Wanpela King i Nogutim Haus Lotu Bilong Jehova

“Ol manmeri i save aninit tru long God, ol bai i sanap strong na sakim tok bilong [king].”​—⁠DANIEL 11:32.

TUPELA king i pait long winim narapela na kamap namba wan, na sampela taim narapela i win na sampela taim narapela i win. Ol i mekim olsem i go inap 2,000 yia. Hevi bilong dispela pait em i painim ol man bilong nau na i traim bilip bilong lain bilong God tu. Samting i kamap long taim pait i pinis, tupela king i no bin ting samting bai kamap olsem. Long bipo Jehova i bin tokim Daniel long ol dispela samting, na em i raitim i stap na bai yumi ken save wanem ol samting i mas kamap.​—⁠Daniel sapta 10 i go inap sapta 12.

² Tupela king hia em king bilong not na king bilong saut, na wanpela buk (“Your Will Be Done on Earth”) i bin stori long tupela. Pastaim king bilong not em Siria, long hap bilong not long Israel, na bihain em Rom. Na pastaim Isip em king bilong saut.

Ol i Pait Long Taim Bilong Pinis

³ Ensel i tokim Daniel olsem: “Yu pasim buk i gat ol dispela tok long en. Na yu mas putim mak long en, bilong tambuim ol man long ol i no ken opim dispela buk. Dispela buk i mas pas i stap inap klostu long taim bilong las de. Na planti manmeri bai i [raun long olgeta hap, na bai ol i kisim planti save long olkain samting (sta daunbilo)].” (Daniel 12:⁠4) Dispela tok profet em i samting bilong taim bilong “las de,” em i kirap long 1914, na long dispela taim planti man bai “raun long olgeta hap” bilong Baibel na “kisim planti save,” na ol bai kisim save tu long insait bilong ol tok profet, na spirit holi bai helpim ol long mekim olsem. (Sindaun 4:18) Pinis i wok long kam klostu, na yumi wok long kisim moa moa save long ol dispela tok profet bilong Daniel. Orait, olsem wanem long king bilong not na king bilong saut nau long dispela yia 1993, em 35 yia bihain long taim ol i bin wokim dispela buk (“Your Will Be Done on Earth”)?

⁴ Namba Wan Pait i bin kamap long 1914, na ol narapela pait na hevi i kamap bihain long en, dispela i makim taim bilong las de o taim bilong pinis olsem Jisas i bin tok. (Matyu 24:​3, 7, 8) Olsem wanem? Tok profet bilong Daniel inap givim save long yumi long dispela yia 1914? Em inap. Kirap bilong taim bilong las de em dispela “taim God i makim,” olsem Daniel i toktok long en long Daniel 11:29. (Buk “Your Will Be Done on Earth,” pes 269-270) Long taim bilong Daniel yet, Jehova i bin makim dispela taim, long wanem, dispela taim i mas kamap long pinis bilong dispela 2,520 yia em Daniel sapta 4 i stori long en.

⁵ Dispela 2,520 yia i kirap long taim Jerusalem i bagarap long yia 607 paslain long Krais, taim Daniel i yangpela yet, na i pinis long 1914, na Baibel i kolim dispela taim olsem taim bilong “ol man bilong ol arapela lain.” (Luk 21:24) Ensel i tokim Daniel long samting i mas kamap long pinis bilong dispela taim, olsem: “King bilong Siria [king bilong not] bai i go long Isip na pait long ol Isip gen, tasol em bai i no inap winim ol olsem bipo.”​—⁠Daniel 11:⁠29.

King i Lus Long Pait

⁶ Long 1914 Jemani i kamap king bilong not na Kaiser Wilhelm i bosim. Pait i kamap long Yurop, na king bilong not na king bilong saut i pait. Briten i daunim Isip na em i kamap olsem king bilong saut, na bihain Amerika i bung wantaim Briten long pait, na tupela wantaim i kamap olsem king bilong saut na i kisim bikpela strong tru, winim ol narapela gavman i bin stap long graun.

