Wan Handet Krismas Pinis na i Gat Strong Yet
EM STORI BILONG RALPH MITCHELL
Papa bilong mi i no longpela man tumas, na em i save autim tok long haus lotu Metodis. Long olgeta tupela o 3-pela yia ol i save salim em i go long ol narapela narapela haus lotu long ol liklik taun, olsem Asvil long Not Karolaina, Amerika, em mama i bin karim mi long dispela ples long Februeri 1895. Mi go bikpela insait long ol lotu i gat nem Kristen, olsem na mi save gut long ol.
MI TINGIM taim mi manki yet na mi go long ol miting bilong kirapim ol man long givim bel gen long lotu, na ol i bringim mi i go long wanpela bang insait long haus lotu em i bilong ol man i bel hevi long sin bilong ol na ol i tanim bel, na nau spirit holi i ken pulap long ol—olsem ol i mas “kisim lotu.” Ol i tokim mi long autim sin bilong mi, na bihainim Tenpela Lo, na bihainim gutpela pasin. Olsem bai mi go long heven taim mi dai. Mi tokim skin bilong mi, ‘Ating bai mi go long bikpaia, long wanem, mi no inap bihainim gutpela pasin tru inap long mi ken i go long heven.’ Mi ting ol manmeri i bikpela pinis—na ol man bilong autim tok bilong lotu—ol tasol i bihainim ol lo bilong Baibel.
Tasol taim mi manki yet mi kirap pilim olsem ol bikman bilong lotu ol i man bilong tupela maus. Papa i save pasim hap mani bilong baim kaikai samting bilong famili na bai em i ken givim bikpela mani long bisop long taim ol pasto na bisop i kibung. Papa i ting bisop bai amamas na givim wok long papa long lukautim wanpela haus lotu i gat planti manmeri i save kam lotu. Mi tingim wanpela man i save autim tok long haus lotu long ples, na em i gat bikpela fam bilong koten. Em i laik kisim bikpela namba long lotu, olsem na em i baim wan handet traipela bek koten i go long ol man na em i karim mani bilong en i go long kibung bilong lotu. Planti man long kibung em ol man bilong autim tok bilong lotu, na taim i olsem ol i no gat mani moa bilong givim, dispela fama i kirap sanap na em i singaut bikmaus olsem: “Em dispela liklik mani tasol bai yupela i givim long bisop bilong yupela? Olgeta wan wan man i putim 5-pela dola, mi bai putim 10-pela dola i go antap long en!” Ol i kisim wan tausen dola samting long dispela kibung, olsem na bisop i makim dispela man long i stap nambawan elda, na papa i mas aninit long em. Mi no inap bilip olsem God yet i bin givim namba long dispela man. Kirap long dispela taim, mi gat tupela tingting long ol samting bilong lotu.
Taim Amerika i go insait long Namba Wan Pait, gavman i singautim mi i go long ami. Mi tingim yet ol pasto bilong ami ol i save autim tok bilong lotu long mipela ol soldia na ol i tok, mipela i mas givim bel na mekim pait bilong helpim kantri bilong mipela. Dispela i mekim na mi nolaik tru long ol lotu. Mi gat tingting olsem mi laik abrusim bagarap long pait, na pinisim skul bilong mi, na bai mi marit. Lotu i no insait long ol samting mi tingting long mekim bihain.
Mi Senisim Tingting
Long 1922 mi gat bikpela laik tru long wanpela yangpela meri, nem bilong em Louise. Em i wanpela strongpela Katolik, na taim mitupela i pasim tok long marit, em i tok em i laik marit long misin Katolik. Tasol mi no laik marit long wanpela haus lotu, olsem na em i orait long mitupela i ken marit long wanpela haus kaunsil long Nu Yok Siti.
Pastaim mitupela i no tok pait long lotu. Mi kamapim klia long em olsem mi no bilip long ol lotu, na mipela inap i stap amamas wantaim sapos mipela i no toktok long lotu. Orait, namel long yia 1924 na 1937, ol pikinini i wok long kamap, na bihain mipela i gat 5-pela pikinini man na 5-pela pikinini meri! Louise i laik bai ol pikinini bilong mipela i go long skul Katolik. Tasol mi no laik bai ol i skul long ol samting bilong lotu, olsem na mitupela i tok pait long dispela samting.
