Olgeta i Mas Givim Biknem Long Jehova!
“Long ples lait i save kamap long en ol i mas litimapim nem bilong Jehova.”—AISAIA 24:15, NW.
JEHOVA—dispela nem bilong God em i nambawan tru! Ol gutpela profet bilong bipo ol i bin amamas tru long autim tok long dispela nem! Ol i amamas long givim biknem long Bikpela King bilong ol, Jehova, em dispela nem i makim olsem em i Man bilong kamapim laik bilong em. (Aisaia 40:5; Jeremaia 10:6, 10; Esekiel 36:23) Na ol profet i bin raitim ol sotpela tok tasol, ol tu i strong long givim biknem long Jehova. Wanpela bilong ol em Hagai. Long Buk Hagai, em i gat 38 ves tasol, nem bilong God i stap inap 35 taim. Tasol i olsem dispela tok profet i no gat strong moa taim ol i rausim gutpela nem tru bilong Jehova na ol i putim “Bikpela” olsem biknem—em dispela pasin ol “namba wan aposel” bilong ol misin i bin mekim long ol Baibel bilong ol.—Skelim wantaim 2 Korin 11:5.
2, 3. (a) Tok profet long God bai bringim ol Israel i kam bek long graun bilong ol, olsem wanem dispela i bin kamap tru? (b) Liklik hap lain bilong Juda wantaim ol poroman bilong ol, ol i bin amamas long mekim wanem?
2 Long Aisaia 12:2 long Baibel Hibru, profet Aisaia i dabolim nem bilong God.a Em i tok: “God i bin kisim bek mi. Na bai mi bilip strong long em na mi no ken pret. [“Ja Jehova,” NW] i save mekim mi i stap strong na mi singim song bilong litimapim nem bilong en.” Olsem na inap 200 yia paslain long Israel i lusim kalabus long Babilon, long rot bilong profet Aisaia Ja Jehova i tokim lain bilong em olsem em i bikpela Man bilong kisim bek ol. Ol bai stap kalabus kirap long yia 607 B.C.E na i go inap long yia 537 B.C.E. Na tu Aisaia i raitim dispela tok: “Mi wanpela tasol mi bin mekim olgeta samting i kamap. . . . Na mi tok olsem, mi yet mi makim Sairus olsem king, bilong em i ken mekim olgeta wok mi laik bai em i mekim. Em bai i tok na ol bai i wokim Jerusalem gen. Na bai ol i stat long wokim haus bilong mi.” Dispela Sairus em i husat? Em King Sairus bilong Persia, em i daunim Babilon long yia 539 B.C.E.—Aisaia 44:24, 28.
3 Tok bilong Jehova long maus bilong Aisaia i kamap tru taim Sairus i tokim ol Israel i stap kalabus olsem: “God i ken i stap wantaim yupela Israel, yupela ol manmeri bilong en. . . . Nau yupela Israel i mas i go bek long Jerusalem, taun bilong God, Bikpela bilong yupela, na wokim gen haus bilong en.” Liklik hap lain bilong Juda ol i amamas tru long i go bek long Jerusalem wantaim ol Netinim, em ol i no bilong lain Israel, na ol pikinini bilong ol wokman bilong Solomon. Ol i kamap long yia 537 B.C.E., long taim stret bilong tingim Ol Bikpela De Bilong i Stap Long Haus Win na mekim ol ofa long Jehova long alta bilong em. Long yia antap, long namba tu mun, ol i putim ol as ston bilong namba tu tempel, na taim ol i mekim olsem ol i amamas na singaut na litimapim nem bilong Jehova.—Esra 1:1-4; 2:1, 2, 43, 55; 3:1-6, 8, 10-13.
