Wetim Gutpela Samting—Bikpela Samting Bilong Lukautim Yumi Long Taim Bilong Hevi

Wanpela manki Korea i laik helpim mama long soim yangpela meri bilong yunivesiti olsem em bikpela samting yumi mas i gat gutpela samting bilong wetim. Manki i tingim tok piksa em i bin harim long miting Kristen na em i tokim meri, “Yu laik helpim mi long save long as bilong wanpela tok bokis?” Meri i orait long dispela na manki i tok: “I gat tupela famili i stap rabis. Bikpela ren i kam daun na rup bilong tupela haus wantaim i gat hul na ren i kam insait. Wanpela famili i bel hevi na toktok planti long ren i kam insait. Tasol narapela famili i stap amamas na wok long stretim rup long haus bilong ol. Olsem wanem na wanpela famili i bel hevi na wanpela famili i amamas?” Meri i tok, em i no save. Olsem na manki i tok: “Namba 2 famili i stap amamas, long wanem, nau tasol ol i kisim pas bilong gavman i tok ol bai kisim nupela haus. Olsem na ol i wetim gutpela samting i kamap. Narapela famili, nogat!”

TOK BOKIS bilong manki i kamapim tok i tru olsem: Sapos yumi gat gutpela samting bilong wetim i kamap, maski yumi gat hevi, bai yumi inap i stap amamas. Olsem tupela famili em i stori long en, hevi i save painim yumi long sampela taim, olsem sik, o hevi long mani, o long famili, na pasin raskol na planti narapela hevi. Planti taim yumi no inap rausim ol dispela hevi, olsem yumi no inap rausim bikpela win na ren i kamap long hap bilong yumi. Olsem na ating yumi bel hevi na yumi pilim olsem yumi no gat rot. Na tu ating misin i bin lainim yumi olsem ol sinman i no ken wetim gutpela samting i painim ol long bihain; planti bai ol i kisim strafe nogut inap oltaim oltaim.

Sapos yumi pilim olsem yumi no gat rot na yumi no gat gutpela samting bilong wetim i kamap, bai yumi bel hevi, a? Tasol yumi inap stretim wanpela samting hia: Yumi olgeta inap wetim gutpela samting. Na sapos yumi wetim gutpela samting i kamap, bai yumi no pilim olsem yumi no gat rot, na bai yumi no bel hevi. Bai yumi inap karim ol hevi i painim yumi na i stap bel isi na amamas. Tru tumas, pasin bilong wetim gutpela samting i kamap em i bikpela samting bilong lukautim yumi.

Ating yu no bilipim dispela tok? Tru dispela pasin i gat strong bilong helpim yumi o nogat? Olsem wanem? I gat as tru na yumi olgeta i ken wetim gutpela samting i kamap?

Olsem Hat Kapa

Nau ol dokta i kisim save olsem pasin bilong wetim gutpela samting em i gat strong. Wanpela dokta (em Shlomo Breznitz) i bin abrusim bagarap long taim ol Natsi i wok long bagarapim ol Juda em i tok, planti hevi i painim yumi “em yumi pret long hatwok yumi ting bai ol i givim long yumi; yumi no pret long ol hevi yet. Pasin bilong wetim gutpela samting i daunim hevi.” Wanpela nius i tok, pasin bilong wetim gutpela samting em “gutpela marasin.” (The Journal of the American Medical Association) Narapela nius i tok: “I gat planti sikman, olsem ol manmeri i gat sik kensa, na taim wanpela samting i mekim na ol i no wetim moa gutpela samting, wantu sik bilong ol i go bikpela; tasol taim ol i kirap wetim gutpela samting, wantu sik bilong ol i wok long pinis.”​—⁠American Health; lukim Sindaun 17:⁠22.

Ol man i stadi long Baibel i save pinis, em bikpela samting yumi mas i gat gutpela samting bilong wetim. Long 1 Tesalonaika 5:​8, aposel Pol i tokim ol Kristen: “Pasin bilong wetim God i kisim bek yumi, em yumi mas putim olsem hat kapa.” Olsem wanem dispela pasin i olsem hat kapa?

