Taim Krais i Kamap Ples Klia Em Bai Kisim Bek Yumi
“Yupela i mas amamas. Na taim biknem bilong Krais i kamap ples klia, bai yupela inap amamas moa yet na belgut tru.”—1 PITA 4:13.
JEHOVA i bin givim planti gutpela presen long ol Witnes bilong em. Em i Bikpela Tisa bilong yumi, na em i bin givim planti save long yumi long ol laik bilong em. Long rot bilong spirit holi em i bin lainim yumi long pasin bilong givim lait long ol man na bai yumi ken tokaut strong na no ken pret. Long 1 Korin 1:6, 7 aposel Pol i tok: “Tok bilong Krais mipela i bin autim long yupela, dispela em i stap strong pinis long bel bilong yupela. Long Krais, God inapim olgeta samting long yupela, em olkain pasin bilong autim tok na olkain save. Olsem na nau yupela i wetim Bikpela bilong yumi Jisas Krais bai i kamap ples klia, na yupela i no sot long wanpela presen bilong Holi Spirit.”
2 “Bikpela bilong yumi Jisas Krais bai i kamap ples klia”—wanem insait bilong dispela tok? Em i makim taim bilong Krais bai kamap ples klia olsem strongpela King na em i kirap long givim gutpela pe long lain bilong em ol i stap gut long em, na em bai mekim save long ol man i givim baksait long God. Olsem 1 Pita 4:13 i makim, ol Kristen bilong i go long heven na ol i stap strong yet, na ol gutpela poroman bilong ol bilong ‘bikpela lain,’ ol bai “amamas moa yet na belgut tru,” long wanem, taim Krais i kamap ples klia, olgeta samting bilong Satan long graun bai pinis.
3 Klostu nau dispela taim bai kamap, olsem na Satan i wok long putim planti hevi moa long yumi. Em i olsem laion i kros na i laik kaikai yumi. Olsem na yumi mas sanap strong! (1 Pita 5:8-10) Ol brata long Tesalonaika long bipo, taim ol i nupela long tok i tru, planti hevi i bin painim ol, olsem i save painim planti Witnes Bilong Jehova long nau. Olsem na Pol i tokim ol: “God bai i . . . bekim hevi long ol man i save givim hevi long yupela. Na em bai i tekewe dispela hevi nau yupela i karim. . . . God bai i mekim olsem long taim Bikpela Jisas wantaim olgeta strongpela ensel bilong en i lusim heven na i kamap ples klia. Em bai i kam long bikpela paia tru na em bai i mekim save long ol man i no laik save long God na i no bihainim gutnius bilong Jisas.” (2 Tesalonaika 1:6-8) Em nau, ol hevi bai pinis!
4 Long taim bilong Pol ol bikman bilong lotu Juda i as bilong planti hevi i bin painim ol Kristen. Long nau tu i olsem—ol man i tok ol i Kristen, olsem ol bikman bilong ol misin, ol i putim hevi long ol Witnes, em ol man bilong i stap isi. Ol i tok ol i save long God, tasol ol i givim baksait long Jehova, “em wanpela tasol em i God,” na ol i lotuim God Triwan. (Mak 12:29) Na ol i no bihainim gutnius bilong Jisas. Ol i strong long ol man yet i mas bosim graun na stretim ol hevi. Ol i no bilip long Kingdom bilong Krais bai mekim dispela wok. Olsem na ol bai kisim bagarap taim ‘Bikpela Jisas wantaim olgeta strongpela ensel bilong en i kamap ples klia’!
