Yumi Mekim Ol Samting Bilong i Stap Nau Tasol o Bilong i Stap Oltaim Bihain?
“God i bin kisim bek yumi, na nau yumi bilip na wetim em inapim tru ol gutpela samting em i laik mekim long yumi.”—ROM 8:24.
1. Ol Epikurian i skulim ol man long wanem samting? Na dispela kain tingting i mekim wanem long sampela Kristen?
APOSEL Pol i raitim pas long ol Kristen i sindaun long Korin olsem: “Bilong wanem sampela namel long yupela i save tok olsem, ‘Man i dai pinis, em i no inap kirap bek’?” (1 Korin 15:12) Ating tingting nogut bilong Epikurus, em wanpela saveman bilong ol Grik, i kam insait long lain Kristen long taim bilong ol aposel. Olsem na Pol i kamapim bilip bilong ol Epikurian, ol i tok: “Mobeta ‘yumi kaikai na dring, long wanem, tumora bai yumi dai.’ ” (1 Korin 15:32) Ol man i bihainim tingting bilong Epikurus ol i no bilip liklik olsem ol man bai kisim laip bihain long taim ol i dai, ol i bilip olsem amamas bilong skin em i nambawan bikpela samting long i stap bilong em. (Aposel 17:18, 32) Tingting bilong ol Epikurian i kirapim ol man long tingim ol yet tasol, na ol i no bilip long wanpela man, na i bilong daunim nogut ol man.
2. (a) Ol man i no bilip long kirap bek, olsem wanem dispela i mekim nogut long ol? (b) Olsem wanem Pol i strongim bilip bilong ol Kristen long Korin?
2 Ol pasin bilong ol long ol i no bilip long kirap bek, dispela i bin kamapim sampela hevi. Pol i tok: “Sapos i tru ol man i dai pinis, ol i no inap kirap bek, orait yumi mas tok olsem, ‘God i no bin kirapim Krais.’ Na sapos i tru God i no bin kirapim Krais, orait dispela tok mipela i save autim, em i samting nating, na bilip bilong yupela em tu i samting nating. . . . Yumi bilip long Krais na wetim em i mekim gut long yumi. Tasol sapos yumi wetim ol samting yumi bai kisim long laip bilong dispela graun tasol, orait tru tumas yumi tarangu lain stret, na yumi winim ol arapela tarangu lain bilong dispela graun.” (1 Korin 15:13-19) Tru tumas, sapos yumi no inap wetim laip i stap oltaim long bihain, bilip Kristen i olsem “samting nating.” Bilip i no gat as bilong en. Olsem na planti hevi tru i kamap insait long kongrigesen Korin, long wanem, ol i larim dispela tingting haiden i bosim ol. (1 Korin 1:11; 5:1; 6:1; 11:20-22) Long dispela as Pol i wok long strongim bilip bilong ol long kirap bek. Em i mekim wok long ol gutpela tok bilong pulim tingting bilong ol, na ol tok bilong Baibel, na ol tok piksa, na long dispela rot em i kamapim long ples klia olsem bilip long kirap bek i no wanpela bilip nating tasol, nogat, em bai kamap tru. Long dispela as em inap kirapim ol wanbilip bilong em olsem: “Yupela i mas i stap strong, na i no ken surik liklik. Yupela i save olsem, hatwok yupela i save mekim long Bikpela, em bai i no inap lus nating. Olsem na oltaim yupela i mas wok strong long mekim wok bilong Bikpela.”—1 Korin 15:20-58.
“Yupela i Mas Was Gut”
3, 4. (a) Olsem Pita i tok, long taim bilong pinis sampela bai kisim wanem tingting nogut? (b) Long olgeta taim yumi mas wok long tingim wanem samting?
3 Long nau, planti man i ting ol samting i no inap kamap gutpela, na ol i tingim i stap bilong ol long nau tasol. (Efesus 2:2) I olsem aposel Pita i tok profet long en. Em i tok: “Ol man bilong tok bilas bai i kamap, na ol bai . . . tok bilas olsem, ‘Em i bin tok olsem em bai i kam bek gen, a? Orait em i stap we? Em i no inap i kam. Taim ol tumbuna i dai, na i kam inap long nau, olgeta samting i stap wankain olsem bipo tru, taim graun i kamap.’ ” (2 Pita 3:3, 4) Sapos ol manmeri i lotu tru long God i kisim dispela kain tingting, ol i no inap ‘kamap strong na karim planti kaikai.’ (2 Pita 1:8) Tasol gutpela tru, dispela samting i no painim planti long lain bilong God long nau.