4. Olsem wanem ol tok bilong Aisaia sapta 35 na 55 i bin kamap tru?
4 Tok profet bilong Jehova long ol samting i mas kamap gutpela gen bai kamap tru long Israel, olsem: “Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap. . . . Na ol manmeri bai i lukim strong na biknem na gutpela bilas bilong God, Bikpela bilong yumi.” “Bai yupela i amamas na lusim Babilon, na bai mi bringim yupela i kam na i no gat wanpela samting bai i kamap bilong mekim yupela i pret. Ol maunten bai i singim ol song bilong amamas . . . Na oltaim oltaim dispela bai i stap olsem mak bilong ol manmeri i ken lukim na tingim ol strongpela wok mi Bikpela mi bin mekim.”—Aisaia 35:1, 2; 55:12, 13.
5 Tasol dispela amamas i no bin stap longtaim. Ol lain i stap klostu long ol Juda ol i bilong narapela lotu tasol ol i laik bung wantaim ol long wokim tempel. Pastaim ol Juda i sanap strong na ol i tok: “Yupela i no ken helpim mipela long wokim haus bilong God, Bikpela bilong mipela. Mipela yet bai i wokim, olsem King Sairus i bin tokim mipela long mekim.” Nau ol dispela lain i kirap birua nogut tru long ol. Ol i “traim long mekim ol Juda i pret na mekim bel bilong ol i kamap nogut bai ol i lusim dispela wok.” Na tu ol i mekim ol tok giaman long Artaserksis, em senis bilong Sairus, na em i tingting kranki long wok ol Juda i mekim na tambuim ol long wokim tempel. (Esra 4:1-24) Inap 17 yia ol i no mekim wok. Sori tru, long dispela hap taim ol Juda i kirap tingim tumas ol mani kago samting.
“Jehova Bilong Ol Bikpela Lain Ami i Tok”
6. (a) Jehova i mekim wanem bilong helpim lain Israel? (b) Olsem wanem na insait bilong nem bilong Hagai i stret long em?
6 Tasol Jehova i kamapim strong bilong em long helpim lain Israel taim em i salim ol profet, olsem Hagai na Sekaraia, bilong kirapim ol Juda long tingim ol wok ol i mas mekim. Nem bilong Hagai em samting bilong ol bikpela de, long wanem, ol i ting insait bilong en i olsem “Em i kamap long Bikpela De Bilong Amamas.” Dispela nem i stret long Hagai, long wanem, em i bin kirap autim tok profet long namba wan de bilong dispela mun em Ol Bikpela De Bilong i Stap Long Haus Win i save kamap long en, na long dispela taim, God i tok ol Juda “i mas amamas tru.” (Lo 16:15) Long rot bilong Hagai, Jehova i givim fopela toksave long ol insait long 112 de.—Hagai 1:1; 2:1, 10, 20.
7 Bilong kirapim tok profet bilong em, Hagai i tok: “Jehova bilong ol bikpela lain ami i tok.” (Hagai 1:2a, NW) Husat dispela “ol bikpela lain ami”? Em ol lain ensel, na sampela Baibel i kolim ol olsem ol lain ami. (Jop 1:6; 2:1; Song 103:20, 21; Matyu 26:53) Taim yumi tingim Bikpela King Jehova i mekim wok long ol dispela strongpela lain ami bilong heven long stiaim wok bilong yumi long nau long kamapim bek lotu i tru long graun, dispela i save strongim tru bel bilong yumi, a?—Skelim wantaim 2 King 6:15-17.
8. Ol Israel i bin kisim wanem kain tingting? Dispela i bin mekim wanem long ol?
8 Hagai i mekim wanem ol tok long namba wan toksave bilong em? Ol manmeri i bin tok: “Taim bilong wokim gen haus bilong God, em i no kamap yet.” Wok bilong sanapim tempel, bilong makim olsem lotu i tru i kamap gen, i no stap moa olsem nambawan samting long tingting bilong ol. Ol i wok long sanapim ol gutpela gutpela haus bilong ol yet. Pasin bilong laikim tumas mani kago i mekim na ol i no givim bel moa long lotu bilong Jehova. Olsem na Jehova i tekewe blesing bilong em. Ol gaden bilong ol i no kamapim planti kaikai moa, na ol i sot long klos bilong pasim long taim bilong bikpela kol. Mani ol i kisim i wok long i go liklik tru, na em i save pinis kwiktaim olsem ol i putim long wanpela paus mani i gat planti hul.—Hagai 1:2b-6.
