Lukautim Ol Sipsip Bilong God Long Pasin Sori
“Lukautim gut ol manmeri bilong God. Ol i stap olsem ol sipsip long han bilong yupela.”—1 PITA 5:2.
BAIBEL i tokaut klia olsem pasin sori em i nambawan pasin bilong God. Long 1 Jon 4:8 Baibel i tok: “God yet em i as bilong dispela pasin bilong laikim ol arapela.” Dispela pasin i as bilong ol samting em i mekim. Namba Wan Pita 5:7 i tok: “God i save wari long yupela.” Em i save lukautim gut lain bilong em olsem wasman bilong sipsip. “Lukim. God, Bikpela . . . i save was gut long ol lain manmeri bilong en, olsem wasman bilong sipsip i save lukautim ol sipsip bilong en. Wasman i save putim ol pikinini sipsip long bros na karim wokabaut. Na em i save wokabaut isi na soim rot long ol sipsip i gat liklik pikinini.” (Aisaia 40:10, 11) Bel bilong Devit i stap isi, long wanem, em inap tok: “Bikpela em i wasman bilong mi. Olsem na mi no inap sot long wanpela samting.”—Song 23:1.
2 I stret Baibel i tok, ol man God i belgut long ol i olsem sipsip, long wanem, ol sipsip i save stap isi, na i stap daun, na bihainim tok bilong gutpela wasman bilong ol. Wasman Jehova i tingim tru ol sipsip bilong em, olsem na em i lukautim ol gut long ol samting bilong skin na spirit. Em i soim rot long ol nau long “taim bilong las de,” em taim nogut bilong planti hevi, na em i stiaim ol i go long stretpela nupela taim.—2 Timoti 3:1-5, 13; Matyu 6:31-34; 10:28-31; 2 Pita 3:13.
3 Jehova i save sori long ol sipsip na lukautim ol gut: “Bikpela i save lukautim ol stretpela manmeri, na em i save harim beten bilong ol. . . . Em i save helpim ol na hevi i no daunim ol. God i save stap klostu long ol manmeri i gat hevi. . . . Planti hevi i save kamap long stretpela man, tasol Bikpela i save helpim em na ol dispela hevi i no daunim em.” (Song 34:15-19) Wasman Bilong Olgeta Hap em i save mekim gut tru long lain bilong em!
Gutpela Wasman i Stap Olsem Piksa
4 Pikinini bilong God, em Jisas, em i lain gut long pasin bilong Papa—Baibel i kolim em “gutpela wasman bilong ol sipsip.” (Jon 10:11-16) Kamapim Tok Hait sapta 7 i stori long bikpela wok em i mekim bilong helpim ol sipsip bilong God. Re 7 Ves 9 i tok, ol wokboi bilong God long nau ol i ‘bikpela lain bilong olgeta kantri na kain kain skin na tok ples.’ Na Re 7 ves 17 i tok: “Pikinini Sipsip [Jisas] . . . bai i stap wasman bilong ol. Em bai i bringim ol i go long . . . wara bilong givim laip.” Jisas i bringim ol sipsip bilong God i go long wara bilong givim laip oltaim long ol, em tok i tru. (Jon 17:3) Baibel i kolim Jisas “Pikinini Sipsip” na dispela i makim olsem em i gat ol gutpela pasin olsem bilong sipsip. Em i nambawan gutpela piksa bilong stap aninit long God.
5 Jisas i kam i stap long graun na em i lukim ol manmeri i stap nogut na em i ting olsem wanem? “Em i sori tru long ol, long wanem, . . . ol i stap nogut tru, olsem ol sipsip i no gat wasman.” (Matyu 9:36) Sapos ol sipsip i no gat wasman, o wasman i no wari long ol, ol weldok samting inap bagarapim ol. Tasol Jisas i wari tru long ol sipsip. Em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. . . . Yupela kisim save long mi, long wanem, mi save mekim pasin isi long ol man na mi save daunim mi yet. Na bai . . . yupela i kisim malolo.”—Matyu 11:28-30.
