Stap Insait Long “Taun Bilong Hait” na Stap Laip!
“Man i bin kilim i dai wantok i no ken lusim dispela taun bilong hait inap hetpris i dai.”—NAMBA 35:28.
MAN Jehova i makim bilong bekim rong, em Krais Jisas, liklik taim bai em i kirap mekim wok bilong em. Em wantaim ol ensel bilong em, liklik taim bai ol i kirap na kilim i dai olgeta man i gat asua bilong kilim man i dai na ol i no bin tanim bel. Tru tumas, Jisas bai mekim wok olsem Man God i makim bilong givim strafe long ol man long taim bilong “bikpela hevi tru,” klostu nau bai kamap. (Matyu 24:21, 22; Aisaia 26:21) Long dispela taim ol man i no inap abrusim strafe bilong ol man i gat asua bilong kilim man i dai.
2 Bilong i stap gut, yumi mas kamap long rot i go long ples ol dispela taun bilong hait i makim, na yumi mas ran siksti i go! Sapos ol i larim man i go insait long dispela taun, em i mas i stap long dispela ples, long wanem, long dispela ples tasol em inap hait na i stap gut. Tasol ating yu tingting olsem: ‘Yumi planti man i no bin kilim i dai wanpela man, orait olsem wanem na asua bilong kilim man i dai em i stap long yumi? Bilong wanem Jisas em i Man bilong bekim rong? Dispela taun bilong hait i makim wanem samting long nau? Inap man i ken lusim dispela taun na i stap gut?’
Yumi Gat Asua Tru?
3 Wanpela hap bilong Lo Bilong Moses bai helpim yumi long save, ol bilion bilion manmeri bilong graun ol i gat asua bilong kilim man i dai. Lo God i putim long ol Israel i makim olsem taim wanpela i kilim man i dai, asua bilong dispela samting i stap long olgeta wan wan bilong lain Israel. Sapos ol i painim bodi bilong wanpela man na ol i no save husat i bin kilim em i dai, ol jas i mas metaim graun i stap namel long bodi bilong man na ol taun i stap klostu long em. Olsem bai ol inap save, wanem taun i stap klostu long ples ol i bin painim dispela man. I olsem dispela taun i gat asua bilong kilim man i dai, na bilong tekewe dispela asua, ol elda bilong dispela taun i mas kisim wanpela yangpela bulmakau meri i no bin mekim yet wanpela wok, na bringim em i go klostu long wanpela wara. Na long wanpela hap graun ol i no bin wokim gaden yet long en, ol i mas brukim nek bilong bulmakau. Ol i mas mekim dispela samting long ai bilong ol pris Livai, ‘long wanem, ol yet i gat wok bilong harim kot taim wanpela man i paitim narapela man. God i bin makim ol bilong mekim dispela wok.’ Orait nau ol elda bilong dispela taun ol i wasim han bilong ol antap long dispela bulmakau, na ol i tok: “Mipela i no bin kilim i dai dispela man. Na mipela i no save husat i bin mekim olsem. Bikpela, yu mas lusim sin bilong mipela manmeri Israel, yu bin kisim bek mipela long Isip. Dispela man i no gat rong, na ol i kilim em i dai. Olsem na yu no ken ting asua bilong dispela samting i stap long mipela.” (Lo 21:1-9) God Jehova i no laik bai pasin bilong kapsaitim blut bilong man i bagarapim Israel, o asua bilong dispela samting i stap long ol manmeri bilong Israel.
4 Tru tumas, taim ol i kilim i dai ol man, asua bilong dispela samting i stap long olgeta manmeri bilong dispela lain. Tingim bikpela asua tru bilong kilim man i dai em i stap long Bikpela Babilon, em olgeta lotu giaman bilong dispela graun. Em i spak long blut bilong ol wokman bilong Jehova! (KTH 17:5, 6; 18:24) Ol lotu ol i kolim Kristen i tok ol i bihainim King bilong kamapim gutaim, tasol ol bikpela pait, na ol planti planti man i bin i dai long ol kot bilong misin na long ol pait bilong lotu, ol dispela samting i mekim na long ai bilong God ol dispela lotu i gat bikpela asua bilong kilim man i dai. (Aisaia 9:6; Jeremaia 2:34) Na bikpela asua bilong kilim i dai planti milion manmeri long tupela pait bilong olgeta hap i kamap long taim bilong yumi, em i stap long ol dispela lotu ol i kolim Kristen. Olsem na long ai bilong God, ol man i pas long ol lotu giaman na ol man i helpim na insait long ol pait bilong dispela graun, ol i gat asua bilong kilim man i dai.
