Putim Olgeta Hevi Bilong Yu Long Han Bilong Jehova
“Yupela i mas daunim . . . yupela yet na stap aninit long strongpela han bilong God. Na long taim em yet i makim, em bai i litimapim yupela. God i save wari long yupela. Olsem na olgeta hevi yupela i karim, yupela i mas putim long han bilong en.”—1 PITA 5:6, 7.
OL HEVI inap nogutim tru sindaun bilong yumi. Yumi ken tok, em i kain olsem ol pairap i save kamap long redio taim yumi laik harim sampela gutpela musik. Sapos i no gat ol dispela pairap, yumi inap harim gut ol dispela musik na kisim amamas long en, na em bai mekim isi bel bilong yumi. Tasol taim redio i pairap em inap bagarapim musik, maski em i gutpela musik tru, na yumi kros na bel i no stap isi. Hevi inap mekim olsem—em inap bagarapim bel isi bilong yumi. Em inap daunim yumi tru na yumi no inap mekim ol bikpela wok bilong yumi. Tru tumas, “sapos man i save wari oltaim, em bai i bel hevi tru na tingting bilong en bai i bagarap.”—Sindaun 12:25.
2 Krais Jisas i tok, yumi mas lukaut, nogut ol hevi i daunim yumi na pulim nabaut tingting bilong yumi. Long tok profet bilong taim bilong las de, em i tok: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus . . . Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.” (Luk 21:34-36) Sapos yumi kaikai na dring planti, tingting bai i no wok gut, na i olsem tasol long “wari long ol samting bilong bodi”—em tu inap paulim tingting bilong yumi, na samting nogut inap painim yumi.
“Wari”
3 Dispela tok “wari” long Baibel i olsem yumi tingting planti long wanpela samting nogut bai painim yumi. I olsem yumi pret na tingting planti, o bel bilong yumi i guria, na tuhat i kamap na bel i pas na klok i wok hariap, long wanem, yumi no save, samting nogut bai painim yumi tru o nogat, na yumi no save, wanem samting tru i laik bagarapim yumi. Na yumi tingting planti—nogut yumi no inap karim dispela hevi. (Webster’s Ninth New Collegiate Dictionary) As bilong sampela hevi em sik, o go lapun, o pret long ol raskol, o bos i rausim yumi long wok, o yumi tingting planti long famili bilong yumi, nogut sampela hevi i painim ol.
4 I gat kain kain hevi—sampela i bikpela na sampela i liklik—na i gat kain kain samting inap kamapim hevi. Maski wankain samting i painim planti man, i no olgeta bai bel hevi long dispela. Olsem na yumi mas save, maski wanpela samting i no givim hevi long yumi, wankain samting olsem em inap bagarapim tru bel bilong sampela wanbilip bilong yumi. Orait, olsem wanem sapos wanpela hevi i wok long daunim yumi na yumi tingting planti tru na yumi no inap tingim ol gutpela tok i tru bilong God long Baibel? Na olsem wanem sapos dispela hevi i mekim na yumi no inap tingting klia long dispela bikpela tok i bin kamap long wok king bilong Jehova na ol Kristen inap i stap gut long em o nogat? Tru, yumi no inap lusim dispela hevi, tasol yumi mas painim sampela gutpela tok bilong Baibel bilong helpim yumi long karim ol hevi i save painim yumi na bel bilong yumi i no bagarap long ol dispela hevi.
I Gat Helpim i Stap
5 Sapos Kristen i mas i gat sampela helpim bilong strongim em long spirit na em i gat sampela hevi bilong karim, i gat sampela tok bilong Baibel inap mekim gut bel bilong em. Baibel inap stiaim gut yumi na em i soim yumi olsem i no yumi tasol i mekim wok bilong Jehova. Devit i raitim wanpela song olsem: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 55:22) Orait yumi ken mekim wanem samting i stret wantaim dispela tok? Yumi ken putim olgeta hevi na tingting pret bilong yumi long han bilong gutpela Papa bilong yumi, Jehova. Dispela bai strongim yumi na mekim bel bilong yumi i stap isi.