Taim Krais Jisas “i Kam”
5 Long Matyu 24:29, 30 Jisas i stori long dispela taim em bai kamap ples klia. Em i kolim ol samting olsem mak bai kamap long taim bilong las de na em i tok: “San bai i kamap tudak, na mun bai i no moa lait, na ol sta bai i lusim skai na pundaun, na ol strongpela samting i stap long skai bai i guria.” Long dispela taim, “mak bilong Pikinini Bilong Man [em King Krais Jisas] bai i kamap long skai na olgeta lain manmeri bilong graun bai i krai. Na ol bai i lukim Pikinini Bilong Man . . . i kam wantaim bikpela strong na bikpela lait bilong en.” Dispela tok “i kam” (tok Grik, er·khoʹme·non) i makim taim Jisas bai kam olsem Man Jehova i makim bilong bekim nogut long ol man.
6 Long Kamapim Tok Hait 1:7 aposel Jon tu i stori long taim Jisas “i kam.” Em i tok: “Lukim. Em i stap namel long ol klaut na i kam.” Tasol ol birua bai no inap lukim Jisas long ai bilong ol, long wanem, “ol klaut” i makim olsem ol man i no inap lukim em taim em i kam bilong bagarapim ol man i givim baksait long God. Sapos ol man bilong graun i lukim Jisas long ai bilong ol taim em i kisim biknem pinis long heven, ol bai kamap aipas olsem Sol, taim em i wokabaut long rot i go long Damaskus na Jisas i kamap long em wantaim strongpela lait.—Aposel 9:3-8; 22:6-11.
7 Dispela hap bilong Kamapim Tok Hait i tok, “olgeta man bai i lukim em long ai bilong ol yet. Olgeta man i bin sutim em long spia samting, ol tu bai i lukim em. Na olgeta lain manmeri . . . bai i krai sori moa yet.” Dispela tok i makim olsem: Taim Jisas i salim ol samting nogut i kam daun bilong bagarapim ol birua, ol bai save, em i kam pinis wantaim bikpela strong na biknem bilong bagarapim ol man nogut. Bilong wanem Baibel i kolim ol dispela birua olsem ol “man i bin sutim em long spia”? Long wanem, ol i bel nogut long ol wokman bilong Jehova long nau olsem ol birua bilong Jisas bipo. Tru tumas, “ol bai i krai sori moa yet.”
8 De bilong Jehova long bekim nogut long ol man, em bai kamap olsem wanem? Long tok profet i stap long Luk sapta 21, Jisas i kolim ol bikpela hevi i olsem mak bilong em i kam bek na i stap King. Dispela mak i kirap long 1914 na i stap yet. Long ves 34 na 35, Jisas i toksave olsem: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus.” Tru tumas, de bilong Jehova bai kamap wantu tasol! Aposel Pol tu i tok olsem long 1 Tesalonaika 5:2, 3: “De bilong [Jehova] bai i kamap wantu tasol olsem stilman i kam long nait. Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol.” Long nau ol gavman i toktok long gutpela taim, na ol i laik strongim Yunaitet Nesen na bai em i ken pasim ol pait i kamap long ol narapela narapela hap.
9 Long ves 4 na 5 Pol i tok moa olsem: “Yupela ol brata yupela i no i stap long tudak, na yupela bai i kirap nogut long lukim dispela de i kamap, olsem man i kirap nogut long lukim stilman i kam. Nogat. Yupela olgeta i man bilong lait na bilong san. Yumi no ol lain bilong nait na tudak.” Yumi amamas long i stap olsem man bilong lait na givim lait long ol man i laik tru long i stap bel isi na sindaun gut long nupela taim God bai kamapim. Song 97:10, 11 i tok: “Bikpela i laikim tru ol manmeri i no save laikim pasin nogut. Em i save lukautim gut ol manmeri bilong en . . . God i save givim lait long ol stretpela manmeri, na i save mekim bel bilong ol i amamas.”
Ol Samting Bai Kamap
10 Long taim bilong “bikpela hevi” tru, wanem samting bai kamap pastaim na wanem samting bai kamap bihain? Yumi ken lukim Kamapim Tok Hait sapta 16. Ves 13 i go inap 16 i toktok long ol spirit nogut i bungim ol lain man long Armagedon, em “bikpela de bilong God I Gat Olgeta Strong.” Dispela hap tu bilong Baibel i tok, dispela de bai kamap olsem stilman, na yumi mas redi i stap na no ken slip, na bai God i ken lukautim yumi. Em taim bilong mekim kot long olgeta lain bilong graun—na narapela tu. Yu ting em i husat?