5 Sampela man, long laik bilong ol yet ol i kilim man i dai, o ol i no was gut na ol i bagarapim wanpela man na em i dai. Na sampela ol i insait long wanpela lain i kilim i dai ol man—ating ol hetman bilong lotu i bin grisim ol long mekim na i tokim ol, dispela em i laik bilong God. Na sampela ol i bin mekim nogut long ol wokman bilong God na kilim ol i dai. Na maski yumi yet i no bin mekim ol dispela kain samting, yumi tu i gat asua long ol dispela man i dai, long wanem, yumi no bin save long lo bilong God na laik bilong em. Yumi olsem dispela man “i kilim nating wanpela wantok bilong em yet, na tupela i no bin birua pastaim.” (Lo 19:4) Ol kain man olsem ol i mas askim God long marimari long ol na ol i mas ranawe i go insait long taun bilong hait. Sapos ol i no mekim olsem, bai ol i bungim Man bilong bekim rong na em bai kilim ol i dai.
Ol Bikpela Wok Bilong Jisas
6 Long Israel, man bilong bekim rong em i wanblut bilong dispela man ol i bin kilim em i dai. Orait, bilong bekim rong bilong ol man i bin kilim i dai ol planti planti manmeri long graun na ol wokman bilong Jehova tu, dispela Man bilong bekim rong long nau em tu i mas i stap olsem wanblut bilong olgeta man bilong graun. Krais Jisas em dispela Man. Taim mama i karim em, em i nambawan olgeta na i no gat sin. Orait Jisas i dai na givim dispela laip bilong em olsem ofa bilong baim bek ol man, na taim em i kirap bek na i go antap long heven, em i givim pe bilong dispela laip long God bilong helpim ol pikinini bilong Adam ol i gat sin na ol i save dai. Long dispela rot Krais i kamap Man bilong kisim bek ol man, em wanblut tru bilong yumi na i stret em i holim dispela wok olsem Man bilong bekim rong. (Rom 5:12; 6:23; Hibru 10:12) Baibel i kolim Jisas olsem brata bilong ol man i bihainim em, em God i bin makim ol long spirit holi. (Matyu 25:40, 45; Hibru 2:11-17) Em i King long heven, olsem na em i kamap “Papa bilong i stap oltaim” bilong ol man em ofa bilong em bai helpim ol na ol bai stap long graun aninit long em. Ol dispela manmeri bai i stap oltaim oltaim. (Aisaia 9:6, 7) Olsem na i stret tru Jehova i bin makim dispela Wanblut bilong ol man bilong graun olsem Man bilong bekim rong.
7 Na Jisas em Hetpris i no gat sin, na em i bin winim ol traim, na em i save pilim hevi bilong ol man. (Hibru 4:15) Olsem na em i mekim wok long ofa bilong em bilong tekewe sin bilong helpim ol man. Ol i bin putim ol dispela taun bilong hait long bipo bilong helpim “ol Israel yet na bilong ol manmeri bilong arapela kantri i stap sotpela taim o longpela taim wantaim [ol].” (Namba 35:15) Olsem na pastaim dispela bikpela Hetpris i mekim wok long ofa bilong em bilong helpim lain bilong em, em God i bin makim ol, em “ol Israel.” Orait nau em i mekim wok long dispela ofa bilong helpim “ol manmeri bilong arapela kantri i stap sotpela taim o longpela taim” long “taun bilong hait.” Dispela “ol arapela sipsip” bilong Bikpela bilong yumi, Krais Jisas, ol i gat tingting long i stap oltaim oltaim long graun.—Jon 10:16; Song 37:29, 34.
