Ripot Long Wok Bilong Kingdom
Stretpela Pasin i Litimapim Wok Bilong Yumi
STRETPELA PASIN em pasin olgeta Kristen i mas bihainim. Aposel Pol i tok: “Mipela i pilim olsem bel bilong mipela i stap stret long ai bilong God. Na mipela i laik wokabaut stret long olgeta taim.” (Hibru 13:18) Taim yumi bihainim stretpela pasin, dispela i “givim biknem long dispela tok yumi save autim, em tok tru bilong God, em Man bilong kisim bek yumi.” (Taitus 2:10) Long Tonga long hap bilong Saut Pasifik stretpela pasin na wok bilong tupela Kristen long autim tok bilong Kingdom i kamapim ol gutpela samting. Brens-ofis bilong Sosaiti Was Taua long Westen Samoa i tok olsem:
‘Inap planti yia tupela marit i bin autim tok bilong Kingdom long 4-pela liklik ples long ailan ol i stap long en, tasol ol i no lukim wanpela samting i kamap long dispela wok ol i mekim. Wanpela taim man i sik, olsem na meri i bin lukautim plantesin bilong ol na katim na draim kopra. Long dispela rot tasol tupela i save kisim liklik mani. Taim ol man bilong baim kopra i kam, bek kopra bilong narapela i paul na i stap wantaim ol 5-pela bek bilong dispela Witnes. Ol wanples i strong long em i mas holim dispela narapela bek na em i ken ting dispela samting i olsem wanpela blesing i kam long God. Tasol dispela sista i no laik, na taim ol bisnisman i givim mani long em inap long 6-pela bek, em i kisim mani bilong 5-pela bek tasol. Ol narapela man i lukim stretpela pasin bilong em.
‘Bihain, taim man bilong dispela sista i laik go raun long narapela ailan, papa bilong stua i askim man long baim sampela kago bilong em. Dispela Witnes i mekim olsem na givim hap mani i go bek long em. Papa bilong stua i kirap nogut tru. Em i tok, em i namba wan taim wanpela man i bin givim hap mani i go bek long em. Narapela taim dispela Witnes i laik baim wanpela samting long stua bilong dispela man. Papa bilong stua i givim ki long em na tokim em long kisim ol samting em i laik kisim na putim mani long stua. Ol man i harim dispela tok ol i askim papa bilong stua, bilong wanem em i givim ki bilong stua long dispela Witnes tasol em i no save givim long ol. Papa bilong stua i tok, em i bilip long dispela Witnes, tasol long ol narapela wanples, nogat.
‘Ol man bilong ples i save toktok long gutpela pasin bilong dispela tupela marit. Ol i save ol Witnes i man bilong bihainim stretpela pasin, na ol i no insait long wok politik, na ol i save autim tok bilong Kingdom—ol dispela samting i mekim na ol man bilong ples i save, bilip bilong ol yet i narapela kain long ol Witnes na tok bilong Baibel. Nau taim ol man i gat askim long Baibel, ol i go askim ol Witnes. Wanpela taim dispela Witnes i lusim slip long nait na go long bung bilong ol wanples na bekim sampela askim bilong ol long Baibel. Taim ol man i laik planim man i dai pinis, planti taim ol i askim dispela Witnes long stori liklik long Baibel long indai. Ol man i amamas long harim tok bilong em.’
Olsem na stretpela pasin bilong dispela tupela marit na wok bilong ol long autim tok i mekim gutpela wok long dispela naispela ailan bilong Saut Pasifik. Ol i bilip olsem bihain bai sampela moa i stadi long Baibel na mekim wok bilong God. Sapos ol i mekim olsem, Jehova bai mekim gut long ol.—Jon 8:32.