⁷ Taim tupela king i bin pait bipo na Rom i stap king bilong not, em i save win, tasol long dispela taim em “i no inap winim ol olsem bipo.” Em i lus, long wanem, “ol man bilong hap san i go daun” i kam long sip na pait long em. (Daniel 11:30) Long taim bilong Daniel ol dispela sip i kam long hap bilong Saiprus. Wanpela Baibel (New International Version) i tok, ol sip hia i bin kam long hap bilong wes. Long taim bilong Namba Wan Pait ol dispela sip i makim ol sip bilong Briten i stap long hap bilong wes, long “hap san i go daun,” na bihain ol sip bilong Amerika i kam bung wantaim ol na ol i kisim bikpela strong.

⁸ Taim dispela tupela king i pait na king bilong saut i “kam long sip na pait long” king bilong not, king bilong not “i pret” na em i lusim pait long 1918. Tasol em i no pinis yet. Em “bai i kros nogut tru na i go bek na bai em i traim long bagarapim lotu bilong ol manmeri bilong God. Em bai i bihainim toktok na tingting bilong ol man i bin givim baksait long God.” (Daniel 11:30) Ensel i bin tokim Daniel olsem, na tru tumas ol dispela samting i bin kamap tru olsem ensel i tok.

King i Kamap Strong Gen

⁹ Pait i pinis long 1918, na Briten na Amerika na sampela kantri moa ol i bin winim Jemani, na ol i tambuim Jemani long pait moa, na ol i laik daunim Jemani na bai Jemani i mas sot long kaikai samting na i stap rabis long bihain. Olsem na bikpela hevi i kamap long Jemani. Dispela i givim rot long Adolf Hitler na bai em inap kamap strong long 1933, na kwiktaim em i kirap long “traim long bagarapim lotu bilong ol manmeri bilong God,” em lain remnan o brata bilong Krais Jisas. Em i daunim ol dispela gutpela Kristen na mekim nogut tru long ol.

¹⁰ Hitler i stiaim ol samting na bai ol wok bisnis i kamap gutpela na ol samting bilong politik tu, na insait long sotpela taim tasol Jemani i kamap strongpela gavman. Hitler “i bihainim toktok na tingting bilong ol man i bin givim baksait long God,” na ol i helpim em long kamap strong olsem. Husat i bin helpim em? Em ol bikman bilong ol misin tasol. Ol i tok ol i lain bilong God, tasol ol i no bihainim moa tok bilong Krais Jisas. Hitler i singautim ol dispela bikman bilong misin “i bin givim baksait long God” na bai ol i ken helpim em. Pop bilong Rom i wokim kontrak wantaim Hitler, na nau misin Katolik wantaim ol misin Talatala long Jemani i helpim Hitler long mekim wok nogut bilong em, na inap 12-pela yia em i mekim wok nogut long bagarapim ol man.

¹¹ Hitler i hambak long strong bilong em, olsem na em i kirapim pait, olsem ensel i tok: “Ol soldia bilong en bai i mekim haus bilong God i kamap doti long ai bilong God. Na bai ol i tambuim ol Israel long ol i no ken mekim ol ofa long God long olgeta de.” (Daniel 11:31a) Long taim bilong ol Israel bilong bipo, “haus bilong God” em i bin stap long Jerusalem, tasol taim ol i bikhet long God em i givim baksait long ol wantaim haus lotu bilong ol. (Matyu 23:37 inap 24:⁠2) Na kirap long taim bilong Jisas, “haus bilong God” em i samting bilong spirit, na rum tambu tru bilong en i stap long heven, na banis bilong en i stap long graun na lain remnan olsem ol brata bilong Hetpris Krais Jisas ol i stap long en na mekim wok. Kirap long 1935 samting, bikpela lain moa i lotu wantaim remnan long dispela “haus bilong God.” (KTH 7:​9, 15; 11:​1, 2; Hibru 9:​11, 12, 24) Hitler i nogutim banis bilong haus bilong God, em wok bilong lain remnan na ol narapela Kristen long ol kantri dispela king bilong not i bosim. Hitler i mekim nogut tru long ol, olsem na ol i no inap “mekim ol ofa long God long olgeta de,” olsem autim tok long ol man na litimapim nem bilong God. (Hibru 13:15) Tasol lain remnan wantaim lain bilong “ol arapela sipsip tu” ol i painim rot long mekim yet wok bilong autim tok, na ol i mekim long pasin hait.​—⁠Jon 10:⁠16.

