Mekim Gut Bel Bilong Man Em ‘Tingting Bilong Em i Bagarap’

LONG nau, ol man bilong dispela graun em Satan i bosim, “ol i no save sem moa long pasin ol i save mekim.” (Efesus 4:19; 1 Jon 5:19) Pasin pamuk na bagarapim marit i pulap long graun. Long planti kantri inap olsem 50 pesen bilong ol marit ol i katim marit. Planti man i orait long pasin bilong sodom. Na planti taim ol nius i stori long reip. Lain i wok bisnis long ol piksa nogut bilong pasin sem ol i kisim planti bilion kina long en.​—⁠Rom 1:​26, 27.

Pasin bilong mekim pasin sem long ol pikinini i no gat asua, dispela pasin em i nogut tru. Dispela pasin i bilong Satan, wankain olsem ol save bilong dispela graun​—⁠em tu i bilong Satan. (Jems 3:15) Wanpela nius (Time) i tok, long Amerika “long olgeta yia, ol tisa na dokta i ripot long ol polis long 400,000 pikinini em ol man i bin mekim pasin sem long ol.” Taim kain man o meri olsem i go bikpela, planti ol i bel hevi yet na tingting wantaim bel bilong ol i bagarap stret​—⁠i olsem ol i karim bikpela pen! Baibel i tok: “Sapos man i gat sik na tingting bilong en i stap strong, orait em inap winim dispela sik. Tasol sapos tingting bilong man i bagarap, olsem wanem bai em i kamap gutpela gen?”​—⁠Sindaun 18:⁠14.

Olgeta kain man, ol man i “bel hevi” na ol man em “strong bilong ol i pinis,” ol i save amamas long harim ol gutpela tok bilong Kingdom bilong God. (Aisaia 61:​1-4) Olsem na planti man em bel bilong ol i bagarap, ol i save bihainim dispela singaut: “Wanem man nek bilong en i drai, em i mas kam. Man i laik dring, em i mas kam na kisim wara bilong givim laip, em i olsem presen bilong God.” (KTH 22:17) Kongrigesen Kristen inap mekim gut bel bilong ol. Ol i amamas long kisim save olsem liklik taim na ol hevi na pen bai pinis olgeta. (Aisaia 65:17) Inap long dispela taim, i mas i gat sampela bilong “mekim gut” long ol na “strongim bel” bilong ol. Olsem na Pol i tokim ol Kristen: “Strongim bel bilong ol man i save pret na . . . helpim ol man i no strong. Na yupela i mas isi isi long olgeta man.”​—⁠1 Tesalonaika 5:⁠14.

Ol i “Kisim Bek Sampela Tingting i Stap Hait”

Inap sampela yia pinis ol man i hatwok long save long as bilong dispela kain “bel hevi” em sampela man i bin kisim. Ol i bin “kisim bek wanpela tingting i stap hait,” na ol i tok, sampela man i bin mekim pasin sem long ol taim ol i liklik yet. Sampela ol i no save tingting olsem sampela man i bin mekim pasin sem long ol, tasol bihain, wantu tasol, ol i kisim tingting olsem. Olsem wanem? Sampela long kongrigesen Kristen i bin kisim kain tingting olsem? I gat olsem long sampela kantri, na ol dispela man i dediket pinis ating sampela taim ol i save bel hevi o kros o sem o pilim olsem ol i stap wanpis. Olsem Devit, ating ol i pilim olsem ol i stap longwe long God na ol i singaut: “Bikpela, bilong wanem yu sanap i stap longwe long mi? Bilong wanem yu save hait long mi long taim nogut?”​—⁠Song 10:⁠1.

Ol dokta bilong oraitim sik bilong tingting, ol i no save gut long planti samting bilong dispela “tingting i stap hait.” Tasol dispela “tingting” inap mekim na Kristen i dediket pinis em i no stap strong moa long ol samting bilong spirit. Olsem na yumi mas larim Tok Bilong God i stiaim tingting bilong yumi long ol dispela samting. Tok bilong Baibel inap ‘mekim tingting bilong yumi i klia, na bai yumi save long as bilong olgeta tok.’ (2 Timoti 2:7; 3:16) Na Baibel i helpim ol man i gat dispela hevi long bilip olsem Jehova “em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi. Long olgeta hevi i kamap long mipela, em i save mekim isi bel bilong mipela.”​—⁠2 Korin 1:​3, 4.

