God i No “Lusim Tingting Long Ol Gutpela Wok Yupela i Bin Mekim”
“GOD em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel . . . long God, na dispela i bin kirapim yupela long helpim ol manmeri bilong em. Na yupela i save mekim olsem yet.” (Hibru 6:10) Dispela tok bilong aposel Pol i stret tru long ol Witnes Bilong Jehova long Isten Yurop. Inap planti yia ol i hatwok tru long mekim wok bilong God taim Rasia i bosim ol dispela hap na i putim planti tambu long ol, tasol ol i stap gut long wok bilong God. Jehova i tingim gutpela wok bilong ol na em i mekim gut tru long ol. Olsem na wok bilong Kingdom ol i mekim i kamap gutpela tru. Orait, nau yumi ken lukim ripot bilong yia i go pinis long 3-pela hap bilong Isten Yurop.
Ol Hap Em Bipo Rasia i Bosim
Ripot i kam long ol hap em Rasia i bin bosim bipo i tok, long yia bilong wok bilong 1992 lain bilong autim tok bilong Kingdom i go bikpela inap 35 pesen—pastaim i gat 49,171 pablisa na nau i gat 66,211! Na i no dispela tasol—ol dispela pablisa i mekim bikpela wok na ol i tilim planti buk na nius bilong Baibel, winim ol narapela yia. Na ol i tilim planti buklet tu, inap 1,654,559. Tasol long 1991 ol i tilim 477,235 tasol. Ol dispela planti buk samting ol i tilim, ol i mekim wanem gutpela wok? Namba bilong ol Baibel-stadi i kamap olsem 38,484!
Na planti moa yet ol i kirap mekim wok painia haptaim—namba i go bikpela inap 94 pesen. Ating dispela wok tu i mekim na planti nupela man i kisim baptais, inap 26,986. Tasol long yia bilong wok bilong 1991, inap olsem 6,570 tasol i kisim baptais.
Wanem samting i mekim na ol dispela nupela baptais i bin harim tok bilong Kingdom na ol i laikim? Sampela i pilim tru pasin bilong Witnes i stadi wantaim ol, em i save tingim tru ol. Wanpela wasman bilong kongrigesen long Moldova i tok:
“Mi na meri bilong mi i go lukim wanpela meri em pastaim em i gat laik long harim tok i tru bilong Baibel. Mipela i kirap stadi wantaim em. Tasol man bilong em i no laik harim dispela tok. Wanpela taim mipela i laik i go stadi wantaim meri na ais i wok long pundaun na i kol nogut tru. I no gat planti man i wokabaut long rot, tasol mipela i go i go na mipela kamap long haus bilong em long taim stret bilong mekim stadi. Meri i tokim man bilong em: ‘Yu lukim pasin bilong ol dispela lain? Ol i save tingim tru yumi, a? Maski bikpela ais i pundaun, ol i kam long taim stret mipela i makim.’ Dispela samting i kirapim tingting bilong man, na em i kirap bung wantaim ol long stadi, na nau em wantaim meri bilong em i baptais pinis na kamap Witnes.”
Na sampela taim gutpela pasin bilong Witnes i kirapim man long harim tok bilong Kingdom. Yumi ken harim stori bilong wanpela elda, em tu i bilong Moldova:
“Wanpela man long hap mi autim tok long en i no laik harim tok bilong ol Witnes Bilong Jehova. Em i tok em i bilong lotu Otodoks, olsem papa na lapun bubu bilong em. Olsem na em i tokim mi long lusim haus bilong em. Mi mekim olsem, tasol pastaim em i larim mi i tokim em, i gat wanem as na mi kam lukim em. Mi kamapim tok bilong Matyu 28:19, i tok: ‘Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit.’ Mi givim atres long em bilong ples mipela save bung long en, na nau mi lusim em. Wanpela wik bihain dispela man i kam long miting bilong mipela, na mi kirap nogut long lukim em! Em i stap inap long taim miting i pinis. Em i tok, taim mi lusim em i kam inap long dispela taim, em i bel hevi long pasin em i bin mekim long mi. Em i kirap stadi long Baibel na nau em i wanpela brata bilong yumi.”