9. Jehova i givim wanem strongpela tok long ol bilong strongim bel bilong ol?
9 Tupela taim Jehova i givim dispela strongpela tok long ol: “Yupela i mas tingting planti long ol samting nogut i kamap long yupela.” Serubabel, em hetman bilong Jerusalem, na hetpris Josua ol i bihainim dispela tok na ol i kirapim ol manmeri long ‘harim dispela tok na mekim olsem God, Bikpela bilong ol i bin tok. Ol i pret, na ol i bihainim tok bilong Hagai, dispela profet God i bin salim i kam long ol.’ Na tu, “Hagai i givim tok bilong Bikpela long ol manmeri olsem, ‘God i tok, “Mi Bikpela, bai mi stap wantaim yupela oltaim.” ’ ”—Hagai 1:5, 7-14.
10. Olsem wanem Jehova i bin mekim wok long strong bilong em bilong helpim lain Israel?
10 Ating sampela lapun long Jerusalem i bin ting dispela tempel ol i laik wokim gen bai i no kamap gutpela olsem olpela tempel, na ol i ting em bai “i olsem samting nating tasol.” Tasol 51 de bihain, Jehova i kirapim Hagai long autim namba tu toksave. Em i tokaut olsem: “Maski, bel bilong yupela olgeta i no ken hevi. Yupela i mas kirap na mekim wok, long wanem, mi stap wantaim yupela. . . . Yupela i no ken pret. Mi Bikpela, mi gat olgeta strong, mi tok olsem.” Jehova, bihain bai em i mekim wok long bikpela strong bilong em long seksekim skai na graun, em i mekim na ol birua i no inap moa long pasim wok, na king tu i no tambuim wok moa. Insait long faipela yia, ol i pinisim olgeta wok long tempel.—Hagai 2:3-6.
11 Orait, nau truim bilong wanpela gutpela tok promis i kamap: “Jehova bilong ol bikpela lain ami i tok olsem, ‘. . . Ol gutpela samting bilong olgeta lain ol i mas i kam insait; na bai mi pulapim haus bilong mi long ol gutpela gutpela samting.’ ” (Hagai 2:7, NW) Ol dispela “gutpela samting” em ol man i no bilong lain Israel na ol i kam lotuim Jehova long dispela tempel, long wanem, tempel i kamapim biknem bilong em. Dispela tempel ol i wokim gen, em i wankain olsem tempel ol i bin wokim long taim bilong Solomon o nogat? Profet bilong God i tok: “Dispela nupela haus bilong mi bai i kamap gutpela tru na bai i winim olpela haus bilong mi. . . . Mi God, Bikpela I Gat Olgeta Strong, mi tok pinis.” (Hagai 2:9) Long namba wan truim bilong dispela tok profet, dispela tempel ol i wokim gen i bin stap longpela taim moa, winim tempel ol i wokim long pastaim. Em i stap yet long taim Mesaia i kamap long yia 29 C.E. Na tu, paslain long taim ol birua i kilim em i dai long yia 33 C.E., Mesaia yet i kamapim biknem long tempel taim em i autim tok i tru long dispela haus.
12. Wanem wok bilong namba wan na namba tu tempel?
12 Namba wan na namba tu tempel long Jerusalem i bin mekim bikpela wok, olsem: Ol i stap olsem piksa bilong makim sampela bikpela hap wok Mesaia bai mekim olsem pris, na ol i lukautim trupela lotu bilong Jehova long graun inap long Mesaia i kamap.—Hibru 10:1.
Gutpela Haus Lotu Spirit
13. (a) Wanem ol samting i bin kamap long haus lotu spirit kirap long yia 29 C.E. na i go inap long yia 33 C.E.? (b) Ofa bilong Jisas i bin mekim wanem bikpela wok bilong helpim ol dispela samting long kamap?
