Ripot Long Wok Bilong Kingdom
Ol i Autim Yet Ol Tok i Tru Bilong Baibel Long Aialan
LONG dispela taim nau i gat planti hevi i bin kamap long naispela kantri Aialan. Tasol maski i gat hevi, ol manmeri bilong Aialan i amamas long harim tok bilong Baibel long ol gutpela samting bai kamap bihain, em dispela tok ol Witnes Bilong Jehova i save autim long ol. Tupela stori hia bilong Aialan i kamapim klia dispela samting.
■ Long Dablin wanpela Witnes Bilong Jehova i autim tok long ol haus wantaim liklik pikinini meri bilong em. Ol i bungim wanpela meri nem bilong em Cathy, em i gat planti wok long lukautim ol planti pikinini bilong em. Dispela Witnes i askim meri sapos em i orait long harim liklik tok bilong pikinini bilong em, em i lain long pasin bilong autim tok. Cathy i orait long dispela, na liklik pikinini meri i mekim gutpela tok, em i redim gut na kamapim gut. Cathy i kirap nogut long pasin bilong liklik meri, em i bilip tru long tok em i mekim na em i mekim long pasin daun, na Cathy i kisim wanpela liklik nius bilong Baibel pikinini i lusim long em.
Bihain Cathy i tingting bek long gutpela pasin bilong liklik meri na em i bin redim gut ol tok. Em i tok: “Mi kirap nogut long wanpela liklik meri inap kamapim kain gutpela tok olsem na em i no apim nem bilong em yet. Olsem na mi pasim tok long bel olsem, taim ol Witnes Bilong Jehova i kam raun gen, mi bai harim tok bilong ol.”
Bihain Cathy i lusim dispela hap na i go sindaun long wanpela liklik taun long hap saut-wes bilong Aialan, klostu long boda bilong provins Kork na Keri. Wanpela taim bihain ol Witnes Bilong Jehova i kam long haus bilong em na em i singautim ol i kam insait. Em i orait long ol i stadi Baibel wantaim em na long nau em i save go long ol miting bilong kongrigesen wantaim sampela pikinini bilong em. Cathy i amamas long dispela liklik meri i bin i gat laik tru long autim gutnius long em.
■ Long hap bilong Talamoa, insait long 7-pela yia ol Witnes i save toktok wantaim wanpela meri long Baibel, nem bilong em Jean. Sampela taim em i amamas long harim tok na em i kisim ol buk na nius, tasol sampela taim em i no amamas tumas. Wanpela de, wanpela Witnes nem bilong em Frances, na wanpela poroman, ol i go lukim Jean tasol em i kros. Dispela Witnes i tok, “Maski mipela i mekim wanem tok, em i wok long kros moa. Bihain, em i tokim mipela long klia na em i pasim strong dua.”
Frances i ting, nogut em bai mekim wankain pasin sapos ol i go lukim em long bihain. Em i tingting: ‘Ating i no gutpela long i go lukim em gen sapos em i no gat laik tru long harim tok.’ Tasol em i toktok wantaim man bilong em Thomas long dispela samting, na Thomas i ting i gutpela long ol i mas i go yet. Narapela taim ol i raun gen long dispela hap, ol i go lukim Jean. Em i amamas na em i kisim sampela nius Wastaua na Kirap! Taim ol i go bek na lukim em sampela taim moa, em i amamas yet, na Thomas na Frances i kirap stadi Baibel wantaim em long olgeta wik.
Wanem samting i mekim na em i senis? Jean i tok, long dispela taim em i bin kros long ol Witnes, nau tasol em i bin karim pikinini na lusim haus sik. Em i wok long givim susu long nupela bebi, na tu em i givim kaikai long han long narapela bebi i bikpela liklik, olsem na em i save kisim liklik slip tasol long nait—inap wan aua na hap tasol. Jean i tok, “Mi no bin amamas liklik long toktok long lotu.”
Insait long tupela mun Jean i wok long kam long olgeta miting, na insait long 4-pela mun em i kirap long autim tok. Tenpela mun bihain long taim em i kirap stadi long Baibel, em i kisim baptais. Nau stori bilong Jean yet i save helpim em long taim em i autim tok. Em i tok: “Sapos mi bungim wanpela man o meri i kros na i no mekim gutpela pasin, mi save wok strong long pilim tingting bilong em. Mi save raitim dispela samting long notbuk. Ating ol samting inap senis long taim mi go bek gen; ating bel bilong dispela man o meri i kamap gutpela gen na nau em bai harim tok.”