Tru Dispela Hevi i Bin Painim Ol?

Ol man bilong dispela graun ol i tok pait long dispela “tingting” em i wanem samting, na samting ol manmeri i tok i bin painim ol bipo i bin kamap tru o nogat. Ol Witnes Bilong Jehova ol i “no bilong dispela graun,” olsem na ol i no insait long dispela tok pait. (Jon 17:16) Ol nius i tok, dispela “tingting” em ol manmeri i kisim long samting nogut i bin painim ol bipo, sampela taim em i bin kamap tru. Olsem: Frank Fitzpatrick, em i mekim wok insurens, em i “kisim bek tingting” long pasin nogut wanpela pris i bin mekim long em bipo. Bihain, klostu 100 ol narapela, ol tu i tokaut olsem dispela pris i bin mekim pasin nogut long ol tu. Na ol man i tok, dispela pris yet i bin tokaut olsem em i bin mekim dispela rong.

Tasol dispela “tingting” man i kisim long samting i bin painim em taim em i pikinini, planti taim i no gat wanpela samting bilong kamapim klia olsem dispela samting i bin kamap tru. Sampela i tok ol i tingim bek wanpela man i bin mekim pasin sem long ol o ples stret dispela samting nogut i bin kamap. Tasol bihain, sampela samting i bin kamap na i kamapim klia olsem dispela samting nau ol i tingim, i no bin kamap tru.

Helpim Ol

Tasol yumi ken mekim wanem bilong mekim gut bel bilong man em ‘tingting bilong em i bagarap’ long wanem “sampela tingting i stap hait” i kamap ples klia. Tingim tok piksa bilong Jisas long gutpela man bilong Samaria. Ol stilman i paitim wanpela man na kisim olgeta samting bilong em. Taim dispela man Samaria i kamap long em, bel bilong em i sori tru long em. Man Samaria i mekim wanem? Em i strong long dispela man i mas kamapim stori bilong olgeta liklik liklik samting nogut i bin painim em? Na em i laik save long ol dispela stilman ol i husat na bai kwiktaim em i ken raunim ol? Nogat. Em i no mekim olsem. Dispela man i bagarap! Olsem na long gutpela pasin sori, man Samaria i pasim ol sua bilong em na bringim em i go long wanpela haus pasindia i stap klostu bambai em i ken kisim bek strong bilong em.​—⁠Luk 10:​30-37.

Tru, man o meri em narapela i bin mekim pasin sem long em taim em i pikinini yet na ‘tingting bilong em i bagarap,’ dispela em i narapela kain long man em skin bilong en i bagarap. Tasol tupela kain samting i save givim bikpela pen na hevi long man. Olsem na samting man bilong Samaria i mekim bilong helpim dispela Juda i bagarap, i helpim yumi long save long ol samting yumi ken mekim bilong helpim ol wanbilip bilong yumi ol i gat hevi. Namba wan samting yumi mas mekim, em yumi mas mekim gut bel bilong em na helpim em long orait bek.

Satan i mekim nogut long gutpela man Jop; ating em i bilip olsem bel hevi o bikpela pen bai mekim Jop i lusim bilip. (Jop 1:11; 2:⁠5) Kirap long dispela taim na i go, Satan i bin mekim bikpela wok long pen na hevi​—⁠maski em yet i kamapim o nogat​—⁠bilong bagarapim bilip bilong ol wokboi bilong God. (Skelim wantaim 2 Korin 12:​7-9.) Planti manmeri, taim ol i pikinini, sampela man i bin mekim nogut long ol (o ol i “kisim bek tingting” olsem dispela samting i bin painim ol) na dispela i mekim na ol i bel hevi na “strong bilong ol i pinis,” na yumi ken tingim olsem, Satan i save mekim wok long dispela samting bilong bagarapim bilip bilong ol Kristen. Olsem Jisas taim Satan i traim em, sapos Kristen i strong long stap gut long God long taim em i kisim pen na hevi, i olsem em i tok: “Satan, yu klia”!​—⁠Matyu 4:⁠10.