6 Na sapos yumi laik putim olgeta hevi bilong yumi long han bilong Jehova, yumi mas beten oltaim. Dispela bai mekim bel bilong yumi i stap isi, long wanem, aposel Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na . . . askim em long helpim yupela. Bel isi God i save givim yumi, em . . . bai i mekim yupela i stap bel isi tru.” (Filipai 4:6, 7) “Bel isi God i save givim yumi” em i winim olgeta narapela kain bel isi, na em i save stap long ol wokboi bilong Jehova i dediket pinis, maski bikpela hevi tru i painim ol. Dispela bel isi i save kamap taim yumi pas gut wantaim God. Taim yumi beten long kisim spirit holi na yumi larim spirit i kirapim yumi, i no olsem yumi bai no gat sampela hevi moa, nogat; tasol yumi gat dispela gutpela pasin em spirit i save kamapim long man, em bel isi. (Luk 11:13; Galesia 5:22, 23) Ol hevi i no daunim yumi olgeta, long wanem, yumi save Jehova i lukautim lain bilong em na ol i “stap gut,” na em i no ken larim wanpela samting i bagarapim yumi inap long olgeta taim bihain.—Song 4:8.
7 Tasol olsem wanem sapos yumi tingim tingim ol tok bilong Baibel na yumi beten oltaim, tasol hevi i mekim yet na yumi no stap bel isi? (Rom 12:12) Jehova i putim ol elda long kongrigesen bilong helpim yumi long ol samting bilong spirit. Ol bai kamapim sampela tok bilong Baibel na beten wantaim yumi, na long dispela rot ol inap mekim gut bel bilong yumi na helpim yumi. (Jems 5:13-16) Aposel Pita i tokim ol wanwok elda long givim bel long lukautim lain bilong God na mekim gut dispela wok. (1 Pita 5:1-4) Ol elda i save tingim tru yumi na ol i laik helpim yumi. Tasol bilong ol elda i ken helpim yumi long kamap strong long spirit insait long kongrigesen, yumi olgeta i mas bihainim tok bilong Pita, em i tok: “Yupela yangpela man i mas aninit long ol hetman. Na yupela olgeta i mas . . . stap aninit long ol arapela manmeri bilong God. Yumi save, ‘God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.’ ”—1 Pita 5:5.
8 Na Pita i tok moa: “Olsem na yupela i mas daunim laik bilong yupela yet na stap aninit long strongpela han bilong God. . . . God i save wari long yupela. Olsem na olgeta hevi yupela i karim, yupela i mas putim long han bilong en. Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai. Tasol yupela i mas i stap strong long bilip na sakim em. Yupela i save, ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela. God . . . i bin singautim yupela long Krais Jisas, . . . olsem na bai yupela i karim pen sotpela taim tasol, na bihain bai em yet i mekim yupela i orait gen, na strongim bilip bilong yupela na mekim yupela i sanap strong oltaim.”—1 Pita 5:6-11.
9 Taim yumi save, yumi inap ‘putim olgeta hevi bilong yumi long han bilong God, long wanem, em i tingim yumi,’ dispela i strongim tru bel bilong yumi! Na sapos Satan i laik bagarapim pasin wanbel i stap namel long yumi na Jehova na em i kirapim ol man long mekim nogut long yumi na putim ol narapela hevi long yumi, yumi ken amamas long save, olgeta man i stap gut long Jehova, ol dispela hevi bilong ol bai pinis. Tru tumas, bai yumi karim hevi inap sotpela taim tasol na God bilong marimari bai mekim yumi i sanap strong.
