Bikpela De Bilong Jehova i Klostu
“Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long em oltaim.”—MALAKAI 3:16.
SAMTING nogut tru i kamap! Tulait i bruk long Ogas 6, 1945, na wantu wanpela bikpela taun i bagarap olgeta. Inap olsem 80,000 manmeri i bagarap! Planti tausen i kisim bikpela bagarap na bihain ol i dai! Bikpela paia tru i kamap! Wanpela bom nuklia i kamapim dispela bikpela bagarap. Olsem wanem long ol Witnes Bilong Jehova long taim bilong dispela bikpela bagarap? Gutpela tru, i gat wanpela Witnes tasol i stap long biktaun Hirosima long dispela taim—em i stap long kalabus, long wanem, em i holimpas bilip Kristen bilong em. Ples kalabus i bagarap, tasol brata bilong yumi i no kisim bagarap. Em i tok, dispela bom i tromoi em i go ausait long kalabus. Em dispela wanpela wok tasol bilong bom i gutpela.
2 Taim dispela bom i pairap, em i taim nogut bilong pret, tasol em i samting nating sapos yumi skelim wantaim “bikpela De” bilong Jehova liklik taim bai kamap. Long dispela De bai “olgeta manmeri i pret nogut tru.” (Malakai 4:5) Tru, i gat ol taim nogut i bin kamap bipo na ol manmeri i pret, tasol De bilong Jehova em i taim nogut moa yet.—Mak 13:19.
3 Long taim bilong Noa “olgeta lain manmeri i wok long mekim ol pasin nogut tasol,” na God i tok: “Olgeta manmeri i wok long pait na bikhet tasol, olsem na mi laik bagarapim ol.” (Stat 6:12, 13) Olsem Jisas i tok long Matyu 24:39: “Ol i stap olsem tasol i go inap long taim bikpela tait i kamap na i pinisim olgeta dispela manmeri.” Tasol bilipman Noa, em “man bilong tokaut long stretpela pasin,” em wantaim famili bilong em i save pret long God na ol i abrusim bagarap.—2 Pita 2:5.
4 Jut 7 i tok: “Bipo ol man bilong Sodom wantaim Gomora na ol taun i stap klostu . . . ol i mekim ol narakain pasin pamuk i nogut tru. Olsem na God i mekim save long ol long paia i stap oltaim. Ol dispela samting i bin kamap bipo, yumi ken tingim ol na yumi no ken bihainim pasin nogut bilong ol dispela lain.” Ol i givim baksait long God na ol i bagarap, long wanem, ol i mekim pasin doti tru. Ol lain bilong nau i tingting tumas long mekim olkain pasin pamuk ol i mas lukaut! Tasol Lot wantaim tupela pikinini meri bilong em i pret long God na God i lukautim ol na ol i no bagarap. Olsem tasol bai Jehova i lukautim ol manmeri i lotuim em long nau, na bai ol i no bagarap long bikpela hevi tru i hariap i kam klostu!—2 Pita 2:6-9.
5 Tingim tu ol samting bilong givim tingting long yumi em i bin kamap long taim Jehova i salim ol ami i go bagarapim Jerusalem, em dispela gutpela taun bipo “olgeta manmeri bilong graun ol i laikim tumas.” (Song 48:2) Bagarap i painim Jerusalem long yia 607 paslain long Krais na long yia 70, long wanem, ol manmeri bilong Jerusalem i tok ol i lain bilong God, tasol ol i lusim lotu i tru. Tasol gutpela tru, ol gutpela wokboi bilong Jehova ol i no bagarap. Baibel i tok, bagarap bilong yia 70 (lukim piksa daunbilo) em i “bikpela hevi tru. Stat long taim God i wokim olgeta samting na i kam inap long nau, kain hevi olsem i no bin kamap bipo.” Dispela hevi i pinisim tru pasin bilong ol Juda i lusim God, olsem na dispela samting i no ken “kamap gen.” (Mak 13:19) Tasol dispela strafe bilong God i painim Jerusalem i olsem piksa tasol bilong “bikpela hevi tru” nau i laik painim olgeta manmeri bilong graun.—KTH 7:14.
