Jehova Bai Lukautim Yu
“Bikpela [Jehova], mi kam long yu bai yu lukautim mi.”—SONG 31:1.
WANPELA singsing long Baibel i toktok long wanpela man i gat hevi na tingting na skin bilong em i les olgeta, na em i kam long Jehova bambai Jehova i ken lukautim em. Singsing i tok, sapos man i bilip, em bai i winim ol hevi. Dispela man i kam na hait aninit long Jehova, na nau ol birua i no inap mekim nogut long em. Em i tok: “Bikpela [Jehova], mi kam long yu bai yu lukautim mi. Yu mas helpim mi. Yu no ken larim ol birua i daunim mi. Yu stretpela olgeta, yu kisim bek mi na mi no bagarap.”—Song 31:1.
2 Man bilong raitim dispela singsing em i painim pinis nambawan ples hait, em Jehova, em i olsem strongpela haus bilong man i ken hait long en na i stap gut. I gat tupela samting i kirapim dispela man long kam long Jehova. Wanpela, em i bilip long Jehova, na Jehova i no inap sakim em. Na narapela, em stretpela pasin bilong Jehova, em Jehova i no inap larim wokman bilong em i lus olgeta. Jehova i no save semim ol gutpela wokman bilong em. Em i truim ol promis bilong em. Em i tok tru tasol, na em i mekim gut long ol man i bilip long em. Olsem na bilip bilong man bai win. Bihain em bai stap gutpela!—Song 31:5, 6.
3 Taim dispela man i singsing, em i pilaim musik wantaim, na sampela taim em i singsing sori, na sampela taim em i singsing amamas na givim biknem long Jehova na i tok: “Litimapim nem bilong Bikpela. Em i givim bel bilong em moa yet long mi. Taim ol birua i raunim mi na i laik bagarapim mi, em i helpim mi long strong bilong en na mi stap gut.”—Song 31:21.
Bikpela Lain i Autim Tok Bilong Kingdom
4 Sampela man i singsing olsem long nau tu. Ol birua o wanpela bikpela bagarap o bikpela hevi bilong mani samting i no inap pasim ol. Jehova i mekim bikpela pasin sori long lain bilong em na em i mekim gut long ol. Long nau ol inap olsem 4,709,889 na ol i stap long 231 kantri na ol i autim tok bilong Kingdom bilong God. Ol i stap aninit long gavman bilong Jehova long heven, em Krais Jisas i bosim, na bihain ol bai stap gutpela tru. Long yia i go pinis ol dispela lain bilong 73,070 kongrigesen ol i autim tok inap 1,057,341,972 aua, olsem na 296,004 nupela man i dediket long God na ol i kisim baptais long wara. Long mun Ogas, kibung intenesenel i kamap long Kiev long Yukren, nem bilong en, “God i Skulim Yumi,” na ol man i kirap nogut long taim ol i lukim planti man i kisim baptais, winim namba bipo i bin kisim baptais, kirap long taim lotu Kristen i kamap nupela na i kam inap long nau! Dispela i truim tok profet bilong Aisaia 54:2, 3 i tok, lain bilong God bai i go bikpela tru.
5 Na i gat sampela moa tu ol i gat laik long kam aninit long Kingdom bilong God, em ol man i bin kam long Memorial long yia i go pinis. Inap 11,865,765 i bin bung long Memorial bilong tingim i dai bilong Jisas. Yumi laik bai planti bilong ol i ken kamap strong inap long ol i ken raun long ol haus na autim tok bilong Kingdom nau long 1994. Satan em birua bilong tok i tru, na yumi save em i belhat tru long ol dispela samting.—KTH 12:12, 17.
6 Satan i laik pasim rot bilong ol man long autim tok. Long Tailan ol pablisa i save bungim planti man em ol spirit nogut i mekim nogut long ol. Sampela i laikim tok i tru, na Jehova i helpim ol long sakim ol dispela spirit. Wanpela man i bin go lukim posinman, na inap 10-pela yia spirit nogut i bosim em. Em i bin askim wanpela pasto long helpim em, tasol pasto i no inap. Wanpela Witnes Bilong Jehova, em wanpela painia, em i kirap stadi wantaim dispela man long Baibel na i lainim em long dispela wanpela rot tasol bilong sakim ol spirit nogut—em i mas kisim stretpela save long tok i tru, na em i mas bilip long God Jehova, na beten askim Jehova long helpim em.—1 Korin 2:5; Efesus 4:6, 7; 1 Timoti 2:3, 4.
