Mi Lusim Planti Samting Bambai Mi Ken Kisim Bikpela Samting Moa
EM STORI BILONG JULIUS OWO BELLO
Inap 32 yia mi wanpela Aladura.* Mi bin bilip olsem beten na pasin bilong oraitim man long rot bilong bilip em inap stretim ol hevi bilong mi na oraitim olgeta kain sik. I no gat wanpela taim mi baim marasin o samting bilong tekewe pen. Insait long ol dispela yia, i no gat wanpela bilong famili bilong mi i bin go slip long haus sik. Taim ol pikinini bilong mi i gat sik, mi save beten long san na long nait inap long taim ol i orait bek. Mi bin bilip olsem God i harim ol dispela beten bilong mi na em i mekim gut long mi.
* Ol i kisim long wanpela tok Yoruba, na insait bilong en em “man i save beten.” Em i makim man bilong wanpela misin bilong Afrika em i save mekim wok bilong oraitim man long rot bilong spirit.
MI WANPELA memba bilong Egbe Jolly, em wanpela klap bilong ol man i ken bung na amamas na em i winim ol narapela klap olsem long taun Akuri, long westen Naijiria. Ol pren bilong mi ol i gat planti mani na bikpela namba, winim ol narapela man long taun bilong mipela. King bilong Akuri, olsem Deji, planti taim em i kam lukim mi long haus bilong mi.
Na tu, mi maritim 6-pela meri na mi gat planti namba tu meri. Wok bisnis bilong mi i kamap gutpela. Olgeta samting long i stap bilong mi em i gutpela tasol. Tasol wankain olsem dispela bisnisman long tok piksa bilong Jisas long gutpela bis, mi painim samting i gutpela tumas, na bilong kisim dispela samting, mi lusim 5-pela meri bilong mi, na namba tu lain meri, na misin, na klap, na biknem bilong mi.—Matyu 13:45, 46.
Olsem Wanem Mi Kamap Wanpela Aladura
Long 1936, taim mi gat 13 krismas, em namba wan taim mi harim ol man i tok long ol Aladura. Wanpela pren, nem bilong em Gabriel, i tokim mi: “Sapos yu go long Misin Krais Apostolik, bai yu harim God i toktok.”
Mi askim em: “God i save toktok olsem wanem?”
Em i tok: “Kam, na bai yu save.”
Mi laik tru long harim tok bilong God. Olsem na long dispela nait, mi go wantaim Gabriel long haus lotu. Ol man i pulap long dispela liklik haus. Ol i kirap long toktok, olsem mekim singsing: “Kam, yupela ol manmeri. Jisas i stap hia!”
Taim ol i wok long mekim olsem, wanpela man i singaut: “Kam daun, spirit holi!” Narapela man i paitim belo, na ol lain i pasim maus. Orait, nau wanpela meri i kirap mekim toktok long wanpela tok ples mi no save long en. Na wantu em i singaut: “Yupela ol manmeri, harim tok bilong God! God i tok olsem: ‘Beten long helpim ol man bilong painim abus, bambai ol i no ken kilim ol man i dai!’ ” Bel bilong olgeta man i kirap tru.
Mi bilip olsem God i toktok long rot bilong dispela meri, olsem na long yia bihain, mi kisim baptais long Misin Krais Apostolik
Namba Wan Taim Mi Bungim Ol Witnes Bilong Jehova
Long 1951, mi kisim wanpela nius Wastaua long wanpela Witnes, nem bilong em Adedeji Boboye. Dispela nius i kirapim tingting bilong mi, na mi kisim sabskripsen bilong en na oltaim mi kaunim. Long 1952, mi go long 4-pela de kibung distrik bilong ol Witnes Bilong Jehova long taun Ado Ekiti.
Samting mi lukim long dispela kibung i kirapim tingting bilong mi. Pastaim mi tingting strong long kamap wanpela Witnes Bilong Jehova, tasol mi rausim dispela tingting. Mi mekim olsem, long wanem, long dispela taim, mi gat 3-pela meri na wanpela namba tu meri. Mi ting mi no inap tru long sindaun wantaim wanpela meri tasol.