6 Baibel i tok profet olsem Jisas bai mekim pasin sori long ol man: “[Bikpela] i salim mi i kam long pinisim bel hevi bilong ol man i stap wantaim bikpela wari, na . . . strongim bel bilong ol manmeri i sori na i krai.” (Aisaia 61:1, 2; Luk 4:17-21) Jisas i no givim baksait long ol rabisman na ol man i stap nogut. Em i truim tok bilong Aisaia 42:3: “Pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut.” (Lukim tu Matyu 12:17-21.) Ol man i gat hevi ol i olsem pitpit i laik bruk, na olsem lam i sot long wel na i no lait gut. Jisas i save ol i stap nogut na em i sori long ol, na strongim bel na bilip bilong ol, na oraitim ol long spirit na skin.—Matyu 4:23.
7 Planti manmeri i kain olsem sipsip ol i bihainim Jisas. Ol i laikim tru tok bilong em, olsem na ol plisman i laik holim em ol i tok: “Bipo i no gat wanpela man i mekim toktok olsem dispela man.” (Jon 7:46) Na ol hetman bilong lotu i gat tupela maus ol i tok: “Olgeta manmeri i go bihainim em.” (Jon 12:19) Tasol Jisas i no laik kisim biknem. Em i stiaim ol man i go long Papa bilong em. Em i lainim ol long ol gutpela pasin bilong Jehova bilong kirapim ol long mekim wok bilong em. Jisas i tok, ol i mas ‘laikim God tru long bel na spirit na strong na tingting bilong ol.’—Luk 10:27, 28.
8 Jehova i save amamas, long wanem, lain sipsip bilong em i laikim em tumas na litimapim wok king bilong em. Long laik bilong ol yet ol i daun long em na mekim wok bilong em, long wanem, ol i save long ol gutpela pasin bilong em. Tasol ol man i save pret na daun long ol hetman bilong graun, o ol i bel hevi na ol i mekim, o ol i gat narapela tingting i stap hait! Ol man i no inap mekim tok long Jehova o Jisas olsem ol i bin mekim long wanpela pop bilong Misin Katolik: “Planti man i givim biknem long em [pop], olgeta man i pret long em, no gat wanpela man i laikim em.”—Vicars of Christ—The Dark Side of the Papacy, bilong Peter De Rosa.
Ol Wasman Nogut Bilong Israel
9 Ol hetman bilong lotu long Israel long taim bilong Jisas ol i no bihainim pasin bilong em, ol i no sori long ol sipsip. Ol i olsem ol hetman bilong Israel long bipo, em Jehova i bin tokim ol: “Yupela bai i bagarap. Ol Israel i olsem ol lain sipsip na yupela i olsem ol wasman bilong ol. Tasol yupela i save lukautim yupela yet, na yupela i no save lukautim ol sipsip. . . . Yupela i no save helpim ol sipsip i no gat strong. Na yupela i no save mekim orait ol sipsip i gat sik na yupela i no save pasim sua bilong ol sipsip i bin kisim bagarap. Na yupela i no save go painim ol sipsip i lus . . . Yupela i save mekim nogut tasol long ol.”—Esekiel 34:2-4.
10 Long taim bilong Jisas tu, ol hetman bilong lotu Juda i pasim strong bel. (Luk 11:47-52) Olsem na Jisas i mekim tok piksa long wanpela Juda, em ol stilman i bagarapim em na em i slip long rot na klostu em i laik i dai. Wanpela pris Juda i kam abrusim em, na wanpela Livai tu. Bihain wanpela Samaria i kam, em ol Juda i no laikim ol, na em i sori long dispela man. Em i pasim sua bilong em, na sindaunim em long wanpela donki, na lukautim em gut. Em i givim mani long papa bilong haus pasindia bilong lukautim man na em i tok, ‘Sapos yu tromoi sampela mani moa, taim mi kam bek, bai mi bekim long yu.’—Luk 10:30-37.
11 Ol hetman bilong lotu long taim bilong Jisas i mekim pasin nogut tru. Taim Jisas i kirapim bek Lasarus, ol bikpris wantaim ol Farisi i singautim ol kaunsil i kam bung na ol i tok: “Bai yumi mekim wanem? Dispela man i save wokim planti mirakel. Sapos yumi larim em . . . olgeta manmeri bai i bilip long em. Na ol Rom bai i kam na bagarapim tempel bilong yumi wantaim ol lain bilong yumi.” (Jon 11:47, 48) Ol i no tingim gutpela wok Jisas i mekim bilong helpim man i dai pinis. Ol i tingting tasol long namba bilong ol. Olsem na ‘long dispela de ol i kirap long painim rot bilong kilim Jisas i dai.’—Jon 11:53.
