Taim Pen na Hevi i No Stap Moa

I NO laik bilong God long pastaim tru long ol man i mas kisim pen na hevi, nogat. God i no as bilong pen na hevi, na em i no laik bai pen na hevi i stap. Olsem na ating yu laik save, ‘sapos olsem, orait, pen na hevi i bin kamap olsem wanem, na bilong wanem God i bin larim pen na hevi i stap i kam inap nau?’​—⁠Skelim wantaim Jems 1:​13.

Bekim bilong dispela askim i stap long wanpela olpela buk i stori long ol samting i bin kamap bipo long ol man, em Baibel, na Buk Stat i stori gut long dispela samting. Em i tok olsem tupela tumbuna bilong yumi bilong pastaim tru, Adam na Iv, ol i bihainim Satan long mekim pasin bikhet long God. Ol samting ol i mekim i kamapim sampela bikpela tok em i pait long ol lo bilong God long bosim ol samting. Taim ol i tok ol yet inap skelim wanem samting i gutpela na wanem samting i nogut, ol i daunim wok bos bilong God. Ol i gat tok long God i stap bos na long em wanpela tasol inap skelim “wanem samting i gutpela na wanem samting i nogut.”​—⁠Stat 2:​15-​17; 3:​1-5.

Bilong Wanem Em i No Kamapim Kwik Laik Bilong Em?

Ating yu laik save, ‘Bilong wanem God i no kamapim kwik laik bilong em?’ Planti man i ting, sapos em i bin mekim olsem, dispela inap stretim dispela tok i bin kamap. Ol i tok, ‘God i gat strong, olsem na i gutpela sapos em i bin mekim wok long en bilong kilim i dai ol dispela bikhetman.’ (Song 147:⁠5) Tasol askim yu yet: ‘Mi save amamas taim ol man i mekim wok long bikpela strong bilong ol long subim ol man long bihainim laik bilong ol? Taim wanpela dikteta, olsem hatpela bos, i mekim wok long ol soldia samting bilong kilim i dai ol birua bilong em, mi pilim olsem dispela em i samting nogut tru?’ Klostu olgeta man i gat stretpela tingting ol i nolaik tru long kain samting olsem.

Tasol ating yu laik tok, ‘sapos God i bin mekim olsem, bai i no gat wanpela man i gat tok long dispela samting em i mekim.’ Tasol ating yu save pinis olsem ol man i gat tok long pasin bilong God long mekim wok long strong bilong em. Ol i laik save i gat wanem as na em i no bin mekim wok long en long sampela taim, olsem long taim em i larim pasin nogut i stap. Na ol i laik save i gat wanem as na em i bin mekim wok long en long sampela narapela taim. Gutpela man Abraham, em tu em i tingting planti long pasin bilong God long kamapim strong bilong em long kilim i dai ol birua bilong Em. Tingim dispela taim God i laik bagarapim Sodom. Abraham i tingting kranki​—⁠em i ting ol gutpela man bai bagarap wantaim ol man nogut. Em i singaut olsem: “Yu laik kilim ol gutpela man wantaim ol man nogut. Em i no gutpela pasin.” (Stat 18:25) Ol man i gat stretpela tingting, olsem Abraham, ol i laik bilip olsem man i gat olgeta strong, em i no ken mekim wok nogut long dispela strong.

Tru, wantu God inap kilim i dai Adam na Iv na Satan. Tasol tingim ol samting dispela inap mekim long ol narapela ensel o long sampela man em i laik wokim long bihain, em ol inap kisim save long dispela samting em i bin mekim. Ating bai ol i laik save, i stret long God i stap bos o nogat. Dispela inap mekim na ol man inap sutim tok long em olsem em i wanpela hatpela bos, na olsem Nietzsche i tok, wanpela God i no gat marimari na i save kirap wantu na kilim i dai ol man i bikhet long em.

Subim Man Long Mekim Pasin i Stret

Ating sampela i laik save, ‘bilong wanem God i no subim ol man long mekim pasin i stret?’ Orait, tingim dispela samting tu. Insait long ol yia i kam inap nau, ol gavman i bin wok long subim ol man long bihainim tingting bilong ol. Sampela gavman o bikman i bin wok long bosim tingting bilong ol man long rot bilong ol marasin o long ol dokta i mekim sampela samting long skin bilong man​—⁠ol i bin tekewe gutpela presen bilong God, em inapim ol man long tingim ol samting ol yet i laik mekim. Tasol maski sampela man i mekim wok nogut long dispela presen, ating yumi amamas tru olsem yumi inap makim wanem rot yumi laik bihainim, a? Na sapos wanpela gavman o bikman i laik tekewe dispela presen long yumi, yumi no ken orait long dispela, a?