Narapela bikpela samting i kamap long yia i go pinis, em ol brata bilong ol narapela kantri i helpim tru ol brata bilong ol dispela hap long ol samting bilong skin ol i sot long en. Ol i salim olsem 400 tan kaikai na planti klos bilong ol man na meri na pikinini. Ol i tilim ol dispela samting i go long olgeta kantri bipo Rasia i bin bosim, na long ol longwe hap tru, olsem Irkutsk long Saibiria and Kabarovsk, klostu long Japan. Dispela i kamapim klia tru olsem Jehova i no lusim tingting long ol brata bilong yumi em ol i givim bel long mekim wok bilong em na litimapim nem bilong em! Dispela pasin sori bilong ol brata em spirit bilong Jehova i bin kirapim ol long mekim, em i helpim ol long pas gut wantaim ol brata long olgeta hap. Wanpela sista long Yukren i raitim pas i go long brens-ofis na i tok:
“Yupela i bin helpim gut mipela na bel bilong mipela i pilim tru. Aiwara bilong mipela i kamap na mipela i tenkyu long Jehova, long wanem, em i no lusim tingting long mipela. Tru mipela i sot yet long sampela samting bilong skin, tasol ol brata long hap bilong Wes ol i bin salim ol samting i kam na dispela i helpim gut mipela na nau mipela i no sot tumas. Olsem na nau mipela inap lusim bikpela hap taim moa long mekim wok bilong Jehova. Sapos em i laik bilong Jehova, mi wantaim pikinini meri bilong mi bai mekim wok painia haptaim inap sampela mun.”
Na sampela man bilong ausait ol i lukim dispela pasin sori bilong ol Witnes long salim kaikai na klos samting i go long ol brata i sot. Wanpela famili bilong narapela kongrigesen i raitim pas na i tok: “Mipela kisim pinis ol dispela kaikai na klos yupela i bin salim i kam. Man! Em i planti tru! Yupela i bin helpim gut mipela, na dispela i skulim mipela olsem mipela tu i mas mekim gutpela pasin long ol narapela man. Ol man i no bilip ol i lukim dispela pasin, na ol man i laik harim, na famili bilong ol tu, ol i lukim, na ol i pilim tru pasin bilong ol Witnes—ol i stap olsem brata brata tru.”
I gat 5-pela kibung distrik na wanpela kibung intenesenel i bin kamap long 1992, nem bilong ol dispela kibung, “Ol Man i Stap Olsem Lait.” I gat 91,673 manmeri ol i kam long ol dispela kibung, na 8,562 i kisim baptais. Lain i bung long kibung intenesenel long Sen Pitasbek i bikpela tru, winim ol narapela kibung long ol dispela hap—i gat 46,214 i bung long Kirov long haus stediam, na ol i kam long 30 kantri.
Long Saibiria wanpela man i gat 60 krismas samting em i kam long ples kibung long Irkutsk bilong lukluk tasol. Em i tok: “Ol manmeri i stap long kibung ol i bilas gut na ol i amamas na narapela i mekim gutpela pasin long narapela. Ol i olsem wanpela bikpela famili i pas gut wantaim. Mi pilim olsem ol i no pren gut long kibung tasol—ol i stap olsem long ol narapela taim tu. Mi kisim sampela gutpela buk samting bilong Baibel na ol i givim save long mi na nau mi save, dispela em i wanem kain oganaisesen. Mi laik bai ol Witnes Bilong Jehova i stadi wantaim mi long Baibel.”