13 Olsem wanem? Dispela tok profet bilong Hagai long ol samting i kamap gutpela gen, em i makim sampela samting bilong bihain o nogat? Tru tumas, em i makim sampela samting bilong bihain! Dispela tempel ol i wokim gen long Jerusalem i bin kamap ples tru bilong trupela lotu long graun. Tasol em i olsem piksa bilong wanpela haus lotu spirit i gutpela moa. Dispela haus spirit i bin kamap long yia 29 C.E., long taim Jisas i kisim baptais long wara Jordan na Jehova i makim em olsem Hetpris, na spirit holi i kam daun olsem wanpela pisin balus antap long Jisas. (Matyu 3:16) Taim Jisas i pinisim wok bilong em long graun na em i dai olsem ofa, God i kirapim em bek long heven, em Rum Tambu Tru i olsem piksa bilong en, na nau Jisas i givim pe bilong ofa bilong em long God. Dispela pe i bilong baim bek ol man, na i karamapim sin bilong ol disaipel bilong em, na i opim rot na God inap makim ol long de Pentikos bilong yia 33 C.E. olsem ol nambatu pris long haus spirit bilong Jehova. Sapos ol i stap gut long mekim wok bilong God insait long banis bilong haus spirit long graun i go inap long taim ol i dai, bihain ol bai kirap bek long heven na mekim yet wok pris.
14. (a) Kongrigesen Kristen bilong pastaim i bin kisim wanem bikpela amamas long ol wok ol i mekim? (b) Bilong wanem dispela amamas i no bin stap longpela taim?
14 Planti tausen Juda i tanim bel—na bihain ol man bilong ol narapela lain—ol i bin kam insait long kongrigesen Kristen na ol i insait long wok bilong autim gutnius long Kingdom bilong God bai kam na bosim graun. Inap 30 yia bihain, aposel Pol inap tok olsem ol i bin autim gutnius “long olgeta manmeri i stap long graun.” (Kolosi 1:23) Tasol taim ol aposel i dai pinis, bikpela lain i bikhet na givim baksait long bilip tru, na lait bilong tok i tru i olsem i laik dai. Ol i bruk bruk long narapela narapela lain i holim nating nem Kristen na bihainim ol bilip na save nating bilong ol haiden; dispela i karamapim bilip Kristen tru.—Aposel 20:29, 30.
15, 16. (a) Olsem wanem truim bilong wanpela tok profet i bin kamap long 1914? (b) Klostu long yia 1900 na bihain liklik long en, Jehova i wok long bungim wanem lain?
15 Planti handet yia i go pinis. Orait long 1870 samting, wanpela liklik lain Kristen i gat gutpela bel ol i kirap stadi na skelim gut ol tok bilong Baibel. Long ol tok bilong Baibel ol inap makim yia 1914 olsem pinis bilong hap “taim God i bin makim bilong ol arapela lain.” Long dispela taim, 7-pela “yia” (i makim 2,520 yia bilong ol gavman bilong man i bosim graun) i pinis long taim God i putim Krais Jisas i stap King long heven—em dispela Man bilong kisim wok king na bosim graun. (Luk 21:24; Daniel 4:25; Esekiel 21:26, 27) Kirap long 1919 na i go, ol dispela Sumatin Bilong Baibel, long nau ol man i save long ol olsem ol Witnes Bilong Jehova, ol i wok strong long autim gutnius bilong Kingdom long olgeta hap bilong graun. Long 1919, long wanpela kibung long Sida Poin, Ohaio, Yunaitet Stets, inap sampela tausen Witnes i bihainim singaut i go long ol bilong mekim wok. Lain bilong ol i wok long go bikpela inap long yia 1935, na long dispela taim 56,153 i putim ripot bilong wok autim tok. Long dispela yia, inap 52,465 i bin kisim bret na wain long Memorial bilong tingim i dai bilong Jisas, na long dispela rot ol i kamapim tingting bilong ol olsem ol i wet long i stap pris wantaim Krais Jisas long dispela hap bilong bikpela haus spirit bilong Jehova i stap long heven. Na tu ol bai wok wantaim em olsem ol wanwok king long Kingdom bilong em.—Luk 22:29, 30; Rom 8:15-17.
