Ol Witnes Bilong Jehova Long Olgeta Hap—Ripablik Filipin

I GAT 7,083 ailan ol i kolim Ripablik Bilong Filipin na ol dispela ailan ol i het bilong wanpela lain maunten, em as bilong en i stap daunbilo tru long solwara.a Na i gat 62,000,000 manmeri i stap long dispela hap na ol i man bilong toktok na stori long olgeta kain samting. Olsem na taim ol Witnes i autim tok bilong Kingdom long ol, ol i save putim gut yau.

Autim Tok Long Skul

Long ailan Masbate, wanpela sumatin bilong haiskul em i autim tok long tisa na ol wanklas taim ol i mas mekim tes na skelim sampela tok, i stret o nogat. Em i tok:

“Dispela tok mipela i mas skelim i olsem: ‘Sapos God i laikim mi tru, em i no inap givim sampela hevi long mi o larim pen i painim mi.’ Bihain tisa i skelim ol pepa bilong mipela na em i lukim olsem olgeta sumatin i bin raitim ‘i stret’ long pepa bilong ol, na mi wanpela mi raitim olsem ‘i no stret.’ Tisa i orait long mi ken tokaut long klas, bilong wanem mi bin raitim ‘i no stret.’ Mi tok, God i no bin givim ol hevi long yumi, tasol em i larim pen i painim yumi; na em i larim ol traim i kamap long yumi bilong traim bilip bilong yumi. Mi mekim wok long Baibel em oltaim mi save karim i go long skul, na mi kamapim tok bilong 1 Jon 4:8 i tok, ‘God i as bilong dispela pasin bilong laikim ol arapela.’ Tisa i harim na em i tokim ol sumatin: ‘Tok bilong Marilou i stret.’ Mi wanpela tasol i bekim stret dispela askim, na mi kisim nambawan mak long dispela tes.”

Tok Bilong Kingdom i Go Long Olgeta Hap

Wanpela painia oltaim i autim tok long narapela hap bilong Filipin na em i bungim wanpela meri i gat 3-pela liklik pikinini. Meri i laikim tru tok bilong Kingdom, olsem na i no hatwok long kirapim Baibel-stadi wantaim em. Man bilong em i no amamas long ol Witnes Bilong Jehova i lainim em long tok bilong Baibel, tasol meri i stadi yet i go.

Man i kisim meri pikinini i go sindaun long narapela biktaun. Em i ting nau bai meri i no inap bung moa wantaim ol Witnes. Tasol i no longtaim na ol Witnes i bungim em na em i kirap stadi gen. Man bilong em i belhat long dispela na taim em i go long wok em i kamapim tingting bilong em long man em i wok long stretim ka bilong em. Tasol em i no save, dispela man em i wanpela Witnes Bilong Jehova.

Witnes i tokim em, sapos meri bilong em i wok yet long stadi long Baibel, dispela bai helpim famili olgeta, long wanem, meri i ken bihainim ol dispela tok bilong Baibel long haus. Na em i tokim man, sapos em tu i kisim save long Kingdom bilong God, dispela bai helpim em yet.

Orait, wanem samting i kamap? Man i larim meri i stadi long Baibel, na em i kisim famili i go bek long ples ol i bin i stap long en pastaim. Meri i kamap strong long spirit na em i kamap pablisa i no baptais yet. Man bilong em i kirap stadi long Baibel, na nau famili olgeta i go long ol miting Kristen.

[Ol Futnot]

[Blok long pes 8]

KANTRI FILIPIN

Yia Bilong Wok, 1993

HAMAS OL I AUTIM TOK: 116,576

SKELIM OLSEM: Wanpela insait long: 549

HAMAS I BUNG LONG MEMORIAL: 357,388

HAMAS PAINIA, AVERES: 22,705

HAMAS BAIBEL-STADI, AVERES: 94,370

HAMAS I KISIM BAPTAIS: 7,559

HAMAS KONGRIGESEN: 3,332

BRENS-OFIS: MANILA

[Piksa long pes 9]

Ol i autim tok long maket na gutpela samting i kamap long en

[Piksa long pes 9]

Brens-ofis bilong Sosaiti Wastaua long Manila