Long dispela kibung long Irkutsk, i gat 5,051 i bung, na wanpela meri bilong Ripablik bilong Yakut long Saibiria i laik harim sampela tok na em i kam. Em i tok: “Mi lukim ol dispela manmeri na bel bilong mi i amamas tru. Mi tenkyu tru long Jehova, em i bin helpim mi long bungim dispela lain na save long ol. Long dispela kibung mi kisim sampela buk samting, na mi laik toktok wantaim ol narapela man long ol dispela tok. Mi gat bikpela laik tru long lotuim Jehova.”
Long Alma-Ata long Kasakstan i gat 6,605 i bung long kibung, na man bilong bosim Sentral Stediam em i tok: “Mi amamas tru long pasin bilong yupela. Nau mi save, yupela olgeta, ol yangpela na ol lapun, i save bihainim gutpela pasin. Mi no ken tok, mi bilip long God, tasol mi bilip long ol gutpela pasin holi em yupela i kamapim long ples klia, olsem yupela i stap olsem brata brata, na tingting bilong yupela long ol samting bilong spirit na bilong skin.”
Wanpela plisman long kibung bilong Alma-Ata i tok: “Tupela taim mi bin bungim yupela long ol kibung. Mi save amamas tru long wok wantaim ol Witnes Bilong Jehova.”
Romenia
Na Jehova i no lusim tingting long gutpela wok ol brata long Romenia i mekim. Long 1992 sampela gutpela samting i painim ol Witnes long dispela hap. Namba wan samting, em ol i kirapim gen brens-ofis long Bukares. Laspela yia em ol Witnes long Romenia i mekim wok bilong ol long ples klia na gavman i orait long en, em long 1949. I gat olsem 20 brata sista i wok long dispela nupela brens-ofis, na long mun Epril i gat 24,752 pablisa long dispela kantri, i winim namba bilong ol pablisa long 1991 inap 21 pesen.
Inap planti yia ol Witnes i mas wok hait long autim tok, na nau ol i wok long lain gut long pasin bilong i go long ol haus na autim tok. Brens-ofis i salim wanpela stori i kam long hap bilong Provins Mureş, na dispela i kamapim klia olsem ol Witnes i wok strong long painim kain kain rot bilong autim tok long ol man. Brens-ofis i tok:
“Wanpela pablisa i raun long tren na em i tingting long autim tok long ol man i stap long ol narapela narapela rum bilong tren. Planti man i laik harim, tasol long laspela rum i no gat wanpela man o meri i laik kisim nius bilong yumi. Bihain wanpela man i belhat na em i kirap sanap na i singaut bikmaus: ‘Bai mi tromoi olgeta nius bilong yu i go ausait! Bilong wanem yu kam toktok wantaim mipela long lotu bilong yu?’ Pablisa i tok isi long em na i tok, sapos em i tromoi ol nius, dispela inap helpim sampela man—ating ol bai kisim na kaunim. Man i lukim Witnes i stap bel isi na man i kirap nogut. Orait, em i kisim ol nius long han bilong Witnes na em i kirap tilim long ol man i stap klostu. Olgeta wan wan i kisim nius na i no gat wanpela bilong dispela man yet. Olsem na Witnes i askim em, ‘Yu no laikim wanpela nius bilong yu yet?’ Em nau, man ya i lukim wanpela man i holim tupela nius na em i pulim wanpela long han bilong em na i tok, ‘Em nau, wanpela nius i kamap pinis long mi!’ ”
Long planti kantri, sampela taim ol pris pasto bilong ol misin i biruaim wok bilong ol Witnes long autim tok. Long Romenia planti taim ol pris bilong lotu Otodoks i save belhat long ol Witnes. Tasol dispela i no inap pasim Jehova long mekim gut long lain bilong em ol i mekim wok bilong em. Wanpela wasman sekit i raitim pas olsem:
“Mipela i go wantaim kongrigesen long autim tok long hap i stap longwe long biktaun. I gat wan handet brata i stap. Mipela baim wanpela bas na mipela i go inap 55 kilomita na kamap long wanpela liklik taun. Mipela singautim planti man i kam long wanpela bikpela tok bai kamap long wanpela haus bung olsem haus kaunsil. Taim miting i kirap, wanpela pris bilong lotu Otodoks i kam bilong bagarapim miting bilong mipela. Ol polis i laik pasim em, tasol em i mekim yet. Bihain em i brukim glas long bikpela dua bilong dispela haus, na ol brata i mas pasim miting. Tasol planti man bilong dispela ples i no amamas long samting dispela pris i mekim. Dispela i opim rot na ol brata inap autim tok long olgeta manmeri i kam bung, na ol i kisim planti buk na nius long ol brata.”
