Ol i Mekim Laik Bilong Jehova

Bilip Bilong Papamama i Kamapim Gutpela Samting

OL ISRAEL i save amamas tru taim nupela pikinini man i kamap. Nau rot i op na dispela lain famili i ken i stap yet na graun i ken stap yet long famili bilong ol. Tasol long yia 1593 B.C.E. samting, taim ol Hibru i kisim ol nupela pikinini man dispela i olsem samting nogut long ol na i no wanpela blesing. Bilong wanem? Long wanem, Fero bilong Isip i pret taim em i lukim namba bilong ol manmeri bilong lain Juda i go bikpela tru hariap long kantri em i bosim, na em i putim lo long kilim i dai olgeta nupela pikinini man bilong ol.​—⁠Kisim Bek 1:12, 15-22.

Long dispela taim nogut bilong kilim ol pikinini, tupela marit Hibru, em Amram na Jokebet, ol i kamap papa na mama bilong wanpela naispela pikinini man. Yumi ken save olsem, ating pret i bin daunim amamas bilong ol taim ol i tingim samting nogut Fero i bin tok long mekim. Tasol taim Amram na Jokebet i lukluk long pikinini man bilong ol​—⁠ol i tingting strong long ol i no ken lusim em, maski hevi i painim ol.​—⁠Kisim Bek 2:​1, 2; 6:​20.

Bilip na Mekim Wok

Amram na Jokebet i haitim pikinini bilong ol inap tripela mun. (Kisim Bek 2:⁠2) Ol Hibru na Isip i save stap klostu klostu, olsem na hevi inap painim tupela. Sapos ol i painim wanpela man i sakim lo Fero i putim, ol bai kilim em i dai​—⁠na ol i mas kilim pikinini tu. Olsem na dispela gutpela papamama i ken mekim wanem samting bilong lukautim pikinini na ol yet long stap laip?

Jokebet i bungim sampela bun bilong gras. Bun bilong dispela gras i strongpela, wankain olsem mambu, na i gat tripela kona bilong en na bikpela bilong en i olsem wanpela pinga. Em inap kamap longpela inap 6 mita. Ol Isip i save wokim ol pepa, mat, sel, sandel na ol bot long dispela gras.

Jokebet i wokim wanpela basket long dispela gras​—⁠bikpela bilong en em inap long pikinini i ken slip long en. Em i putim kolta bilong pasim ol hul long basket na wara i no ken go insait. Jokebet i putim pikinini bilong em insait long basket na putim em namel long ol pitpit long arere bilong wara Nail.​—⁠Kisim Bek 2:⁠3.

Ol i Painim Pikinini

Miriam, pikinini meri bilong Jokebet i sanap longwe liklik bilong lukim wanem samting bai kamap. Nau pikinini meri bilong Fero i kam long Nail long waswas.a Ating Jokebet i save pikinini meri bilong Fero i save kam oltaim long dispela hap bilong Nail, olsem na em i putim basket long hap em inap lukim hariap. I no longtaim na pikinini meri bilong Fero i lukim basket i stap namel long ol pitpit, na em i singautim wanpela wokmeri bilong em i go kisim i kam. Taim em i lukim pikinini i stap insait i krai, em i sori nogut tru. Em i save em wanpela pikinini Hibru. Tasol em i no inap long larim ol i kilim dispela naispela pikinini. Pikinini meri bilong Fero i gat gutpela pasin, na ating narapela samting i bin stiaim em, em i save tu long bilip bilong ol Isip olsem, bilong i go long heven ol man i mas mekim gutpela pasin long ol narapela taim em i stap laip long graun.b​—⁠Kisim Bek 2:​5, 6.

Miriam i stap longwe liklik na lukluk, em i go klostu long pikinini meri bilong Fero na i askim em: “Inap mi go singautim wanpela meri Hibru long givim susu long pikinini na lukautim bilong yu, o nogat?” Pikinini meri bilong Fero i tok: “I orait, yu ken mekim olsem.” Miriam i ran i go long mama bilong em. I no longtaim, Jokebet i kam pinis na pikinini meri bilong Fero i tokim em, “Kisim dispela pikinini bilong mi na lukautim em gut na givim susu long em, na bai mi givim pe long yu.” Ating long dispela taim pikinini meri bilong Fero i save olsem Jokebet i mama bilong dispela pikinini.​—⁠Kisim Bek 2:​7-9.

Jokebet i lukautim pikinini bilong em inap em i lusim susu.c Dispela i opim rot long em bilong skulim pikinini long trupela God, Jehova. Bihain Jokebet i bringim pikinini i go bek long pikinini meri bilong Fero na em i givim nem Moses long pikinini, insait bilong dispela nem i olsem “pikinini i bin stap long wara na mi kisim em i kam antap.”​—Kisim Bek 2:​10.

Sampela Save Yumi Kisim Long En

Amram na Jokebet i bin wok strong tru long skulim pikinini bilong ol long ol lo bilong lotu i tru long dispela sotpela hap taim pikinini i bin stap wantaim ol. Ol papamama long nau i mas mekim wankain pasin. Yes, em wok bilong ol na ol i mas mekim olsem. Satan “em i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:⁠8) Em i laik bagarapim ol gutpela yangpela man na yangpela meri em ol i tingting long kamap wokman bilong Jehova. Maski ol i yangpela tumas, Satan i no save sori long ol! Long dispela as, ol papamama i gat gutpela tingting i skulim ol liklik pikinini bilong ol long pret long trupela God, Jehova.​—⁠Sindaun 22:6; 2 Timoti 3:​14, 15.

Olsem Hibru 11:​23 i tok, bikpela wok Amram na Jokebet i mekim bilong haitim nupela pikinini bilong ol inap 3-pela mun i kamapim bilip bilong ol. Tupela wantaim i save pret long God na ol i bilip long strong bilong Jehova long kisim bek ol man, olsem na ol i no lusim pikinini bilong ol, na ol i kisim blesing long samting ol i bin mekim. Yumi tu mas strong long bihainim ol lo bilong Jehova na bilip olsem, maski Jehova i larim wanem wanem samting i painim yumi, dispela bai kamapim gutpela samting long bihain olsem bai yumi stap gut na amamas inap oltaim oltaim.​—⁠Rom 8:⁠28.

[Ol Futnot]