Sampela Ples Long Graun Bilong Promis

Yupela Mas Amamas! Wel i Pulap Long Hul na i Kapsait

PROFET Joel i tokim ol manmeri bilong Saion long ol i mas amamas long Jehova. Bilong makim amamas na gutpela sindaun bilong ol, em i toktok long ‘wel bilong diwai oliv.’ Em i tok: “Ol pikinini bilong wit bai i pulap tru long ol ples bilong rausim lip samting bilong wit. Na long ol hul bilong wokim wain na wel bilong diwai oliv, wain na wel bai i pulap tru na bai i kapsait.”​—⁠Joel 2:​23, 24.

Sapos yu bin i stap long Israel long dispela taim bipo, bai yu gat wanpela diwai oliv klostu long haus o long gaden, olsem yu lukim long piksa hia.a Dispela diwai oliv i gutpela samting tru na i helpim gut sindaun bilong ol. Bilong wanem dispela diwai i bikpela samting tru long ol?​—⁠Lukim Hetman 9:​8, 9.

Lukim gut dispela diwai. Ol diwai oliv inap i stap planti handet yia, na sampela i winim wan tausen yia. Olsem na i gat planti buk i kamap long skin bilong diwai oliv, na skin bilong en i waitpela liklik. Em i no save go antap tumas​—⁠em inap olsem 6 mita samting, na han bilong en i save go nabaut. Lip bilong en i lait, na i no grinpela tru​—⁠i olsem waitpela liklik, na em i no save tromoi ol lip bilong en​—⁠oltaim i gat lip long en. Olsem na long olgeta taim i gat gutpela ples kol aninit long en. Tasol i no dispela samting tasol na diwai oliv i bikpela samting long ol Israel.

Kaikai bilong dispela diwai i bikpela samting long sindaun bilong ol​—⁠em i save karim planti tausen tausen oliv​—⁠bai yu lukim sampela i grinpela na sampela i blakpela liklik. Long mun Me planti plaua tru i save kamap long diwai oliv, na bihain kaikai bilong en i kamap. (Jop 15:33) Taim pikinini oliv i nupela yet em i grinpela, tasol taim em i mau, em i blakpela liklik.

Mun Oktoba na Novemba em taim bilong kisim oliv, na em i bikpela wok. Ol i save putim ol laplap long graun aninit long diwai, na ol i holim ol longpela stik na paitim paitim diwai, na ol oliv i mau pinis bai pundaun antap long laplap. (Lo 24:20) Ol i save wasim ol oliv na putim long wara i gat sol na dispela i save rausim pait bilong en. Wanem samting moa ol i mekim?

Ol inap kaikai olsem, o ol i save larim i stap longtaim long wara i gat sol na ol i kaikai long em inap planti mun. Em i olsem abus bilong ol, na ating planti taim ol i save kaikai wantaim bret ol i wokim long bali, olsem wanpela kain wit.

Tasol bikpela wok tru ol i mekim long oliv, em ol i save wokim wel long en. Ol i save putim ol oliv long wanpela samting olsem dis ston na paitim i go na wel i kamap, o ol i save krungutim long lek. (Maika 6:15) Taim ol i wokim wel long dispela pasin, em i nambawan wel tru na ol i save pulimapim long ol lam i stap insait long haus lotu. (Kisim Bek 25:37; 27:​20, 21) Wel oliv ol i wokim long dispela pasin ol i save laikim tru, na ol i mekim wok long en long taim bilong mekim bikpela kaikai samting.

Bilong kisim bikpela wel tru, ol i save kisim ol oliv, maski ol i no gutpela tumas, na ol oliv ol i bin kisim gutpela klinpela wel long en i gat hap wel i stap yet, na ol i pulimapim long samting olsem tang ston, tasol as bilong ston i kam antap klostu liklik long maus bilong en; i gat kain kain, na wanpela kain yu inap lukim long piksa hia. Ol i putim wanpela traipela raunpela ston antap long en na wanpela donki o wanpela man bai tantanim dispela ston na wilwilim ol oliv, na wel bai kamap na ol i pulimapim long ol botol ston.​—⁠Matyu 18:⁠6.

Long ol dispela lain bilong bipo, wel bilong oliv em i wanpela bikpela samting tru na ol i save laikim tumas, olsem ol man i save laikim tumas gol, na ol i save mekim kain kain wok long en. Long wanpela diwai tasol, wanpela famili bai i gat wel inap long wanpela yia. Oliv em i nambawan kaikai bilong ol, long wanem, em i save sindaun gut long bel na i strongim skin bilong ol. (Lukim Jeremaia 41:8; Esekiel 16:13.) Sampela taim ol i save tanim sanda wantaim wel bilong welim skin bilong ol, o taim wanpela man i kam lukim ol, ol i save kapsaitim sampela long het bilong em bilong makim olsem ol i laik mekim gut long em. (2 Samuel 12:20; Song 45:7; Luk 7:46) Na ol i save putim wel bilong oliv long ol sua tu, olsem marasin.​—⁠Aisaia 1:6; Mak 6:13; Luk 10:⁠34.

Tasol i gat kain kain wok ol i save mekim long wel bilong oliv. Ol i save pulimapim long lam bilong ol olsem kerasin, na ol i save givim olsem ofa long God, na ol i save mekim wok bisnis long en. Em nau, yumi save, long ol Israel bipo, diwai oliv em i wanpela bikpela samting tru. Olsem na Joel i tok piksa long en bilong makim gutpela sindaun na amamas.​—⁠Lo 6:11; Song 52:8; Jeremaia 11:16; Matyu 25:​3-8.

[Ol Futnot]

[Piksa Kredit Lain long pes 24]

Pictorial Archive (Near Eastern History) Est.