4 I no gat rong long man i laik save long pinis bilong dispela pasin nogut bilong nau i laik kamap. Tingim ol aposel bilong Jisas, ol tu i laik save long en. Ol i bin askim Jisas: “Bikpela, ating nau long dispela taim bai yu mekim kantri Israel i kamap strong gen na i gat king i bosim em, o nogat?” Jisas i tok: “Em i no samting bilong yupela bai yupela i save long ol taim na ol de Papa i makim. Nogat. Em yet i bosim dispela ol samting.” (Aposel 1:6, 7) Ol dispela tok i olsem ol tok em i bin kamapim long maunten Oliv: “Yupela i no save wanem de Bikpela bilong yupela bai i kam. . . . Pikinini Bilong Man bai i kam long wanpela taim yupela i no ting em bai i kam.” (Matyu 24:42, 44) Yumi mas wok long tingim dispela tok! Sampela inap ting olsem, ‘Ating mi ken slek liklik na mi no ken tingting planti long pinis.’ Tasol dispela tingting i kranki stret! Tingim Jems na Jon, em “ol man i olsem klaut i pairap.”—Mak 3:17.
5, 6. Pasin bilong Jems na Jon inap skulim yumi long wanem samting?
5 Yumi save Jems em i wanpela aposel i bin givim bel tru long mekim wok bilong God. (Luk 9:51-55) Taim kongrigesen Kristen i kamap pinis, ating em i bin mekim bikpela wok long en. Tasol taim Jems i yangpela yet, King Herot Agripa Namba 1 i bin givim tok long kilim em i dai. (Aposel 12:1-3) Olsem wanem? Jems i dai long wanpela taim em i no bin tingim, olsem na yumi ken ting em i bel hevi, long wanem, em i bin givim bel tru na wok strong long mekim wok autim tok? Nogat, a? Em i no stap laip inap planti krismas, tasol ating em i amamas long em i bin wok strong long mekim wok bilong Jehova. Long nau, i no gat wanpela bilong yumi i ken save long wanem taim bai yumi dai. (Saveman 9:11; skelim wantaim Luk 12:20, 21.) Olsem na yumi bihainim gutpela tingting sapos yumi givim bel tru long mekim wok bilong Jehova na yumi no slek liklik. Dispela bai helpim yumi long holimpas gutnem long ai bilong em na yumi inap mekim ol samting bilong i stap oltaim bihain.—Saveman 7:1.
6 Samting i painim aposel Jon inap skulim yumi tu. Jon i stap taim Jisas i bin kirapim strong ol disaipel, olsem: “Yupela i mas was gut.” (Matyu 25:13; Mak 13:37; Luk 21:34-36) Jon i bihainim dispela tok, na em i givim bel long mekim wok bilong Jehova inap planti yia. Ating em i bin stap laip inap planti yia, winim ol narapela aposel. Taim Jon i lapun tru, em inap tingim bek gutpela wok em i bin mekim inap planti yia. Olsem wanem? Em i ting em i bin popaia, na em i mekim nating wok i no gat as bilong en? Nogat tru! Em i bin strong yet long wetim ol samting bai kamap bihain. Taim Jisas, em i kirap bek pinis, em i tok: “Tru tumas, bai mi kam kwiktaim.” Wantu Jon i bekim tok: “I tru. Bikpela Jisas, yu kam.” (KTH 22:20) Jon i no bin mekim ol samting bilong kisim gutpela sindaun na stap isi tasol na em i no tingting long bihain, nogat. Em i bin tingting strong long mekim wok bilong Jehova long laip bilong em olgeta na inap long strong bilong em, maski Bikpela bai kam long wanem taim. Olsem wanem long yumi?
Sampela As Long Bilip Bilong i Stap Oltaim
7. (a) Taim “God i no mekim wanpela samting i kamap yet,” olsem wanem em i bin tok promis long laip oltaim? (b) Olsem wanem Jisas i helpim ol man long save long laip oltaim?