16 Tasol Kamapim Tok Hait 7:4-8 na 14:1-4 i kamapim klia olsem namba olgeta bilong ol Kristen em God i makim ol em inap olsem 144,000 tasol, na planti bilong ol i bin kam insait long kongrigesen Kristen long taim bilong ol aposel, paslain long taim ol man i bin lusim lotu Kristen na i bikhet na givim baksait long tok i tru. Klostu long yia 1900 na bihain liklik long en, Jehova i wok long bungim ol laspela manmeri bilong dispela lain na em i mekim ol i kamap klin long rot bilong ol tok bilong em i olsem wara, na em i kolim ol olsem stretpela man taim ol i bilip long ofa bilong Jisas bilong tekewe sin, na Jehova i putim mak long ol olsem ol Kristen em i makim pinis bambai em i ken inapim namba bilong lain 144,000.
17. (a) Kirap long 1935 samting, Jehova i wok long bungim wanem lain? (b) Bilong wanem yumi ken tingim tok bilong Jon 3:30? (Lukim tu Luk 7:28.)
17 Taim dispela lain ol inap pinis, wanem samting bai kamap bihain? Long 1935, long wanpela bikpela kibung long Wosington, Yunaitet Stets, ol i tokaut olsem dispela “planti manmeri tru” bilong Kamapim Tok Hait 7:9-17 em wanpela lain bai kamap ples klia “bihain” long wok bilong bungim lain 144,000 i pinis, na ol bai kisim laip i stap oltaim long Paradais long graun. Jon Bilong Baptais, em i bilong kirap bek na i stap long graun olsem wanpela bilong lain “arapela sipsip,” em i bin kamapim klia olsem Jisas em dispela man God i makim, na bihain stret em i tok long Mesaia olsem: “Nem bilong em i mas kamap bikpela, na nem bilong mi i mas i go daun.” (Jon 1:29; 3:30; 10:16; Matyu 11:11) Wok bilong Jon Bilong Baptais long redim ol disaipel bilong bungim Mesaia em i laik pinis long taim Jisas i kisim dispela wok bilong bungim ol man ol bai insait long lain 144,000, na lain bilong ol i wok long i go bikpela. Tasol long 1935 samting, ol samting i bin kamap i narapela kain olgeta. Namba bilong ol man God i “bin singautim ol na em i bin makim ol” bilong insait long lain 144,000 i wok long i go liklik, tasol namba bilong bikpela lain bilong “ol arapela sipsip” i wok long i go bikpela tru. Dispela bikpela lain i wok yet long i go bikpela nau long taim pasin nogut bilong dispela graun klostu i laik pinis long Armagedon.—KTH 17:14b.
18. (a) Bilong wanem yumi ken bilip olsem “planti milion man i stap nau ol i no ken i dai”? (b) Bilong wanem yumi mas givim bel long bihainim tok bilong Hagai 2:4?
18 Long 1922 samting, ol Witnes Bilong Jehova i bin kamapim wanpela pablik-tok, nem bilong en “Planti Milion Man i Stap Nau Ol i No Ken i Dai.” Ating long dispela taim dispela tok i olsem samting i no inap kamap tru. Tasol long nau yumi ken mekim dispela tok na bilip strong olsem em bai kamap tru. Lait i wok long kamap strong moa long ol tok profet bilong Baibel, na ol man bilong dispela graun ol i no bihainim moa ol lo; dispela tupela samting i makim klia olsem pinis bilong dispela graun bilong Satan i klostu tru! Ripot bilong Memorial bilong 1996 i kamapim olsem inap 12,921,933 i bin kam long dispela bung, tasol 8,757 (.068 pesen) tasol bilong dispela lain i bin kisim bret na wain bilong kamapim tingting bilong ol long i go long heven. Wok bilong kamapim bek lotu i tru klostu bai i pinis. Tasol yumi no ken slek long mekim dispela wok. Olsem Hagai 2:4 i tok: “Yupela i mas kirap na mekim wok, long wanem, mi stap wantaim yupela.” Yes, yumi mas tingting strong long givim bel long mekim wok bilong Jehova, na yumi no ken larim pasin bilong laikim tumas mani kago o ol pasin bilong dispela graun i mekim yumi les na lusim wok!—1 Jon 2:15-17.
