Askim

Inap sampela yia ol ripot i kamapim olsem namba bilong ol man i kisim bret na wain long Memorial i go antap liklik. Olsem wanem? Dispela i kamapim olsem God i makim planti nupela man long spirit holi?

I gat as tru na yumi ken bilip olsem inap planti yia pinis dispela namba 144,000 bilong ol Kristen em God i bin makim ol long spirit holi, em inap pinis.

Long Aposel 2:​1-4 yumi ken kaunim stori bilong ol namba wan man ol i insait long dispela lain 144,000, olsem: “Bikpela De Bilong Pentikos i kam pinis, na ol manmeri i bilip long Jisas ol i bung wantaim long wanpela haus. Na wantu wanpela nois i kam long heven, em i olsem krai bilong strongpela win, na i pulapim tru dispela haus ol i sindaun i stap long en. Na ol i lukim samting olsem paia i kamap, na i luk olsem planti tang bilong man. Na ol dispela tang i go nabaut na i stap long olgeta bilong ol. Na Holi Spirit i pulap long olgeta dispela manmeri, na ol i stat long mekim tok long ol kain kain tok ples. Holi Spirit i mekim na ol inap mekim ol dispela toktok.”

Bihain long dispela de, Jehova i makim sampela narapela long spirit holi bilong em. Long taim lotu Kristen i kirap nupela, God i makim planti tausen moa long spirit holi. Long taim bilong Memorial long nau, planti brata i mekim tok bilong Memorial ol i save kamapim tok bilong aposel Pol long Rom 8:​15-17, em i stori long ol dispela man God i bin makim na em i tok ol i kisim ‘dispela Spirit God i bin givim long ol i save mekim ol i kamap pikinini bilong God.’ Na Pol i tok moa olsem spirit holi ol i kisim ‘i save helpim spirit bilong ol na ol i save tokaut ples klia olsem ol i stap pikinini bilong God na ol bai kisim ol gutpela samting God Papa i bin promis long givim, em ol samting Krais, brata bilong ol i kisim pinis.’ Ol man i kisim tru dispela spirit, ol i save God i bin makim ol. I no olsem ol i gat laik tasol long kisim spirit holi o bel bilong ol i kirap nating na ol i no gat stretpela tingting long ol yet.

Yumi ken ting olsem, kirap long taim bilong ol aposel i kam inap nau, God i bin makim sampela man bilong i go long heven, tasol ating namel long yia 500 na 1000 samting, i gat wan wan tasol bilong ol dispela man o meri i stap.a Taim lotu Kristen tru i kamap bek klostu long yia 1900 samting, God i bin makim sampela manmeri moa. Tasol i olsem long yia 1935, dispela lain 144,000 em inap pinis. Olsem na wanpela narapela lain Kristen i kamap, em ol i stap gut long God na ol i gat tingting long i stap oltaim long graun. Jisas i kolim ol olsem “ol arapela sipsip,” na ol i bung na lotu wantaim ol manmeri God i bin makim ol olsem wanpela lain em God i orait long en.​—⁠Jon 10:​14-16.

Ol samting i bin kamap kirap long yia 1935 i kam inap nau, i kamapim long ples klia olsem Jehova i no wok long makim moa sampela man long spirit holi, na em i blesim dispela bikpela lain manmeri em ol i laik winim “taim bilong bikpela hevi tru.” (KTH 7:​9, 14, NW) Olsem: Inap 63,146 manmeri i kam long Memorial long yia 1935, na 52,465 manmeri ol i kisim bret na wain bilong kamapim olsem God i bin makim ol. Inap 30 yia bihain, long 1965, inap 1,933,089 i bin kam long Memorial, tasol namba bilong ol manmeri i kisim bret na wain i go daun long 11,550. Na 30 yia bihain, long 1995, inap olsem 13,147,201 i bin kam long Memorial, tasol 8,645 tasol ol i bin kisim bret na wain. (1 Korin 11:​23-26) Olsem na namba bilong ol manmeri i tok ol i bilong lain remnan i go daun tru​—⁠long 1935 i gat olsem 52,400; long 1965 i gat olsem 11,500; long 1995 i gat olsem 8,600. Tasol God i bin blesim ol manmeri i gat tingting long i stap long graun, na namba bilong ol i go antap tru.

Laspela ripot bilong Memorial em bilong yia 1995, na em i kamapim olsem 28 manmeri moa ol i kisim bret na wain, winim bilong yia 1994; tasol sapos yumi skelim namba bilong ol manmeri i kisim bret na wain wantaim namba bilong ol manmeri i kam long Memorial, i olsem lain bilong kisim bret na wain i go liklik. Tru sampela moa i kisim bret na wain, tasol sapos yumi skelim olgeta samting, dispela i no ken mekim na yumi tingting planti long en. Inap sampela yia, sampela i baptais nupela ol i bin kirap kisim bret na wain. Tasol bihain sampela i tokaut olsem ol i bin popaia. Ol i luksave olsem bel bilong ol i bin kirapim ol long kisim bret na wain, long wanem, ol i gat hevi long skin o long tingting. Ol i kisim save olsem God i no bin makim ol bilong i go long heven. Ol i bin askim God long marimari long ol. Na ol i mekim yet wok bilong God olsem Kristen i stap gut long God, na ol i wet long kisim laip oltaim long graun.

Olsem na yumi no ken tingting planti sapos wanpela man o meri i kirap kisim bret na wain, o em i no kisim moa. Sapos God i makim wanpela man long spirit holi bilong kisim laip long heven o em i no makim em, dispela i no samting bilong yumi. Tingim tok bilong Jisas, olsem: “Mi yet mi gutpela wasman bilong ol sipsip. Mi save long ol sipsip bilong mi.” Na Jehova tu i save long ol manmeri em i bin makim ol olsem pikinini bilong em long spirit. I gat as tru na yumi ken bilip olsem namba bilong ol manmeri God i bin makim ol long spirit holi em bai go daun moa, long wanem, planti ol i lapun na sampela hevi inap painim ol na ol i dai. Ol dispela manmeri God i bin makim ol tru, sapos ol i stap gut long God inap long taim ol i dai, ol bai kisim laip olsem prais, na ol narapela sipsip, em ol i bin wasim klos bilong ol long blut bilong Pikinini Sipsip, ol i ken amamas long abrusim bagarap long taim bilong bikpela hevi tru.​—⁠2 Timoti 4:​6-8; KTH 2:⁠10.

[Futnot]