Tasol sori tru, long sampela hap bilong Romenia i no gat planti Witnes i stap. Taim wanpela painia oltaim i kamap nupela long provins Olt, i gat 9-pela brata tasol i stap long dispela provins, na i gat bikpela hap tru bilong autim tok long en. Orait, wanpela yia bihain i gat 27 Witnes—5-pela bilong ol i bin lusim wok autim tok na nau ol i kirap gen long mekim dispela wok. Painia i kisim ples slip long biktaun Korabia, na i no gat wanpela Witnes long dispela hap. Ol Witnes i kam i stap long dispela hap inap 45 de tasol na pris bilong dispela hap em i mekim wanpela toksave long redio bilong pasim ol man long harim tok bilong ol Witnes. Em i tok, ol i kam long Korabia na autim bilip bilong ol na ol i laik kirapim ol man long senisim lotu bilong ol. Pris i laik bagarapim nem bilong ol Witnes long dispela hap. Orait, bihain ol dispela brata i stap long Bukares bilong mekim kibung distrik. Pris bilong lotu Otodoks long Korabia i mekim lotu pinis long haus lotu na bihain em i givim strongpela toksave long lain bilong em, em i tok, ‘Yumi olgeta i mas i go bung long rot na singaut na kirapim ol polis long mekim sampela samting bilong pasim ol Witnes, em ol i wok long tilim ol nius samting long ol man bilong dispela hap na i olsem ol i givim marasin nogut long ol na givim bikpela sik long ol.’ Tasol long dispela nait stret, wanpela lain raskol i kam brukim na bagarapim bikpela haus lotu bilong dispela taun na bikpela haus kaunsil tu. Olsem na pris wantaim lain bilong em i no bin mekim dispela bung em i toktok long mekim!
Ol Hap Bipo Ol i Kolim Yugoslavia
Long yia bilong wok bilong 1992, planti hevi i bin painim ol brata long hap bilong Yugoslavia. Tasol ol gutpela samting tu i bin painim ol.
Pait i bin kirap long Sloven ia pastaim, na bihain long Kroesia, na bihain long Bosnia na Hersegovina. Insait long wanpela yia tasol long wanpela ripablik, 5-pela nupela kantri i bin kamap na ol i wok long kamapim ol boda na lo na mani bilong ol yet. Planti handet Witnes Bilong Jehova i mas lusim haus bilong ol na kisim ples slip wantaim ol brata bilong ol long ol narapela hap. Long sampela biktaun ol i kamapim sampela komiti bilong givim ples slip na kaikai na laplap long ol brata i sot long ol samting. Long yia bilong wok bilong 1992, ol i tilim kaikai inap olsem 55 tan i go long ol brata long ol kongrigesen i stap long ol hap i gat pait. Mipela i kisim planti pas bilong tok tenkyu.
Ol brata long Dubrovnik i bin stori olsem ol i tenkyu tru long ol samting ol i bin kisim. Taim wanpela sista i karim wanpela karamap kaikai i go bek long haus bilong em, wanpela meri klostu long haus bilong em i askim em, em i baim we ol kiau. Sista i tokim em, ol brata spirit long narapela hap i bin salim i kam. Meri hia i kirap nogut. Wanpela man long Slovenia ol brata i no save long em, em i telefon long wanpela elda na i tok: “Mi harim tok olsem kaikai ol Witnes i kisim long ol brata bilong ol bilong tilim, ol i save tilim i go long pasin i stret. Mi bin salim sampela karamap kaikai i go long sampela man, tasol ol i no kisim. Inap mi salim sampela karamap kaikai long yupela na bai yupela i ken tilim?” Na tu, ol nius na redio i bin stori long ol gutpela wok yumi mekim bilong helpim ol narapela.
