Yu Inap Laikim Tru God?

“SAPOS wanpela man i lukim pes bilong mi bai em i dai.” Em God i tok olsem. (Kisim Bek 33:20) Na tu, kirap long taim bilong ol man i bin raitim Baibel na i kam inap nau, i no gat wanpela samting i makim olsem wanpela man i bin toktok stret wantaim God. Orait, sapos yu no bin lukim tru pes bilong wanpela man, na yu no bin harim nek bilong em, yu ting i hatwok​—⁠o i no inap tru​—⁠long kisim pasin bilong laikim em tru? Yumi inap laikim tru na pas gut wantaim Man i bin wokim heven na graun?

Yumi inap tru long pas gut wantaim God olsem pren bilong em. Long Lo 6:​5, lain Israel i bin kisim tok olsem: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela.” Bihain Krais Jisas i kamapim gen dispela lo long ol disaipel, na em i tok moa olsem: “Dispela lo em i bikpela, na em i namba wan tru.” (Matyu 22:​37, 38) Yu ting Baibel i tok yumi mas laikim tumas God sapos yumi no inap tru long mekim olsem?

Tasol yu ting God i laik bai yumi mas laikim em tru, long wanem, em i tok yumi mas mekim olsem? Nogat, i no long dispela as tasol na em i laik bai yumi mas laikim em tru. Taim God i wokim namba wan man na meri, em inapim ol long laikim em tru. Em i no bin subim Adam na Iv long laikim em tru na pas gut wantaim em, nogat. God i bin putim ol long gutpela ples tru na givim gutpela sindaun long ol na bai ol inap kisim pasin bilong laikim em tumas. Tupela yet i mas tingim rot ol i laik bihainim​—⁠ol i ken i go klostu long God o ol i ken surik long em.

Adam na Iv i makim rot ol i laik bihainim​—⁠ol i laik bikhet long God. (Stat 2:​16, 17; 3:​6, 7) Tasol ol pikinini bilong tupela bai ol inap long kisim pasin bilong laikim tru Man bilong wokim ol na pas gut wantaim em.

Ol i Wokabaut Wantaim Trupela God

Baibel i stori long Abraham na i tok, em i “pren” bilong God. (Jems 2:​23) Tasol i no Abraham wanpela tasol i pas gut wantaim God olsem pren bilong em. Baibel i stori long planti ol narapela man bilong graun ol i laikim tru Jehova na ol i stap “pren tru bilong God.”​—⁠Stat 5:​24; 6:9; Jop 29:4; Song 25:14; Sindaun 3:​32.

Ol wokman bilong God long bipo, taim mama i karim ol, ol i no gat dispela pasin bilong laikim tru God. Ol i mas wok long kisim dispela pasin. Ol inap mekim olsem wanem? Ol i mas save long nem bilong em, Jehova. (Kisim Bek 3:​13-​15; 6:​2, 3, NW) Ol i mas save, em i stap na em i God tru. (Hibru 11:⁠6) Long olgeta taim ol i mas tingim tingim ol gutpela pasin sori em i bin mekim long ol. (Song 63:⁠6) Ol i mas beten long God na kamapim ol tingting i stap long bel bilong ol. (Song 39:12) Ol i mas kisim save long ol gutpela pasin bilong em. (Sekaraia 9:​17) Na ol i mas pret long mekim ol samting em i no save laikim.​—⁠Sindaun 16:⁠6.

Olsem wanem long yu? Yu inap kamap pren bilong God na wokabaut wantaim em? Tru, yu no inap lukim God o harim nek bilong em. Tasol Jehova i singautim yu long ‘i stap long haus bilong em’ olsem pren bilong em. (Song 15:​1-5) Olsem na yu inap long laikim tru God. Tasol olsem wanem yu inap kisim pasin bilong laikim tru God na pas gut wantaim em?