Yu Inap Kisim Sampela Pren Tru
I GAT sampela samting i save pasim rot bilong ol man long kisim ol pren tru. Baibel i tok profet olsem, long “taim bilong las de” bai ol man i no laikim ol narapela, na i no laikim ol wanblut, na i no stap gut long narapela. (2 Timoti 3:1-5; Matyu 24:12) Ol dispela pasin i mekim na long nau planti manmeri moa yet ol i bel hevi long i stap wanpis. Wanpela meri i tok: “Hap mi sindaun long en i olsem sip bilong Noa. Sapos yu no gat poroman [olsem marit], yu no inap i go insait long sip.” Tasol asua bilong dispela i no stap tasol long dispela meri o man i stap wanpis, nogat. Long sampela hap, ol manmeri i no save sindaun longtaim long wanpela hap, na ol famili i save bruk, na ol biktaun i gat planti manmeri na ol i no tingim ol narapela, na pasin raskol i pulap na ol man inap kisim bagarap, na long nau ol man i no gat taim bilong malolo, na dispela i mekim na i hatwok long painim ol pren tru.
Man i sindaun long biktaun em i save bungim planti man moa insait long wanpela wik, tasol man i stap long ples tasol, em i no save bungim planti man olsem insait long wanpela yia o long olgeta yia em i stap laip! Tasol maski ol man bilong taun i save long planti man, ol i stap pren long skin tasol. Planti man ol i save go oltaim long ol pati na ol bung bilong amamas na bai ol i ken painim amamas. Tasol ol dispela kain amamas ol i kisim wantaim ol poroman nogut i olsem yumi kisim ol rop i gat nil bilong wokim paia na kukim kaikai, na yumi no kisim paiawut tru. Saveman 7:5, 6 i tok: “Sapos ol man i gat gutpela tingting i krosim yu na stretim yu, orait dispela em i gutpela pasin, na i winim biknem ol man i no gat gutpela tingting i givim yu. . . . Lap bilong ol i no gat as bilong en. I olsem rop i gat nil i stap long paia na i pairap, tasol em i no inap mekim sospen i hat tru.” Tru, rop i gat nil i save paia gut na i pairap, tasol paia bilong en i no save stap longtaim na hatim gut skin bilong yumi. Na i wankain tu long ol poroman i save lap na pairap na amamas nating wantaim yumi—ol inap mekim na bai yumi lusim tingting liklik long hevi bilong yumi, tasol ol i no inap pinisim tru bel hevi bilong i stap wanpis na inapim laik bilong yumi long kisim ol pren tru i save stap pren inap longtaim.
Sampela taim yumi stap wanpis, tasol dispela i narapela kain long bel hevi bilong i stap wanpis. Sampela taim yumi mas i stap wanpis bambai yumi ken maloloim tingting na kisim nupela strong na ol narapela i ken laikim yumi i stap pren bilong ol. Tasol sampela manmeri, taim ol i bel hevi long i stap wanpis, ol i wok long painim ol poroman long rot bilong televisen samting. Wanpela lain i skelim dispela samting ol i tok, planti manmeri ol i save lukim televisen oltaim bilong pinisim bel hevi bilong i stap wanpis. Tasol dispela lain i tok, sapos oltaim yumi wok long lukim televisen, dispela i no inap tru long helpim yumi taim yumi bel hevi long i stap wanpis. Em i save kamapim pasin bilong skin les na yumi laik sindaun tasol, na yumi les, na tingting i raun tasol na tingim ol samting i no save kamap tru. Dispela i no inap helpim yumi long daunim bel hevi bilong i stap wanpis olsem pasin bilong toktok wantaim sampela man i save mekim.
Taim yumi stap wanpis long sampela taim, dispela inap helpim yumi sapos yumi mekim gutpela wok long dispela hap taim. Yumi inap kaunim buk samting, o raitim pas, o wokim sampela samting, o malolo. Na yumi ken beten long God, o stadi long Baibel, na tingim tingim ol dispela tok. (Song 63:6) Ol dispela samting i rot bilong helpim yumi long kam klostu long God Jehova, em dispela Man inap kamap nambawan Pren tru bilong yumi.