Tru, God inap kirap wantu na mekim wok long strong bilong em bilong subim ol man long bihainim ol lo bilong em, tasol i gat wanem narapela rot long em i ken mekim olsem? God Jehova i save, gutpela rot bilong daunim dispela pasin bikhet em long larim hap taim na em i no bosim ol man i save sakim ol lo bilong em. Dispela bai givim hap taim long ol lain bilong Adam na Iv long ol i ken bosim ol yet, na lo bilong God i no ken bosim ol. Bilong wanem em i mekim olsem? Long wanem, em i save olsem bihain ol samting bai kamap ples klia olsem pasin bilong em long mekim wok bos em i stret long olgeta taim​—⁠long taim em i mekim wok tu long bikpela strong bilong em long kamapim laik bilong em, na pasin bikhet ol man i mekim long em bai kamapim samting nogut.​—⁠Lo 32:4; Jop 34:​10-​12; Jeremaia 10:⁠23.

Olsem Wanem Long Ol Man i No Gat Asua?

Ating yu laik save, ‘olsem wanem long ol man i no gat asua?’ ‘I stret long ol i ken kisim pen bambai God i ken stretim sampela liklik tok bilong lo?’ Tasol God i no bin larim pasin nogut i stap bilong stretim sampela liklik tok bilong lo na em tasol, nogat. Em bilong kamapim klia wanpela as tok i tru, olsem: em wanpela tasol em i king tru na ol man i mas bihainim ol lo bilong em bambai ol i ken i stap bel isi na amamas.

Wanpela bikpela samting yumi mas tingim, i olsem: God i save olsem em inap stretim bek olgeta hevi i bin kamap long ol man long pasin nogut em i bin larim i stap. Em i save, dispela hap taim bilong pen na hevi i stap em bai kamapim ol gutpela samting long bihain. Tingim wanpela mama i holim strong pikinini bilong em i pilim pen taim dokta i givim sut long em bilong pasim sampela sik em inap kilim pikinini i dai. I no gat wanpela mama i laik bai pikinini bilong em i pilim pen. Na i no gat wanpela dokta i laik givim pen long sikman. Taim dispela samting i kamap, pikinini i no save gut i gat wanem as na ol i bin larim em i kisim pen, tasol bihain em bai save.

Bilong Mekim Gut Bel Bilong Man i Kisim Pen na Hevi

Ating sampela i pilim olsem maski ol man i save long ol dispela samting, dispela i no inap mekim gut bel bilong ol man i gat pen na hevi. Hans Küng i tok, man i kisim pen na hevi, maski em i save long as tru bilong en, dispela i no inap helpim em liklik, “wankain olsem stori bilong ol vaitamin samting bilong kaikai em i no inap helpim man em i hangre nogut tru.” Em i kamapim askim olsem: “Ol dispela tok olsem i gat as na pen na hevi i stap, yu ting dispela inap strongim bel bilong ol man em pen na hevi i laik daunim tru ol?” Tasol tok bilong ol man i sakim Tok Bilong God, em Baibel, i no bin strongim bel bilong ol man i kisim pen na hevi, a? Taim ol i tok olsem em laik bilong God na ol man i mas kisim pen na hevi na God i bin wokim graun bilong kamap olsem wanpela ples baret bilong aiwara o wanpela ples bilong traim ol man inap long ol i ken kisim laip long heven, dispela i no inap helpim man i gat hevi, a? Dispela i save mekim nogut tru long nem bilong God!

Tasol Baibel yet inap mekim gut bel bilong man. Baibel i stori long i gat wanem as na pen na hevi i stap, na tu em i kirapim ol man long bilipim tru tok promis bilong God olsem em bai stretim bek olgeta hevi i bin kamap long pasin nogut em i bin larim i stap inap liklik hap taim.

“Olgeta Samting i Kamap Nupela Gen”

Klostu nau God bai stretim bek olgeta samting olsem em i gat laik long en taim namba wan man na meri em i wokim ol i no bikhet yet. Dispela hap taim em i bin makim bilong ol man i ken bosim wokabaut bilong ol, na God nogat, klostu nau em bai pinis. Yumi stap long dispela taim em God bai salim “[Jisas] i kam . . . Nau em i mas i stap long heven na wetim dispela taim God i makim bilong mekim olgeta samting i kamap nupela gen, olsem bipo yet em i bin tok long maus bilong ol profet.”​—⁠Aposel 3:​20, 21.