“Dispela Samting Nogut Tru”

¹² Klostu long taim Namba 2 Pait i laik pinis, narapela samting i kamap ples klia. “Ol i sanapim dispela samting nogut tru insait long haus bilong God.” (Daniel 11:31b) Jisas tu i bin toktok long “dispela samting nogut tru,” na pastaim dispela samting i olsem Lig ov Nesen, em “dispela wel animal,” tasol em i bin go insait long “dispela hul i no gat as,” olsem bagarap o dai pinis. (Matyu 24:15; KTH 17:⁠8) Em i mekim olsem long taim Namba 2 Pait i bin kirap. Tasol long wanpela kibung bilong ol Witnes Bilong Jehova long 1942 Nathan H. Knorr, em namba 3 presiden bilong Sosaiti Was Taua, em i bin stori long tok profet bilong Kamapim Tok Hait sapta 17 na em i tok, dispela wel animal bai lusim bikpela hul i no gat as na em i mas kam ausait na kirapim gen wok bilong en.

¹³ Nathan H. Knorr i tok stret, long wanem, namel long Ogas na Oktoba long 1944, long wanpela bikpela haus ol i kolim Dambaton Oks long Yunaitet Stets, ol gavman i bung na toktok long wokim wanpela sata i gat ol lo ol kantri i mas bihainim, na dispela i kamap olsem Yunaitet Nesen. Inap 51 kantri i tok orait long dispela Yunaitet Nesen, na Rasia tu, na Yunaitet Nesen i kirap long mekim wok bilong en long Oktoba 24, 1945, na i olsem Lig ov Nesen i lusim bikpela hul na i kamap bek gen na nau em i gat nupela nem.

¹⁴ Long tupela bikpela pait, Jemani i bin biruaim king bilong saut, tasol bihain long Namba 2 Pait wanpela hap bilong kantri Jemani i kam aninit long king bilong saut, na narapela hap i kam aninit long narapela strongpela gavman, em gavman Komyunis. Tasol long nau tupela hap i pas bek na i stap olsem kantri Jemani tasol. Tasol longtaim dispela hap i stap Komyunis em i birua long Briten wantaim Amerika, na kros i stap namel long tupela king, olsem narapela i resis long winim narapela.​—⁠Buk “Your Will Be Done on Earth,” pes 264-284.

King Wantaim Kontrak

¹⁵ Nau ensel i tok: “King bai i grisim ol man i bin givim baksait long God, na bai ol i bihainim em.” (Daniel 11:32a) Husat “ol man i bin givim baksait long God”? Em ol dispela bikman bilong ol misin tasol. Ol i tok ol i Kristen, tasol ol tok ol i mekim na ol pasin na wok bilong ol i bagarapim nem Kristen. Long wanpela buk (Religion in the Soviet Union) Walter Kolarz i tok, long taim bilong Namba 2 Pait ‘Gavman Komyunis i bin wok long kirapim ol misin long helpim gavman long mani samting na long tokim ol man long helpim gavman long pait na bai kantri i ken winim pait.’ Bihain long pait, ol bikman bilong misin i laik pren yet wantaim dispela king bilong not, maski em i no bilip long God.a Olsem na ol misin i insait tru long ol samting bilong dispela graun, na ol i stap olsem ol man i givim baksait long God na olsem samting i nogut tru long ai bilong God.​—⁠Jon 17:14; Jems 4:⁠4.