Long 1939 wanpela samting i kamap na tingting bilong mi long ol samting bilong lotu i senis olgeta. Tupela Witnes Bilong Jehova, em Henry Webber na Harry Piatt, ol i kam long haus bilong mi long Rosel, Nu Jesi. Kwiktaim mi pilim olsem ol i laik toktok long wanpela samting mi no laik toktok long en—em lotu. Mi bel nogut yet long lotu, long wanem, mi tingim yet tok bilong ol pasto bilong ami, ol i bin tok, ‘Mekim pait bilong helpim kantri bilong yu,’ tasol ol pasto long ples ol i tok, ‘Yu no ken kilim man i dai.’ Ol i man bilong tupela maus! Mi ting nau bai mi stretim tingting bilong dispela tupela Witnes. Mi tokim tupela: “Yu harim: Sapos lotu bilong yu i tru, orait ol narapela lotu i giaman. Na sapos wanpela bilong ol narapela lotu i tru, orait olgeta narapela lotu i giaman, na lotu bilong yu tu. I mas i gat wanpela lotu tasol i trupela lotu.” Mi kirap nogut long tupela i wanbel long tok bilong mi!
Orait, nau tupela i tokim mi long kisim Baibel bilong mi na opim long 1 Korin 1:10. Mi kaunim tok olsem: “Ol brata, long nem bilong Bikpela bilong yumi Jisas Krais mi tokaut strong long yupela olsem, yupela olgeta i mas wanbel long ol toktok yupela i mekim. Yupela i no ken bruk nabaut. Yupela i mas i stap wanlain tru long wankain tingting na wankain laik.” Mi kirap nogut long dispela tok bilong Baibel. Tasol mi pret, nogut tupela man hia i laik pulim mi i go insait long wanpela nupela lotu samting. Tasol ol i bin skulim mi long wanpela samting—ol Kristen i no ken bruk nabaut. I gat planti askim moa i stap long tingting bilong mi. Wanpela i olsem: Wanem samting i save painim man taim em i dai? Mi laik tru long givim dispela askim long ol! Tasol mi ting nogut dispela i mekim na mi wantaim meri bilong mi i kirap na tok pait long ol samting bilong lotu.
Orait nau wanpela i tok: “Mipela i laik kam bek long wik antap na toktok wantaim yu.” Long pasin isi mi laik tok, nogat, tasol meri bilong mi i kirap na tok, “Ralph, ol i laik save, wanem taim ol i ken i kam lukim yumi gen.” Mi kirap nogut long tok bilong em, long wanem, em i wanpela strongpela Katolik! Tasol mi tingting, ‘Ating mitupela inap painim sampela tok bilong lotu mipela i ken wanbel long en.’ Olsem na mi orait long Henry Webber na Harry Piatt i ken kam bek long Fraide antap.
Em nau, long dispela rot mi kirap stadi long Baibel wantaim ol Witnes Bilong Jehova. I no longtaim bihain na ol i singautim mi i go long wanpela kibung long Madison Skwea Gaden long Nu Yok Siti. Mi tingim yet tok bilong Joseph F. Rutherford, nem bilong en “Gavman na Gutaim,” em i mekim long Jun 25, 1939. I gat 18,000 manmeri ol i bung, na mi insait long dispela namba. Tasol i gat 75,000 olgeta i harim dispela tok—planti ol i harim long rot bilong telefon.
Tasol sampela hevi i kamap long dispela kibung. Lain bilong wanpela pris Katolik, em Charles Coughlin, ol i tok long bagarapim kibung, na tru olsem ol i tok, taim Brata Rutherford i wok long mekim tok bilong em, planti handet man ol i belhat na singaut bikmaus na tok bilas olsem, “Litimapim nem bilong Hitler!” “Ure long Franco!” Ol i kros na mekim bikpela pairap tru, na ol man i harim tok long rot bilong telefon ol inap harim dispela pairap! Ol atendan i wok inap 15 minit samting long pasim dispela lain, na bihain ol i stap isi. Tasol long taim bilong dispela bikpela pairap, Brata Rutherford i toktok yet, na ol man i sindaun harim ol i amamas na i wok long paitim han, na dispela i strongim em long mekim yet tok bilong em na em i no pret.
