Ol i Mekim Laik Bilong Jehova
Pita i Autim Tok Long De Pentikos
LONG yia 33 C.E. long wanpela moning i gat gutpela san, bel bilong ol man i kirap tru! Planti Juda na ol man i bihainim lotu bilong ol, ol i wokabaut long ol rot insait long Jerusalem. Ol i kam long ol kantri olsem Elam, Mesopotemia, Kapadosia, Isip, na Rom. Ol man i amamas long lukim pasin bilong ol long pasim bilas bilong ples na mekim tok long ol narapela narapela tok ples! Sampela i bin kam longwe tru inap olsem 2,000 kilomita bambai ol i ken i stap long wanpela bikpela bung. Em wanem bung? Em Pentikos—em wanpela bikpela bung bilong ol Juda bilong makim olsem taim bilong kisim bali long gaden em i pinis, na em i taim bilong bikpela amamas.—Wok Pris 23:15-21.
Smok bilong ol ofa ol i mekim long alta bilong tempel i wok long i go antap, na ol Livai i mekim song ol i kolim Halel (Song 113 i go 118). Klostu long 9 klok moningtaim ol man i kirap nogut. “Wanpela nois i kam long heven, em i olsem krai bilong strongpela win.” Dispela nois i pulapim tru dispela haus em 120 disaipel bilong Krais Jisas i bung long en. Baibel i tok: “Ol i lukim samting olsem paia i kamap, na i luk olsem planti tang bilong man. Na ol dispela tang i go nabaut na i stap long olgeta bilong ol. Na Holi Spirit i pulap long olgeta dispela manmeri, na ol i stat long mekim tok long ol kain kain tok ples. Holi Spirit i mekim na ol inap mekim ol dispela toktok.”—Aposel 2:1-4.
Olgeta Wan Wan i Harim Tok Ples Bilong Ol Yet
Liklik taim na ol disaipel i wok long lusim dispela haus i kam ausait. Olaman! Ol inap toktok long tok ples bilong ol dispela planti manmeri i bin kam long Jerusalem! Ating ol Persia i bin kam raun long Jerusalem long dispela taim, na ol Isip tu, ol i kirap nogut long harim ol Galili i toktok long tok ples bilong ol. Ol manmeri i tingting planti. Ol i askim olsem: “Dispela samting nau i kamap, em wanem kain samting tru?” Tasol sampela i tok bilas long ol disaipel olsem: “Ol i dringim planti nupela wain na ol i spak.”—Aposel 2:12, 13.
Orait nau aposel Pita i sanap na mekim tok long ol manmeri. Em i stori olsem dispela strongpela wok bilong mekim tok long kain kain tok ples em i truim wanpela promis God i bin mekim long rot bilong profet Joel, olsem: “Bai mi kapsaitim Spirit bilong mi long olgeta manmeri.” (Aposel 2:14-21; Joel 2:28-32) Tru tumas, nau tasol God i bin kapsaitim spirit holi bilong em long ol disaipel bilong Jisas. Dispela i kamapim klia olsem Jisas i kirap bek pinis na nau em i stap long heven long han sut bilong God. Na Pita i tok: “Olsem na yupela olgeta lain Israel, yupela i mas save gut olsem, dispela Jisas yupela i nilim em long diwai kros, God i makim em i stap Bikpela, na man bilong kisim bek ol manmeri bilong en.”—Aposel 2:22-36.
Ol man i harim dispela tok ol i mekim wanem? Baibel i tok: “Dispela tok i sutim tru bel bilong ol. Na ol i askim Pita wantaim ol arapela aposel olsem, ‘Ol brata, bai mipela i mekim wanem nau?’ Na Pita i tokim ol olsem, ‘Yupela olgeta wan wan i mas tanim bel na kisim baptais.’ ” Inap olsem 3,000 manmeri i mekim dispela samting! Na bihain ol i “strong long harim tok bilong ol aposel.”—Aposel 2:37-42.
Pita i go pas long mekim toktok long dispela bikpela taim, olsem na em i mekim wok long namba wan ki bilong “ol ki bilong kingdom bilong heven” em Jisas i bin tok promis long givim long em. (Mt 16:19) Ol dispela ki i opim rot long ol manmeri bilong kain kain lain i ken kisim sampela gutpela blesing. Namba wan ki i opim rot long ol Juda i ken kamap Kristen em God i makim ol long spirit holi. Bihain, namba tu na namba tri ki i opim rot long ol Samaria na ol man bilong ol narapela lain i ken kisim dispela gutpela samting.—Aposel 8:14-17; 10:44-48.
I Skulim Yumi
Tru, olgeta dispela manmeri bilong lain Juda na ol man i bihainim lotu bilong ol, ol i gat asua long i dai bilong Pikinini bilong God, tasol Pita i daun long ol na kolim ol olsem “ol brata.” (Aposel 2:29) Em i laik kirapim ol long tanim bel, em i no laik krosim ol. Olsem na em i mekim gutpela tok long ol. Em i stori long ol samting tru i bin kamap, na em i kamapim sampela tok bilong Baibel bilong strongim ol dispela tok.
Ol man i autim gutnius long nau, gutpela sapos ol i bihainim pasin bilong Pita. Ol i mas traim kamapim ol tok em ol man i harim ol inap wanbel long en, na long pasin isi toktok gut wantaim ol long ol tok bilong Baibel. Sapos ol i kamapim ol tok i tru bilong Baibel long stretpela pasin, ol man i gat gutpela bel ol bai bilip na bihainim.—Aposel 13:48.
Long de Pentikos, Pita i strong long autim tok, na em i no pret. Tasol 7-pela wik paslain long dispela de, em i bin tokaut olsem em i no save liklik long Jisas. Long dispela taim bipo, Pita i pret long ol man. (Matyu 26:69-75) Tasol Jisas i bin beten askim God long helpim Pita. (Luk 22:31, 32) Ating taim Jisas i kirap bek pinis na kamap long ai bilong Pita, dispela i strongim dispela aposel. (1 Korin 15:5) Olsem na Pita i no lusim bilip. I no longtaim na em i strong long autim tok na em i no pret. Tasol em i no autim tok long de Pentikos tasol, nogat; em i mekim i go inap long taim em i dai.
Olsem wanem sapos yumi bin mekim wanpela rong o popaia, olsem Pita i bin mekim? Yumi mas kamapim klia olsem yumi tanim bel, na beten askim God long lusim dispela rong, na askim sampela long helpim yumi long ol samting bilong spirit. (Jems 5:14-16) Sapos yumi mekim olsem, orait, yumi ken bilip olsem gutpela Papa bilong yumi long heven, Jehova, em bai orait long ol wok yumi mekim bilong em, na yumi ken wok i go moa.—Kisim Bek 34:6.