Ol Man i Stap Pren Long Bipo
Tru, sapos yumi mekim gutpela pasin pren long olgeta man, em gutpela. Tasol Baibel i tok, “sampela man i gat narakain pren na tupela i pas gut na i wanbel . . . winim pasin namel long tupela brata.” (Sindaun 18:24) Yumi olgeta i mas i gat sampela gutpela pren ol i save tingim tru yumi, na dispela kain pasin pren i save givim amamas long yumi na strongim yumi na bel bilong yumi i stap isi. Tru, long nau yumi no save lukim tumas dispela kain pasin bilong pren gut wantaim, tasol Baibel i stori long sampela man olsem, em ol i stap pren tru. Devit na Jonatan ol i stap pren tru na i pas gut wantaim. Yumi inap kisim wanem save long dispela pasin bilong tupela? Wanem samting i mekim na tupela i stap pren tru inap long taim ol i dai?
Wanpela samting i olsem: Tupela i gat wankain laik na tingting long sampela bikpela samting. Nambawan bikpela samting, em tupela wantaim i givim bel olgeta long God Jehova. Jonatan i lukim pasin bilong Devit long bilip tru long God, na em i lukim ol samting Devit i mekim bilong helpim lain bilong Jehova, olsem na Jonatan “i givim bel bilong en moa yet long Devit na em i laikim Devit tru olsem em i laikim em yet.” (1 Samuel 18:1) Olsem na taim tupela pren i save laikim tru God, dispela i helpim tupela long pas gut wantaim na i stap wanbel.
Jonatan na Devit i strongpela man na ol i save bihainim ol lo bilong God. Olsem na narapela inap tingim gut narapela. (1 Samuel 19:1-7; 20:9-14; 24:6) Em nau, sapos yumi gat ol pren i save stap aninit long God na bihainim ol lo bilong Baibel, dispela i wanpela gutpela blesing tru yumi kisim.
I gat sampela samting moa i mekim na Devit na Jonatan i pren gut wantaim. Tupela i no giaman tasol long i stap pren—tupela i stap pren tru, na narapela i save kamapim tingting na bel bilong em long narapela. Jonatan i putim laik bilong Devit i go pas long laik bilong em yet. Taim Jehova i tok promis long Devit bai kamap king, Jonatan i no bel nogut long Devit—em i sambai long Devit na strongim bel bilong em, na strongim em long ol samting bilong spirit tu. Na Devit i amamas long Jonatan i helpim em olsem. (1 Samuel 23:16-18) Long pasin i stret wantaim Baibel, Devit na Jonatan i kamapim bel bilong tupela, olsem narapela i laikim tru narapela. Tupela i stap pren wantaim, long wanem, narapela i pilim tru gutpela pasin bilong narapela na laikim em tru. (1 Samuel 20:41; 2 Samuel 1:26) Na tupela wantaim i stap gut long God long olgeta taim, olsem na tupela i no inap bruk. Sapos yumi bihainim ol dispela pasin, dispela inap helpim yumi long kisim ol pren tru na i stap pren bilong ol inap long olgeta taim.
Pasin Bilong Kisim Ol Gutpela Pren
Olsem wanem? Yu wok long painim ol pren tru? Nogut yu ting bai yu hatwok tru long painim. Ating sampela yu save bungim ol long olgeta taim ol inap kamap pren bilong yu, na ating ol i laik tru bai yu stap pren bilong ol. Na ol Kristen i mas tingim ol narapela Kristen na bihainim tok bilong Pol long “givim bel bilong [ol] olgeta” long ol brata Kristen na no ken pasim bel bilong ol. (2 Korin 6:11-13) Tasol yu no ken bel hevi sapos yu wok strong long kamap pren bilong wanpela, tasol yupela i no pas gut wantaim. Yu no inap mekim insait long sotpela taim tasol—ating bikpela hap taim i mas lus pastaim. Na sampela ol i pren gut wantaim, tasol ol i no save pas gut tru wantaim olsem sampela i mekim. (Saveman 11:1, 2, 6) Tasol sapos yumi laik kisim wanpela pren tru bilong yumi, orait yumi no ken tingim skin bilong yumi yet tasol, na yumi mas bihainim tok bilong Jisas, em i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.”—Matyu 7:12.