Taun Bilong Hait Long Nau
8 Long nau, wanem dispela taun bilong hait? Em i no wanpela ples tru long graun, olsem Hebron, em wanpela bilong ol 6-pela taun bilong hait bilong lain Livai na em i ples hetpris bilong Israel i sindaun long en. Taun bilong hait long nau, em samting God i bin putim bilong lukautim yumi na bai yumi no ken brukim lo bilong em long blut na yumi mas i dai. (Stat 9:6) Maski man i bin tingting pastaim na i brukim dispela lo, o em i no bin tingting gut na em i mekim, em i mas askim God long lusim dispela rong na tekewe sin bilong em—bilong mekim olsem em i mas bilip long blut bilong Hetpris Krais Jisas. Ol Kristen God i bin makim, em ol i gat tingting long i go long heven, na dispela lain “planti manmeri tru” i gat tingting long i stap oltaim long graun, ol i bin mekim ol samting bambai ofa bilong Jisas bilong tekewe sin i ken helpim ol, na ol i stap insait long dispela “taun bilong hait.”—KTH 7:9, 14; 1 Jon 1:7; 2:1, 2.
9 Taim aposel Pol i no kamap Kristen yet, em i bin brukim dispela lo bilong blut. Long dispela taim nem bilong em Sol, na em i bin mekim nogut long lain bilong Jisas na em i orait long ol man i kilim ol i dai. Pol i tok: “Tasol em i save, mi bin mekim ol dispela pasin, long wanem, mi no bin save gut long em na mi no bilip long em. Olsem na em i sori long mi.” (1 Timoti 1:13; Aposel 9:1-19) Sol i pilim tru rong bilong em na em i tanim bel, na planti wok bilong bilip em i bin mekim bihain i kamapim klia dispela samting. Tru, bilong i go insait long dispela taun bilong hait long nau, yumi mas bilip long ofa bilong Krais long baim bek ol man, tasol yumi mas mekim sampela samting moa.
10 Sapos man i bin kilim i dai wanpela man na em i no bin tingting long mekim, em inap i stap long wanpela taun bilong hait long Israel sapos em inap kamapim klia olsem bel bilong em i stap klin long ai bilong God na em i no gat asua bilong kilim man i dai. Bilong bel i ken i stap klin long ai bilong God, yumi mas bilip long ofa bilong Jisas, na pilim tru ol sin bilong yumi na tanim bel, na lusim olpela wokabaut bilong yumi. Yumi mas askim God long givim klinpela bel long yumi, na yumi mekim olsem taim yumi beten na dediketim laip bilong yumi long God long rot bilong Krais, na yumi kisim baptais long wara bilong makim dispela samting. (1 Pita 3:20, 21) Dispela klinpela bel i mekim na yumi inap i stap gut long ai bilong Jehova. I gat wanpela rot tasol bilong kisim klinpela bel—yumi mas bihainim ol lo bilong God, na yumi mas mekim ol wok yumi kisim insait long dispela taun bilong hait, olsem ol ranaweman i bin i stap long ol taun bilong hait long bipo ol i mas bihainim Lo na mekim ol wok bilong ol. Namba wan wok bilong lain bilong Jehova long nau em wok bilong autim tok bilong Kingdom. (Matyu 24:14; 28:19, 20) Sapos yumi mekim olsem, bai yumi stap man bilong mekim ol gutpela wok insait long dispela taun bilong hait long nau.
11 Sapos yumi lusim dispela taun bilong hait long nau yumi inap kisim bagarap, long wanem, liklik taim nau na Man bilong bekim rong em bai kirap na mekim save long olgeta man i gat asua bilong kilim man i dai. Nau em i no taim bilong raun ausait long dispela taun bilong hait, o raun klostu long arere bilong graun bilong en, em ples yumi inap kisim bagarap long en. Sapos yumi no bilip moa long ofa bilong Hetpris bilong tekewe sin, bai yumi stap ausait long taun bilong hait. (Hibru 2:1; 6:4-6) Na yumi inap kisim bagarap sapos yumi kisim pasin bilong ol manmeri bilong dispela graun, o yumi stap arere tasol long oganaisesen bilong Jehova, o yumi abrusim ol stretpela lo bilong Papa bilong yumi long heven.—1 Korin 4:4.