10 Namba wan 1 Pita 5:6, 7 i makim tripela pasin inap helpim yumi long karim hevi na bai yumi no tingting planti oltaim. Wanpela em pasin daun, o ‘daunim yumi yet.’ Laspela tok bilong 1 Pita ves 6 i tok, “long taim God i makim,” dispela i makim olsem yumi no ken les. 1 Pita Ves 7 i tok, yumi inap putim olgeta hevi bilong yumi long han bilong God, long wanem, ‘em i save wari long yumi.’ Dispela tok i kirapim yumi long bilip tru long Jehova. Orait nau yumi ken stori long olsem wanem pasin daun, na no ken les, na bilip tru long God, em inap helpim yumi na ol hevi i no ken daunim yumi.
Pasin Daun Inap Helpim Yumi
11 Sapos yumi gat pasin daun, bai yumi tokaut olsem tingting bilong God i winim moa yet tingting bilong yumi. (Aisaia 55:8, 9) Na pasin daun i helpim yumi long tokaut olsem tingting bilong yumi i sot tru taim yumi skelim wantaim tingting bilong Jehova, em inap skelim olgeta samting long tingting bilong em. Em i save lukim ol samting yumi no inap pilim liklik, olsem em i bin mekim long stretpela man Jop. (Jop 1:7-12; 2:1-6) Taim yumi mekim pasin daun na “stap aninit long strongpela han bilong God,” i olsem yumi tokaut olsem yumi samting nating tasol aninit long Nambawan Bikpela King. Dispela inap helpim yumi long karim ol hevi em i larim ol i painim yumi. Tru ating bel bilong yumi i krai tru long dispela hevi i mas pinis hariap, tasol Jehova inap skelim stret olgeta samting na em i save wanem taim stret em i mas kirap na helpim yumi, na em i mas mekim olsem wanem. Olsem na yumi mas mekim pasin daun olsem pikinini na holim strongpela han bilong Jehova na bilip tru olsem em bai helpim yumi long karim ol hevi bilong yumi.—Aisaia 41:8-13.
12 Na pasin daun bai helpim yumi long bihainim ol tok bilong God long Baibel na bai yumi no tingting planti oltaim. Olsem: Sapos ol samting bilong bisnis o mani i as bilong dispela hevi, i gutpela sapos yumi tingim tok bilong Pol, em i tok: “Yupela i no ken . . . mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’ ” (Hibru 13:5) Long pasin daun planti ol i bihainim dispela tok na ol i no tingting planti long painim mani na gutpela sindaun. Tru ating ol i sot yet long mani, tasol ol i no larim dispela hevi i bosim tingting bilong ol na bagarapim ol long ol samting bilong spirit.
No Ken Les
13 Dispela tok “long taim God i makim,” long 1 Pita 5:6, i makim olsem yumi mas karim hevi na no ken les. Sampela taim wanpela hevi bai stap longtaim, na dispela bai mekim na yumi bel hevi na tingting planti. Long dispela taim tu yumi mas putim hevi bilong yumi long han bilong Jehova. Jems i tok, ol man i strongim bel na karim hevi ol i ken amamas. Na em i tok: “Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em. Yes, yumi save, Bikpela em i save sori moa yet long yumi.” (Jems 5:11) Jop i kamap rabis olgeta, na tenpela pikinini bilong em i lus, na sik nogut tru i kisim em, na ol pren giaman i sutim nating tok long em. Yumi save, em i bel hevi na tingting planti.
14 Tasol Jop i karim dispela hevi na em i no les. Na yumi tu, sapos wanpela bikpela hevi i traim bilip bilong yumi, ating yumi mas wet na karim dispela hevi pastaim, olsem Jop i bin mekim. Tasol bihain God i kirap helpim Jop, na em i pinisim hevi bilong Jop na givim gutpela pe long em. (Jop 42:10-17) Sapos yumi wetim Jehova, bai yumi kisim pasin bilong strongim bel na no ken les, na dispela i kamapim klia olsem yumi givim bel tru long God.—Jems 1:2-4.