Wanem wok bilong hat kapa? Soldia long taim bilong Baibel i save pasim hat kapa o hat ain antap long hat ol i wokim long gras bilong sipsip o skin bilong bulmakau. Dispela kain hat i lukautim het bilong soldia long taim bilong pait bambai ol supsup na stik na bainat i no ken bagarapim em. Olsem na ol soldia i gat hat ol i save pasim. Tasol maski soldia i pasim hat kapa, i no olsem em i no inap kisim bagarap o em i no inap pilim samting i paitim het; tasol hat i lukautim em bambai em i no ken bagarap olgeta.

Hat kapa i lukautim het, na olsem tasol pasin bilong wetim gutpela samting i lukautim tingting bilong yumi. Yumi no inap sakim olgeta hevi olsem ol i samting nating. Tasol sapos yumi wetim gutpela samting, dispela inap helpim yumi long karim ol hevi, na bai tingting na bel na bilip bilong yumi i no bagarap olgeta.

Bilipman Abraham i pasim dispela kain “hat.” Jehova i tokim em long kilim pikinini bilong em Aisak olsem ofa. (Stat 22:​1, 2) Abraham inap bel hevi tru long dispela, na bai em i sakim tok bilong God. Wanem samting i lukautim tingting bilong em na bel bilong em i no bagarap? Em i bilip na wetim God​—⁠em wanpela bikpela samting. Hibru 11:19 i tok: “Abraham i tingting olsem, ‘Sapos Aisak i dai, maski, God em inap long kirapim em bek.’ ” Jop i bilip na wetim taim bilong kirap bek na dispela i helpim em na em i no bel nogut long hevi i painim em. Sapos em i bel nogut, ating bai em i kirap toknogutim God. (Jop 2:​9, 10; 14:​13-15) Krais Jisas i save em i mas karim bikpela pen tru na i dai, tasol em i tingim amamas em bai kisim bihain na dispela i strongim na mekim gut bel bilong em. (Hibru 12:⁠2) Yumi mas bilip olsem God i no inap mekim pasin i no stret, na em i no save lus long truim tok bilong em​—⁠dispela em i as tru bilong wetim gutpela samting i kamap.​—⁠Hibru 11:⁠1.

As Bilong Wetim Gutpela Samting

Tok i tru na samting tru em i as bilong bilip na as bilong wetim gutpela samting i kamap. Sampela i kirap nogut long dispela. Wanpela man bilong raitim buk i tok, “planti man i ting pasin bilong wetim gutpela samting em longlong pasin bilong wet nating long samting i no inap kamap.” Tasol pasin bilong wetim gutpela samting i no olsem yumi amamas nating na ting olgeta samting bai kamap gutpela, o yumi ting bai yumi inap kisim olgeta samting yumi laikim, na i no gat hevi. Nogat. Ol samting tru i painim yumi i daunim kain tingting nating olsem.​—⁠Saveman 9:⁠11.

Laik long kisim planti samting i no as bilong wetim gutpela samting; save i as bilong en. Tingim namba 2 famili long tok bokis bilong manki: Sapos gavman i no save truim ol tok promis bilong en, ol i no ken wetim gutpela samting i kamap, a? Ol i mas save long ol samting i makim olsem dispela promis bai kamap tru, na bai i gat as tru na ol i ken wetim gutpela samting i kamap.

Olsem tasol ol Witnes Bilong Jehova long nau i wetim gutpela samting i kamap em wanpela gavman i as bilong en​—⁠em Kingdom bilong God. Kingdom em nambawan tok bilong Baibel. Kingdom i as na inap planti tausen yia ol meri na ol man, olsem Abraham i bin wetim gutpela samting i kamap. (Hibru 11:10) God i tok promis olsem: Long rot bilong Kingdom em bai pinisim pasin nogut bilong dispela graun na kamapim nupela taim. (Rom 8:​20-22; 2 Pita 3:13) Yumi ken bilip tru long Kingdom; i no wanpela driman nating. As bilong en​—⁠God Jehova, Nambawan Bikpela bilong heven na graun. Ol samting em i bin wokim i soim yumi, em i stap na em i gat bikpela strong inap long truim olgeta tok promis bilong em. (Rom 1:20) Na ol samting em i bin mekim long ol man i soim yumi, em i no lus long truim ol tok promis bilong em.​—⁠Aisaia 55:⁠11.