11 Long tok piksa, em i olsem wanpela meri i laik kisim biknem. Kamapim Tok Hait 17:5 i tok long em olsem, “Nem em i olsem wanpela tok bokis, na nem yet em i olsem, ‘Bikpela taun Babilon, em mama tru bilong olgeta pamukmeri na bilong olgeta pasin nogut tru i stap long graun.’ ” Tasol long nau ol Witnes Bilong Jehova i save pinis long dispela meri. Em i makim olgeta lotu giaman bilong graun, na ol lotu giaman i gat nem Kristen ol i bikpela hap bilong en. Em i mekim ol samting i nogut tru long ai bilong Jehova, olsem: Em i insait long ol wok politik, na em i mekim nogut long ol Kristen tru, olsem “kilim i dai ol manmeri bilong God” na “kilim i dai ol profet,” na em i gat asua tu long “olgeta man bilong graun ol birua i bin kilim ol i dai” long ol pait—winim wan handet milion ol i bin dai long ol pait long taim bilong yumi.—KTH 17:2, 6; 18:24.
12 Na ol lotu i holim nating nem Kristen ol i mekim nogut long nem bilong God, long wanem, ol i gat tupela maus. Ol i skulim ol man long ol bilip haiden bilong Babilon na Grik, tasol ol i no skulim ol long gutpela tok bilong Baibel. Olsem na ol i gat asua long ol man i brukim ol lo bilong Baibel na ol i no bihainim pasin i stret. Tok bilong Jems 5:1 na 5 i sutim ol man bilong mangal i stap namel long ol, em i tok: “Yupela ol manmeri i gat planti samting. . . . Ol bikpela hevi i laik kamap long yupela, na yupela i mas krai na singaut nogut. . . . Yupela i bin kisim ol gutpela gutpela samting na yupela i amamas i stap. Yupela i bin kaikai planti na kamap patpela, na de bilong kilim yupela i dai em i kamap pinis.”
Bikpela Babilon i Mas Bagarap!
13 Long kirap bilong taim bilong “bikpela hevi,” Jehova bai givim strafe long Bikpela Babilon. Kamapim Tok Hait 17:15-18 i stori long God i gat “tingting” long stiaim “10-pela kom,” em ol gavman insait long Yunaitet Nesen, em dispela “wel animal,” na bai ol i bagarapim Bikpela Babilon olgeta. Baibel i tok: “Ol dispela 10-pela kom . . . wantaim dispela wel animal ol bai i birua long pamukmeri. Ol bai bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia. God yet i givim tingting long ol.” Olsem na wanpela maus long heven i givim strongpela toksave long ol man olsem: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut long ol dispela sin.” (KTH 18:4, 5) Na dispela singaut i go yet long ol man, olsem: Lusim Bikpela Babilon, nogut yupela i lusim taim na yupela tu i kisim bagarap!
14 Taim Bikpela Babilon i bagarap, ol man bai ting olsem wanem long dispela? “Ol king bilong graun,” em ol bikman politik, ol bai krai sori, long wanem, ol i bin prenim dispela meri. Na “ol bisnisman,” em ol bikman bilong bisnis na ol kampani, ol i bin kamap maniman long rot bilong dispela meri, olsem na ol tu bai krai sori taim em i bagarap. Ol tu bai sanap longwe na tok: “Sori, sori tumas long dispela bikpela taun! Bipo em i save putim ol naispela waitpela klos na ol kain kain retpela laplap, na em i save bilasim skin bilong en long gol na long ol naispela ston wantaim ol bis i dia tumas. Long wanpela aua tasol, dispela olgeta mani na bilas em i bagarap olgeta.” Ol gutpela bilas bilong ol pris pasto, na ol bikpela haus lotu bilong ol i gat gutpela bilas, ol bai pinis olgeta! (KTH 18:9-17) Tasol yu ting olgeta man bai bel hevi taim Bikpela Babilon i bagarap?