Bilip Long Jehova
15 Pita i tokim ol wanbilip long ‘putim olgeta hevi bilong ol long han bilong God, long wanem, em i save wari long ol.’ (1 Pita 5:7) Olsem na yumi inap bilip tru long Jehova. Sindaun 3:5, 6 i tok: “Yu mas bilip strong long Bikpela. . . . Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” Sampela i gat planti hevi na ol i no inap bilip moa long wanpela man bai helpim ol, long wanem, bipo ol i gat hevi na i no gat wanpela man i helpim ol. Tasol i gat as tru na yumi inap bilip long dispela Man bilong wokim yumi, em i As bilong laip. Long olgeta taim yumi ken bilip na wetim Jehova i helpim yumi na ol hevi i no ken bagarapim yumi.—Song 34:18, 19; 36:9; 56:3, 4.
16 Bilong yumi ken bilip na wetim God, yumi mas bihainim tok bilong Jisas, em i bin skulim ol man long olgeta tok Papa i bin skulim em long en. (Jon 7:16) Jisas i tokim ol disaipel long mekim wok bilong Jehova na long dispela rot ol i ‘bungim ol gutpela samting bilong ol long heven.’ Tasol olsem wanem long ol samting olsem kaikai, klos, haus? Jisas i tok, “No ken tingting planti.” Em i tok, God i save givim kaikai long ol pisin. Em i save bilasim gut ol plaua. Tasol ol wokboi bilong God i winim tru ol dispela samting, a? Olsem na Jisas i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” Na Jisas i tok: “Olsem na yupela i no ken tingting tumas long tumora.” (Matyu 6:20, 25-34, Nupela Testamen na Ol Sam, 1988) Yumi save yumi mas i gat kaikai, wara, klos, haus, tasol sapos yumi bilip tru long Jehova bai yumi no tingting planti tumas long painim ol dispela samting.
17 Bilong painim Kingdom pastaim, yumi mas bilip long God na tingim ol bikpela samting pastaim. Sampela man i save go daun insait long solwara bilong kisim kina i gat pel insait long en—em wok mani ol i mas mekim bilong lukautim famili, na dispela i bikpela samting. Tasol bikpela samting tru, em win! Sapos ol i no gat samting bilong pulim win insait long solwara, orait sampela taim ol i mas kam antap na pulim win. Na i olsem tu long yumi—yumi mas mekim sampela wok namel long ol man bilong dispela graun bambai yumi ken kisim ol samting bilong helpim skin. Tasol yumi mas putim ol samting bilong spirit i go pas long dispela, long wanem, dispela bai helpim famili long kisim laip. Sapos yumi bilip tru long God, bai yumi no tingting planti tumas long ol samting bilong skin yumi mas kisim. Na sapos yumi ‘wok strong long wok bilong Jehova,’ dispela tu bai helpim yumi, long wanem, taim yumi ‘amamas long Jehova,’ em i save strongim yumi.—1 Korin 15:58; Nehemia 8:10.
Wok Long Putim Hevi Bilong Yu Long Han Bilong Jehova
18 Bilong tingting gut long ol samting bilong spirit, yumi mas wok long putim ol hevi bilong yumi long han bilong Jehova. Oltaim yumi mas tingting: Em i save tingim tru ol wokboi bilong em. Yumi ken tingim wanpela meri Kristen, em man bilong em i no stap gut long em. Bel hevi bilong meri i go bikpela tru na em i no inap slip. (Skelim wantaim Song 119:28.) Tasol long nait em i save putim olgeta hevi bilong em long han bilong Jehova. Em i save kamapim bel bilong em long God na tokim em long olgeta hevi em wantaim tupela liklik pikinini meri bilong em i karim. Taim em i beten strong olsem, em inap slip, long wanem, em i bilip tru olsem Jehova bai lukautim em wantaim tupela pikinini bilong em. Em i katim marit i stret wantaim lo bilong Baibel, na nau em i marit pinis long wanpela elda na em i stap amamas.