7 Yumi ken bilip tru olsem yumi inap kisim laip oltaim, em i no wanpela driman nating ol man yet i kamapim. Olsem Taitus 1:2 i tok, yumi givim bel long God, long wanem, yumi “bilip strong na wetim God i givim laip bilong i stap oltaim long [yumi]. Bipo tru, taim God i no mekim wanpela samting i kamap yet, em i tok pinis long em bai i givim dispela laip long yumi. Na em i no save giaman.” Em laik bilong God long pastaim tru long ol man i bihainim tok bilong em ol bai stap oltaim. (Stat 1:28) I no gat wanpela samting, pasin bikhet bilong Adam na Iv tu, em inap senisim dispela laik bilong God. Olsem Stat 3:15 i tok, wantu God i bin tok promis long wanpela “pikinini” bai kam na pinisim ol samting nogut i painim ol manmeri. Taim dispela “pikinini” o Mesaia, Jisas, i bin kamap, em i mekim bilip long kisim laip oltaim olsem wanpela as bilip em i skulim ol man long en. (Jon 3:16; 6:47, 51; 10:28; 17:3) Em i givim laip bilong em i gutpela olgeta olsem ofa bilong baim bek ol man, na long dispela rot Krais inap long givim laip oltaim long ol man. (Matyu 20:28) Sampela disaipel bilong em, em 144,000 olgeta, ol bai kisim laip i stap oltaim long heven. (KTH 14:1-4) Olsem na sampela man em pastaim ol i save dai, nau bai ol i no inap i dai—nau ol bai “senis na i stap laip oltaim”!—1 Korin 15:53.
8. (a) Wanem insait bilong dispela tok “stap laip oltaim” na ol i no inap i dai moa? Na bilong wanem Jehova i givim dispela kain laip long ol 144,000? (b) Jisas i tok ol “arapela sipsip” inap wetim wanem gutpela samting?
8 Dispela tok “stap laip oltaim” na i no inap i dai moa, i no makim tasol olsem man i no inap i dai moa, nogat. Em i makim tu, “strong bilong laip i stap oltaim oltaim.” (Hibru 7:16; skelim wantaim Kamapim Tok Hait 20:6.) God i laik kamapim wanem samting taim em i givim kain gutpela presen olsem? Tingim tok Satan i bin sutim long God olsem i no gat wanpela man bai stap gut long God. (Jop 1:9-11; 2:4, 5) Taim God i givim laip oltaim long ol 144,000 na ol i no inap i dai moa, em i kamapim long ples klia olsem em i bilip tru long ol, long wanem, ol i bin bekim tru tok bilas Satan i bin sutim long em. Tasol olsem wanem long ol narapela manmeri? Jisas i bin tokim ol disaipel em i bin makim pastaim bilong i stap insait long “liklik lain” bilong Kingdom, ol bai “sindaun long ol gutpela sia na [ol] bai i bosim ol 12-pela lain bilong Israel.” (Luk 12:32; 22:30) Dispela i makim olsem sampela narapela man bai kisim laip i stap oltaim long graun aninit long Kingdom bilong em. Ol dispela “arapela sipsip” bai i no kisim laip oltaim na i no inap i dai moa, nogat, ol bai kisim “laip i stap oltaim oltaim.” (Jon 10:16; Matyu 25:46) Olsem na olgeta Kristen bai kisim laip i stap oltaim. Em i no wanpela driman nating, tasol wanpela samting em “[God] i no save giaman” i bin tok promis long en, na em i bin baim long blut bilong Jisas i dia tumas.—Taitus 1:2.
Truim i Kamap Bihain Bihain?
9, 10. Wanem samting i makim olsem klostu nau pinis bai kamap?