Taim mi go bek long Akuri, mi tokim Adedeji em i no ken kam lukim mi gen, na mi no wokim gen sabskripsen bilong Wastaua. Mi kirap mekim sampela wok moa insait long misin bilong mi. Mi ting, kirap long taim mi insait long Misin Krais Apostolik, God i bin blesim mi. Mi marit long 3-pela meri na mi gat planti pikinini. Mi wokim pinis haus bilong mi yet. I no gat wanpela taim mi bin slip long haus sik. I olsem God i harim ol beten bilong mi, olsem na i no gat as na bai mi senisim lotu bilong mi.
Mi Wok Long Kisim Biknem Tasol Mi Bel Hevi
Mi kirap long givim planti mani long misin. Liklik taim bihain ol i givim wok elda long mi, olsem na mi inap save, misin i wok olsem wanem. Mi tingting planti long ol samting mi lukim. Pasto na “ol profet” ol i laikim tumas mani; ol i mangal long mani na mi bel nogut tru long dispela.
Olsem: Long Mas 1967 mi kamap papa bilong 3-pela pikinini, em mama bilong ol i narapela narapela meri bilong mi. Misin bilong mi i save mekim wanpela bung bilong givim nem long ol pikinini. Olsem na mi kisim sampela presen—pis, lemonet, na loliwara—i go long pasto na bai ol samting i ken redi bilong mekim dispela bung.
Long de bilong dispela bung, pasto i sanap long ai bilong kongrigesen olgeta, na em i tok: “Mi kirap nogut long ol maniman bilong dispela misin. Ol i laik bai i gat bung bilong givim nem long pikinini, na ol i bringim loliwara na pis tasol. I no gat mit! I no gat meme! Tingim! Kein i givim ol bikpela yam long God olsem ofa, tasol God i no orait long dispela ofa, long wanem, i no gat blut long en. God i laikim ol samting i gat blut long en. Abel i bringim wanpela animal, na God i orait long dispela ofa.”
Taim mi harim dispela tok, mi belhat na mi hariap wokabaut i go ausait. Tasol mi save go yet long dispela haus lotu. Isi isi, mi wok long lusim bikpela hap taim moa long bung wantaim ol pren na long i go long ol miting bilong klap. Sampela taim mi go long ol miting long Haus Kingdom, na mi wokim gen sabskripsen bilong mi bilong Wastaua. Tasol mi no redi yet long kamap wanpela Witnes Bilong Jehova.
Mi Pasim Tok Long Bel Long Lotuim Jehova
Long 1968, wanpela samting i senisim tru tingting bilong mi. Wanpela taim mi kirap kaunim wanpela stori long Wastaua, em i stori long ol man i mekim nogut tru long ol Witnes Bilong Jehova long Malawi. Em i stori long wanpela yangpela meri i gat 15 krismas, na ol i bin pasim em long wanpela diwai na 6-pela taim ol i reipim em, long wanem, em i strong long holimpas bilip bilong em. Mi kirap nogut tru long dispela samting na mi no kaunim moa dispela nius; tasol mi wok long tingim yet dispela stori. Mi save, long misin bilong mi i no gat wanpela yangpela meri em bai sanap strong long bilip olsem. Bihain long nait, mi kisim nius na mi kaunim gen dispela pes.
Mi kirap wok strong long stadi long Baibel. Taim mi stadi i go, mi kisim save olsem misin i bin giamanim tru mipela. Olsem i bin kamap long taim bipo, ol pris bilong mipela i wok long ‘stilim ol samting bilong ol man.’ (Hosea 6:9) Em ol dispela kain man tasol Jisas i bin tok lukaut long en taim em i toktok long ol ‘profet giaman’! (Matyu 24:24) Mi no bilip moa long ol driman na ol strongpela wok bilong ol. Mi pasim tok long bel olsem mi bai lusim lotu giaman na helpim ol narapela tu long mekim olsem.
Ol i No Laik Bai Mi Lusim Misin
Taim ol elda i save olsem mi tingting strong long lusim dispela misin, ol i salim wanpela lain i kam bilong traim senisim tingting bilong mi. Ol i no laik bai mi lusim ol, long wanem, mi save givim bikpela hap mani long misin. Ol i tok ol bai givim namba long mi olsem Baba Egbe, o helpim bilong wanpela haus lotu bilong Misin Krais Apostolik long Akuri.
Tasol mi no laik, na mi tokim ol long as na mi no laik kisim dispela namba. Mi tok: “Misin i bin giamanim yumi. Ol i tok, olgeta gutpela man bai go long heven. Tasol mi bin kaunim Baibel na mi save olsem, 144,000 manmeri tasol bai go long heven. Olgeta narapela stretpela man bai stap long Paradais long graun.”—Matyu 5:5; KTH 14:1, 3.