Stap Strong Long Spirit

Lain “wokboi i gat gutpela tingting” ol i bin kamapim sampela tok bilong helpim man o meri em narapela i bin bagarapim em taim em i pikinini, na bai em i ken karim dispela kain pen na bel hevi. (Matyu 24:​45-47) Sapos man i bilip long “olgeta bikpela strong” bilong God na em i “pasim olgeta klos pait God i save givim long yumi,” dispela bai helpim em. (Efesus 6:​10-17) “Tok tru” bilong Baibel em i hap bilong dispela klos pait, na dispela tok tru i kamapim Satan em i nambawan birua na i pinisim tudak em Satan na ol helpim bilong em ol i wok long en. (Jon 3:19) Na tu, i gat “stretpela pasin olsem siot kapa i karamapim bros bilong yupela.” Man i bel hevi em i mas wok strong long bihainim stretpela pasin. Olsem: Sampela ol i gat bikpela laik long nogutim skin bilong ol yet o long mekim pasin pamuk. Long olgeta taim ol i sakim dispela laik, i olsem ol i winim pait!

“Gutnius bilong God,” em tu em i hap bilong dispela klos pait. Sapos man i toktok wantaim narapela long ol gutpela samting Jehova i laik mekim, dispela bai strongim em yet wantaim dispela man i harim. (1 Timoti 4:16) Sapos ‘tingting bilong yu i bagarap,’ na yu hatwok long toktok wantaim ol narapela long dispela gutnius, orait, gutpela sapos yu go wantaim narapela Kristen taim em i go mekim dispela bikpela wok. Na no ken lusim tingting long “pasin bilong bilip, na holim strong olsem hap plang.” Bilip olsem Jehova i laikim tru yu na em bai bekim bek olgeta samting bilong yu i bin lus. Yu no ken holim tupela tingting​—⁠yu mas bilip olsem Jisas tu em i laikim yu, na em i kamapim klia dispela samting taim em i dai bilong helpim yu. (Jon 3:16) Long bipo yet i kam inap nau, Satan i tok Jehova i no save tingim tru ol wokboi bilong em, tasol dispela tok em i giaman. Dispela tok em i wanpela bilong ol narapela tok giaman em i save mekim bilong nogutim yumi.​—⁠Jon 8:⁠44; skelim wantaim Jop 4:​1, 15-18; 42:​10-15.

Sapos yu bel hevi na yu hatwok long bilip olsem Jehova i tingim yu, gutpela sapos yu bung wantaim ol man ol i bilip strong olsem Jehova i save tingim tru ol man. (Song 119:​107, 111; Sindaun 18:1; Hibru 10:​23-25) No ken larim Satan i tekewe dispela prais long yu bilong kisim laip oltaim. Yu mas save, narapela hap bilong dispela klos pait em olsem yu mas ‘tingting long God i kisim bek yu na dispela tingting i mas i stap olsem hat kapa yu putim,’ na tu yu mas holim “bainat bilong Holi Spirit.” Spirit holi i bin kamapim ol tok bilong Baibel, na Satan i no inap daunim strong bilong en. (2 Timoti 3:16; Hibru 4:12) Ol gutpela tok bilong Baibel inap helpim man long daunim bel hevi bilong em na kamap orait gen.​—⁠Skelim wantaim Song 107:20; 2 Korin 10:​4, 5.

Las tru, oltaim yu mas beten long God i ken strongim yu long karim dispela hevi. (Rom 12:12; Efesus 6:18) Jisas i beten strong na dispela i bin helpim em long karim bikpela bel hevi tru, na dispela kain beten i ken helpim yu tu. (Luk 22:​41-43) Olsem wanem? Yu hatwok long beten? Orait, askim ol narapela long beten bilong helpim yu na beten wantaim yu. (Kolosi 1:3; Jems 5:14) Spirit holi bai strongim beten bilong yu. (Skelim wantaim Rom 8:​26, 27.) Olsem sampela sik bilong skin i givim bikpela pen long man na i no save pinis, sampela kain bel hevi i no inap pinis long dispela taim yumi stap long en. Tasol sapos Jehova i helpim yumi, bai yumi inap karim dispela hevi, na wankain olsem Jisas, sapos yumi karim dispela hevi na sanap strong, bai yumi winim strong bilong dispela hevi. (Jon 16:33) “Yupela ol lain bilong mi, oltaim yupela i mas bilip long God. Yupela i mas autim olgeta hevi na olgeta tingting bilong yupela long em. Long wanem, yumi ken i go long em na i stap gut.”​—⁠Song 62:⁠8.

Olsem Wanem Long Man Ol i Tok Em i Bin Bagarapim Pikinini?