6 Bilong wanem God i larim ol dispela bikpela hevi i kamap na bikpela lain tru ol i bagarap? Long taim bilong Noa, na long Sodom na Gomora, na Jerusalem, Jehova i givim strafe long ol manmeri em ol i mekim ol pasin nogut tasol, na ol i bagarapim dispela gutpela graun na mekim ol pasin doti, na ol i lusim, o sakim, lotu i tru. Taim bilong givim strafe long olgeta manmeri bilong dispela taim nau em i kam klostu pinis.—2 Tesalonaika 1:6-9.
“Long Taim Bilong Las De”
7 Ol dispela bagarap bilong bipo i makim bikpela hevi tru em bai mekim olgeta manmeri i pret na 2 Pita 3:3-13 i stori long en. Aposel Pita i tok: “Bikpela samting yupela i mas save long en, em i olsem. Long taim bilong las de, ol man bilong tok bilas bai i kamap, na ol bai i bihainim laik nogut bilong bel bilong ol.” Bihain Pita i stori long taim bilong Noa na em i tok: “God i tok na em i mekim . . . bikpela tait i karamapim dispela graun, na graun i bagarap olgeta. Na nau, long wankain tok bilong God tasol, skai na graun i stap na i wetim paia i kamap na i bagarapim ol. Skai na graun i wetim bikpela de bilong kot i kamap, na ol man i bin givim baksait long God, ol bai i bagarap olgeta.” Dispela bikpela hevi tru bai i winim olgeta bikpela hevi bilong bipo. Taim em i pinis, Kingdom bilong Krais ol man i wetim longtaim bai kamapim nupela samting—em “nupela skai na nupela graun, na stretpela pasin tasol bai i stap long en.” Gutpela samting tru bai kamap!
8 Long taim bilong yumi ol samting nogut moa yet i wok long kamap. God i no as bilong bikpela bagarap bilong Hirosima, tasol yumi ken ting dispela tu em i wanpela ‘samting bilong mekim ol man i pret nogut tru’ em Jisas i tok bai kamap olsem mak bilong taim bilong las de. (Luk 21:11) Namba wan bom nuklia i bagarapim Hirosima na ol man i pret yet long ol samting nogut bilong nuklia. Olsem na long Novemba 29, 1993 i gat het-tok long wanpela nius olsem: “Ol Gan i Ros Pinis, Tasol Ol Bom Nuklia i Redi i Stap.” (The New York Times) Na long nau ol man bilong narapela narapela lain na skin na pasin ol i wok yet long pait na bagarapim planti man. Bipo ol soldia tasol i save bagarap long pait, tasol long nau planti man nating (inap 80 pesen) i bagarap na planti milion manmeri i ranawe lusim ples bilong ol.
9 Long bipo na long nau tu, ol pris pasto i save “pren wantaim ol pasin bilong graun”; ol i save insait long ol bikpela pait na ol pait nogut bilong daunim gavman. (Jems 4:4) Sampela i wok wantaim ol bikpela bisnisman i mangal long mani em ol i wokim planti samting bilong pait na mekim bikpela wok bisnis long ol drak. Wanpela nius (The New York Times) i stori long kain bisnisman olsem bilong Saut Amerika em ol birua i kilim em i dai, na nius i tok: “Em i giaman long mekim wok bisnis i no brukim lo na givim bikpela mani bilong helpim ol man, tasol em i wok hait long maketim ol drak. Em i gat program long redio, na planti taim ol pris Katolik i raun wantaim em.” Narapela nius (The Wall Street Journal) i tok, dispela man i bagarapim ol milion manmeri i kalabus long ol drak, na em yet i tok na ol i kilim i dai sampela tausen manmeri. Wanpela nius (The Times) bilong Landon i tok: “Planti taim ol dispela kilman i baim ol pris bilong mekim Misa bilong tok tenkyu . . . long wankain taim olsem ol pris long narapela haus lotu i mekim Misa bilong man ol i kilim i dai.” Em pasin nogut tru!
10 Yumi no save wanem kain pasin nogut ol man i stap aninit long strong bilong ol spirit nogut bai kamapim yet long graun. Olsem 1 Jon 5:19 i tok: “Dispela graun olgeta em i stap aninit long strong bilong Satan.” Long nau “bikpela hevi” i kamap long graun na solwara, long wanem, “Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:12) Tasol gutpela tru, Rom 10:13 i tok promis olsem “olgeta manmeri i askim Bikpela long helpim ol, em bai i kisim bek ol.”