9 Aposel Pol i tok profet olsem ol “planti hevi nogut tru” bai makim olsem yumi stap pinis long “taim bilong las de.” Ol man i lusim pasin bilong laikim ol narapela, na ol i mangalim planti samting, na ol i tingting long inapim ol laik bilong skin tasol, na ol i givim baksait long God. Olsem wanem? Ol dispela pasin i makim olsem De bilong Jehova bilong givim strafe long olgeta manmeri nogut bilong dispela graun i kam klostu pinis? Pasin pait na birua i wok long go bikpela, olsem na yumi ken lukim truim bilong tok bilong Pol olsem: “Ol man nogut na ol giaman profet ol bai i wok long giamanim ol manmeri . . . na pasin bilong ol bai i kamap nogut tru.” (2 Timoti 3:1-5, 13) Ating sampela bai singaut “Nau em i gutpela taim tru. Yumi stap gut,” tasol gutaim i no inap kamap, long wanem, “wantu tasol samting bilong bagarapim ol bai i kamap long ol, olsem pen i save kamap long meri i laik karim pikinini. Na ol bai i no inap abrusim dispela samting.” Yumi no stap long tudak na yumi no save long insait bilong dispela taim bilong nau, nogat. Olsem na gutpela sapos “ai bilong yumi i op i stap, na tingting bilong yumi i klia.”—1 Tesalonaika 5:1-6.
10 Na Baibel i makim olsem taim bilong las de i “sotpela taim tasol.” (KTH 12:12; skelim wantaim 17:10.) Ating dispela “sotpela taim” i klostu pinis. Tok profet bilong Daniel i tok stret long pasin birua i stap namel long ‘king bilong not’ na ‘king bilong saut,’ na dispela pasin birua i stap inap long nau. (Daniel 11:5, 6) Liklik hap tasol bilong truim bilong dispela tok profet i mas kamap yet, em pait bilong ‘king bilong not,’ olsem Daniel 11:44, 45 i stori long en.—Lukim Wastaua (tok Inglis) bilong Julai 1, 1987, na Wastaua bilong Novemba 1, 1993, bilong kisim save long dispela tok profet.
11. (a) Inap long wanem mak tok bilong Matyu 24:14 i kamap tru pinis? (b) Tok bilong Jisas long Matyu 10:23 i makim wanem samting?
11 Na tu, i gat tok profet bilong Jisas olsem “ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Long nau, ol Witnes Bilong Jehova i mekim dispela wok long 233 kantri na ailan. Tru, i gat yet sampela hap ol i no bin autim tok long en, na ating long taim Jehova i makim, dua bai op na givim rot long ol dispela man i ken harim tok. (1 Korin 16:9) Tasol tok bilong Jisas long Matyu 10:23 i kirapim tingting bilong yumi. Em i tok: “Mi tok tru long yupela, yupela bai i no pinisim wok yet long olgeta taun bilong Israel, na Pikinini Bilong Man bai i kam.” Ol bai autim gutnius bilong Kingdom long olgeta hap bilong graun, tasol yumi yet i no inap autim tok long olgeta wan wan hap bilong graun paslain long taim Jisas i “kam” olsem Man bilong givim strafe.
12. (a) Kamapim Tok Hait 7:3 i stori long ol man i kisim “mak” long wanem taim? (b) Namba bilong ol manmeri God i bin makim ol em i go daun na dispela i makim wanem samting?
12 Tingim tok bilong Kamapim Tok Hait 7:1, 3, em i tok ol ensel i pasim “4-pela win” bilong bagarapim ol samting inap long taim ol i “putim mak bilong God bilong yumi long pes bilong ol wokman.” Dispela i no stori long namba wan taim ol Kristen i kisim mak, em long taim God i makim ol manmeri bilong ol 144,000 bilong i go long heven, nogat. (Efesus 1:13) Em i stori long taim ol i kisim mak olsem ol i winim pinis ol traim na ol i bin stap gut olsem ‘wokman bilong God bilong yumi.’ Namba bilong ol manmeri bilong God ol i kisim tru mak na ol i stap yet long graun em i go daun tru. Na Baibel i tokaut klia olsem God i “sotim taim” bilong namba wan hap bilong bikpela hevi tru, long wanem, em i tingim “ol manmeri em i makim pinis.” (Matyu 24:21, 22) Planti bilong ol manmeri ol i tok God i bin makim ol, ol i lapun pinis. Ating dispela tu i makim olsem pinis i klostu, a?
Wanpela Wasman i Stap Gut Long Wok
13, 14. Lain wasman i mas mekim wanem wok?