Taim Bilong Lusim Taun Bilong Hait
12 Long Israel, sapos man i bin kilim i dai wanpela man na em i no bin tingting long mekim, em i mas i stap long wanpela taun bilong hait “inap hetpris i dai.” (Namba 35:28) Orait, long nau ol man pastaim ol i gat asua bilong kilim man i dai, ol i mas i stap insait long taun bilong hait i go inap long wanem taim? Ol i mas i stap inap long taim Hetpris Krais Jisas i no gat wok moa long helpim ol. Pol i tok: “Em inap tru long kisim bek ol manmeri i kam klostu long God long nem bilong em.” (Hibru 7:25) Sapos hap sin na asua bilong kilim man i dai i stap yet long ol, Hetpris i gat wok long helpim ol, bambai ol man i gat sin ol inap i stap olsem stretpela man long ai bilong God.
13 Tingim gen dispela samting: Ol taun bilong hait long bipo ol i bilong “ol Israel” na bilong ol manmeri bilong ol arapela kantri i stap sotpela taim o longpela taim wantaim ol. “Ol Israel” em ol Israel bilong spirit. (Galesia 6:16) Ol i mas i stap insait long taun bilong hait long olgeta taim ol i stap long graun. Bilong wanem ol i mas mekim olsem? Long wanem, sin i stap yet long skin bilong ol na Hetpris i gat wok yet long helpim ol. Tasol ol dispela Kristen God i bin makim ol, taim ol i dai na kirap bek na kisim laip olsem spirit long heven, i no gat wok moa long ofa bilong Hetpris long tekewe sin bilong ol; ol i lusim pinis skin bilong graun wantaim asua bilong kilim man i dai. Em nau, i olsem Hetpris i dai pinis long helpim na tekewe sin bilong dispela lain.
14 Ol manmeri bilong kamap king wantaim Krais ol i stap yet long skin bilong man, olsem na ol i mas i stap insait long taun bilong hait inap long taim ol i dai na pinisim wok ol i bin i stap gut long en. (Rom 8:17; KTH 2:10) Taim ol i dai, ol i lusim pinis skin na pasin bilong man bilong graun na ol i no ken kisim bek moa. Olsem na Hetpris i “dai” pinis long helpim lain Israel bilong spirit taim ol i kirap bek pinis na kamap spirit em ol bai stap oltaim long heven na kisim “pasin bilong God yet.”—2 Pita 1:4.
15 Wanem taim Hetpris bai “dai” long helpim ol lain bilong nau ol i olsem “ol manmeri bilong arapela kantri i stap sotpela taim o longpela taim wantaim [ol Israel]” na bai ol i ken lusim taun bilong hait? Ol manmeri bilong bikpela lain ol i no inap lusim taun bilong hait bihain stret long “bikpela hevi tru.” Bilong wanem? Long wanem, sin i stap yet long skin bilong ol na ol i mas i stap aninit yet long Hetpris na bai em i ken lukautim ol. Ol i mas bilip long wok bilong em long tekewe sin bilong ol insait long wan tausen yia em i mekim wok king na pris, na bihain ol bai kamap gutpela olgeta. Em nau, Jisas bai putim ol long han bilong God bilong kisim laspela traim bilong ol, em ol bai holimpas bilip o nogat. Bilong mekim olsem, God bai lusim Satan wantaim ol spirit nogut long hul inap sotpela taim. Ol bai winim dispela traim na God bai orait long ol, na God bai kolim ol stretpela man. Long dispela rot ol bai kamap manmeri i gutpela olgeta.—1 Korin 15:28; KTH 20:7-10.a
16 Olsem na ol man i abrusim bagarap long taim bilong “bikpela hevi tru” ol i mas i stap insait long taun bilong hait inap long pinis bilong Wan Tausen Yia; long dispela rot bel bilong ol bai i stap klin long ai bilong God. Orait, taim ol i gutpela olgeta, ofa bilong Hetpris i no gat wok moa long tekewe sin bilong ol, na em i no gat wok moa long lukautim ol. Long dispela taim Jisas i pinis long i stap Hetpris bilong ol—i olsem Hetpris i dai, long wanem, em i no gat wok moa long helpim ol long blut bilong ofa bilong em. Long dispela taim ol bai lusim taun bilong hait.