12 Na ol i mekim pasin nogut moa yet—“ol bikpris i wokim toktok long kilim Lasarus tu i dai, long wanem, planti Juda i ting long samting Jisas i bin mekim long Lasarus, na ol i lusim ol bikpris na ol i bilip long Jisas.” (Jon 12:10, 11) Tasol ol samting ol i mekim bilong lukautim nem na namba bilong ol, i no helpim ol. Jisas i tokim ol: “Nau ples bilong yupela bai i bagarap.” (Matyu 23:38) Na taim ol dispela lain i stap laip yet, ol Rom i kam ‘bagarapim ples na lain bilong ol,’ na ol tu i bagarap.
Ol Gutpela Wasman Kristen
13 Bilong senisim ol dispela hatpela wasman i tingim ol yet tasol, Jehova i salim Gutpela Wasman Jisas bilong lukautim lain sipsip bilong em. Na em i tok promis long kirapim ol namba tu wasman bilong “lukautim gut ol dispela sipsip. Na bai ol sipsip i no inap pret long wanpela samting.” (Jeremaia 23:4) Olsem na long taim bilong ol aposel na long nau tu, ol i “makim ol hetman” bilong lukautim ol kongrigesen Kristen “long olgeta taun.” (Taitus 1:5) Ol dispela hetman i stap strong long spirit na inapim ol mak Baibel i kolim bilong ol wasman bilong “ol manmeri bilong God.”—1 Pita 5:2; 1 Timoti 3:1-7; Taitus 1:7-9.
14 Bilong lukautim gut ol sipsip, ol elda i mas “holim strong pasin bilong laikim tru ol arapela manmeri bilong God.” (1 Pita 4:8) Tasol ol disaipel bilong Jisas long pastaim i mas lain long mekim olsem, long wanem, ol i tingting tumas long kisim nem na namba. Olsem na ol i kros long taim mama bilong tupela disaipel i tokim Jisas, em i laik bai tupela pikinini bilong em i ken sindaun klostu long Jisas long Kingdom, “narapela long han sut na narapela long han kais.” Jisas i tokim ol: “Ol bikman bilong ol [arapela lain] i save strong tumas long ol manmeri i mas bihainim tok bilong ol. Tasol dispela pasin i no ken i stap namel long yupela. Nogat. Man i laik i stap bikman namel long yupela, em i mas i stap wokman bilong yupela.”—Matyu 20:20-28.
15 Narapela taim ol disaipel i “tok pait long husat em i namba wan bilong ol” na bihain Jisas i tokim ol: “Sapos wanpela man i laik i stap namba wan, orait em i mas i stap las tru, olsem wokman bilong helpim olgeta man.” (Mak 9:34, 35) Ol i mas kisim pasin bilong daunim ol yet na laik long helpim ol narapela. Tasol ol i hatwok long kisim dispela gutpela pasin, olsem na long laspela kaikai long apinun paslain long Jisas i dai, ol i “pait long toktok” long husat i namba wan bilong ol! Ol i mekim olsem, maski Jisas i makim pinis pasin elda i mas bihainim bilong helpim ol sipsip—em i bin daunim em yet na wasim lek bilong ol. Em i tok: “Mi Bikpela na mi Tisa, na mi wasim lek bilong yupela. Orait yupela tu i mas wasim lek bilong ol arapela man bilong lain bilong yumi. Mi soim pasin long yupela, na yupela tu i mas mekim wankain pasin olsem nau mi mekim long yupela.”—Luk 22:24; Jon 13:14, 15.
16 Oltaim ol Witnes Bilong Jehova i bin lainim ol man olsem ol elda i mas mekim pasin olsem. Klostu 100 yia bipo, Wastaua (tok Inglis) bilong Epril 1, 1899, i kamapim tok bilong aposel Pol long 1 Korin 13:1-8 na i tok: “Aposel i tokaut klia olsem sapos yumi gat save o yumi inap mekim gut toktok, dispela i no mak bilong yumi pas gut wantaim God; mak bilong dispela i olsem: pasin sori i pulap long bel bilong yumi na i bosim olgeta wokabaut bilong yumi na i wok strong long skin bilong yumi na kirapim yumi long mekim ol samting. . . . Em nambawan pasin yumi mas wok long painim long ol man yumi laik kisim bilong kamap wokman bilong sios, bilong mekim ol wok holi.” Wastaua i tok, ol man i no laik daunim ol yet na givim bel long ol arapela, “ol i no gutpela tisa, na wok bilong ol bai bagarapim ol man, em i no ken helpim ol.”—1 Korin 8:1.