¹⁶ Tasol olsem wanem long ol Kristen tru? “Ol manmeri i save aninit tru long God, ol bai i sanap strong na sakim tok bilong em. Ol lida bilong Israel i gat gutpela save, ol bai i helpim na stiaim planti manmeri na givim gutpela tingting long ol. Tasol ol birua bai i kilim sampela bilong ol dispela lida long bainat na kukim sampela long paia bai ol i dai. Na bai ol i stilim ol samting bilong sampela lida na kalabusim sampela. Tasol bai ol i no mekim dispela pasin longpela taim.” (Daniel 11:32b, 33) Ol Kristen long hap bilong king bilong not ol i bihainim lo i tok, ol “i mas i stap aninit long ol gavman,” tasol ol i no insait long ol wok bilong dispela graun. (Rom 13:⁠1; Jon 18:36) Ol samting bilong Sisar (olsem gavman) ol i givim long Sisar, na ol samting bilong God ol i givim long God. (Matyu 22:21) Dispela i bin traim ol, ol bai sanap strong na holimpas bilip bilong ol o nogat.​—⁠2 Timoti 3:⁠12.

¹⁷ Ol i bin “sanap strong,” maski ol birua i putim bikpela hevi long ol na mekim nogut tru long ol, na taim ol birua i “kukim sampela long paia bai ol i dai,” ol i stap strong yet. Ol i “winim pinis strong bilong dispela graun” olsem Jisas tu “i winim pinis strong bilong dispela graun.” (Jon 16:33) Na ol i no lusim wok bilong autim tok tu, maski ol i stap long kalabus. Long dispela rot ol i “givim gutpela tingting” long ol man i harim ol dispela tok ol i bin autim, olsem na lain Witnes Bilong Jehova i go bikpela long ol kantri em king bilong not i bosim, maski ol i karim bikpela hevi. Ol “i gat gutpela save,” olsem na long ol dispela kantri “planti manmeri tru” i wok long kam insait long lain bilong Jehova.​—⁠KTH 7:​9-14.

¹⁸ Ensel i toktok long hevi i painim lain bilong God, na i tok: “Taim ol birua i wok long kilim ol dispela lida, sampela man bai i helpim ol lida.” (Daniel 11:34a) Ol i kisim dispela “helpim” long taim king bilong saut i winim Namba 2 Pait na i daunim dispela king bilong not, na nau hevi bilong ol dispela Kristen i slek liklik. (Lukim KTH 12:​15, 16.) Narapela gavman i kamap king bilong not, na em tu i mekim nogut long ol Witnes, tasol sampela taim i gat helpim bilong ol. Tupela king i bin stap birua birua, tasol taim kros bilong ol i laik kol, ol i save ol Kristen tru i no save pait wantaim ol, olsem na ol dispela gavman i larim ol i mekim wok bilong ol long ples klia na i no gat tambu long ol. Na ol dispela “planti manmeri tru” i bin kamap bikpela lain tru na ol i helpim gut lain remnan. Ol i bin harim tok em remnan i bin autim long ol, na nau ol i bung wantaim ol long mekim wok, olsem Matyu 25:​34-40 i tok.

Bilong Klinim Lain Bilong God

¹⁹ Tasol sampela i no gat gutpela bel taim ol i mekim wok bilong God. Ensel i tok: “Planti bilong ol bai i gat tingting bilong helpim ol yet na bai ol i wok long helpim ol lida. Ol birua bai i bagarapim sampela bilong ol dispela lida, tasol dispela hevi bilong ol bai i strongim ol arapela lida long mekim stretpela pasin tasol, na bai ol i kamap klin tru long ai bilong God. Dispela kain pasin bai i no inap pinis. Bai i stap olsem inap long las de God i bin makim.”b (Daniel 11:34b, 35) Sampela i harim tok i tru, tasol ol i no laik dediket long God na mekim wok bilong em, na sampela i giaman long laikim tok i tru na ol i kotim ol brata long gavman. Wanpela ripot i tok: “Sampela Komyunis i kam insait long oganaisesen bilong God na ol i giaman long givim bel, na sampela i kamap wasman samting.”