Pasin sem man i mekim long pikinini, i wankain olsem reip. I stret man o meri i ken sutim tok long man i bin bagarapim em. Tasol sapos nau tasol “sampela tingting i stap hait” i kamap ples klia, dispela man o meri i no ken i go hariap na sutim tok long man. Long kain taim olsem, gutpela sapos em i stap isi na tingting gut pastaim. Bihain liklik, ating bai em inap skelim gut dispela “tingting” na wanem samting em i laik mekim long dispela.

Tingim stori bilong Donna. Ol i tok em i gat pasin kranki long kaikai na em i bin i go lukim wanpela man i gat wok long givim tok long ol man i gat hevi, tasol dispela man i no gat gutpela nem long mekim wok bilong em. Liklik taim na Donna i kirap sutim tok long papa bilong em olsem taim em i liklik, papa i bin mekim pasin sem long em​—⁠dispela i mekim na papa i mas kamap long kot. Kot i no wanbel, olsem na ol i no putim papa long kalabus, tasol em i mas baim kot samting inap olsem 100,000 kina. Bihain liklik, Donna i tokim papamama bilong em olsem em i no bilip moa olsem dispela samting nogut i bin painim em!

Solomon i kamapim gutpela tingting olsem: “Yu no ken ting em i bin mekim pasin nogut na yu hariap i go sutim tok long em long kot.” (Sindaun 25:⁠8) Sapos i gat as tru na yu ting dispela man i bin bagarapim yu em i wok yet long mekim pasin sem long ol pikinini, orait, ating yu ken go lukim ol elda. Ol elda long kongrigesen i ken helpim yu. Tasol no ken mekim wanpela samting hariap tumas. Ating bihain bai yu inap lusim tingting long dispela samting. Tasol sapos yu laik toktok wantaim dispela man yu ting em i bin mekim nogut long yu (tasol pastaim yu mas skelim gut, olsem samting i kamap long dispela bai mekim wanem long yu), orait, i stret long yu ken mekim olsem.

Insait long dispela hap taim em man o meri i “kisim bek tingting” long sampela samting i bin painim em bipo, na em i wok long orait gen, ating sampela hevi inap kamap. Olsem: Long tingting em i bin lukim wanpela man o meri i mekim nogut long em, em wanpela man o meri em i save lukim long olgeta de. Mipela i no ken kolim sampela lo long wanem samting yu mas mekim, nogat. “Olgeta man wan wan bai karim hevi bilong ol yet.” (Galesia 6:⁠5) Sampela taim ating man i pilim olsem wanpela wanblut o wanpela long famili stret bilong em i bin mekim pasin sem long em. Yumi mas save, sapos yumi “kisim bek wanpela tingting i stap hait,” dispela tingting inap giamanim yumi, olsem na nogut yu hariap long kamapim wanpela man yu ting i bin mekim dispela pasin nogut long yu. Long kain taim olsem, sapos dispela samting i no kamap yet long ples klia, orait, gutpela sapos yu toktok yet wantaim famili bilong yu​—⁠olsem go lukim ol, o raitim pas long ol, o telefon long ol​—⁠na dispela bai kamapim klia olsem yu wok long bihainim ol tok bilong Baibel long dispela samting.​—⁠Skelim wantaim Efesus 6:​1-3.

Ol Elda i Ken Mekim Wanem?

Sapos wanpela long kongrigesen i “kisim bek wanpela tingting i stap hait” na em i tok wanpela man i bin mekim pasin sem long em taim em i liklik yet, na em i go lukim ol elda, orait, ol elda bai makim tupela bilong ol long helpim em. Ol dispela elda i mas isi long em na strongim em long karim dispela hevi. Sapos em i kamapim nem bilong sampela man em i “ting” ol i bin mekim nogut long em, ol elda i no ken kamapim long ol narapela.