God i Kam Bilong Mekim Kot
11 Tok profet bilong Malakai i helpim yumi long save long ol samting liklik taim bai painim ol man bilong graun. Malakai em i laspela profet Hibru paslain long taim bilong ol Kristen. Long 607 paslain long Krais, Jerusalem i bagarap na bikpela hevi i painim ol Israel. Tasol 70 yia bihain, Jehova i marimari long ol na kisim ol i go bek long kantri bilong ol. Tasol 100 yia moa na ol i lusim gen Jehova na mekim ol pasin nogut. Ol i bagarapim nem bilong Jehova, na givim baksait long ol stretpela lo bilong em, na ol i nogutim haus lotu bilong em, long wanem, ol i bringim ol animal i aipas o lek nogut o sik bilong mekim ofa long en. Ol i rausim ol meri ol i maritim taim ol i yangpela, bai ol i ken maritim ol meri haiden.—Malakai 1:6-8; 2:13-16.
12 I gat wok long mekim ol i kamap klin. Malakai 3:1-4 i stori long dispela wok. Olsem ol Israel long bipo, ol Witnes Bilong Jehova long nau ol i mas kamap klin, olsem na dispela tok bilong Malakai i sutim ol tu. Taim Namba Wan Pait i laik pinis, sampela Sumatin Bilong Baibel, em nem bilong ol Witnes long dispela taim, ol i no klia olgeta long ol pasin bilong graun. Long yia 1918, Jehova i salim i kam “ensel bilong autim tok bilong kontrak bilong [em],” em Krais Jisas. Em i go long tempel spirit God yet i putim na rausim ol pasin doti bilong graun long liklik lain i lotuim God na ol i kamap klin. Jehova i mekim tok profet na askim olsem “husat inap winim kot” taim ensel o wokman bilong em i kam? “Taim em i kamap ples klia, husat bai i no inap lus? Em bai i kam olsem paia i hat tru na i save kukim silva na gol bilong rausim pipia bilong en. Na em i olsem strongpela sop bilong wasim laplap samting i doti tru. Bai em i kam bilong skelim pasin bilong olgeta manmeri olsem man i save kukim silva long paia na rausim pipia bilong en. Olsem tasol wokman bilong Bikpela bai i rausim pasin doti bilong ol pris [lain pris God i makim long spirit holi] na bai ol inap bringim ol gutpela ofa long Bikpela.” Ol i kamap klin pinis na mekim olsem!
13 Lain pris God i makim long spirit holi ol inap olsem 144,000. (KTH 7:4-8; 14:1, 3) Tasol olsem wanem long ol narapela Kristen long nau ol i dediket pinis? Lain bilong ol i kamap bikpela inap sampela milion, ol i ‘bikpela lain.’ Ol tu i mas lusim ol pasin bilong graun na kamap klin. Ol i “wasim ol klos bilong ol long blut bilong Pikinini Sipsip, na ol klos i kamap waitpela.” (KTH 7:9, 14) Ol i bilip strong long ofa bilong Pikinini Sipsip, Krais Jisas, olsem na ol inap i stap klin long ai bilong Jehova. Em i tok promis olsem ol bai abrusim bagarap long taim bilong bikpela hevi tru, em taim nogut bilong mekim ol manmeri i pret, em bikpela De bilong Jehova.—Sefanaia 2:2, 3.
14 Lain remnan bilong lain pris wantaim dispela bikpela lain ol i mas tingim sampela tok moa God i mekim, olsem: “Mi bai kam bilong skelim pasin bilong yupela. Na kwiktaim bai mi kotim ol man i save wokim posin na ol man i save bagarapim marit na ol man i save autim tok giaman long kot na ol bosman i no save baim gut ol wokman bilong ol na ol man i save trikim na kisim olgeta samting bilong ol meri, man bilong ol i dai pinis, na bilong ol pikinini, papa bilong ol i dai pinis, na bilong ol man bilong ol arapela kantri. Ol man i mekim dispela olgeta kain pasin, ol i no save stap aninit long mi, olsem na bai mi kotim ol. . . . Mi tasol mi Bikpela na mi no save senisim tingting bilong mi.” (Malakai 3:5, 6) Tru tumas, ol lo bilong Jehova i no save senis, olsem na lain bilong em long nau i mas pret na daun long Em; ol i mas sakim olkain pasin bilong lotuim god giaman, na mekim tok i tru, na wokabaut stret, na givim samting bilong helpim ol narapela, na wok oltaim long kisim ol gutpela pasin Kristen.—Kolosi 3:9-14.