Pasto bilong misin em i wok long kirapim ol meri bilong mi long birua long mi. Em i tokim ol olsem ol i mas pasim ol Witnes Bilong Jehova long kam long haus bilong mipela. Wanpela meri bilong mi em i putim gip long kaikai bilong mi. Narapela tupela i kamapim wanpela driman ol i bin lukim long taim ol i stap long haus lotu na i gat tok lukaut long en. Driman i tokaut olsem mi bai dai sapos mi lusim misin. Tasol maski ol i mekim dispela tok, mi wok yet long autim tok long ol meri bilong mi, na mi singautim ol long i kam wantaim mi long ol miting. Mi tokim ol: “Bai yupela i painim ol narapela man bilong marit long en long dispela hap.” Tasol i no gat wanpela i laik i go, na ol i wok yet long givim hevi long mi.
Bihain, long Februeri 2, 1970, mi go raun long wanpela taun i stap klostu na taim mi kam bek long haus, mi lukim haus i stap nating. Olgeta meri bilong mi wantaim ol pikinini, ol i ranawe pinis.
Stap Gut Long Wanpela Meri Tasol
Mi tingting olsem, ‘Nau mi ken stretim marit bilong mi.’ Mi singautim namba wan meri bilong mi, Janet, long kam bek na stap wantaim mi. Em i orait long mekim olsem. Tasol famili bilong em i no laik tru bai em i kam bek long mi. Taim ol narapela meri bilong mi ol i kisim save olsem mi bin askim Janet long i kam bek, ol i go long haus bilong papa bilong em na ol i laik paitim em nogut tru, tasol ol i no mekim. Bihain famili bilong Janet i tokim mi long kam long wanpela miting.
Inap 80 manmeri olgeta i stap long dispela miting. Ankol bilong Janet, em i go pas long famili, em i tok: “Sapos yu laik marit gen long pikinini bilong mipela, orait yu mas kisim bek ol dispela narapela meri. Tasol sapos yu laik bihainim nupela lotu bilong yu na i stap wantaim wanpela meri tasol, orait yu mas painim narapela meri. Sapos yu kisim bek Janet, ol narapela meri bilong yu bai kilim em i dai, na mipela i no laik bai pikinini bilong mipela i dai.”
Mipela i bin pulim tok i go longpela taim liklik long dispela samting, na nau famili bilong Janet i save olsem mi strong long mi mas kisim wanpela meri tasol. Bihain ol i no strong moa. Ankol i tok: “Mipela i no ken tekewe meri bilong yu. Yu ken kisim em i go wantaim yu.”
Long Me 21, 1970, mitupela Janet i stretim marit bilong mitupela long gavman. Nainpela de bihain, mi kisim baptais olsem wanpela Witnes Bilong Jehova. Long Disemba bilong dispela yia, Janet tu i kisim baptais.
Mi Amamas Long Ol Blesing Bilong Jehova
Ol wanlotu bilong mitupela bilong bipo ol i bin tok olsem, sapos mitupela i kamap Witnes bai mitupela i dai. Em klostu 30 yia i go pinis. Tasol olsem wanem? Sapos mi dai nau, yu ting as bilong dispela em mi bin kamap wanpela Witnes Bilong Jehova? O sapos meri bilong mi i dai nau, bai wanpela inap tok em i dai long wanem em i bin kamap wanpela Witnes Bilong Jehova? Bai ol i no inap tok olsem, a?
Mi bin wok strong long skulim ol 17 pikinini bilong mi long bihainim rot bilong tok i tru. Planti bilong ol i bikpela pinis long taim mi kamap wanpela Witnes, tasol mi strongim ol long stadi long Baibel na mi save kisim ol i go long ol miting na long ol kibung. Mi gat bikpela amamas, long wanem, 5-pela pikinini bilong mi ol i lotuim Jehova wantaim mi. Wanpela i wok elda wantaim mi long kongrigesen. Narapela em i wokman long wanpela kongrigesen i stap klostu. Na tupela pikinini moa i mekim wok painia oltaim.
Taim mi tingting bek, mi kirap nogut long bikpela marimari bilong Jehova, em i helpim mi long kamap wanpela wokman bilong em. Tru tumas, dispela tok bilong Jisas em i stret olgeta, em i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi”!—Jon 6:44.