7 Witnes i stadi wantaim em long Baibel, na long nait em i driman long papa bilong em bipo i dai pinis, na papa i tok em bai kilim em i dai sapos em i lusim wok bilong em olsem wailis bilong ol spirit. Hevi i painim famili bilong em. Tasol em i strong na em i stadi yet long Baibel na em i go long ol miting. Taim tupela i stadi, painia i tokim em, sapos em i gat wanpela samting ol posinman i save mekim wok bilong ol long en, dispela bai givim rot long ol spirit nogut long kam long em. Em i tingim sampela wel em i bin kisim bilong wokim marila. Nau em i save em i mas rausim. Em i rausim pinis, na ol spirit nogut i no kam moa long em. (Lukim Efesus 6:13; Jems 4:7, 8.) Em wantaim meri bilong em i stadi gut na ol i kam oltaim long miting na kisim save bilong Baibel.
8 Sampela hevi moa i save mekim na bai ol man i no harim gutpela tok bilong Kingdom. Long Gana ol kampani i pinisim planti wokman, na pe bilong ol samting i go antap, na i hatwok long painim kaikai na klos samting. Ol Witnes Bilong Jehova i karim dispela hevi, na i no long strong bilong ol yet, nogat; ol i bilip long Jehova na em yet i helpim ol. Wanpela man i bin putim wanpela skin pas long tebol long brens-ofis. Pas i gat 200 kina i stap insait, i olsem pe bilong wanpela wokman inap 3-pela mun. Em presen bilong wanpela man i no raitim nem bilong em. Long skin pas em i tok, “Ol i pinisim mi long wok, tasol Jehova i helpim mi long kisim narapela wok. Mi amamas long em wantaim Pikinini bilong em, Krais Jisas. Mi laik helpim wok bilong autim gutnius bilong Kingdom long taim pinis i no yet, olsem na mi givim dispela liklik kontribusen.—Lukim 2 Korin 9:11.
9 Ol miting i save lainim ol man na bai ol i ken insait long wok bilong litimapim nem bilong Jehova olsem wanpela gutpela singsing. (Lukim Song 22:22.) Long hap bilong saut long Honduras kongrigesen El Jordan i stap. I gat 19 pablisa long en, ol i save kam oltaim long miting na ol i no save lusim wanpela miting. Long olgeta wik 12-pela i mas brukim wanpela wara i op tumas na bai ol i ken kam long miting. I no hatwok tumas long taim bilong san, long wanem, ol i save putim ol ston namel long wara na bai ol i ken wokabaut long en. Tasol long taim bilong ren wara i save tait na karim ol samting i go. Olsem na ol brata sista i mas save gut long subim wara. Ol i pulimapim klos bilong ol long wanpela bikpela dis na ol i karamapim plastik long dis, na wanpela strongpela brata i go pas na subim dis i go, na ol narapela i bihainim em. Taim ol i kamap long hapsait bilong wara ol i mekim drai skin bilong ol na putim klos bilong miting, na taim ol i kamap long Haus Kingdom ol i klin na pes bilong ol i lait!—Song 40:9.
Ples Hait Bilong Lukautim Yu
10 Maski ol spirit nogut i laik mekim nogut long yu, o yu gat narapela hevi, Jehova i ken i stap olsem strongpela ples hait bilong yu. Yu ken beten long em na em bai lukautim yu. Em i save putim yau na harim ol hevi bilong lain bilong em. Wanpela man bilong raitim Song i save long dispela, olsem na em i beten long Jehova olsem: “Yu mas harim mi, na kisim bek mi kwiktaim. Yu stap olsem bikpela maunten ston mi ken hait long en. Na yu mas banisim mi gut, bai mi stap gut na ol birua i no inap daunim mi. . . . Yu olsem ples hait bilong mi na yu lukautim mi. Yu . . . bringim mi i go long gutpela rot . . . Ol birua i bin putim umben bilong holimpas mi. Yu mas lukautim mi bai mi no kisim bagarap.”—Song 31:2-4.