Nambawan wok bilong ol elda em bilong mekim wok wasman. (Aisaia 32:​1, 2; 1 Pita 5:​2, 3) Ol i mas “sori tru long ol arapela na mekim gut long ol. [Ol] i mas daunim [ol] yet na mekim pasin isi long ol man.” (Kolosi 3:12) Long gutpela pasin ol i mas putim yau na kamapim ol gutpela tok bilong Baibel bilong mekim orait ol. (Sindaun 12:18) Sampela i “kisim bek tingting” bilong samting i bin painim ol bipo na ol i gat hevi, ol i tok, ol i save pilim tru ol gutpela pasin bilong ol elda i bin i go lukim ol na telefon long ol bambai ol i ken save, ol i stap olsem wanem. I no olsem ol elda i mas tromoi bikpela hap taim long mekim olsem, tasol samting ol i mekim i kamapim klia olsem oganaisesen bilong Jehova i save tingim ol. Taim man i bel hevi i save olsem ol brata Kristen bilong em ol i laikim em tru, dispela inap helpim em long orait bek liklik.

Tasol olsem wanem sapos man i gat dispela kain bel hevi em i laik sutim tok long wanpela man?a Orait, nau tupela elda i ken tokim em olsem em i mas tingim tok bilong Matyu 18:​15, na em yet i mas i go toktok wantaim dispela man long dispela samting. Sapos bel bilong em i bagarap na em yet i no inap go lukim em, orait, em i ken telefon o raitim pas long em. Olsem na dispela man bai i gat rot long ai bilong Jehova long stretim dispela tok ol i bin sutim long em. Ating em inap kamapim sampela samting bilong soim olsem em i no bin mekim dispela samting nogut. O ating em bai tokaut olsem em i bin mekim dispela rong, na tupela i ken wok long stap wanbel gen. Sapos olsem, em i gutpela samting tru! Sapos em i kamapim rong bilong em, dispela tupela elda i ken bihainim ol lo bilong Baibel na stretim dispela samting.

Sapos man i tok em i no gat asua, orait, man i bin sutim tok long dispela man, ol elda i mas tokim em, ol elda i gat wok long harim kot ol i no ken mekim wanpela samting. Na kongrigesen bai tingim dispela man i olsem man i no gat asua. Baibel i tok, pastaim long ol i mekim kot, i mas i gat tupela o tripela man i save long dispela samting. (2 Korin 13:1; 1 Timoti 5:19) Na sapos sampela man moa ol i “kisim bek tingting” olsem dispela man i bin mekim nogut long ol, tasol i no gat sampela samting moa bilong kamapim long ples klia dispela samting, orait, ol elda i no ken mekim kot. Tasol dispela i no makim olsem dispela “tingting” em man i kisim em i no tru ( o i tru). Tasol bilong mekim kot long dispela samting, ol elda i mas bihainim ol lo bilong Baibel long dispela samting.

Dispela man i tok em i no gat asua, olsem wanem sapos tru tru em i bin mekim rong? Bai em i abrusim strafe? Nogat tru! Maski em i gat asua o nogat, dispela samting i stap long han bilong Jehova. “Sin bilong sampela man i stap ples klia, na i olsem ol dispela sin i go kamap long kot paslain long ol man i bin mekim sin. Tasol sin bilong sampela man i stap hait, na bihain tasol ol bai i kamap ples klia.” (1 Timoti 5:24; Rom 12:19; 14:12) Buk Sindaun i tok: “Ol stretpela man i wet long Bikpela i givim gutpela taim long ol na bai ol i lukim na ol i amamas. Tasol ol man nogut i wet nating. Ol i no inap lukim gutpela taim.” “Bihain bai ol [man nogut] i dai, na ol i no inap kisim ol dispela samting.” (Sindaun 10:28; 11:⁠7) Tasol bihain, God Jehova na Krais Jisas bai wokim stretpela kot na skelim pasin bilong ol man.​—⁠1 Korin 4:⁠5.

Sakim Satan

Taim man i dediket pinis i karim bikpela pen o bel hevi, dispela i kamapim long ples klia olsem em i gat strongpela bel na em i laikim tru God! Na dispela i kamapim klia olsem spirit holi bilong Jehova i gat bikpela strong bilong helpim ol!​—⁠Skelim wantaim 2 Korin 4:⁠7.

Tok bilong Pita i stret long ol, olsem: “Yupela i mas i stap strong long bilip na sakim [Satan].” (1 Pita 5:⁠9) Bilong mekim olsem, ating bai ol i hatwok liklik. Ating sampela taim i hatwok long bihainim stretpela tingting. Tasol yu no ken hevi tumas! Klostu nau, Satan wantaim ol samting em i mekim bilong trikim ol man, em bai pinis. Tru tumas, yumi wet long dispela taim na “God yet . . . bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:​3, 4.

[Ol Futnot]