Ol Hetman i Stap Long Ples Spirit

HUSAT i bosim graun? I gat wanpela man i stap antap na em i mekim? O God i larim ol man i lukautim ol yet? Bilong painim bekim bilong ol dispela askim, yumi ken tingim wanpela samting i bin kamap long taim Jisas i mekim wok bilong em long graun.

Jisas i baptais na bihain liklik wanpela spirit ol man i no inap lukim, em Satan, em i traim Jisas. Baibel i stori long wanpela traim, olsem: “Satan i kisim Jisas gen na i go long wanpela maunten i antap moa. Na Satan i soim em olgeta strongpela kantri bilong dispela graun wantaim ol gutpela samting bilong ol.” (Matyu 4:⁠8) Bihain Satan i tokim Jisas: “Bai mi givim yu strong bilong bosim olgeta dispela kantri, na bai yu gat biknem tru. Olgeta dispela samting ol i bilong mi pinis. Na sapos mi laik givim long wanpela man, orait mi ken givim. Sapos yu brukim skru na lotu long mi, orait bai mi givim yu dispela olgeta samting.”​—⁠Luk 4:​6, 7.

Satan i tok em i holim strong bilong bosim olgeta kantri, o gavman, bilong dispela graun. Olsem wanem? Jisas i tok Satan i no holim dispela strong? Nogat, em i no tok olsem. Long narapela taim Jisas i makim klia olsem Satan i holim dispela strong, long wanem, Jisas i kolim Satan olsem “hetman i save bosim dispela graun.”​—⁠Jon 14:30.

Baibel i tok, Satan em i wanpela ensel nogut i gat bikpela strong. Aposel Kristen Pol i stori long Satan taim em i stori long “olgeta spirit nogut,” na em i tok “ol i save bosim graun long dispela taim bilong tudak.” (Efesus 6:​11, 12) Na aposel Jon i tok: “Dispela graun olgeta em i stap aninit long strong bilong Satan.” (1 Jon 5:19) Buk Kamapim Tok Hait long Baibel i tok, Satan “i giamanim olgeta manmeri bilong graun.” (KTH 12:⁠9) Na Buk Kamapim Tok Hait i tok piksa olsem Satan em i snek i givim “strong bilong em yet” long olgeta gavman politik bilong graun, na em i mekim ol “i stap king olsem em yet.”​—⁠KTH 13:⁠2.

Ol samting i kamap long graun, dispela tu i makim olsem i gat wanpela man nogut i gat strong na em i stiaim ol man long mekim ol samting i bagarapim ol. Em dispela as tasol na ol gavman bilong graun i no inap kamapim gutaim, na em dispela as tasol na ol manmeri i save birua na pait na kilim i dai planti man. I no gat narapela as, a? Wanpela meri i lukim ol manmeri bilong wanpela kantri i pait na bagarapim nogut tru lain bilong ol yet, na em i tok: “Olsem wanem dispela samting nogut tru inap kamap? I no pasin birua tasol i kamapim. Wanpela spirit nogut i mekim na ol man i kirap bagarapim nogut tru ol narapela man.”

Wanpela Spirit i Stap Tru na Em i Birua Long God

Long nau planti man i no bilip olsem Satan i stap tru. Tasol em i no olsem pasin nogut tasol i stap insait long ol man, olsem sampela man i ting. Baibel yet na ol samting i kamap long graun i makim klia olsem em i wanpela spirit i stap tru. Na em i birua tru long God Jehova. Tasol Satan i no bikpela olsem God. God Jehova em i Man bilong wokim olgeta samting, olsem na i stret em i stap Bos bilong olgeta samting em i bin wokim.​—⁠KTH 4:11.

God i no wokim wanpela spirit nogut i birua long em. Tasol wanpela ensel i kisim laik nogut; em i laik bai ol man i mas lotu long em. Tasol i stret ol i mas lotu long Jehova. (Jop 38:7; Jems 1:​14, 15) Dispela laik nogut i kirapim em long mekim pasin bikhet long God. Taim em i bikhet olsem, em i kamap Satan (olsem “birua”) na em i kamap man bilong krungutim gutnem bilong God. Taim yu tingim ol dispela samting, ating yu laik save bilong wanem God i larim Satan i stap na bosim graun.

As na God i Larim Satan i Bosim Graun

Yu tingim tok Satan i bin mekim long Jisas long strong bilong bosim graun? Satan i tok: “Bai mi givim yu strong bilong bosim olgeta dispela kantri . . . Olgeta dispela samting ol i bilong mi pinis.” (Luk 4:⁠6) Dispela tok i makim olsem God i larim Satan na Satan i holim dispela strong. Tasol bilong wanem God i larim Satan?