17 Orait yumi laik save, ol manmeri i kirap bek long matmat insait long Wan Tausen Yia, ol i mas i go insait long dispela taun bilong hait na i stap long en inap long taim hetpris i dai? Nogat, long wanem, ol i kisim pinis strafe bilong sin bilong ol taim ol i dai. (Rom 6:7; Hibru 9:27) Tasol Hetpris bai helpim ol long kamap gutpela olgeta. Sapos ol i winim laspela traim long pinis bilong Wan Tausen Yia, God bai kolim ol tu olsem stretpela man, na ol inap tru long i stap oltaim oltaim long graun. Tasol ol man i no bihainim ol lo bilong God na winim dispela traim olsem man bilong holimpas bilip, ol bai kisim strafe na bagarap olgeta.
18 Ol hetpris bilong Israel ol i bin i go lapun na ol i dai. Tasol Jisas “i kamap hetpris wankain olsem Melkisedek, na em bai i stap hetpris oltaim oltaim.” (Hibru 6:19, 20; 7:3) Olsem na taim Jisas i pinis long mekim wok olsem Hetpris bilong helpim ol man, laip bilong em i no pinis long dispela taim. Ol gutpela wok em i mekim olsem King na Hetpris bai stap long ol man inap oltaim oltaim, na inap long olgeta taim bihain ol man bai i gat bikpela dinau long em long ol dispela wok em i bin mekim bilong helpim ol. Na tu, inap oltaim oltaim Jisas bai go pas long wok bilong lotuim Jehova.—Filipai 2:5-11.
Bilong Skulim Yumi
19 Wok bilong ol dispela taun bilong hait long bipo inap skulim yumi long kain kain samting, olsem: Sapos man i bin birua long man na kilim em i dai, em i no inap i stap insait long taun bilong hait. (Namba 35:20, 21) Olsem na man i stap insait long taun bilong hait long nau, em i no ken larim pasin bilong bel nogut long brata i kamap long bel bilong em, a? Aposel Jon i tok: “Man i no laikim tru brata bilong en na i bel nogut long em, i olsem em i kilim man i dai. Na yupela i save, man i kilim narapela man i dai, em i no kisim laip bilong i stap gut oltaim oltaim.” Olsem na yumi “mas laikim tru ol arapela, long wanem, pasin bilong laikim ol arapela em i pasin bilong God.”—1 Jon 3:15; 4:7.
20 Bilong abrusim man bilong bekim rong, man i bin kilim man i dai na em i no bin tingting long mekim, em i mas i stap insait long taun bilong hait na i no ken wokabaut i go na kalapim mak bilong graun bilong taun. Orait, olsem wanem long ol man i stap insait long taun bilong hait long nau? Bilong i stap gut na Man bilong bekim rong i no ken bagarapim ol, ol i no ken lusim taun. Na ol i mas lukaut, nogut sampela samting i laik pulim ol i go long arere bilong graun bilong dispela taun. Na tu, ol i mas was gut, nogut bel bilong ol i kirap long laikim ol samting bilong dispela graun bilong Satan. Bilong was gut olsem, ating ol i mas beten oltaim na taitim bun tru; tasol ol i mas mekim olsem sapos ol i laik i stap laip.—1 Jon 2:15-17; 5:19.