17 Olsem na ol elda i no ken “i stap olsem ol bikman na daunim” ol sipsip. (1 Pita 5:3) Ol i mas i go pas long “mekim gutpela pasin long ol arapela Kristen,” na givim bel long ol. (Efesus 4:32) Pol i tok klia olsem: “Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik . . . Yupela i mas givim bel bilong yupela long ol arapela manmeri.” Dispela pasin i mekim yumi “i wok bung wantaim.”—Kolosi 3:12-14.
18 Pol i lain long mekim pasin olsem, em i tok: “Taim mipela i stap wantaim yupela, mipela i stap . . . olsem meri i givim susu long ol pikinini bilong en. Mipela i laikim yupela tumas, olsem na mipela i laik givim gutnius bilong God long yupela. Na mipela i redi tu long givim laip bilong mipela bilong helpim yupela.” (1 Tesalonaika 2:7, 8) Na em i tok tu, ‘Strongim bel bilong ol man, na helpim ol man i no strong, na isi isi long olgeta man.’ (1 Tesalonaika 5:14) Maski wanem kain hevi sipsip i kamapim long ol elda, ol i mas tingim tok bilong Sindaun 21:13: “Sapos yu pasim yau na yu no laik harim ol rabisman i singaut long yu bilong helpim ol, orait bihain ol man bai i no harim singaut bilong yu tu.”
19 Ol elda i lukautim ol sipsip long pasin sori ol i helpim gut ol sipsip. Aisaia 32:2 i tok: “Ol wan wan bikman bai i helpim gut ol manmeri i kam bilong kisim helpim bilong ol. Ol bai i stap olsem ol ples hait ol manmeri i ken i go na hait long en long taim bilong bikpela win na ren. Na bai ol i stap tu olsem wara i ran i go long ples drai na olsem bikpela ston i haitim san long ples drai na ol man i kam sindaun long ples kol bilong en na malolo long taim bilong hatpela san.” Dispela gutpela tok piksa i makim stret gutpela wok planti elda i mekim long nau bilong helpim ol man. Ol i lain long ‘laikim tru ol brata na litimapim nem bilong ol arapela tasol.’ (Rom 12:10) Taim ol elda i mekim gutpela pasin sori olsem, na mekim pasin daun, ol sipsip i tingim gutpela wok ol i mekim na ol i “belgut tru long ol na laikim ol tru.”—1 Tesalonaika 5:12, 13.
Ol Yet i Gat Wok Long Skelim Samting Ol i Laik Mekim
20 Jehova i wokim ol man bai ol yet inap skelim ol samting ol i laik mekim. Ol elda i ken givim tingting long ol brata na stretim ol tu, tasol ol i no ken bosim ol samting ol i mekim o bosim bilip bilong ol. Pol i tok: “Mi no tok olsem mipela i bosim bilip bilong yupela. Nogat. Long bilip yupela sanap strong pinis. Mipela i save wok wantaim bilong kamapim amamas bilong yupela.” (2 Korin 1:24) Tru tumas, “olgeta man wan wan bai i karim hevi bilong pasin ol yet i mekim.” (Galesia 6:5) Jehova i givim ol lo long yumi, tasol em i larim yumi i stap fri bilong tingim planti samting yumi yet i laik mekim. Olsem na ol elda i no ken putim ol lo long ol brata i no kalapim lo bilong Baibel. Na ol i no ken kamapim tingting bilong ol yet olsem lo ol narapela i mas bihainim, o tingim ol yet tasol sapos ol narapela i no laik bihainim tingting bilong ol.—2 Korin 3:17; 1 Pita 2:16.
21 Tingim pasin Pol i mekim long Filemon taim Pol i stap kalabus long Rom. Filemon em i wanpela Kristen i stap long Kolosi, long Esia Maina, na wanpela wokboi nating bilong em, nem bilong em Onesimus, i ranawe i go long Rom na kamap Kristen na em i stap helpim Pol. Pol i rait long Filemon olsem: “Mi bai amamas tru sapos mi inap pasim em i stap wantaim mi, bai em i ken mekim wok bilong yu yet bilong helpim mi . . . Tasol mi laik bai yu mas tok orait long dispela pastaim . . . Mi no laik tokim yu long wanem samting yu mas mekim. Nogat. . . . Mobeta yu mas mekim long laik bilong yu yet.” (Filemon 13, 14) Pol i salim Onesimus i go bek, na Pol i askim Filemon long kisim em olsem brata Kristen bilong em. Pol i save, ol sipsip i no bilong em; ol i bilong God. Em i no bos bilong ol; em i stap wokman bilong ol. Pol i no putim lo long Filemon; em i save, i stret Filemon yet i mas skelim samting em i laik mekim.