Wanpela brata i kisim baptais long kibung intenesenel long Sagreb long 1991, em i lukim ol hevi bilong kaikai i wok long kamap bikpela, olsem na em i bin baim planti kaikai na bungim i stap. Em i kisim dispela kaikai i go long haus bilong em i stap klostu long hap bilong pait. Orait, taim kaikai i sot tru, dispela kaikai i bin helpim gut ol brata.
Rot i bin op long kisim pas bilong tok orait long wanpela bikpela trak i ken kisim kaikai i go long ol brata long Sarajevo, em biktaun ol birua i banisim na ol brata i sot long kaikai. Mipela i amamas long tokaut, dispela kaikai i bin kamap gut long ol.
Pait i mekim na sampela man i no soldia i bin kisim bagarap. Taim yia bilong wok i pinis, 6-pela brata na sista na tupela man i laik harim tok ol i dai, na sampela i kisim hap bagarap.
Tasol planti samting i kamapim klia olsem sapos yu wanpela Witnes Bilong Jehova, sampela taim dispela inap lukautim yu. Olsem: Taim ol brata i go long kibung distrik long Belgret, ol soldia i pasim bas bilong ol. Ol soldia i laik painim lain bilong wanpela lotu, na ol i askim ol brata, i gat sampela man bilong dispela lotu i stap wantaim ol, o nogat? Ol brata i tok, Nogat. Ol i tokim ol brata long soim kat aidentiti long ol, na nem bilong sampela brata i olsem ol i bilong dispela lotu. Ol soldia i tok, ol i giaman. Tasol ol brata i holim wanpela pas bilong ol i tok ol i lusim pinis lotu em bipo ol i insait long en, na ol i tok nau ol i Witnes Bilong Jehova na ol i laik go long kibung bilong ol. Olsem na ol soldia i larim ol i go.
Inap longtaim pinis ol brata i save ol i insait long wanpela bikpela lain brata bilong olgeta hap. Tasol ol i go long kibung intenesenel long 1991, nem bilong en “Ol Man i Laikim Pasin Bilong i Stap Fri Em God i Givim Long Ol,” na ol i lukim pasin ol brata long olgeta hap i mekim bilong helpim ol, na dispela i mekim na nau ol i pilim moa yet olsem ol i insait long wanpela lain brata em narapela i laikim tru narapela.—Jon 13:34, 35.
Ol painia i givim bel yet long mekim wok bilong ol na dispela i bin helpim gut wok autim tok. Nau ol inap kisim Wastaua long ol bikpela tok ples bilong dispela hap, na ol i kamap long wankain taim olsem long tok Inglis, na skin bilong Wastaua i gat ol gutpela piksa long kala kala. Ol man i laikim tok i tru na stretpela pasin, Wastaua i save givim kaikai bilong spirit long ol “long taim bikman i makim.” (Luk 12:42) Insait long yia bilong wok bilong 1992, inap olsem 674 nupela brata na sista i kisim baptais.
Tru tumas, God i no lusim tingting long ol gutpela wok na gutpela pasin sori ol brata sista long Isten Yurop ol i mekim. Jehova i laik bai olgeta man i lotuim em, maski ol i stap we, ol i mas bihainim gutpela tok bilong aposel Pol i stap long Hibru 6:11, i tok: “Mipela i laikim tumas bai yupela olgeta i mas wok strong olsem tasol, na holimpas bilip bilong yupela, na wetim dispela taim God i makim bilong mekim gut long yumi.”