Askim
Jisas i kamap long lain bilong Jesi na Devit, na bilong wanem sampela Baibel i kolim em “rop” bilong Jesi na Devit?
Yumi save rop bilong diwai o purpur samting i kamap pastaim na as na ol han bilong en i kamap bihain. Olsem na sapos yumi tok Jesi (o pikinini bilong em Devit) i olsem rop Jisas i kamap long en, i olsem dispela tok i stret. Tasol long Aisaia 11:10 planti Baibel tok Inglis i tok olsem Mesaia i kam bihain em i olsem “rop bilong Jesi.” Rom 15:12 i kamapim dispela tok bilong makim Krais Jisas. Bihain Kamapim Tok Hait 5:5 i kolim em olsem “Laion bilong lain Juda, em rop bilong Devit.” (New World Translation) Dispela tok i gat as bilong en.
Planti taim Baibel i stori long ol diwai purpur samting bilong mekim tok bokis. Sampela taim tok bokis i stori long pikinini kaikai i putim kru na i go bikpela, na rop bilong en i kamap paslain long as na ol han na ol pikinini bilong en, na ol rop i lukautim ol dispela samting. Olsem Jop 14:8, 9 i tok: “Maski ol rop bilong en i olpela pinis na as bilong en i drai, sapos graun i gat wara, nupela kru bai i kamap.”
Sapos rop bilong diwai i bagarap, diwai olgeta bai i stap nogut. (Skelim Matyu 3:10; 13:6.) Olsem na Malakai i tok: “Taim bai kamap na paia bai kukim ol man bilong bikhet na ol man i mekim pasin nogut. . . . Long dispela taim paia bai kaikaim ol, olsem paia i save kaikaim diwai na i no gat hap rop o hap han bilong en i stap.” (Malakai 4:1, NW) Insait bilong dispela tok i klia—ol bai bagarap olgeta. Ol bai kilim i dai ol papamama (ol rop) na ol pikinini bilong ol (ol han).a Dispela i kamapim klia, ol papamama i gat bikpela wok long helpim ol pikinini; sapos papamama i no stap gut long God ating ol liklik pikinini i no gat rot long kisim laip oltaim long bihain.—1 Korin 7:14.
As bilong tok bilong Jop 14:8, 9 na Malakai 4:1 i olsem: Ol bikpela han bilong diwai (na ol kaikai i stap long ol liklik han) i kisim ol samting bilong i stap laip long ol rop. Dispela i helpim yumi long save olsem wanem Jisas em i “rop bilong Jesi” na “rop bilong Devit.”
Long samting bilong skin Jesi na Devit i olsem tumbuna bilong Jisas; ol i olsem rop na Jisas i olsem kru o han bilong diwai. Aisaia 11:1 i tok long Mesaia olsem: “Lain bilong Jesi i stap olsem as bilong diwai ol i katim pinis. Tasol nupela kru bai i kamap long dispela as bilong diwai.” Na long Kamapim Tok Hait 22:16 Jisas i tok em i ‘Kru i kamap long Devit.’ Tasol em i tok tu em i “rop bilong Devit.” Bilong wanem em i tok olsem?
Jisas em i “rop” bilong Jesi na Devit, long wanem, long rot bilong em lain bilong ol i stap laip yet. No gat wanpela man long nau inap save tru em i bilong lain Livai o Dan o Juda. Tasol yumi save lain bilong Jesi na Devit i stap yet, long wanem, Jisas i stap laip long heven.—Matyu 1:1-16; Rom 6:9.
Na tu, Jisas i kisim namba olsem King long heven. (Luk 1:32, 33; 19:12, 15; 1 Korin 15:25) Em i bikpela samting long ol tumbuna bilong em. Devit i bin mekim wanpela tok profet na em i kolim Jisas olsem Bikpela bilong em.—Song 110:1; Aposel 2:34-36.
Jisas i kisim pinis namba olsem Jas. Long taim em i stap King inap 1,000 yia, ofa bilong Jisas bai helpim Jesi na Devit tu. Long rot bilong Jisas ol bai stap laip long graun na em bai stap ‘Papa bilong oltaim oltaim’ bilong ol.—Aisaia 9:6.
Olsem na maski Jisas i kamap long lain bilong Jesi na Devit, namba em i kisim pinis na ol samting em bai mekim bihain i makim olsem i stret yumi kolim em “rop bilong Jesi” na “rop bilong Devit.”
[Ol Futnot]
a Wanpela rait ol i raitim long matmat long Fonisia long bipo i gat tok i wankain liklik. Sapos ol man i opim matmat, rait i tokim ol: “Bai yupela i no gat rop long graun na no gat kaikai long antap!”—Vetus Testamentum, Epril 1961.
[Piksa Kredit Lain long pes 31]
Pictorial Archive (Near Eastern History) Est.