Nau tingting bilong mi i kirap tru. Bilong wanem wanpela pris Katolik i kirapim ol man long birua nogut tru long ol Witnes Bilong Jehova? Mi ting olsem dispela tok Rutherford i autim i mas tru—long dispela as ol pris i no laik bai ol man olsem mi i harim dispela tok. Olsem na mi wok yet long stadi long Baibel na mi wok long kamap strong. Orait, long Oktoba 1939, mi kisim baptais long wara bilong makim olsem mi dediket pinis long Jehova. Sampela pikinini bilong mi ol i kisim baptais long 1940, na meri bilong mi, Louise, i baptais long 1941.
Ol Hevi Mi Karim
Taim mi kisim tok i tru, bihain liklik mama bilong mi i dai, na mi mas i go bek long Not Karolaina bilong i go long bung bilong planim em. Mi pilim olsem mi no inap i go harim tok bilong planim em, long wanem, ol i laik mekim insait long haus lotu Metodis, na bel bilong mi bai i gat tok sapos mi go insait long en. Olsem na mi telefon long papa na mi tokim em long larim bokis i stap long haus ol i save putim skin bilong man long en taim ol i laik planim em. Papa i orait long dispela, tasol taim mi kamap, ol i lusim pinis dispela haus na ol i go long haus lotu. Ol i ting bai mi go na bungim ol.
Tasol mi no mekim olsem, na famili bilong mi i kros tru long dispela. Mi wantaim susa bilong mi, Edna, i save pas gut wantaim, tasol taim ol i planim pinis mama, em i no laik toktok moa wantaim mi. Mi raitim ol pas, tasol em i no bekim. Long olgeta yia Edna i save kam long Nu Yok bilong mekim kos bilong ol tisa long Siti Koles, na mi save go bilong lukim em. Tasol em i no laik lukim mi—em i tok em i gat planti wok tumas. Bihain mi les na mi no i go moa, nogut dispela i skrapim bel bilong em. Mi no harim sampela tok moa bilong em inap planti yia.
Sikspela pikinini bilong mi i no laik salut long plak, na ol i rausim ol long skul long 1941. Ol i bin mekim olsem long planti ol narapela pikinini long Amerika na Kanada. Ol Witnes i tingim ol dispela pikinini i mas kisim save olsem lo bilong gavman i makim bilong ol pikinini, olsem na ol i putim sampela skul bilong ol yet, ol i kolim Skul Bilong Kingdom. Ol pikinini bilong mi i go long wanpela skul olsem, em i stap long Lekwut, Nu Jesi, long wanpela haus bipo em i wanpela hotel. Long namba wan plua i gat wanpela Haus Kingdom, na i gat klasrum bilong ol skulmanki, na haus kuk, na rum bilong sindaun na kaikai. Ol rum slip bilong ol pikinini meri i stap long namba 2 plua, na ol rum slip bilong ol manki i stap long namba 3 plua. Em i gutpela skul tru. Planti pikinini i slip long dispela skul ol i save go bek long haus long Sarere Sande tasol. Ol pikinini em haus bilong ol i stap longwe, ol i save go bek long haus tupela taim long mun.
Kirap long taim mi kam insait long tok i tru, mi gat bikpela laik long kamap painia, em nem bilong ol Witnes Bilong Jehova ol i save autim tok long olgeta de. Long kibung i bin kamap long Sen Lui, Misuri, long 1941, wanpela brata i mekim tok na em i stori olsem em i wok long mekim bikpela long 12-pela pikinini, tasol em inap mekim wok painia wantaim. Nau mi tingting, ‘Sapos em inap mekim wok painia na lukautim 12-pela pikinini, mi inap mekim wok painia na lukautim 10-pela pikinini.’ Tasol sampela samting long sindaun bilong mi i pasim rot bilong mi i go inap 19 yia. Orait, long Oktoba 1, 1960, mi inap kirap mekim wok bilong Jehova olsem wanpela painia oltaim.