Bilong save long bekim bilong dispela askim, yumi mas tingim ol samting i bin kamap long Iden taim Satan i kirap mekim wok bilong bosim graun. Long Iden Satan i tok olsem God i bosim nogut ol man, long wanem, em i pasim namba wan man na meri, Adam na Iv, long kisim gutpela samting. Satan i tok, sapos tupela i kisim pikinini bilong diwai God i tambuim, bai tupela i kamap fri na Jehova i no ken bosim ol moa. Bai tupela i kamap olsem God yet!​—⁠Stat 2:​16, 17; 3:​1-5.

Satan i mekim dispela tok giaman na pulim Iv, na long rot bilong Iv em i kirapim Adam tu long brukim lo bilong God. Long dispela rot tupela i kam aninit long strong bilong Satan na em i kamap bos bilong ol. Em i kamap olsem god bilong ol, em i birua long Jehova. Tasol Adam tupela Iv i no kamap fri. Ol i kamap wokboi bilong Satan na bilong sin na dai.​—⁠Rom 6:16; Hibru 2:​14, 15.

Jehova inap bihainim stretpela pasin bilong em na kilim i dai wantu tasol Satan na tupela hia i bin kirap long bihainim em. (Lo 32:⁠4) Tasol i gat bikpela tok bilong stretim. I olsem Satan i tok pasin bilong Jehova long bosim ol man i no stret. Jehova i bihainim gutpela tingting na larim hap taim i stap bilong kamapim klia olsem, sapos ol man i lusim em ol samting nogut bai painim ol. Jehova i larim ol dispela bikhetman i stap pastaim, na em i larim Adam na Iv i kamapim ol pikinini.​—⁠Stat 3:​14-19.

Planti pikinini bilong Adam ol i no bin daun long wok bos bilong Jehova, tasol ol samting Jehova i mekim long ol manmeri i lotuim em i kamapim klia olsem em i mekim gutpela wok bos i win tru. Ol man i daun long Jehova na bihainim tok bilong em, ol i stap amamas tru na bel isi. Tasol ol man i stap aninit long ol gavman bilong graun, em Satan i bosim, ol i stap nogut tru na bel bilong ol i no stap isi. Tru tumas, “sampela bikman i wok long daunim ol arapela manmeri na mekim nogut long ol.” (Saveman 8:⁠9) Satan i bosim dispela graun, olsem na ol gavman bilong graun i no bin helpim ol man long i stap gutpela na i stap amamas oltaim. Tasol i gat as na yumi ken wetim gutpela samting i kamap.

Satan i Gat Sotpela Taim Tasol!

Tru, Satan i stiaim ol samting hia long graun, tasol em bilong liklik taim tasol. Jehova i no ken larim Satan i bosim graun i go longtaim! Klostu nau bai em i pasim Satan na bai Satan i no inap mekim wok moa. Nupela bos bai kirap bosim graun, em stretpela king God yet i makim. Dispela King em Krais Jisas. Kamapim Tok Hait i stori long em i kamap King long heven olsem: “Bikpela bilong yumi [Jehova] wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun.” (KTH 11:15) Ol yia Baibel i makim na truim bilong ol tok profet bilong en i kamapim klia olsem Jisas i bin kamap King long heven long yia 1914.​—⁠Matyu 24:​3, 6, 7.

Baibel i stori long ol samting i kamap bihain liklik long taim Jisas i kamap King. Baibel i tok: “Bikpela pait i kirap long heven. Maikel [Krais Jisas] wantaim ol ensel bilong en ol i pait long dispela traipela snek. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.”​—⁠KTH 12:​7-9.

Taim ol i rausim Satan long heven, wanem samting i kamap? Ol lain long heven ol i amamas, tasol olsem wanem long ol manmeri i stap long graun? Kamapim Tok Hait 12:12 i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Tru tumas, taim ol i rausim Satan long heven, bikpela hevi i kamap long graun. Wanpela buk i tok: “Bikpela hevi bilong Pait Bilong Fopela Yia long 1914-1918 . . . i soim ol lain long hap bilong Wes ol i no inap lukautim ol yet na bai pasin longlong na laik nogut bilong ol i no ken bagarapim ol. Ol i no kisim bek strong bihain long dispela pait.”​—⁠The Columbia History of the World.