11 Jehova i no haitim yumi inap liklik taim tasol, nogat. Em i wanpela ples hait yumi inap i stap gut long en oltaim. Em i bin lukautim na soim rot long lain bilong em i kam inap long nau. Em i gat bikpela strong na em bai daunim olgeta trik na pasin hait bilong Satan wantaim lain bilong em na bai ol i no gat strong moa. (Efesus 6:10, 11) Sapos yumi bilip strong long Jehova, em bai helpim yumi long abrusim ol samting bilong Satan long bagarapim yumi. (2 Pita 2:9) Insait long 4-pela yia i go pinis, wok bilong ol Witnes Bilong Jehova i kamap long 35 kantri moa. Long sampela hap, sindaun bilong ol man o hevi bilong mani o wok bilong politik i bin pasim wok bilong autim gutnius, na sampela man i gat gutpela bel ol i lusim ol dispela hap na ol i go sindaun long narapela hap na bai ol i ken painim tok i tru, olsem long Japan.
12 Planti man bilong ol narapela kantri na narapela tok ples ol i kisim wok mani long Japan, na nau i gat ol kongrigesen long ol dispela tok ples. Wanpela brata Japan i gat 10-pela Baibel-stadi long tok ples Japan, na em i laik i go long wanpela hap i sot long ol Witnes na bai em i ken mekim bikpela wok moa. Pren bilong em i tokim em: “Sapos yu go long narapela hap bai yu gat 20 Baibel-stadi!” Brata i go long taun Hirosima, na 4-pela mun bihain em i gat wanpela Baibel-stadi tasol. Wanpela taim em i bungim wanpela man Brasil i save tok ples Potyugal, tasol brata i no inap harim, olsem na em i go baim buk bilong lainim em long tok Potyugal. Em i kisim liklik, na em i go painim gen dispela man, na em i tok Gude long em long tok Potyugal, na man i kirap nogut. Man i tokim brata long kam insait long haus, na brata i kirapim stadi wantaim em. Bihain liklik, brata i gat 22 Baibel-stadi, na em i mekim 14 long tok Potyugal, na 6-pela long tok Spen, na tupela long tok Japan!
Strong Long Autim Tok
13 Lain bilong Jehova i strong long autim tok bilong Kingdom olsem wanpela gutpela singsing. Ol i no pret. Ol i save Jehova i stap na em bai helpim ol. (Song 31:14) Ol i no inap sem, long wanem, ol i save Jehova i no ken givim baksait long ol. Ol i save em bai truim tok bilong em long sambai long ol. (Song 31:17) Tasol Satan wantaim ol ensel nogut bilong em bai sem. Jehova i bin givim wok long lain bilong em long autim tok long ol man, na dispela tok i gutpela na i no gat sem long en, olsem na wanpela man i no ken semim ol bilong kirapim ol long autim dispela tok. Jehova i no save semim man na bai man i mas lotuim em, nogat; na Pikinini bilong Jehova tu i no save mekim olsem. Sapos man i bilip strong long Jehova na em i amamas long ol gutpela pasin Jehova i bin mekim long em, bel bilong em bai kirapim em long autim tok. (Luk 6:45) Olsem na maski yumi no bin winim planti aua tumas long autim tok, sapos yumi bin givim bel long mekim inap long strong bilong yumi, em gutpela, na yu no ken sem. Jisas na Papa bilong em i amamas long liklik mani em rabismeri i bin putim.—Luk 21:1-4.
14 Long nau planti pablisa i go insait long wok painia bilong makim olsem ol i givim bel long lotuim Jehova, na long wanpela mun long yia i go pinis i gat 890,231. Sapos dispela namba i wok long i go bikpela olsem em i bin mekim long yia i go pinis, long dispela yia em bai winim 1,000,000. Wanpela sista long Naijiria i kirap mekim wok painia, na em i tok: “Taim mi laik lusim skul mi go helpim ol brata long kukim kaikai long skul bilong ol painia, em ol Witnes Bilong Jehova i wokim. Mi bungim tupela lapun sista painia, em krismas bilong ol i winim krismas bilong lapun bubu bilong mi, na mi tingting: ‘Sapos tupela lapun olsem ol inap mekim wok painia, olsem wanem long mi yet? Ating mi tu mi inap.’ Olsem na taim mi pinis long skul mi kirap mekim wok painia.”
