Askim

“Wastaua” bilong Novemba 1, 1995, i kamapim wanpela tok bilong Jisas long Matyu 24:​34, em i toktok long “ol manmeri bilong dispela taim.” Olsem wanem? Dispela i makim olsem nau yumi no klia gut olsem Kingdom bilong God i bin kamap long 1914?

Dispela tok i bin kamap long Wastaua i no senisim bikpela bilip bilong yumi long 1914, nogat. Jisas i kolim mak bai kamap bilong makim olsem em i kamap King pinis na bosim Kingdom. Yumi bin lukim planti samting i kamap na i makim olsem ol samting Jisas i bin kolim olsem mak ol i wok long kamap tru kirap long 1914. Ol bikpela pait, bikpela hangre, bikpela sik, guria, na ol narapela samting i kamapim klia olsem kirap long 1914 Jisas i mekim wok olsem King bilong Kingdom bilong God. Dispela samting i makim olsem kirap long 1914 na i kam inap long nau, yumi stap long taim bilong las de.

Orait, Wastaua i laik kamapim klia wanem samting? Em i laik kamapim klia samting Jisas i bin tingim taim em i toktok long “ol manmeri bilong dispela taim” long Matyu 24:34. Dispela ves i tok olsem: “Mi tok tru long yupela, taim ol manmeri bilong dispela taim i no i dai yet, dispela olgeta samting bai i kamap.” Orait, dispela tok bilong Jisas long “ol manmeri bilong dispela taim,” wanem insait bilong en long taim bilong Jisas na long taim bilong yumi?

Planti skripsa i kamapim klia olsem Jisas i no kolim dispela tok “ol manmeri bilong dispela taim” bilong makim wanpela liklik lain o wanpela lain stret, olsem ol hetman bilong lain Juda tasol o ol disaipel tasol i bin i stap gut long em, nogat. Em i mekim dispela tok taim em i kamapim rong bilong lain Juda em ol i bin sakim em. Tasol gutpela tru, ol wan wan man na meri ol inap mekim olsem aposel Pita i tokim ol manmeri long mekim long de Pentikos, olsem ol i mas tanim bel na mekim ol samting bambai ol i no ken “bagarap wantaim ol dispela lain man bilong mekim ol kain kain pasin nogut.”​—⁠Aposel 2:​40.

Long dispela tok, Pita i no makim wanpela lain i gat wankain krismas, na em i no makim wanpela hap taim stret o wanpela yia stret, nogat. Em i no tok, ol manmeri i mas was gut, nogut ol i bagarap wantaim ol dispela lain man em ol i bin kamap long wankain yia olsem mama i bin karim Jisas o ol i bin kamap long yia 29 C.E., nogat. Pita i bin toktok long ol Juda bilong dispela taim bipo ol i no bilip​—⁠ating sampela ol i yangpela liklik na sampela i olsem lapun​—⁠em ol i bin harim ol tok bilong Jisas, na lukim ol mirakel bilong em o harim stori bilong ol dispela mirakel, na ol i no bilip olsem em i Mesaia.

Yumi ken ting olsem Pita i tingim dispela samting taim em na tripela narapela aposel i bin bung wantaim Jisas long maunten Oliv na Jisas i toktok long “ol manmeri bilong dispela taim.” Olsem Jisas i tok profet, ol Juda bilong dispela taim bipo​—⁠em ol man i gat klostu wankain krismas olsem Jisas​—⁠ol bai lukim o harim tok bilong ol pait, guria, bikpela hangre, na ol narapela samting i makim olsem las de bilong lain Juda i klostu pinis. Ol manmeri bilong dispela taim bipo ol i no bin i dai yet na las de bilong lain Juda i kamap long yia 70 C.E.​—⁠Matyu 24:​3-​14, 34.

Tasol yumi mas tokaut olsem sampela taim yumi no bin kisim dispela tingting long tok bilong Jisas. Pasin bilong yumi man bilong graun em yumi laik save long taim stret bilong las de bai kamap. Ol aposel tu i laik save long taim stret, na ol i askim Jisas olsem: “Bikpela, ating nau long dispela taim bai yu mekim kantri Israel i kamap strong gen na i gat king i bosim em, o nogat?”​—⁠Aposel 1:⁠6.

Ol wokman bilong God long nau tu, ol i bin wok strong long kisim sampela tingting long tok bilong Jisas long “ol manmeri bilong dispela taim,” i olsem em i makim wanpela hap taim stret, i kirap long yia 1914. Wanpela tingting bilong ol i olsem: Taim bilong wanpela lain em inap olsem 70 o 80 yia samting, em ol manmeri i bikpela liklik na ol inap pilim as bilong Namba Wan Pait na ol narapela samting i bin kamap; sapos olsem, orait yumi inap skelim olsem i gat hamas yia moa na bai las de i kamap.

Tasol maski ol i gat stretpela bel na ol i mekim olsem, yu ting dispela tingting bilong ol i stret wantaim narapela tok Jisas i mekim? Em i tok: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save. . . . Olsem na yupela i mas was gut. Yupela i no save wanem de Bikpela bilong yupela bai i kam.”​—⁠Matyu 24:​36-​42.

Olsem na ol tok dispela Wastaua i kamapim long “ol manmeri bilong dispela taim” i no senisim bilip bilong yumi long ol samting i bin kamap long 1914. Tasol em i kamapim klia moa insait bilong tok bilong Jisas long “ol manmeri bilong dispela taim,” na em i helpim yumi long save, dispela tok bilong Jisas i no givim rot long yumi na bai yumi ken kaunim hamas yia​—⁠kirap long 1914​—⁠i stap yet na bai las de i kamap.