15 Kamapim Tok Hait 18:20, 21 i bekim: “Yu heven wantaim ol manmeri bilong God, . . . yupela olgeta i ken amamas long dispela samting nau i kamap long dispela taun. God i . . . bekim pe nogut long em. Na long dispela pasin em i bekim ol pasin nogut dispela taun i bin mekim long yupela.” Ol bai bagarapim tru Bikpela Babilon “na ol man bai i no inap lukim em moa.”
16 Bikpela amamas tru bai kamap! Long Kamapim Tok Hait 19:1-8 wanpela singaut i kamap 4-pela taim long heven, olsem: “Yumi litimapim nem bilong God!” Tripela taim ol i litimapim nem bilong Jehova, long wanem, em i bin givim strafe long dispela pamukmeri, em Bikpela Babilon. Olgeta lotu giaman i pinis olgeta! Wanpela nek long heven i tok: “Yupela wokman bilong God, em yupela ol lain i save pret long God na aninit long en, . . . yupela olgeta litimapim nem bilong God!” Gutpela tru sapos yumi insait long dispela singsing!
Marit Bilong Pikinini Sipsip
17 Namba 4 singaut i tok: “Yumi litimapim nem bilong God! God, Bikpela I Gat Olgeta Strong, nau em i stap king tru!” Long Kamapim Tok Hait 11:17 i gat wankain tok o singsing, olsem: “Bikpela [Jehova], yu God I Gat Olgeta Strong. . . . Yu kisim pinis bikpela strong bilong yu, na yu kamap king tru. Olsem na mipela i tenkyu long yu.” Dispela i toktok long taim Jehova i kamapim Kingdom long 1914 na Krais i “holim stik ain na bosim strong olgeta lain manmeri.” (KTH 12:5) Tasol Kamapim Tok Hait 19:6 i toktok long taim Bikpela Babilon i bagarap, na taim ol dispela lotu giaman i pinis olgeta man bai save, Jehova em i God tru, na long olgeta taim bihain ol bai lotu long em wanpela tasol, em Nambawan Bikpela King!
18 Olsem na bai yumi ken tokaut olsem: “ ‘Nau yumi ken belgut na amamas moa yet na litimapim nem bilong [Jehova], long wanem, taim i kamap pinis bilong Pikinini Sipsip i marit, na meri bilong en i redi i stap. God i givim naispela waitpela klos long dispela meri, em klos i klin tru na i lait moa yet.’ Dispela . . . i makim stretpela pasin ol manmeri bilong God i mekim.” (KTH 19:7, 8) Baibel i no tok, wanem taim dispela lain remnan i stap yet long graun ol bai go antap long heven. Tasol olsem Baibel i tok, ol bai insait long marit bilong Pikinini Sipsip, em Krais Jisas, na em i taim bilong amamas tru. Na dispela lain bai amamas moa yet, long wanem, ol i bin lukim stret dispela pamukmeri, em Bikpela Babilon, i kisim bagarap.
Lain Bilong Satan Bai Bagarap
19 Kamapim Tok Hait 6:2 i toktok long waitpela hos, na sapta 19 na ves 11 i toktok gen long en, olsem: “Wanpela waitpela hos i stap. Na nem bilong man i sindaun long dispela hos, em i olsem, ‘Man i lukautim gut wok bilong en,’ na ‘Man i save mekim pasin i tru tasol.’ Taim em i skelim pasin bilong ol manmeri long kot, na taim em i kirapim pait, em i save bihainim stretpela pasin tasol.” Em i “King bilong olgeta king,” na em i raun long hos na “krungutim ol pikinini wain long bikpela tang ston i makim belhat bilong God.” “Ol king bilong graun, wantaim ol ami bilong ol, ol i kam bung pinis” bilong mekim pait long Armagedon, tasol man i sindaun long waitpela hos em bai winim pait, na olgeta samting bilong oganaisesen bilong Satan long graun bai pinis olgeta.—KTH 19:12-21.