15 Sampela tasol inap painia, tasol olgeta inap autim tok. Wanpela lapun sista long Beljam i gat 82 krismas na em i go baim abus long stua. Em i harim meri bilong papa bilong stua i bel hevi long ol wok politik i bin kamap. Taim sista i laik givim pe bilong abus long dispela meri, sista i putim liklik nius namel long mani, em nius Wanem Sampela Bilip Bilong Ol Witnes Bilong Jehova? Bihain sista i go bek long stua, na meri i askim em, ‘Bai i gat namba 3 pait i kamap? Baibel i tok wanem?’ Sista i bringim buk long em Bel Isi na Gutpela Sindaun—Bai Kamap Olsem Wanem? Bihain sista i go bek gen long dispela stua, na meri i gat sampela askim moa. Sista i sori long em na bel bilong sista i kirapim em long tokim meri long stadi long Baibel. Meri i amamas, na sista i kirapim stadi wantaim em, na nau em i laik kisim baptais. Na olsem wanem long man bilong em? Em i kaunim nius na nau em tu i stadi.
“Gutpela Wok Tru”
16 Nau em taim bilong hevi, tasol Jehova i mekim gut long ol man i stap aninit long em. Em i gutpela papa na i mekim pasin sori long yumi na lukautim yumi. Em i givim ol gutpela samting long ol pikinini bilong em i stap long graun. Em i givim planti amamas long ol na ol man i lukim, olsem man bilong raitim Song i tok: “Yu save mekim gutpela wok tru bilong helpim ol man i stap aninit long yu. Yu save lukautim gut ol man i bilip long yu. Yu save helpim ol moa yet long ai bilong olgeta manmeri.”—Song 31:19, 21.
17 Ol man bilong graun i lukim stretpela pasin bilong lain bilong Jehova na ol i kirap nogut. Wanpela lapun bilong Gana i gat 96 krismas na em i bin stap nating wantaim wanpela meri inap 70 yia, na nau em i askim gavman long rejistaim marit bilong em. Man bilong gavman i gat namba long stretim marit em i kirap nogut na i tokim em: “Yu lapun pinis, olsem na bilong wanem yu laik stretim marit bilong yu?”
18 Lapun i tok: “Mi laik kamap wanpela Witnes Bilong Jehova na autim tok paslain long taim dispela pasin bilong graun i pinis. Wok bilong autim gutnius bilong Kingdom bilong God i bikpela wok tru, winim olgeta narapela wok, na i helpim ol man long kisim laip i stap oltaim. Ol Witnes i save bihainim tok bilong gavman, olsem lo bilong stretim marit. Olsem na mi laik bai yu stretim marit bilong mi.” Dispela man i kirap nogut, tasol em i stretim marit bilong lapun, na lapun i amamas na i go pinis.—Lukim Rom 12:2.
19 Nau dispela man bilong gavman i wok long tingim ol dispela tok bilong lapun, olsem: “Ol Witnes Bilong Jehova . . . bikpela wok bilong ol . . . dispela pasin bilong graun bai pinis . . . Kingdom bilong God . . . laip i stap oltaim.” Nau em i laik painim ol Witnes na askim ol long ol dispela samting. Ol i stadi wantaim em long Baibel, na em i kamap strong na kisim baptais. Sapos yumi bihainim tok bilong Jehova long olgeta samting, dispela bai kamapim gutpela samting long yumi na long ol man i lukim stretpela pasin bilong yumi.—Lukim 1 Pita 2:12.
20 Ol lapun i bin larim tok i tru i stretim pasin bilong ol, ol i stap olsem gutpela piksa ol yangpela i ken bihainim nau long taim bilong planti pasin giaman. Long Mianma i gat wanpela yangpela sista olsem. Em i bilong wanpela famili i gat 10-pela pikinini na famili i rabis na i gat pasin daun. Papa i kisim pensen na mekim wok painia. Wanpela taim yangpela sista i painim pinis wanpela ring long skul, em ring daimon i gat bikpela pe. Kwiktaim em i kisim ring i go long tisa. Tisa i givim ring long meri i bin lusim. Long de bihain tisa i stori long ol sumatin long olsem wanem ring i bin lus, na olsem wanem meri i bin kisim bek. Tisa i save, sapos ol narapela i bin kisim ring ol i no inap bekim, olsem na tisa i tokim yangpela sista long sanap na tokim klas, bilong wanem em i mekim olsem. Sista i tok, em i wanpela Witnes Bilong Jehova, na God bilong em i no laikim pasin bilong stil o giaman. Olgeta sumatin long klas i harim dispela tok, na dispela i givim rot long em long autim tok long tisa wantaim ol sumatin.
