save long yumi! Sapos man i ting ol hevi i kamap em asua bilong God, em i mas askim em yet olsem: Mi save amamas na tenkyu long God long ol gutpela samting mi save kisim? Mi save amamas na tenkyu long em i bin wokim mi na nau mi stap laip? Sapos hevi i painim mi, ating em asua bilong mi yet, a? Mi save bihainim tok bilong Baibel na bihainim ol lo bilong Jehova na bai em i ken laikim mi na helpim mi?
Lain Bilong God Tu i Mas Was Gut
11. Ol bikman bilong lotu Juda long bipo ol i bin mekim wanem rong?
11 Ol bikman bilong lotu Juda long bipo ol i bin tok ol i mekim wok bilong God, tasol ol i no bihainim tok i tru bilong em; ol i bihainim tingting bilong ol yet. (Matyu 15:8, 9) Jisas i kamapim tingting kranki bilong ol, olsem na ol i kilim em i dai. Na bihain moa ol i belhat long ol disaipel bilong em. (Aposel 7:54-60) Tingting bilong ol i kranki tru, olsem na ol i kros long Jehova yet.—Lukim Aposel 5:34, 38, 39.
12. Wanem samting i bin kamap na yumi save sampela bilong kongrigesen Kristen tu i tok, God i gat asua long hevi bilong ol?
12 Sampela bilong kongrigesen Kristen tu i gat tingting kranki na ol i tok, asua bilong God na hevi i bin painim ol. Long wanpela kongrigesen ol elda i mas givim sampela tok bilong Baibel long wanpela yangpela meri marit, olsem yumi no ken poromanim man i bihainim pasin bilong dispela graun. Hevi i painim meri long dispela pasin em i bin mekim long poromanim wanpela man, na em i tokim ol elda, em i kros long God, long wanem, God i no bin helpim em na bai dispela traim i no ken painim em. Ol elda i wok strong long helpim em, tasol em i no harim tok bilong ol na tok bilong Baibel, na bihain em i pamuk na kongrigesen i mas rausim em.
13. Bilong wanem yumi no ken toktok planti?
13 Sapos yumi i man bilong toktok planti, dispela pasin inap kirapim yumi long putim asua i go long God. Sampela man bilong “givim baksait long God” ol i bin kam insait long kongrigesen long bipo na ol i man bilong toktok planti. Disaipel Jut i tok, ol dispela man “i save senisim tok bilong marimari bilong God, na mekim em i kamap tok bilong ol kain kain pasin nogut. Ol dispela man i save givim baksait long dispela wanpela Hetman, em Bikpela bilong yumi Jisas Krais.” Na Jut i tok tu olsem: “Ol dispela man ol i save bel nogut long olgeta samting i kamap long ol, na ol i save toktok planti oltaim.” (Jut 3, 4, 16) Ol gutpela wokman bilong Jehova i mas bihainim stretpela tingting na ol i mas amamas na tenkyu long ol samting God i givim long ol na mekim long ol, na bai God i ken orait long ol. Ol i ken beten askim God long helpim ol long holim dispela gutpela kain tingting bambai ol i no ken kamap man bilong bel nogut long ol samting na i no bilip moa long God na i stap pren bilong em.
14. Ating sampela Kristen i kros long narapela wanbilip na ol i mekim wanem? Tasol bilong wanem dispela i no stret?
14 Nogut yu ting dispela samting i no inap painim yu. Yumi tu i save popaia na mekim pasin kranki, o narapela i mekim, na dispela inap kirapim yumi long ting olsem God i as bilong ol hevi. Nogut yumi bel hevi long samting wanpela wanbilip i bin mekim. Sapos wanpela brata i hevi olsem, maski em i bin mekim wok bilong Jehova inap planti yia, ating bai em i tok: ‘Sapos dispela wanbilip i stap yet long kongrigesen, mi no ken i go long miting.’ Na bihain em i bel nogut moa yet na i tok: ‘Maski, bai mi lusim dispela kongrigesen.’ Tasol Kristen i no ken ting olsem. Sapos em i kros long wanpela wanbilip, nogut em i bel nogut long ol narapela bilong kongrigesen tu, em God i orait long ol na ol i mekim wok bilong em. Na sapos Kristen i dediket long Jehova, tasol bihain em i no givim bel moa long mekim wok bilong Jehova, na long tingting bilong em em i kros long God, dispela tingting i no stret. Yumi no ken larim wanpela man o wanpela hevi i mekim na yumi bel hevi na yumi lusim Jehova. Maski i gat wanem as na yumi kros long wanpela wanbilip, yumi no ken larim dispela i kirapim yumi long lusim lotu bilong Jehova.—Jems 4:17.
15, 16. Diotrefes i mekim wanem rong? Tasol Gaius i mekim wanem?
