Tok Bilong Evolusen i Stap Long Kot

Ol man i bilip long tok bilong evolusen, nau ol i laik skelim gen dispela samting

TINGIM olsem yu wanpela loya na yu mas skelim man long kot. Dispela man i tok, em i no gat asua, na i gat ol witnes bilong helpim em. Tasol tok bilong narapela i pait wantaim tok bilong narapela. Na bihain gen, ol i senisim stori bilong ol. Bai yu bilipim tok bilong ol, na larim dispela man i winim kot? Nogat, a? Ol witnes i laik helpim em, tok bilong ol i no stret wantaim, olsem na yu no inap bilip long dispela man, a?

Kain samting olsem i kamap long tok bilong evolusen. I gat planti witnes bilong helpim dispela tok, em ol i kamapim kain kain stori long ol samting i gat laip i bin kamap olsem wanem. Tasol sapos yumi skelim gut tok bilong ol, olsem long kot, yu ting tok bilong evolusen bai winim kot? Ol man i bilip long dispela tok ol i wanbel long ol toktok ol i mekim o olsem wanem?

Tok Bilong Ol i Pait

Ol samting i gat laip i bin kamap olsem wanem? Ating i no gat narapela askim em ol man i gat kain kain tingting long en na ol i bin tok pait planti long en. Ol i no tok pait tasol long ol samting i bin kamap long rot bilong evolusen o God i bin wokim, nogat; ol man i bilip long evolusen, ol yet i tok pait planti. Ol i tok pait long evolusen i bin kamap olsem wanem, em i kirap we, husat o wanem samting i kirapim, em i kamap insait long bikpela hap taim o nogat.

Longtaim pinis ol man i bilip long evolusen i tok, namba wan samting i gat laip i bin kamap insait long wanpela raunwara i hat liklik na i gat marasin long en. Nau sampela i ting laip i kamap insait long spet bilong solwara, o long hatpela wara i kamap long as bilong solwara na i sut i kam antap. Sampela i tok, ol samting i gat laip i bin kamap long antap na i kam long graun long rot bilong samting i pundaun long graun. O wanpela samting olsem sta i paitim graun na senisim ol samting long win na nau sampela samting i kamap laip. Wanpela saveman i tok: “Sapos samting olsem sta ain i pundaun long graun, ol narapela kain samting inap kamap.”

Na ol i skelim gen wanem kain pasin i bin stap na ol samting i gat laip i bin kamap. Wanpela nius (Time) i tok: “Bipo ol i ting ol samting i stap isi na gutpela na ol samting i gat laip i bin kamap, tasol nau ol i ting skai i bin lait olsem paia na ol maunten i pairap na ol samting olsem sta i pundaun long graun.” Olsem na nau sampela saientis i tok, sapos ol samting i gat laip i bin kamap insait long kain pasin olsem, orait laip i no bin kamap insait long longpela hap taim olsem ol i ting bipo.

Na ol i gat narapela narapela tingting long God i bin mekim wanem wok—⁠“sapos em i stap.” Sampela i tok, God i no bin mekim wok​—⁠ol samting i gat laip i kamap nating. Na sampela i tok, God i kirapim wok na bihain ol samting i kamap long rot bilong evolusen.

Orait, taim namba wan samting i kamap laip pinis, nau ol narapela narapela kain samting i kamap olsem wanem? Ol stori bilong dispela i pait. Long yia 1958, em 100 yia bihain long taim ol i wokim buk bilong Darwin (The Origin of Species), wanpela man i bilip long evolusen (Sir Julian Huxley) em i tok: “Darwin i tok, ol samting i no gat strong, ol dispela i dai na lus olgeta, tasol ol samting i gat strong ol i stap laip na ol i wok long kamap planti. Nau yumi save tru, dispela tasol em i rot bilong evolusen.” Tasol 24 yia bihain, narapela man i bilip long evolusen (Michael Ruse) i tok, nau planti saveman moa i ting evolusen i no bin kamap olsem; tingting bilong Darwin i sot.

Nius Time i tok, “i gat planti samting” i helpim tok bilong evolusen, tasol i hatwok long save long en na “planti hap tok bilong en i no stret, na ol man i laik stretim, tingting bilong ol i pait.” Olsem na tok bilong evolusen i no winim kot. Sampela man i bilip long dispela tok ol i laik skelim gen bambai ol i ken save tru, ol samting i gat laip i bin kamap olsem wanem.

Em nau, ol man i laik helpim tok bilong evolusen long ol samting i gat laip i bin kamap olsem wanem, tasol ol i no wanbel long toktok ol i mekim. Wanpela saientis (T. H. Janabi) i tok, ol man i save tokaut long evolusen ol “i bin kamapim na lusim kain kain tingting kranki na ol man bilong saiens i no wanbel long wanpela tingting bilong evolusen.”

Charles Darwin i save, dispela bai kamap. Long buk bilong em (The Origin of Species), long tok i go pas, em i tok: “Mi save i gat planti tok long dispela buk, em ol man i no ken wanbel long en, long wanem, ol inap tingim sampela samting i givim narapela tingting long ol i no wankain olsem tingting mi kisim.”