21 Ol man i bin ranawe i kam na i stap long wanpela taun bilong hait long bipo, ol i mas mekim wok. Na i wankain tu long “ol Israel” em God i bin makim ol long spirit holi—ol i bin wok strong long bungim kaikai bilong gaden na autim tok bilong Kingdom. (Matyu 9:37, 38; Mak 13:10) Na “ol manmeri bilong arapela kantri” ol i stap insait long taun bilong hait long nau, em ol Kristen ol i bilong i stap long graun, ol tu i kisim dispela gutpela wok bilong helpim ol man, na ol i wok wantaim ol man God i bin makim ol na ol i stap yet long graun. Na dispela wok i gat gutpela pe tru bilong en! Ol man i stap gut long wok bilong ol insait long taun bilong hait long nau, ol bai abrusim bagarap taim Man bilong bekim rong i givim strafe long ol man. Ol bai kisim ol gutpela blesing tru long wok bilong em olsem bikpela Hetpris God i bin makim, em ol blesing bilong i stap oltaim oltaim. Orait, olsem wanem long yu? Bai yu stap insait long taun bilong hait na yu ken i stap oltaim oltaim?
[Ol Futnot]
Bai Yu Bekim Olsem Wanem?
◻ Olsem wanem yumi ken tok, ol bilion bilion manmeri bilong graun ol i gat asua bilong kilim man i dai?
◻ Krais Jisas i mekim wanem tupela wok wantaim bilong helpim ol man?
◻ Taun bilong hait long nau em i wanem samting? Man i mas mekim wanem bilong i go insait long en?
◻ Wanem taim ol man inap lusim dispela taun bilong hait?
◻ Ol taun bilong hait God i bin putim, ol i skulim yumi long wanem ol samting?
[Askim Bilong Stadi]
1. Husat dispela Man bilong bekim rong? Liklik taim bai em i kirap na mekim wanem?
2. Wanem ples tasol em i ples tru bilong hait? Wanem sampela askim yumi mas save long bekim bilong en?
3. Wanem hap bilong Lo Bilong Moses bai helpim yumi long save, ol bilion bilion manmeri bilong graun ol i gat asua bilong kilim man i dai?
4. Olsem wanem long asua bilong Bikpela Babilon long kilim man i dai?
5. Olsem wanem na sampela man i kain olsem man long Israel i bin kilim man i dai na i no bin tingting long mekim?
6. Olsem wanem yumi ken tok, Jisas em i wanblut tru bilong ol man, winim ol narapela man?
7. Jisas, em bikpela Hetpris, em i mekim wanem bilong helpim ol man?
8. Long nau taun bilong hait em i wanem samting?
9. Olsem wanem Sol i bin brukim lo bilong God long blut? Tasol olsem wanem em i kamapim klia olsem em i tanim bel?
10. Olsem wanem yumi ken kisim klinpela bel? Yumi mas mekim wanem bambai bel i ken i stap klin?
11. Bilong i stap gut insait long taun bilong hait long nau, yumi no ken mekim wanem?
12. Ol man pastaim ol i gat asua bilong kilim man i dai, ol i mas i stap insait long taun bilong hait inap long wanem taim?
13. Long nau husat dispela “ol Israel”? Ol i mas i stap insait long taun bilong hait inap long wanem taim?
14. I gat wanem narapela as na ol man i wet long kisim laip long heven ol i mas i stap insait long taun bilong hait long nau?
15. Long nau husat ol dispela ‘arapela manmeri i stap sotpela o longpela taim wantaim ol Israel’? Bikpela Hetpris bai mekim wanem bilong helpim ol?
16. Wanem taim ol man i winim “bikpela hevi tru” ol i no gat wok moa long ofa bilong Hetpris long tekewe sin bilong ol?
17. Long Taim Bilong Wan Tausen Yia, bilong wanem ol man i kirap bek long matmat i no gat wok long i go insait long taun bilong hait na i stap long en?
18. Wanem samting long wok king na wok pris bilong Jisas bai stap oltaim oltaim long ol man?
19. Ol taun bilong hait God i bin putim, ol i skulim yumi olsem wanem long pasin bilong bel nogut long man na laikim tru man?
20. Ol man i stap insait long taun bilong hait ol i mas mekim wanem na bai Man bilong bekim rong i no ken bagarapim ol?
21. Ol man i stap insait long taun bilong hait long nau ol i mekim wanem gutpela wok?
[Piksa long pes 16]
Yu save long ol bikpela wok Krais Jisas i mekim?