13 Long dispela taim nau, yumi mas larim ‘gutpela wokboi’ i soim rot long yumi. (Matyu 24:45) Winim 100 yia pinis, dispela “wokboi” bilong nau i bin mekim gut wok bilong en olsem “wasman.” (Esekiel 3:17-21) Wastaua bilong Jun 1, 1984, i tok: “Dispela ‘wasman’ i lukim ol samting i kamap long graun olsem Baibel i bin tok profet long en, na em i toksave long ol man long taim bilong ‘bikpela hevi tru’ i laik kamap, na em i autim tok long ‘wanpela samting i moa gutpela.’ ”—Matyu 24:21; Aisaia 52:7.
14 Tingim: Em wok bilong ol wasman long tokaut long “wanem samting [ol] i lukim.” (Aisaia 21:6-8) Long taim bilong ol man i bin raitim Baibel wanpela wasman i toksave long birua i laik kamap, maski birua i stap longwe yet na em i no inap lukim gut em husat tru. (2 King 9:17, 18) Ating long dispela taim bipo sampela taim ol i popaia, a? Tasol wanpela gutpela wasman i no inap pasim maus, long wanem, em i pret em bai sem. Sapos haus bilong yu i paia, bai yu pilim olsem wanem sapos ol paiaman i no kam, long wanem, ol i ting i no tru olsem haus bilong yu i paia? Maski i gat liklik samting tasol i makim olsem bagarap i laik kamap, yumi laik kain man olsem i mas kam hariap, a? Olsem tasol, lain wasman i bin tokaut long ol samting taim ol i ting i stret ol i mekim olsem.
15, 16. (a) Bilong wanem sampela taim yumi mas stretim save bilong yumi long insait bilong sampela tok profet? (b) Yumi ken lain long wanem samting long ol gutpela wokboi bilong God em ol i no bin save gut long insait bilong sampela tok profet?
15 Tasol taim ol samting i wok long kamap, yumi kisim stretpela save moa long insait bilong ol tok profet. Ol samting i bin kamap bipo i soim yumi olsem, planti taim ol man i no save tru long insait bilong ol tok profet paslain long taim truim bilong en i kamap. God i bin tokim Abram long hamas yia stret ol tumbuna pikinini bilong em bai stap “long kantri bilong ol arapela lain. Na bai ol i kamap wokboi nating.” Ol bai stap inap 400 yia. (Stat 15:13) Tasol Moses i laik kisim bek ol long taim i no stret long mekim olsem.—Aposel 7:23-30.
16 Na tingim tu ol tok profet long Mesaia. Sapos yumi tingim ol samting i kamap pinis, em i klia tru olsem ol profet i bin tokaut long indai na kirap bek bilong Mesaia. (Aisaia 53:8-10) Tasol ol disaipel bilong Jisas i no bin kisim gut dispela samting. (Matyu 16:21-23) Ol i no bin save olsem truim bilong tok bilong Daniel 7:13, 14 bai kamap long taim Krais i “kam i stap” long bihain, em dispela taim Baibel i kolim pa·rou·siʹa. (Matyu 24:3) Ol i ting dispela samting bai kamap long taim bilong ol yet, olsem na ol i askim Jisas: “Bikpela, ating nau long dispela taim bai yu mekim kantri Israel i kamap strong gen na i gat king i bosim em, o nogat?” Tasol ol i popaia, long wanem, dispela samting i mas kamap klostu 2,000 yia bihain. (Aposel 1:6) Na maski kongrigesen Kristen i kamap strong pinis, sampela tingting i no stret i bin wok long kamap yet. (2 Tesalonaika 2:1, 2) Tasol maski sampela taim ol Kristen i no gat stretpela save, Jehova i bin blesim tru wok bilong ol dispela bilipman long taim bilong ol aposel!
17. Yumi mas i gat wanem tingting sapos yumi mas stretim sampela save bilong yumi long Baibel?
17 Lain wasman bilong nau tu, sampela taim ol i mas stretim tingting bilong ol long sampela tok. Tasol olsem wanem? I gat wanpela inap ting olsem Jehova i no bin blesim wok bilong ‘gutpela wokboi’? Na tu, sapos yumi tingim ol tok ol i bin stretim, klostu olgeta em ol liklik tok tasol, a? Save bilong yumi long ol as tok bilong Baibel i no bin senis. Bilip bilong yumi olsem yumi stap long taim bilong las de em i strong moa!
