Lotu Bilong Yu—Em Olsem Wanpela Sip Yu No Ken Lusim?
WANPELA sip i stap long solwara na strongpela win na biksi i wok long sakim sip. Boskru i wok strong tru na bai sip i no ken bagarap, tasol ol i no inap. Nau ol i mas tingting: Bai ol i stap wantaim sip o ol bai lusim na ol i no ken bagarap? Sampela tisa bilong lotu i save mekim tok piksa long dispela samting. Yu bin harim tu?
Planti tisa bilong misin Katolik na ol narapela misin tu, ol i save tok piksa long lotu bilong ol i olsem wanpela sip i stap long solwara long taim bilong strongpela win na biksi. Ol i tok, Jisas o Pita i holim stia bilong sip, na dispela sip tasol i rot bilong God long kisim bek ol man. I olsem ol pris i tok: ‘Yu no ken lusim sip. Bipo tu ol bikpela hevi i bin painim misin, tasol em i olsem wanpela sip i winim pinis taim nogut bilong strongpela win na biksi.’ Sampela i save tok, ‘Bilong wanem bai yumi lusim em? I no gat narapela rot. Yumi mas i stap na helpim ol long stiaim sip i go long gutpela hap i no gat si.’
Olsem na planti man bilong ol kain kain lotu ol i save tok: ‘Mi save i gat planti pasin kranki long lotu bilong mi, tasol mi wet long sampela senis i kamap long en. Mi no laik lusim. Mi laik insait long wok bilong helpim em long winim ol hevi bilong en.’ Ol man i gat dispela tingting, ating ol i laikim tru lotu ol i kisim long ol tumbuna bilong ol, o ol i pret long ‘givim baksait’ long en.
Wanpela bikpela tisa bilong misin Katolik i no wanbel long sampela tok bilong misin, em Hans Küng, em i tok: “Olsem wanem? I gutpela mi lusim sip long taim bilong biksi na win na larim ol hevi bilong en i stap long han bilong ol narapela man mi bin stap wantaim ol long sip na ol yet i ken traim stiaim sip na rausim wara i bin kam insait long sip, na ating ol bai hatwok tru long abrusim bagarap?” Em i bekim olsem: “Mi no ken lusim wok bilong mi insait long misin.” Narapela rot, em bilong “lusim dispela misin, long wanem, em i lusim stretpela rot—na senis bilong en, em bikpela laik long bihainim stretpela pasin, na ating bai yumi inap kamap olsem Kristen tru.”—Buk Die Hoffnung bewahren.
Tasol yu ting i gutpela sapos man i laik i stap long dispela sip, olsem misin bilong em, na em i ting God bai marimari na larim olgeta lotu i gat bikpela hap taim tru bilong senisim pasin bilong ol? Em i wanpela bikpela askim yumi mas tingim. Tasol olsem dispela tok piksa i makim, sapos sip i laik go daun insait long solwara na man i laik lusim sip hariap na em i kalap long wanpela liklik bot i no gutpela tumas, ating em inap kisim bagarap long dispela liklik bot tu, a? Orait, yu ting yumi bihainim gutpela tingting sapos yumi strong long stap insait long wanpela misin, maski i olsem em i laik bagarap? Ol misin bilong nau i mekim wanem bilong stretim ol hevi bilong ol? Hamas yia moa na bai God i larim ol i sakim laik bilong em?
[Piksa Kredit Lain long pes 3]
Chesnot/Sipa Press