Tasol sori tru, planti man i tok ol i Kristen ol i no wetim moa gutpela samting em bai kamap tru. Wanpela tisa bilong lotu (Paul Tillich) em i bin tok: “Ol Kristen [bilong pastaim] i lain long wetim las de. Tasol bihain, isi isi, ol i no wet moa. . . . Ol i no bilip strong moa long nupela taim bai kamap long graun, maski olgeta taim ol i mekim Beten Bilong Bikpela na askim God long kamapim​—⁠Mipela i mas bihainim laik bilong yu long graun olsem ol i save bihainim long heven!”

Sori tru! Planti milion o bilion manmeri i stap tarangu​—⁠ol i sot tru long gutpela samting bilong wetim​—⁠tasol dispela tok i stap long Baibel bilong ol yet na ol inap save long en. Ol i no wetim gutpela samting​—⁠ol i no gat dispela samting bilong lukautim tingting bilong ol na bikpela hevi i kamap! Ol i stap bel hevi na “bihainim tingting nogut bilong ol yet,” na dispela i bin kirapim planti long bagarapim graun long olkain pasin pamuk na pasin pait. (Rom 1:28) Nogut yumi pundaun olsem. Yumi no ken lusim “hat kapa”​—⁠oltaim yumi mas strongim bilip bilong yumi long samting yumi wetim.

Bilong Strongim Bilip

Nambawan rot bilong strongim bilip bilong yumi long samting yumi wetim i kamap em yumi mas tingim as bilong en, em God Jehova. Wok strong long lainim ol tok bilong em long Baibel. Rom 15:4 i tok: “Olgeta tok bipo ol i bin raitim long buk bilong God, em . . . i bilong . . . mekim yumi sanap strong na wetim God i kisim yumi.”

Na yumi mas bilip tru long ol samting yumi wetim​—⁠long tingting bilong yumi, yumi mas lukim olsem dispela i kamap tru. Olsem wanem? Yu tingting long i stap oltaim long Paradais long graun? Yu laik bungim ol famili bilong yu taim ol i kirap bek long matmat? Sapos olsem, orait long tingting yu mas lukim olsem yu stap long dispela taim. Olsem: Aisaia 65:​21, 22 i tok, bai olgeta wan wan i wokim haus bilong em yet na sindaun long en. Orait, long tingting yu lukim olsem yu stap long dispela taim na wokim rup long nupela haus bilong yu na hamaim laspela nil i go insait? Yu lukim olgeta samting yu bin tingting long mekim na olgeta wok bilong yu i kamap gutpela? Nau ol pairap bilong ol man i wokim haus i slek, na yu lukim san i laik go daun. Liklik win i meknaisim ol diwai na pinisim tuhat i bin kamap long skin taim yu wok. Yu harim sampela pikinini i lap, na gutpela singsing bilong pisin, na toktok bilong famili bilong yu em ol i stori i stap insait long haus.

Sapos yu tingim kain taim bilong amamas olsem, yu no tingting nating; yu tingim wanpela tok profet em bai kamap tru. (2 Korin 4:18) Sapos yu tingting strong long ol samting yu wetim i kamap, bai bilip bilong yu long ol dispela samting i stap strong. Dispela bai lukautim yu na bai yu no sem o surik long “autim gutnius.” (Rom 1:16) Oltaim bai yu “amamas na wetim Bikpela,” olsem Pol, na bai yu no pret long “autim gutnius.”​—⁠Hibru 3:⁠6.

Yumi wet long kisim laip i stap oltaim long bihain, tasol i gat as bilong wetim gutpela samting long nau tu. Wanpela man bilong gavman long Rom bipo, nem bilong em Kaseodores, em i tok: “Man i pilim gutpela samting bilong nau, em inap wetim gutpela samting bilong bihain.” Tru tumas! Sapos yumi no pilim ol blesing yumi kisim long nau, olsem wanem ol tok promis long ol blesing bilong bihain inap strongim bel bilong yumi?