Krais Jisas bai mekim wanem? Em bai pinisim ol birua bilong God na ol i no ken i stap moa long graun. (2 Tesalonaika 1:​6-​10) Tasol i no olsem em bai kirap kwik na mekim wantu tasol, olsem ol dikteta bilong graun ol i save mekim, nogat. Pasin bilong man long bosim em yet i bin kamapim planti samting nogut, na dispela i kamapim klia olsem i stret long God i mas mekim wok long bikpela strong bilong em long kamapim laik bilong em. (KTH 11:​17, 18) Pastaim dispela bai kamapim “bikpela hevi tru” olsem i no bin kamap bipo, kain olsem Bikpela Tait i bin kamap long taim bilong Noa, tasol em bai bikpela moa long dispela. (Matyu 24:​21, 29-​31, 36-​39) Ol man i winim dispela “bikpela hevi tru” ol bai kisim “nupela strong” taim ol i lukim truim bilong ol promis em God i bin mekim long “maus bilong ol profet.” (Aposel 3:​19; KTH 7:​14-​17) God i bin tok promis long mekim wanem?

Ol profet bilong God long bipo ol i tok olsem pen na hevi i bin kamap long pait na kilim man i dai, em bai pinis. Olsem: Song 46:9 i tok: “Em i save mekim i dai pait long olgeta hap graun.” Bihain ol lain i no gat asua ol i no ken kisim nogut moa, na bai i no gat ol taranguman moa olsem refyuji, na bai i no gat ol lain em narapela i bin reipim ol, bagarapim hap skin bilong ol, na kilim ol i dai long ol pait nogut! Profet Aisaia i tok: “Olgeta lain manmeri bai i no ken pait moa, na bai ol i no skul moa long pait.”​—⁠Aisaia 2:⁠4.

Ol profet i tok tu olsem pen na hevi em pasin raskol na pasin i no stret i bin kamapim, em bai pinis. Sindaun 2:​21, 22 i tok promis olsem, “ol gutpela stretpela man bai i stap gut oltaim long graun bilong yumi,” na ol man i kamapim pen na hevi God “bai i kamautim ol.” Ol man i no ken wok moa long “daunim ol arapela manmeri na mekim nogut long ol.” (Saveman 8:⁠9) Olgeta man nogut i no ken i stap moa. (Song 37:​10, 38) Olgeta manmeri bai inap stap bel isi na kisim gutpela sindaun, na i no gat pen na hevi moa.​—⁠Maika 4:⁠4.

Na tu, ol profet i tok promis olsem pen na hevi em sik bilong skin na sik bilong bel hevi i bin kamapim, dispela tu bai pinis. (Aisaia 33:24) Aisaia i tok promis olsem ol aipas, ol yaupas, ol man em hap skin bilong ol i bagarap, ol sikman, olgeta bai i orait bek. (Aisaia 35:​5, 6) God bai stretim bek olgeta samting nogut em dai i bin kamapim. Jisas i tok profet olsem “olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Long driman aposel Jon i kisim long “nupela skai na nupela graun,” em i tok olsem “God yet . . . bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:​1-4) Tingim! No gat pen, no gat aiwara, no gat krai, no gat dai​—⁠pen na hevi i no ken i stap moa!

Maski wanem wanem hevi i bin kamap insait long dispela hap taim em God i bin larim pasin nogut i stap, em bai stretim bek olgeta dispela hevi. Ol man bai lusim tingting olgeta long ol pen na hevi​—⁠em God i no bin tingting liklik long kamapim. Aisaia i tok profet olsem: “Ol bai i lusim tingting olgeta long ol bel hevi na trabel ol i bin i gat bipo . . . Ol man bai i no inap tingim moa ol samting i bin kamap bipo.” (Aisaia 65:​16, 17) Laik bilong God long pastaim tru olsem em i laik bai wanpela lain man i gutpela olgeta i ken i stap amamas na bel isi long Paradais long graun, em bai kamap tru. (Aisaia 45:18) Ol man bai bilip na daun tru long God i stap king. Em i gutpela samting tru long yumi ken stap long dispela taim na God bai pinisim ol hevi na pen, na long dispela taim em bai kamapim klia olsem em i no “hatpela bos, man bilong giaman, man bilong pulim samting bilong narapela, man bilong kilim man i dai,” olsem Nietzsche i bin tok, nogat. Olgeta taim em i man bilong mekim pasin sori, na em i gat gutpela tingting na save, na em i save mekim stretpela wok long bikpela strong bilong em!

[Piksa long pes 5]

Sampela hetman i bin wok long bosim tingting bilong ol man; ol i no laik bai ol man i tingim wanem rot ol yet ol i laik bihainim

[Kredit Lain]

UPI/Bettmann

[Piksa long pes 7]

Taim i no gat pen na hevi moa, olgeta manmeri bai stap amamas tru