22 Lain bilong God i wok long i go bikpela na ol i makim ol nupela elda. Ol dispela nupela elda, na ol olpela elda i gat save pinis, ol i mas save wok bilong ol em bilong i stap daun na helpim ol brata. Long dispela rot, lain bilong God i wok long kamap bikpela na God i stiaim ol i go long nupela taim long pasin em i laikim—em i laik bai ol i stretim gut ol wok na wok gut, tasol ol i no ken lusim pasin bilong sori. Dispela pasin i pulim ol sipsip i kam—ol i laikim oganaisesen bilong God, long wanem, ol i lukim olsem “God i save mekim olgeta samting i wok wantaim bilong mekim gut long ol man i save givim bel bilong ol long God.” Oganaisesen i mas wok gut olsem, long wanem, pasin sori i as bilong en na dispela pasin “em i no inap pinis.”—Rom 8:28; 1 Korin 13:8.
Bai Yu Bekim Olsem Wanem?
◻ Baibel i stori olsem wanem long Jehova i lukautim lain bilong em?
◻ Jisas i gat wanem wok long lukautim lain sipsip bilong God?
◻ Wanem nambawan pasin ol elda i mas kisim?
◻ Bilong wanem ol elda i no ken lusim tingting olsem ol sipsip yet i ken tingim samting ol i laik mekim?
[Askim Bilong Stadi]
1, 2. Wanem pasin em i nambawan pasin bilong Jehova? Dispela pasin i kirapim em long mekim wanem?
3. Man bilong raitim Song i stori olsem wanem long pasin bilong Jehova long lukautim ol sipsip?
4. Jisas i gat wanem wok long lukautim ol sipsip bilong God?
5. Jisas i ting olsem wanem long ol man?
6. Jisas i sori long ol man i stap nogut na em i mekim wanem?
7. Ol man i bihainim Jisas, em i stiaim tingting bilong ol i go long husat?
8. Lain bilong God i save daun long em, tasol olsem wanem dispela pasin bilong ol i narapela kain long pasin bilong ol man i daun long ol hetman bilong graun?
9, 10. Stori long pasin bilong ol hetman bilong Israel long bipo na long taim bilong Jisas.
11, 12. (a) Olsem wanem ol hetman bilong lotu long taim bilong Jisas i mekim pasin i nogut moa? (b) Bihain ol Rom i mekim wanem long ol dispela hetman?
13. Jehova i tok promis long salim husat bilong lukautim ol sipsip bilong em?
14, 15. (a) Ol disaipel i hatwok long lain long bihainim wanem kain pasin? (b) Jisas i mekim wanem bilong lainim ol olsem ol elda i mas mekim pasin daun na i stap wokboi bilong ol narapela?
16. Long yia 1899 Wastaua (tok Inglis) i tok wanem long nambawan pasin ol elda i mas bihainim?
17. Baibel i tokaut klia long wanem ol pasin ol elda i mas bihainim?
18. (a) Pol i mekim wanem gutpela pasin long ol sipsip na em i stap gutpela piksa? (b) Bilong wanem ol elda i no ken pasim yau taim sipsip i laik kisim helpim?
19. Ol elda i lukautim ol sipsip long pasin sori, olsem wanem ol i helpim gut ol sipsip? Ol sipsip i pilim tru pasin sori bilong ol elda na ol i mekim wanem?
20. Bilong wanem ol elda i mas tingim ol brata yet i gat wok long skelim ol samting ol i laik mekim?
21. Pasin Pol i mekim long Filemon i lainim yumi long wanem samting?
22. (a) Ol elda i mas save ol i gat wanem wok? (b) Jehova i kamapim wanem kain oganaisesen?
[Piksa long pes 16]
Jisas em i “gutpela wasman” na em i mekim pasin sori
[Ol Piksa long pes 17]
Ol hetman nogut bilong lotu i pasim tok long kilim Jisas i dai