19 Yumi amamas long yumi inap insait long truim bilong Hagai 2:6, 7 (NW) long nau, em i tok: “Jehova bilong ol bikpela lain ami i bin tok olsem, ‘Wanpela taim gen—inap liklik hap taim—na bai mi seksekim skai na graun na solwara na ol hap graun i drai.’ Jehova bilong ol bikpela lain ami i tok olsem, ‘Na bai mi seksekim olgeta lain man na bai ol gutpela samting bilong olgeta lain ol i mas i kam insait; na bai mi pulapim haus bilong mi long ol gutpela gutpela samting.’ ” Pasin bilong mangal, na paulim mani, na bel nogut i kamap bikpela tru long olgeta hap long nau. Tru tumas dispela graun i stap long las de bilong en, na Jehova i kirap pinis long “seksekim” graun long rot bilong ol Witnes bilong em ol i wok long ‘tokaut long em bai mekim save long ol birua bilong em.’ (Aisaia 61:2) Jehova bai seksekim graun i go i go inap long taim em i bagarapim long Armagedon, tasol paslain long dispela taim, em i wok long bungim “ol gutpela samting bilong olgeta lain”—ol manmeri i gat pasin daun na ol i olsem ol sipsip—bilong mekim wok bilong em. (Jon 6:44) Dispela bikpela lain i ‘mekim wok bilong em’ nau insait long banis bilong haus lotu bilong em long graun.—KTH 7:9, 15.
20. Yumi ken painim we ol gutpela samting i winim gol na silva?
20 Taim yumi mekim wok insait long haus spirit bilong Jehova, yumi kisim ol gutpela samting i winim tru gol na silva. (Sindaun 2:1-6; 3:13, 14; Matyu 6:19-21) Na tu, Hagai 2:9 i tok: “Dispela nupela haus bilong mi bai i kamap gutpela tru na bai i winim olpela haus bilong mi. Na long dispela ples bai mi givim bel isi na planti gutpela samting long ol manmeri bilong mi. Mi God, Bikpela I Gat Olgeta Strong, mi tok pinis.” Dispela tok i makim wanem samting long yumi long nau? Stori i kam bihain bai kamapim klia dispela samting.
[Futnot]
a Aisaia i kolim dispela tok “Ja Jehova” bilong strongim dispela nem. Lukim buk Insight on the Scriptures, Volyum 1, pes 1248.
Ol Askim Bilong Tingim Gen?
◻ Ol profet i bin mekim wanem long nem bilong Jehova na yumi mas bihainim pasin bilong ol?
◻ Strongpela tok Jehova i givim long lain Israel em i bin bringim ol i kam bek long graun bilong ol, olsem wanem dispela inap strongim bel bilong yumi?
◻ Wanem gutpela haus spirit i mekim wok long nau?
◻ Jehova i wok long bungim wanem ol lain paslain na bihain long yia 1900? Ol i wet long kisim wanem gutpela samting?
1. Ol profet bilong Jehova i ting olsem wanem long nem bilong em? Ol misin i gat wanem tingting i narapela kain long dispela?
5. Bilong wanem amamas bilong lain Israel i no bin stap longpela taim?
7. Namba wan tok Hagai i mekim bilong kirapim tok profet bilong em, olsem wanem dispela i ken strongim bel bilong yumi?
11. Olsem wanem God i bin pulapim ol gutpela gutpela samting long namba tu tempel, ‘winim’ long olpela tempel?
19. Olsem wanem yumi inap insait long truim bilong Hagai 2:6, 7?
[Ol Piksa long pes 7]
Ol lain ami bilong Jehova long heven i stiaim na strongim ol Witnes bilong em long graun