21 Long Beljam wanpela tisa i lukim pasin bilong wanpela pikinini long klas bilong em, em wanpela yangpela sista. Tisa i tok: “Bipo mi no bin laikim ol Witnes. Mi ting ol i no save laikim ol narapela lain. Tasol nau mi save ol i mekim gut long ol narapela manmeri na ol i bihainim yet lo bilong ol.” Long olgeta yia ol tisa i save givim prais long ol pikinini i bin mekim gutpela wok. Na ol i givim prais long ol pikinini i stadi long pasin bilong ol man, na inap 3-pela yia ol pikinini bilong ol Witnes Bilong Jehova i bin kisim dispela prais. Planti taim dispela kain samting i save painim ol manmeri i bilip long Jehova.—Song 31:23.
22 Song 31:24 i tok: “Yupela olgeta manmeri i bilip long Bikpela [Jehova], yupela sanap strong, na bel bilong yupela i ken kisim strong oltaim.” Klostu nau ol pasin nogut Satan i bin kamapim long graun em bai pinis, tasol Jehova i no ken lusim yumi. Em bai stap klostu long yumi na strongim yumi. Em “i olsem wanpela strongpela haus. Ol stretpela man i ken ran i go long en na i stap gut.”—Sindaun 18:10.
Yu Tingim Yet?
◻ Olsem wanem yumi inap bilip long Jehova i olsem strongpela haus bilong hait long en na stap gut?
◻ Olsem wanem yumi save i gat bikpela lain i autim tok bilong Kingdom na ol i no pret?
◻ Olsem wanem yumi save Satan i no inap holimpas lain bilong Jehova?
◻ Jehova i laik mekim wanem long ol man i bilip long em?
[Askim Bilong Stadi]
1. Song 31 i tok wanem long Jehova inap lukautim man?
2. (a) Wanem tupela samting inap kirapim yumi long kam long Jehova olsem strongpela haus bilong hait long en? (b) Jehova i wanem kain God?
3. Man bilong mekim dispela singsing em i givim biknem long Jehova olsem wanem?
4, 5. (a) Husat i litimapim nem bilong Jehova long nau? Ol i mekim olsem wanem long yia i go pinis? (Lukim sat long pes 12-15.) (b) Taim yumi lukim hamas man i bin kam long Memorial, olsem wanem yumi save i gat sampela moa i laik autim tok bilong Kingdom? (Lukim sat.) (c) Ating husat long kongrigesen bilong yu inap kamap strong na mekim dispela wok?
6, 7. Stori long wanpela man Jehova i bin helpim em long rausim ol spirit nogut.
8, 9. Wanem sampela hevi moa ol lain bilong autim tok bilong Kingdom ol i winim?
10. Taim hevi i painim yumi, olsem wanem yumi save Jehova inap helpim yumi?
11. Olsem wanem yumi save Jehova i no olsem wanpela haus bilong hait long en inap liklik taim tasol?
12. Olsem wanem Jehova i bin helpim wanpela painia long Japan?
13. Bilong wanem wanpela man i no ken semim yumi bilong kirapim yumi long autim tok?
14. Yu inap stori olsem wanem long wok painia? (Lukim sat.)
15. Sapos yumi autim tok long kain kain taim na ples, wanem gutpela samting inap kamap?
16. Wanem gutpela pasin Jehova i mekim long lain bilong em na ol man i lukim?
17-19. Long Gana wanem gutpela samting i bin kamap long taim wanpela lapun i laik stretim marit bilong em?
20. Long Mianma, wanem samting i bin kamap na yangpela sista inap autim tok?
21. Taim ol yangpela i bilip tru long Jehova, olsem wanem long pasin bilong ol?
22. Wanem laspela tok bilong Song 31? Dispela tok i helpim yumi olsem wanem nau long taim pasin nogut bilong dispela graun i laik pinis?
[Sat long pes 12-15]
RIPOT BILONG WOK BILONG OL WITNES BILONG JEHOVA LONG 1993
(Bilong save ol dispela rait i stap we long pes, lukim buk o magasin)
[Ol Piksa long pes 16, 17]
Lain bilong autim tok bilong Kingdom ol i planti tumas inap 4,709,889!
1. Senegal
2. Brasil
3. Sili
4. Bolivia