15 Ol man i lusim ol stretpela pasin bilong Jehova, em i marimari na tokim ol: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela.” Sapos ol i tok: “Mipela i mas mekim wanem samting bilong mipela i ken i kam bek long yu?” em i bekim tok olsem: “Yupela i save stilim ol samting bilong mi.” Na sapos ol i tok: “Bilong wanem yu tok olsem mipela i stilim ol samting bilong yu?” Jehova i tok, ‘Long wanem, yupela i no givim ol gutpela ofa long mi long haus lotu.’ (Malakai 3:7, 8) Yumi insait long lain bilong Jehova, olsem na yumi mas i gat laik long givim gutpela ofa, olsem givim gutpela hap strong na save na mani samting bilong yumi bilong mekim wok bilong Jehova. Yumi no laik “stilim” samting bilong God, olsem na yumi save ‘painim Kingdom pastaim na stretpela pasin bilong em.’—Matyu 6:33.
16 I gat gutpela pe bilong olgeta man i lusim ol pasin bilong dispela graun, olsem pasin bilong tingting long helpim ol yet tasol na laikim tumas mani kago. Long Malakai 3:10-12, Jehova i tok: “Yupela i mekim olsem na bai mi ken givim planti gutpela samting long yupela na yupela i no ken sot.” Long olgeta man i pilim tru gutpela pasin bilong Jehova, em i tok promis olsem ol bai i gat planti gutpela samting bilong spirit na karim planti kaikai. Na em i tok moa olsem, ‘Bai olgeta narapela lain i lukim yupela na i tok, “Ol i stap gut tru. Ol i amamas moa yet.” ’ Dispela gutpela samting i kamap pinis namel long ol milion manmeri bilong God long olgeta hap bilong graun long nau, em ol i tenkyu long em, a?
Ol Man i Holimpas Bilip Ol i Stap Long Buk Bilong Laip
17 Nau mipela laik stori long ol brata sista bilong yumi long Ruanda ol i holimpas bilip. Oltaim ol i save kisim ol gutpela ofa bilong spirit i kam long haus lotu spirit bilong Jehova. Olsem: Long “God i Skulim Yumi” Kibung Distrik bilong ol long Disemba 1993, wok bilong ol 2,080 pablisa i karim kaikai na 4,075 manmeri i kam bung. Inap 230 nupela Witnes i kisim baptais, na klostu 150 bilong ol i bin mekim wok painia haptaim long mun bihain.
18 Taim tupela lain bilong kantri i kirap long pait long Epril 1994, ol i kilim i dai olsem 180 brata sista; ol i kilim i dai tu wasman bilong nambawan biktaun Kigali wantaim famili bilong em olgeta. I gat 6-pela brata sista bilong tanim tok ol i stap long ofis bilong Sosaiti Was Taua long Kigali, 4-pela bilong lain Hutu na tupela bilong lain Tutsi. Inap sampela wik ol i wok i stap, maski ol man i tok long kilim ol i dai, i go inap long tupela Tutsi i ranawe na ol i kilim tupela long ples ol i save pasim ol man. Bihain narapela 4-pela i kisim sampela masin kompyuta i stap yet na ol i ranawe i go long Goma, long Saier, na ol i wok yet long tanim ol tok bilong Wastaua long tok Kinyaruanda.—Aisaia 54:17.
19 Ol dispela Witnes i ranawe, maski ol i stap nogut tru, ol i save askim ol brata long kaikai bilong spirit pastaim na kaikai bilong skin bihain. Ol gutpela brata bilong sampela kantri ol i mekim bikpela hatwok bilong kisim ol samting i go long ol. Ol dispela ranaweman i autim tok na stretim gut ol samting, maski i gat bikpela hevi, na dispela i litimapim tru nem bilong Jehova. Ol i wok yet long givim gutpela ofa bilong helpim lotu bilong Jehova. Ol i kamapim klia tru ol i bilip olsem Pol i tok long Rom 14:8: “Sapos yumi stap laip, em i samting bilong Bikpela. Na sapos yumi dai, em tu i samting bilong Bikpela. Olsem na sapos yumi stap laip, o sapos yumi dai, yumi bilong Bikpela tasol.”
20 Jehova i save tingim olgeta manmeri i stap gut long wok bilong em. Profet Malakai i tok moa olsem: “Bihain ol manmeri i save stap aninit long Bikpela na i harim tok bilong en, ol i toktok long ol yet, na Bikpela i harim toktok bilong ol. Na Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long em oltaim.”—Malakai 3:16.