Em i Kam Lukim Mi
Long 1975, susa bilong mi, Edna, i telefon long mi. Long dispela taim mi gat 80 krismas, na mi no bin harim nek bilong em inap 20 yia samting. Em i stap long ples balus na em i askim mi long kam kisim em wantaim man bilong em. Mi amamas long lukim Edna gen, tasol i gat narapela samting bai mi kirap nogut long en, winim dispela. Mipela laik i go long haus, na long rot man bilong Edna i tok, “Yu pulim pinis wanpela i go insait long lotu bilong yu.” Mi no kisim gut tok bilong em. Orait, mipela i kamap pinis long haus na em i tokim mi gen, “Em hia, yu pulim pinis wanpela i go insait long lotu bilong yu.” Meri bilong mi i kisim dispela tok wantu tasol. Em i tanim lukluk long susa bilong mi na i askim em, “Edna, yu wanpela Witnes, a?” Edna i tok, “Em nau.”
Olsem wanem Edna i kisim tok i tru? Long 1972 mi laik stretim dispela hevi i stap namel long mitupela, na mi salim sabskripsen bilong Wastaua long em olsem presen. Wanpela yia samting bihain, sik i kisim Edna na em i mas i stap tasol long haus. Ol dispela nius i stap yet insait long karamap bilong ol long tebol. Orait, em i laik save ol i wanem kain nius, na em i opim wanpela na em i kirap kaunim. Taim em i kaunim pinis em i tingting, ‘Dispela tok em tok i tru!’ Em i kaunim olgeta Wastaua i hip i stap long tebol na bihain ol Witnes Bilong Jehova i kam long haus bilong em. Em i orait long stadi long Baibel, na bihain em i kamap wanpela Witnes Bilong Jehova.
Hevi Bilong i Dai
Bihain, sik daiabitis i kisim meri bilong mi Louise, na dispela sik i wok long i go bikpela tru, na long 1979 em i dai taim em i gat 82 krismas. Taim Louise i dai, i olsem hap bodi bilong mi i dai. Bel bilong mi i bagarap olgeta. Mi no save bai mi mekim wanem, na mi no tingim ol samting bai mi mekim bihain. I mas i gat sampela man bilong strongim bel bilong mi. Wanpela wasman bilong raun, em Richard Smith, em i strongim mi long mekim yet wok painia. Mi lukim olsem taim mi wok long mekim gut bel bilong ol man em wanpela long famili i dai, dispela em i nambawan samting bilong mekim gut bel bilong mi.
Sosaiti Was Taua i stretim rot bilong ol brata sista i ken mekim wanpela bikpela raun long Israel long 1979, na mi putim nem bilong mi long i go wantaim ol. Dispela raun i strongim mi tru, na taim mi kam bek long ples mi kirap mekim gen wok painia. Kirap long dispela taim, long olgeta yia mi save go autim tok long ol longwe ples o long ol ples long narapela hap bilong kantri ol Witnes i no save autim tok long en planti taim. Mi save mekim yet dispela wok, maski mi gat bikpela krismas tru.
Insait long ol yia mi stap long tok i tru, mi bin helpim olsem 50 manmeri long kamap long rot i go long laip. Klostu olgeta pikinini bilong mi i insait long tok i tru. Tupela pikinini meri bilong mi i mekim wok painia oltaim. Narapela pikinini meri, em Louise Blanton, em i wok wantaim man bilong em, George, long nambawan ofis bilong ol Witnes Bilong Jehova long Bruklin, Nu Yok, na wanpela pikinini man bilong mi em i mekim wok elda inap planti yia pinis.
Yumi olgeta i bin kisim sin long tupela tumbuna bilong pastaim, olsem na sik na dai i save painim yumi olgeta. (Rom 5:12) Na mi tu, mi no bin abrusim sik na pen. Sik atraitis i stap long lek bilong mi long han kais. Sampela taim mi save kisim bikpela pen long en, tasol em i no pasim mi long raun na autim tok. Na mi beten long dispela sik i no ken pasim mi bihain. Mi laik wok yet i go. Nambawan bikpela laik bilong mi, em mi laik mekim wok painia i go inap long pinis tru, na mi laik wok inap tru long strong bilong mi long tokim ol man long nem bilong Jehova na ol samting em i laik mekim.
[Piksa long pes 23]
Mi wantaim pikinini meri bilong mi, Rita