Askim
Sampela taim yumi harim ol brata i beten o mekim tok olsem Kingdom bilong God bai kamap long graun. Dispela kain tok em i stret o nogat?
Yumi ken tok olsem, dispela kain tok i no stret wantaim tok bilong Baibel. Kingdom bilong God em i bilong heven. Olsem na aposel Pol inap tok: “Bikpela bai i kisim bek mi long olgeta pasin nogut ol i laik mekim long mi, na em bai i mekim mi i stap gut na bringim mi i go long kingdom bilong en i stap long heven. Yumi mas litimapim nem bilong em oltaim oltaim. I tru.”—2 Timoti 4:18; Matyu 13:44; 1 Korin 15:50.
Kingdom bilong God i kamap long heven long 1914, na em i no inap kamap long Paradais long graun o long narapela hap. Krais Jisas em i King bilong Kingdom. Jisas i stap King na em i gat namba bilong bosim ol ensel. Olsem na i stret sia king bilong em i mas i stap long han sut bilong God long heven. Ol Kristen God i makim ol long spirit holi ol i go long heven bilong mekim wok king na pris wantaim em.—Efesus 1:19-21; KTH 5:9, 10; 20:6.
Olsem wanem? Yumi no ken kolim moa Beten Bilong Bikpela na tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven”? (Matyu 6:10) Nogat. I stret yumi ken beten olsem, dispela beten i gat yet as bilong en.
Kingdom bilong God bai mekim yet strongpela samting long graun, na yumi tingim dispela taim yumi beten na yumi kolim ol tok i kain olsem wanpela hap tok bilong Beten Bilong Bikpela. Olsem: Daniel 2:44 i tok, dispela Kingdom bai “kam” bilong bagarapim olgeta lain man na kisim bek wok bilong bosim dispela graun. Na Kamapim Tok Hait 21:2 i stori long Nupela Jerusalem i lusim heven na i kam daun. Nupela Jerusalem em lain 144,000, em ol Kristen spirit holi i makim ol na ol bai kamap meri bilong Krais. Na tu, ol bai mekim wok king wantaim Jisas long Kingdom. Tok profet bilong Kamapim Tok Hait 21:2 i makim olsem ol bai lukluk i kam daun long graun bilong helpim ol gutpela manmeri long kisim planti blesing.—KTH 21:3, 4.
I stret yumi ken beten olsem “Kingdom bilong yu i mas i kam,” i go inap long taim dispela tok profet na ol narapela gutpela tok profet i kamap tru pinis. Tasol yumi no ken lusim tingting olsem Kingdom bai i no inap kam daun tru long graun. Dispela gavman o Kingdom, i stap long heven, em i no stap long graun.
[Piksa Kredit Lain long pes 31]
Earth: Based on NASA photo