20 Tasol olsem wanem long Satan yet? Kamapim Tok Hait 20:1-6 i tok, “wanpela ensel i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu.” Ensel hia em Krais Jisas, na em i holim Satan, “em snek bilong bipo tru,” na tromoi em i go daun long dispela hul na pasim em long sen na pasim ai bilong hul. Nau King Krais Jisas wantaim meri bilong em i kirap bosim graun inap wan tausen yia. I no gat krai moa! Indai Adam i bin kamapim i no stap moa! No gat hevi o pen moa! “Ol dispela samting bilong bipo ol i pinis olgeta.”—KTH 21:4.
21 Nau yumi wetim Bikpela Krais Jisas i kamap ples klia, na yumi mas wok strong long tokim ol man long ol gutpela tok promis bilong God long Kingdom. Klostu nau em bai kisim bek yumi! Olsem na yumi mas sanap strong olsem ol pikinini bilong Bikpela King Jehova, na stap olsem ol manmeri bilong lait!
Bilong Tingim Gen
◻ Olsem wanem yumi ken save, taim bilong Krais i kamap ples klia i klostu pinis?
◻ De bilong belhat bilong Jehova bai kamap olsem wanem?
◻ Ol man i laikim tumas Jehova ol i mas ting olsem wanem long ol samting i kamap nau long graun?
◻ Taim “bikpela hevi” i kirap, wanem ol samting bai kamap?
[Askim Bilong Stadi]
1. Olsem wanem Jehova i bin mekim gut long ol wokman bilong em?
2. Yumi ken wetim wanem gutpela samting i kamap taim Bikpela bilong yumi Krais Jisas i kamap ples klia?
3. Yumi mas mekim wanem, olsem ol brata bilong yumi long Tesalonaika i bin mekim?
4. Taim Jisas i kamap ples klia, bilong wanem i stret ol bikman bilong lotu i kisim strafe?
5. Matyu 24:29, 30 i tok wanem long taim Jisas i kamap ples klia?
6, 7. Olsem wanem “olgeta man bai i lukim em long ai bilong ol yet”? Husat ol i insait long disela lain?
8. Jisas na Pol i givim wanem toksave long yumi long bagarap bai kamap wantu tasol?
9. Lait i kam long husat? Bilong wanem em i kam long ol?
10. Yumi mas harim gut wanem toksave i tok long de bilong Jehova long bekim nogut long ol man? (KTH 16:15)
11. Olsem wanem yumi inap save long dispela meri em Kamapim Tok Hait 17:5 i stori long en?
12. Bilong wanem ol lotu i holim nating nem Kristen ol i gat asua?
13. Taim “bikpela hevi” i kirap, wanem samting bai kamap? Kamapim Tok Hait 18:4, 5 i givim wanem toksave long ol man?
14. Husat ol bai krai sori long taim Bikpela Babilon i bagarap?
15, 16. Wanem samting bai mekim na lain bilong God bai amamas?
17. Skelim Kamapim Tok Hait 11:17 na 19:6 na stori long olsem wanem Jehova i kirap mekim wok King.
18. Taim Bikpela Babilon i bagarap, wanem gutpela tok bilong amamas bai kamap?
19. Kamapim Tok Hait 19:11-21 i stori long wanem ol samting bai kamap?
20. Wanem samting bai painim Satan yet?
21. Yumi wetim Krais Jisas i kamap ples klia, na yumi mas strong long mekim wanem?
[Piksa long pes 23]
Jisas ‘i stap namel long ol klaut na i kam’ bilong givim strafe long ol birua
[Piksa long pes 25]
Klostu nau na olgeta lotu giaman, na ol samting bilong dispela graun bilong Satan, na Satan yet, ol bai pinis