Yu inap kamap pren bilong husat? Tru yu ken kamap pren bilong ol wankrismas bilong yu. Tasol olsem wanem long ol yangpela o ol lapun? Tingim Devit wantaim Jonatan, na Rut wantaim Naomi, na Pol wantaim Timoti—ol i stap pren tru, maski krismas bilong narapela i aninit tru long krismas bilong narapela. (Rut 1:16, 17; 1 Korin 4:17) Olsem wanem? Yu inap kamap pren bilong sampela meri em man bilong ol i dai pinis na ol narapela meri i no marit? Na tingim ol nupela lain ol i kam sindaun long hap bilong yu. Ating ol i bin lusim planti pren bilong ol, o sindaun bilong ol i senis. Yu no ken wetim ol narapela i kam painim yu. Sapos yu wanpela Kristen, bai yu inap kisim ol pren tru sapos yu bihainim tok bilong Pol, olsem: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.”—Rom 12:10.
Pasin bilong i stap pren bilong narapela em i wankain olsem pasin bilong givim samting long narapela. Jisas i tok, sapos yumi givim ol samting long ol man, orait ol man bai i givim ol samting long yumi. Na Jisas i tok, amamas bilong givim samting long ol man, dispela i winim amamas bilong kisim ol samting long ol. (Luk 6:38; Aposel 20:35) Olsem wanem? Yu bin bungim sampela man bilong kain kain skin na sindaun? Ol kibung intenesenel bilong ol Witnes Bilong Jehova i kamapim long ples klia olsem ol man bilong kain kain skin na sindaun ol inap kamap pren tru taim ol i lotuim God tru.
Stap Pren Tru
Sori tru, sampela i mekim olsem ol i stap pren, tasol narapela i sutim tru bel bilong narapela. Ol i tok baksait long narapela, na ol i kamapim wanpela tok bilong pren long ol narapela, maski ol i bin tok ol i no ken kamapim, na ol i no pilim gutpela pasin pren bilong narapela—ol dispela samting inap bagarapim bel bilong yu sapos wanpela i bin mekim olsem long yu na yu ting em i pren tru bilong yu. Sapos kain samting olsem i painim yu, orait yu ken mekim wanem?
Yu mas i stap olsem gutpela piksa em i ken bihainim. Wok strong long abrusim pasin bilong bagarapim nating bel bilong em. Long sampela hap, em pasin bilong sampela long tok pilai na kamapim ol liklik pasin kranki bilong pren bilong ol. Tasol dispela kain pasin bilong tok bilas samting na trikim pren, em i no inap helpim tupela long pas gut wantaim, maski em i tok em i mekim “tok pilai tasol.”—Sindaun 26:18, 19.
Sapos yu gat wanpela gutpela pren, wok strong bambai yupela ken i stap pren oltaim. Sampela taim ating wanpela i save ting, pren bilong em i no tingim gut em, na dispela inap kamapim hevi namel long tupela. Sapos wanpela gutpela pren bilong yu i gat sik, o em i tingting planti long wanpela bikpela hevi i painim em, ating em bai i no inap mekim gut long yu olsem pastaim em i bin mekim. Olsem na long kain taim olsem, yu mas pilim hevi bilong em na wok long helpim em na sambai long em.
Taim wanpela hevi i kamap namel long yutupela, wok long stretim hariap, na mekim long gutpela pasin. Sapos inap, i gutpela sapos yutupela tasol i stap na stretim. (Matyu 5:23, 24; 18:15) Yu mas kamapim klia long pren bilong yu olsem yu laik i stap pren bilong em. Ol pren tru i save lusim tingting long rong bilong narapela. (Kolosi 3:13) Olsem wanem? Bai yu stap kain pren olsem—bai yu pas gut wantaim pren bilong yu, winim pasin namel long tupela brata?
Tru, yumi kaunim stori bilong ol man i bin i stap pren tru, na yumi tingting long dispela samting, tasol yumi mas mekim sampela samting moa. Sapos yumi bel hevi long i stap wanpis, orait yumi mas kirap na mekim sampela samting, na ating i no longtaim na bel hevi bilong i stap wanpis em bai pinis. Sapos yumi wok strong, yumi inap kisim sampela pren tru, na bai yumi pas gut tru wantaim sampela. Tasol i no gat wanpela pren i winim God—em i nambawan Pren tru bilong yu. Jehova tasol inap save gut long yumi, na pilim tingting bilong yumi, na sambai long yumi long olgeta taim. (Song 139:1-4, 23, 24) Na Baibel i tok promis long gutpela samting tru yumi inap wet long en—em nupela taim bai kamap na yumi inap kisim ol pren tru bilong i stap oltaim oltaim.—2 Pita 3:13.
[Ol Piksa long pes 5]
Devit wantaim Jonatan i stap pren tru, na yumi tu inap mekim olsem