Beten i kirapim yumi long wetim gutpela samting long nau. Yumi save beten long ol samting bilong bihain bihain, tasol yumi mas beten tu long ol samting bilong helpim yumi long nau. Olsem wanem? Yumi laik kamap wanbel moa wantaim famili na ol brata Kristen, na kisim kaikai bilong spirit, na kisim ol samting bilong skin em yumi mas kisim? Orait yumi ken beten askim God long helpim yumi long dispela. (Song 25:4; Matyu 6:11) Sapos yumi mekim olsem, dispela bai helpim yumi long karim ol hevi bilong olgeta de na sanap strong. (Song 55:22) Na taim yumi sanap strong, dispela i strongim pasin bilong yumi long wetim gutpela samting.​—⁠Rom 5:​3-5.

Kisim Gutpela Tingting Long Ol Man

Tingting nogut i olsem ros i bagarapim “hat kapa” bilong wetim gutpela samting, na bai i no inap lukautim yu moa. Yu save pinis wanem kain tingting i nogut, na olsem wanem yu ken sakim? Sapos yu ting olsem ol man i no gat gutpela pasin, na yu save kros long ol pasin kranki bilong ol, na yu ting ol samting i no inap kamap gutpela, yu no ken ting dispela kain tingting nogut i makim olsem yu gat save na tingting. Nogat. Man i gat kain tingting nogut olsem, em i no wokim tingting.

I no hatwok long ting olsem ol man i no inap mekim gutpela pasin. Sampela man i bin kisim hevi long han bilong ol narapela na ol i no bilip moa long ol man; ol i ting ol i no inap helpim ol o strongim bel bilong ol. Ating ol i ting ol elda Kristen tu i no inap helpim ol long hevi bilong ol.

Baibel i helpim yumi long kisim stretpela tingting long ol man. Tru yumi no ken bilip olgeta long ol man. (Song 146:​3, 4) Tasol ol elda long kongrigesen i olsem “presen” Jehova i givim. (Efesus 4:​8, 11) Ol i wok strong, na ol i gat save pinis, na ol i laik tru long stap olsem “ples hait ol manmeri i ken i go na hait long en long taim bilong bikpela win na ren.”​—⁠Aisaia 32:⁠2.

I gat planti moa long lain Kristen, ol tu i laik tru long strongim bel bilong ol narapela. I gat planti handet tausen long nau ol i stap olsem mama, papa, susa, brata, pikinini bilong ol manmeri i bin lusim lain bilong ol yet; planti tru ol i stap olsem gutpela pren ‘i winim brata’ long helpim ol manmeri i gat hevi.​—⁠Sindaun 18:24; Mak 10:⁠30.

Sapos yu bin beten askim Jehova long helpim yu, yu no ken les. Ating em i redim pinis rot; ating i gat wanpela elda o narapela strongpela Kristen em i redi nau long helpim yu sapos yu askim em. Sapos yumi kisim stretpela tingting long ol man, bai yumi no surik long olgeta na stap wanpis, em dispela inap kirapim yumi long tingim yumi yet tasol na mekim pasin kranki.​—⁠Sindaun 18:⁠1.

Na sapos hevi i kamap namel long yu na wanpela brata Kristen, yu no ken les na ting gutpela samting i no inap kamap. Baibel i tok: “Man i save givim bel bilong en long ol arapela, em i . . . save wetim God i helpim em.” (1 Korin 13:​4-7) Kisim tingting long ol brata sista Kristen wankain olsem bilong Jehova​—⁠wetim gutpela samting i kamap. Tingim ol gutpela pasin bilong ol, na bilip long ol, na painim rot bilong stretim hevi. Kain pasin olsem bai lukautim yumi, na bai i no gat ol kros na tok pait, em dispela i no inap helpim yumi.

Yu no ken ting i no gat rot, olsem ol man bilong dispela graun. I gat gutpela samting yumi ken wetim​—⁠bilong helpim yumi oltaim long bihain na stretim planti hevi bilong yumi long nau. Bai yu kisim dispela gutpela tingting? Olgeta wokboi bilong Jehova, em ol i wetim God i kisim bek ol na ol i pasim dispela olsem hat kapa, maski wanem kain hevi i painim ol, ol i gat rot. Sapos yumi no les long wetim gutpela samting Jehova i tok promis long en, orait i no gat wanpela samting long heven o long graun inap tekewe dispela long yumi.​—⁠Lukim Rom 8:​38, 39.