Ol man i autim tok bilong helpim evolusen, tok bilong ol i pait, olsem na yu ting yumi ken bilipim tok bilong evolusen?

Ol Man i Gat Save Ol i Laikim, A?

Wanpela buk (Milestones of History) i tok, kirap long taim tok bilong evolusen i kamap nupela “planti man i laikim, long wanem, ol i ting em i wanpela tok tru bilong saiens, winim tok olsem i gat wanpela God na wantu em i bin wokim ol samting.”

Tasol sampela man i bilip long evolusen i mekim strongpela tok olsem dispela em i wanpela tok i tru. Olsem: Wanpela saientis (H. S. Shelton) i tok, kain tingting olsem i gat wanpela God na wantu em i bin wokim ol samting “em i longlong tru na yumi no ken tingim.” Narapela saveman (Richard Dawkins) i tok strong olsem: “Sapos yu bungim wanpela man i tok em i no bilip long evolusen, dispela man i no gat save, o em i no gat tingting, o em i longlong.” Na Profesa René Dubos i tok: “Long nau, planti man i gat save ol i bilip olsem olgeta samting long antap na long graun i bin kamap long rot bilong evolusen na i wok yet long kamap olsem.”

I olsem ol i tok, maski man i gat liklik hap save tasol, em bai bilipim tok bilong evolusen. Sapos em i bilip bai i olsem em “i gat save” na em i no “longlong.” Tasol i gat planti man na meri i winim bikpela skul em ol i no bilipim tok bilong evolusen. Wanpela man i raitim buk na em i tok: “Mi painim pinis planti man bilong saiens em ol yet i gat tupela tingting long tok bilong evolusen, na wan wan i tok, tingting bilong Darwin long evolusen i no stret wantaim saiens.”​—⁠Francis Hitching long buk The Neck of the Giraffe.

Wanpela saveman bilong saiens long Inglan em i gat biknem (Chandra Wickramasinghe), em i tok: “I no gat wanpela samting bilong truim wanpela as tok bilong Darwin long evolusen. Em wanpela tok planti man i kirap long bihainim long yia 1860, na mi ting em i nogutim wok saiens i kam inap long nau.”

Wanpela saveman (T. H. Janabi) i skelim tok bilong sampela man i bilip long evolusen na em i tok: “Ol man i ting i gat planti samting i makim tok bilong evolusen i tru, tasol nogat. Mi kisim save olsem i gat wan wan liklik hap hap samting tasol na em i no inap helpim dispela tok long laip i bin kamap olsem wanem.”

Olsem na man i no bilip long tok bilong evolusen, yumi no ken ting em “i no gat save, o em i no gat tingting, o em i longlong.” Wanpela man i bilip strong long evolusen (George Gaylord Simpson) em i stori long tingting bilong ol man i sakim tok bilong evolusen na em i tok, “Yumi no ken lap o tok bilas long ol dispela tingting. Ol man i kamapim dispela tingting, ol i man bilong skul na ol i gat save.”

Ol i Bilip Nating

Sampela i ting i gat as na ol man i bilip long tok bilong evolusen, na i no gat as na ol man i bilip olsem God i bin wokim ol samting. Tru, i no gat wanpela man i bin lukim God. (Jon 1:18; lukim tu 2 Korin 5:⁠7.) Tasol ol man i no bin lukim ol samting ol i tok em i as bilong evolusen, na ol i no inap kamapim gen.

Olsem: Ol man bilong saiens i no bin lukim ol bikpela senis ol i tok i kamap long ol jin na dispela i mekim na ol nupela nupela kain samting i kamap. Tasol ol i ting, long dispela rot yet ol nupela kain samting i gat laip i bin kamap. Ol i strong long tok, long pastaim tru wanpela liklik samting i no gat laip em i bin kamap laip, tasol ol i no lukim kain samting olsem i kamap.

No gat samting bilong truim tok bilong evolusen, olsem na wanpela saveman (T. H. Janabi) i tok, ol man “i bilip nating” long en. Na narapela saveman (Fred Hoyle) i tok bilas olsem em i “Gutnius bilong Darwin.” Na saveman Evan Shute i tok: “Mi ting man i bilip olsem God i bin wokim ol samting, em i no gat hatwok long kamapim as bilong ol tok hait olsem man i bilip long evolusen.”

Sampela saveman moa i wanbel long ol dispela tok. Saveman Robert Jastrow i tok: “Man em i narakain samting tru na taim mi tingting long em i bin kamap olsem wanem, mi ting tok olsem man i bin kamap long sampela marasin insait long wanpela raunwara i hat liklik, dispela i olsem wanpela mirakel wankain olsem stori bilong Baibel long man i bin kamap olsem wanem.”

Orait, olsem wanem na planti man i sakim yet tok olsem God i bin wokim ol samting i gat laip?

[Piksa long pes 3]

Strongpela tok bilong sampela inap kirapim ol narapela long bilipim ol