21 Em bikpela samting tru long nau long yumi mas litimapim nem bilong Jehova na pret long em! Sapos yumi mekim olsem, taim em i skelim ol man long kot, bai yumi no ken bagarap olsem ol manmeri ol i laikim na helpim ol pasin samting bilong dispela graun. Kamapim Tok Hait 17:8 i tok “nem bilong ol i no i stap long buk bilong laip.” Nambawan bikpela nem i stap long buk bilong laip em nem bilong Krais Jisas, em i Nambawan Man bilong bringim yumi long rot bilong laip, na em i Pikinini bilong God yet. Matyu 12:21 i tok: “Ol manmeri bilong ol arapela lain bai ol i bilip long em na wetim em i helpim ol.” Olgeta man i bilip long ofa bilong em ol inap tru long kisim laip i stap oltaim. Taim ol i raitim nem bilong yumi tu long buk bilong laip bai yumi kisim bikpela blesing!
22 Taim God i skelim pasin bilong ol man, olsem wanem long ol wokboi bilong Em? Long Malakai 3:17, 18, em i tok: “Bai mi marimari long ol olsem wanpela papa i save marimari long pikinini i mekim wok bilong papa. Olsem na long dispela taim bai yupela i ken lukim gen pasin mi save mekim long ol stretpela manmeri i save bihainim mi, na pasin mi save mekim long ol man nogut, em ol man i save sakim tok bilong mi.” Tupela lain bai i stap ples klia tru: ol man nogut, em ol i bilong bagarap olgeta, na ol stretpela man, em God i orait long givim laip oltaim long ol aninit long Kingdom. (Matyu 25:31-46) Long dispela rot bikpela lain manmeri i kain olsem sipsip bai abrusim bagarap long bikpela De bilong Jehova.
Yu Inap Tingim?
◻ Jehova i givim strafe long wanem ol lain long taim bilong Baibel?
◻ Olsem wanem ol samting i kamap long nau i wankain olsem bilong bipo?
◻ Husat ol i bin kamap klin na dispela i truim tok profet bilong Malakai?
◻ Ol i raitim nem bilong husat long buk bilong God bilong tingim ol?
[Askim Bilong Stadi]
1, 2. Malakai i toksave long wanem bikpela de em bai mekim ol manmeri i pret nogut tru?
3. Paslain long Bikpela Tait, olsem wanem long pasin bilong “olgeta lain manmeri” na lain bilong Noa?
4. Ol samting i bin painim Sodom na Gomora i givim wanem tok lukaut long ol man?
5. Strafe i bin painim Jerusalem i givim wanem save long yumi?
6. Bilong wanem Jehova i bin larim ol dispela bikpela hevi i kamap?
7. (a) God i givim strafe long sampela lain long bipo na dispela i makim wanem samting? (b) Wanem gutpela samting bai kamap?
8. Olsem wanem ol samting nogut moa yet i wok long kamap long taim bilong yumi?
9. Ol hetman bilong lotu i bin mekim wanem na ol i pren wantaim dispela graun?
10. Yumi mas ting olsem wanem long ol pasin nogut i kamap long nau?
11. Ol Israel i mekim wanem na dispela i as bilong tok profet bilong Malakai?
12, 13. (a) Wanem samting i mekim na lain pris God i makim long spirit holi i stap doti long ai bilong em na ol i mas kamap klin? (b) Bikpela lain tu i kamap klin na dispela i helpim ol olsem wanem?
14. Taim ol manmeri bilong God long nau i wok long kamap olsem nupela man, ol i mas bihainim wanem tok?
15. (a) Jehova i marimari na mekim wanem tok? (b) Yumi ken mekim wanem na bai yumi no “stilim” samting bilong Jehova?
16. Wanem gutpela tok bilong strongim yumi i stap long Malakai 3:10-12?
17-19. (a) Bikpela hevi i kamap long Ruanda i bin mekim wanem long ol brata i stap long dispela kantri? (b) Ol dispela brata sista i stap gut long God ol i bilip long wanem samting na ol i wok i go yet?
20, 21. (a) Nem bilong wanem ol man i no i stap long buk bilong Jehova bilong tingim ol? (b) Nem bilong husat ol i stap long buk? Ol i mekim wanem na nem bilong ol i stap long buk?
22. Long taim bilong Jehova long givim strafe, wanem tupela lain bai stap ples klia?