15 Gaius em i wanpela Kristen na em i “mekim gutpela wok” long mekim gut long ol wanlotu bilong narapela hap, maski em i no save long ol! Long kongrigesen bilong em, em Diotrefes i stap na em i gat pasin antap. Diotrefes i no laik daun long Jon, maski Jon em i aposel bilong Krais Jisas. Em i bin tok baksait long Jon na em i mekim tok nogut. Aposel Jon i tok: “Na [Diotrefes] i no mekim dispela tasol. Nogat. Em i no save kisim ol brata i go long haus bilong en. Na taim ol arapela man i laik bringim ol i go long haus bilong ol, em i save pasim ol, na em i rausim ol long [kongrigesen].”—3 Jon 1, 5-10.
16 Jon i tingting long kam long dispela kongrigesen na kamapim dispela samting long Diotrefes. Tasol yumi laik save, olsem wanem long Gaius na ol narapela gutpela Kristen long dispela kongrigesen? Ol i no tok, ‘Sapos dispela man i stap, mi no ken i stap long kongrigesen o kam long miting.’ Ol i no larim pasin bilong Diotrefes i mekim nogut bel bilong ol. Ol i tingting tasol long mekim laik bilong Jehova na long i stap strong. Ol i no larim Satan i pundaunim ol o mekim ol i bel hevi samting. Sapos ol i lusim Jehova na ol i tok, em asua bilong Jehova na ol i gat hevi, Satan bai amamas, tasol ol i no mekim olsem.—Efesus 6:10-18.
No Ken Kros Long Jehova!
17. Maski yumi no amamas long wanpela man o meri o samting bilong kongrigesen, yumi mas mekim wanem?
17 Sapos yumi bilong lain bilong God, tasol yumi bel nogut long wanpela man o meri o sampela samting bilong kongrigesen, na yumi no bung moa wantaim lain bilong Jehova, bai yumi mekim nogut long yumi yet na yumi no bihainim stretpela tingting. (Hibru 5:14) Yumi mas strong long holimpas lo bilong Jehova, maski wanem hevi i save painim yumi. Stap gut long God Jehova na Krais Jisas na kongrigesen Kristen. (Hibru 10:24, 25) Tok i tru i bringim yumi i go long laip oltaim, em i stap long kongrigesen Kristen tasol. Yumi no inap painim dispela tok i tru long narapela hap, nogat.
18. Maski yumi no klia long sampela samting God i save mekim, wanem samting yumi save gut long en?
18 Jehova i no save mekim samting nogut long man na bai em i ken traim em, nogat. (Jems 1:13) God Jehova i as bilong pasin sori, na em i save mekim ol gutpela samting tasol. Em i save mekim gutpela pasin long ol man, na em i mekim gut moa yet long ol man i save givim bel long em. (1 Jon 4:8) Sampela taim yumi no save bilong wanem God Jehova i save mekim sampela samting, tasol yumi ken save em bai mekim ol samting bilong helpim lain bilong em. Pita i tok: “Yupela i mas daunim laik bilong yupela yet na stap aninit long strongpela han bilong God. Na long taim em yet i makim, em bai i litimapim yupela. God i save wari long yupela. Olsem na olgeta hevi yupela i karim, yupela i mas putim long han bilong en.” (1 Pita 5:6, 7) Tru tumas, Jehova i tingim tru lain bilong em.—Song 94:14.
19, 20. Yumi mas mekim wanem, maski hevi i painim yumi?
19 Olsem na yu no ken larim wanpela hevi o wanpela samting i pundaunim yu. Baibel i tok: “Ol manmeri i laikim tumas lo bilong [God Jehova], ol i stap gut tru, na i no gat wanpela samting inap mekim ol i pundaun.” (Song 119:165) Traim na hevi i save painim yumi olgeta, na dispela samting inap mekim na bai yumi bel hevi. Tasol yumi no ken bel nogut long ol samting o long sampela brata, na yumi no ken tru bel nogut o kros long Jehova. (Sindaun 4:23) Em wantaim ol gutpela tok bilong Baibel i ken helpim yumi long stretim ol hevi o long karim ol hevi.—Matyu 18:15-17; Efesus 4:26, 27.
20 Sapos samting i skrapim bel bilong yu o yu no wanbel wantaim sampela samting, yu no ken larim dispela samting i kirapim yu long mekim pasin kranki o pasin longlong, long wanem, dispela bai mekim nogut long yu yet na putim hevi long yu yet. Mekim ol toktok na pasin i gutpela na i mekim bel bilong Jehova i amamas. (Sindaun 27:11) Beten askim Jehova long helpim yu. Yu insait long lain bilong em na em i tingim yu na em i ken helpim yu na givim gutpela tingting long yu na bai yu ken i stap long rot bilong kisim laip oltaim wantaim lain bilong em. (Sindaun 3:5, 6) No ken tru kros long God. Sapos hevi i kamap, i no asua bilong em. Jehova i no gat rong.
Bai Yu Bekim Olsem Wanem?
◻ Lot i popaia olsem wanem? Tasol God i ting olsem wanem long Lot?
◻ Devit i ting olsem wanem long ol rong na pasin bikhet?
◻ Taim hevi i painim yumi, bilong wanem yumi no ken tok em asua bilong God?
◻ Wanem samting inap helpim yumi na bai yumi no ken kros long God?
[Piksa long pes 15]
Taim Lot i lusim Abraham, Lot i popaia long tingim gutpela ples bilong sindaun