Mekim Ol Samting Bilong i Stap Oltaim Bihain
18. Bilong wanem yumi no inap mekim ol samting bilong i stap nau tasol?
18 Ol man bilong dispela graun inap tok, ‘Mobeta yumi kaikai na dring, long wanem, tumora yumi dai,’ tasol yumi no ken kisim wankain tingting. Pasin bilong wok strong long kisim ol amamas bilong nau i no gat as, mobeta yu wok long mekim ol samting bilong helpim yu long i stap oltaim. Gutpela samting yu inap wetim, maski em laip oltaim long heven na i no inap i dai moa o kisim laip oltaim long graun, em i no wanpela driman nating, nogat. Em wanpela samting em bai kamap tru, olsem God “i no save giaman” em i bin tok promis long en. (Taitus 1:2) Ol samting i makim olsem klostu nau truim bilong ol samting yumi wetim bai kamap! “Taim i sotpela nau.”—1 Korin 7:29.
19, 20. (a) Jehova i ting olsem wanem long ol samting yumi bin lusim bilong mekim wok bilong Kingdom? (b) Bilong wanem yumi mas mekim ol samting bambai yumi ken i stap laip oltaim long bihain?
19 Tru, dispela taim nogut long nau i stap longpela taim pinis, winim ol yia em planti man i ting em bai stap. Nau sampela inap pilim olsem sapos ol i bin save long dispela bipo, ol i no inap daunim sampela laik bilong ol yet olsem ol i bin mekim. Tasol yu no ken bel hevi long ol gutpela samting yu bin mekim. Pasin bilong daunim laik bilong yumi yet em bikpela samting long ol Kristen. Ol Kristen i mas “daunim laik bilong [ol] yet.” (Matyu 16:24) Yumi no ken ting olsem ol wok yumi bin mekim bilong amamasim Jehova i lus nating. Jisas i tok promis: “Olgeta man i bin ting long mi na long gutnius na i lusim haus o brata o susa o mama o papa o pikinini o gaden, bai ol i kisim 100 moa. . . . Na long taim i laik kamap bihain ol bai i kisim laip i stap gut oltaim oltaim.” (Mak 10:29, 30) Kirap long nau na i go inap wan tausen yia bihain, yu ting wok mani bilong yu, o haus, o hap mani bilong yu i stap long beng, em bai bikpela samting? Tasol ol samting yu bin lusim bilong mekim wok bilong Jehova bai bikpela samting, kirap long nau na i go inap wan milion yia bihain—o kirap long nau na i go inap wan bilion yia bihain! Em bai olsem, long wanem, ‘God em i no man nogut, na bai em i lusim tingting long ol gutpela wok yumi bin mekim.’—Hibru 6:10.
20 Olsem na i gutpela sapos yumi mekim ol samting bambai yumi ken i stap laip oltaim long bihain, na “yumi no save lukluk i go long ol samting yumi inap lukim long ai. Nogat. Yumi save lukluk strong long ol samting yumi no inap lukim long ai, long wanem, samting yumi save lukim long ai, em bai i stap sotpela taim tasol. Tasol ol dispela gutpela samting yumi no inap lukim long ai, ol bai i stap oltaim oltaim.” (2 Korin 4:18) Profet Habakuk i tok: “Taim bilong ol dispela samting i mas kamap, em i no yet. Olsem na yu mas raitim dispela tok na putim i stap. Tasol i no longtaim na dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” (Habakuk 2:3) Yumi ting klostu nau pinis ‘bai kamap,’ na dispela i mekim wanem long pasin bilong yumi long mekim ol wok bilong yumi yet na bilong famili? Stori i kamap bihain long dispela bai toktok long dispela samting.
Sampela Tok Bilong Tingim Gen
◻ I olsem pinis bilong dispela pasin nogut bilong nau i no laik kamap hariap na dispela i mekim wanem long sampela long nau?
◻ I gat wanem as na yumi ken bilip long laip i stap oltaim?
◻ Yumi mas ting olsem wanem long ol samting yumi bin lusim bilong mekim wok bilong Kingdom?
[Piksa long pes 15]
Wok bilong autim tok long olgeta hap i mas pinis paslain long pinis i kamap