²⁰ Ol dispela man bilong giaman ol i as na gavman i kalabusim sampela brata. Jehova i larim dispela samting i kamap na bai ol i lain long “mekim stretpela pasin tasol, na bai ol i kamap klin tru long ai” bilong em. Jisas tu “em i karim pen, na dispela i skulim em tru long pasin bilong bihainim tok bilong God,” na lain remnan tu i mas winim ol traim na holimpas bilip bilong ol. (Hibru 5:8; Jems 1:​2, 3; lukim Malakai 3:⁠3.) Long dispela rot ol bai “kamap klin tru.” Na ol man i stap gut long Jehova ol bai amamas tru long taim “las de” i kamap na ol bai kisim gutpela pe long ol i bin sanap strong na karim hevi. Bai yumi stori long dispela long taim yumi toktok moa long tok profet bilong Daniel.

[Ol Futnot]

Yu Tingim Yet?

◻ Olsem wanem yumi ol man bilong nau inap save gut long insait bilong tok profet bilong Daniel?

◻ Olsem wanem king bilong not “i kros nogut tru” na i “bagarapim lotu” bilong God?

◻ Olsem wanem lain remnan i lukim “dispela samting nogut tru” namba tu taim?

◻ Olsem wanem ol i ‘kilim ol lida,’ tasol sampela ‘i helpim ol,’ na ol i stap strong?

[Askim Bilong Stadi]

1, 2. Wanem pait i bin stap inap 2,000 yia?

3. Olsem ensel i tok, wanem taim bai yumi kisim save long king bilong not na king bilong saut? Bai yumi kisim dispela save olsem wanem?

4, 5. (a) Taim Daniel i stori long tupela king em i makim 1914 i mas kamap long wanem taim? (b) Na wanem samting i mas kamap long 1914 olsem ensel i tok?

6. Long 1914 husat i king bilong not na husat i king bilong saut?

7, 8. (a) Long Namba Wan Pait, olsem wanem king bilong not “i no inap winim ol olsem bipo”? (b) Husat i winim dispela pait? King bilong not i mekim wanem long taim em i lus long pait?

9. Olsem wanem na Adolf Hitler inap kamap strong? Em i mekim wanem long “lotu bilong ol manmeri bilong God”?

10. Hitler i singautim husat bilong helpim em? Na ol i mekim wanem?

11. Olsem wanem king bilong not “i mekim haus bilong God i kamap doti” na pasim ol Kristen na bai “ol i no ken mekim ol ofa long God long olgeta de”?

12, 13. “Dispela samting nogut tru” em wanem samting? Em i bin kirap bek long wanem taim? Em i bin kirap bek olsem wanem?

14. Wanem taim senis i kamap long king bilong not? Em i kamap olsem wanem?

15. Husat “ol man i bin givim baksait long God”? Ol i stap olsem wanem long king bilong not?

16, 17. Husat dispela lain ol “i gat gutpela save”? King bilong not i bin mekim wanem long ol?

18. Ol remnan i bin kisim wanem “helpim” long taim ol i bin stap aninit long king bilong not?

19. Olsem wanem long sampela ol “i gat tingting bilong helpim ol yet”?

20. Bilong wanem Jehova i bin larim ol man bilong giaman i kam insait na givim hevi long lain bilong em?

[Piksa long pes 15]

Long 1918 king bilong saut i daunim king bilong not, tasol king bilong not i kamap strong gen aninit long Hitler

[Piksa long pes 16]

Ol bikman bilong ol misin i bin wok long kamap pren bilong king bilong not

[Kredit Lain]

Zoran/Sipa Press