19 Yumi lain bilong Jehova i gat sampela rot bilong helpim yumi long karim hevi. Sapos yumi bihainim ol tok bilong Baibel, dispela bai helpim gut yumi. Na God i save givim planti kaikai bilong spirit long yumi long rot bilong “wokboi i gat gutpela tingting,” olsem sampela gutpela tok long nius Wastaua na Kirap! i strongim bel bilong yumi. (Matyu 24:45-47) Spirit bilong God i save helpim yumi. Na beten oltaim i save helpim yumi tru. Ol elda Kristen i redi oltaim long helpim yumi long ol samting bilong spirit na strongim bel bilong yumi.
20 Sapos yumi gat pasin daun na yumi no les, dispela bai helpim yumi tru long karim ol hevi i save painim yumi. Bikpela samting tru, em yumi mas bilip na wetim Jehova, long wanem, taim yumi save em i helpim na stiaim yumi, dispela i strongim bilip bilong yumi. Na taim yumi bilip long God, yumi no tingting planti tumas. (Jon 14:1) Bilip i kirapim yumi long painim Kingdom pastaim na wok strong long wok bilong Bikpela, na dispela inap helpim yumi long karim hevi. Dispela wok bai mekim yumi i stap bel isi namel long ol manmeri ol bai litimapim nem bilong God inap oltaim oltaim. (Song 104:33) Olsem na yumi mas wok yet long putim olgeta hevi bilong yumi long han bilong Jehova.
Bai Yu Bekim Olsem Wanem?
◻ Olsem wanem long dispela tok “wari” long Baibel?
◻ Wanem sampela samting inap helpim yumi long karim hevi?
◻ Pasin daun na no ken les, olsem wanem em inap helpim yumi na yumi no tingting planti long ol hevi bilong yumi?
◻ Bilong karim hevi, bilong wanem yumi mas bilip tru long Jehova?
◻ Bilong wanem yumi mas wok yet long putim olgeta hevi bilong yumi long han bilong Jehova?
[Askim Bilong Stadi]
1. Ol hevi inap mekim wanem long yumi? Yumi ken mekim wanem tok piksa long dispela?
2. Krais Jisas i tok wanem long ol hevi i save painim yumi?
3. Stori long dispela tok “wari” long Baibel. Wanem sampela as bilong ol hevi?
4. (a) Yumi mas ting olsem wanem long ol man na ol hevi bilong ol? (b) Sapos yumi gat hevi na yumi tingting planti, yumi ken mekim wanem?
5. Yumi ken mekim wanem samting i stret wantaim tok bilong Song 55:22?
6. Olsem Filipai 4:6, 7 i tok, beten inap helpim yumi olsem wanem?
7. Olsem wanem ol elda Kristen inap helpim yumi long karim hevi bilong yumi?
8, 9. Tok bilong 1 Pita 5:6-11 inap strongim bel bilong yumi olsem wanem?
10. Namba wan Pita 5:6, 7 i makim wanem tripela pasin inap helpim yumi long karim hevi na yumi no tingting planti oltaim?
11. Olsem wanem pasin daun inap helpim yumi long karim hevi?
12. Taim yumi mekim pasin daun na bihainim tok bilong Hibru 13:5, dispela bai mekim wanem long yumi sapos yumi tingting planti long painim ol samting bilong skin?
13, 14. (a) Olsem wanem Jop i stap olsem gutpela piksa long karim hevi na no ken les? (b) Sapos yumi bilip na wetim Jehova, dispela inap helpim yumi olsem wanem?
15. I gat wanem as na yumi inap bilip tru long Jehova?
16. Krais Jisas i tok wanem long tingting planti long ol samting bilong skin?
17. I gat wanem tok piksa long yumi mas painim Kingdom pastaim?
18. Wanem samting i bin kamap na yumi ken save, sapos yumi putim olgeta hevi bilong yumi long han bilong Jehova, dispela bai helpim tru yumi?
19, 20. (a) I gat wanem ol rot bilong helpim yumi long karim hevi? (b) Yumi mas wok yet long mekim wanem long olgeta hevi bilong yumi?
[Piksa long pes 24]
Yu save bilong wanem Jisas i tok, “Yupela i no ken tingting planti”?