Strong bilong ol lain bilong nau i pinis na planti hevi moa yet i painim ol. Jisas i tok: “Ol man bilong sampela lain bai i kirapim pait long ol narapela narapela lain. . . . Long sampela hap ol bai i gat taim bilong bikpela hangre, na graun bai i guria.” Na em i tok, bai i gat ol bikpela sik tu. (Matyu 24:​7, 8; Luk 21:11) Na Baibel i tok, long “taim bilong las de” bilong dispela graun Satan i bosim, bai planti man i “laikim ol yet tasol, na ol bai laikim tumas long kisim mani. . . . Ol bai i sakim tok bilong papamama, na . . . taim ol i kros, bai i no gat rot bilong pinisim kros bilong ol.” Na bai ol manmeri i “laikim tumas ol kain kain pasin bilong amamas bilong dispela graun, na ol bai i no laikim God.”​—⁠2 Timoti 3:​1-5.

Ol bikpela pait, na bikpela sik, na hangre, na guria, na pasin bilong ol man i go nogut​—⁠olgeta dispela samting i bin kamap moa yet bihain long yia 1914, olsem Baibel i tok profet pinis. Ol dispela samting i makim olsem ol i rausim pinis Satan​—⁠em i birua bilong God na ol man na em i belhat nogut tru​—⁠na tromoi em i kam daun klostu long graun, na nau em inap kamapim belhat bilong em long dispela hap tasol. Tasol Baibel i kamapim klia olsem klostu nau bai God i no larim Satan i mekim moa ol wok bilong em. Satan i gat “sotpela taim tasol”​—⁠em bai stap inap long Armagedon, taim God i bagarapim dispela graun Satan i bosim.

Wanem samting bai painim Satan? Aposel Jon i tok: “Mi lukim wanpela ensel i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu. Em i holimpas dispela bikpela snek, em snek bilong bipo tru, em Satan, dispela ‘Man I Save Kotim Olgeta Man.’ Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong.” (KTH 20:​1-3) Em gutpela tru, a? Bai olgeta hevi bilong ol man i pinis!

Stap Amamas Aninit Long Kingdom

Taim Satan i kalabus pinis, Kingdom bilong God long han bilong Krais Jisas bai kirap bosim ol samting hia long graun. Bai i no gat planti gavman long graun; wanpela gavman tasol bilong heven bai stap na bosim olgeta hap bilong graun. Bai i no gat pait moa; gutaim bai kamap long olgeta hap. Taim Kingdom bilong God i bosim graun, bai olgeta man i sindaun gut wantaim olsem bikpela lain brata, na bai narapela i laikim tru narapela.​—⁠Song 72:​7, 8; 133:1; Daniel 2:44.

Jisas bai stap wanem kain king? Taim em i stap long graun em i kamapim klia olsem em i laikim tru ol manmeri. Jisas i sori long ol manmeri i stap hangre na em i givim kaikai long ol. Em i oraitim ol sikman, na opim ai bilong ol aipas na maus bilong ol mauspas, na em i stretim bek skin bilong ol lek nogut. Na em i kirapim bek sampela man i dai pinis! (Matyu 15:​30-38; Mak 1:34; Luk 7:​11-17) Ol dispela mirakel i makim ol gutpela samting tru em bai mekim taim em i stap King. Bai yumi amamas tru yumi gat gutpela king em inap helpim yumi gut olsem!

Ol manmeri i daun long wok king bilong Jehova ol bai kisim planti blesing inap oltaim oltaim. Tok promis bilong Baibel i olsem: “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” (Aisaia 35:​5, 6) Aposel Jon i stori long dispela gutpela taim na em i tok: “Na long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. . . . Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ ”​—⁠KTH 21:​3, 4.

Ol gutpela samting yumi kisim long wok king bilong God Jehova long rot bilong Pikinini bilong em, Krais Jisas, bai stretim tru ol hevi yumi bin karim nau long dispela graun Satan i bosim. Long nupela taim God i tok promis long en, bai ol man i no ken tingting moa olsem ‘Husat tru i bosim graun?’ (2 Pita 3:13) Ol manmeri i bihainim tok bai ol i stap amamas na i stap gutpela hia long graun aninit long tupela gutpela Hetman i stap long ples spirit, em Jehova na Krais Jisas. Olsem wanem long yu? Yu laik tru long kisim laip long graun aninit long ol?

[Piksa long pes 7]

Ol manmeri bai i stap gutpela long graun aninit long Kingdom bilong God

[Piksa Kredit Lain long pes 4]

NASA photo