Yu Save Pilim Tru Ol Gutpela Blesing Yu Kisim Long Jehova?
KENICHI, em wanpela man i gat 50 krismas samting, em i go long wanpela haus marasin bilong kisim sampela marasin bilong kus. Taim em i dring dispela marasin, olgeta hap skin bilong em i skrap na ol liklik liklik buk i gat wara long en i kamap long skin. Em nau, Kenichi i ting man bilong lukautim haus marasin i no bin tingim gut wanem kain marasin em i mas kisim.
Ating sampela man i gat wankain tingting long God Jehova olsem Kenichi i kisim long dispela man bilong lukautim haus marasin. Ol i no bilip tru olsem God i gat olgeta strong, em Jehova, em i save tingim ol samting long i stap bilong yumi wan wan. Tru, ol i bilip olsem God i gat gutpela pasin, tasol ol i no bilip tru olsem em i save tingim yumi wan wan. Na taim sampela hevi i painim ol, o taim ol i bihainim lo bilong Baibel na i gat sampela bikpela hevi i kamap long dispela, ol i strong moa long bilip olsem God i no save tingim yumi wan wan. Ol i no inap skelim gut ol samting long tingting, olsem na ol i tingim ol hevi bilong ol olsem ol dispela liklik buk i kamap long skin bilong Kenichi na skin i skrap—ol i tingim ol dispela hevi bilong ol i olsem asua bilong God.—Sindaun 19:3.
Jehova i no olsem ol manmeri bilong graun. Ol i gat hap save tasol long ol samting, na i gat sampela samting ol i no inap mekim. Ol i no inap skelim gut long tingting ol samting ol narapela i sot long en na ol i mas kisim, olsem man bilong lukautim haus marasin i no bin skelim gut wanem kain marasin Kenichi i mas kisim. Tasol Jehova i no olsem, nogat. Ai bilong em i save lukim olgeta samting. Planti taim Jehova i save helpim yumi, tasol yumi no save, na yumi no pilim liklik, long wanem, yumi tingting tasol long ol samting yumi sot long en na yumi no tingim ol planti planti blesing yumi kisim. Taim sampela hevi i painim yumi, yumi no ken hariap long putim asua bilong en i go long Jehova. Yumi mas skelim gut long tingting na pilim tru ol gutpela samting yumi kisim long Jehova.
Wanpela buk dikseneri (Webster’s Ninth New Collegiate Dictionary) i tok, wanpela insait bilong dispela tok “blesing” em i olsem “wanpela samting i save mekim yumi i stap amamas o i save helpim yumi.” Yu pilim olsem dispela tok i stret moa yet long ol blesing yumi save kisim long Jehova?
Em i Win Long Lukautim Yumi Long Ol Samting
Taim meri marit i tok, man bilong em i save lukautim gut famili long ol samting, em i laik tok olsem man i save lukautim famili long ol samting ol i mas kisim, olsem em i save givim kaikai, haus, klos samting long famili inap long ol i ken i stap amamas na stap gutpela. Orait olsem wanem long pasin bilong Jehova long lukautim yumi long ol samting? Yumi ken tingim dispela graun yumi sindaun long en. Graun i stap longwe long san inap 150,000,000 kilomita, na dispela i stret tru na bai graun i no hat tumas o kol tumas, na ol samting i gat laip ol inap i stap long graun. Na graun i slip liklik inap olsem 23.5 digri bambai i gat taim bilong san na taim bilong kol samting, na dispela i mekim na planti kaikai i save kamap long graun. Olsem na graun i save lukautim olsem 5 bilion manmeri long kaikai. Tru tumas, Jehova em i Man bilong lukautim yumi long planti kaikai samting!
Na Baibel i kamapim klia olsem Jehova i save tingim tru ol samting bilong yumi olgeta wan wan, na em i tingim i stap bilong yumi. Tingim dispela samting: Jehova i save kolim nem bilong ol bilion bilion sta ol i stap, na em i save long olgeta wan wan liklik pisin i pundaun long graun. (Aisaia 40:26; Matyu 10:29-31) Olsem na yumi save, em i tingim moa yet ol manmeri i save laikim em tru na em i bin baim ol long blut bilong gutpela Pikinini bilong em, Krais Jisas! (Aposel 20:28) Tok bilong saveman i stret tru, em i tok: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”—Sindaun 10:22.
Ol Blesing i Save Helpim Gut Yumi
I gat wanpela samting yumi holim, em i wanpela gutpela samting tru na yumi mas tenkyu tru long en. Em wanem samting? Baibel i kamapim long ples klia dispela samting taim em i tok: “Mi no save laikim mani olsem mi laikim lo bilong yu.” (Song 119:72; Sindaun 8:10) Tru, yumi save laikim tru gutpela gol, tasol yumi mas laikim moa yet lo bilong Jehova. Stretpela save long lo bilong em wantaim gutpela tingting na pasin bilong skelim gut ol samting long tingting, Jehova i save givim ol dispela samting long ol man i gat gutpela bel na ol i wok long painim tok i tru, na ol i mas laikim tru ol dispela samting. Ol inapim yumi long lukautim yumi yet na bai yumi ken sakim ol samting nogut, na long karim hevi bilong ol samting i save kamap, na long stretim ol hevi bilong yumi. Olsem na bai yumi ken i stap belgut na amamas.
Na dispela i stret long ol pikinini tu. Yumi ken tingim wanpela pikinini meri, em i bihainim lo bilong Jehova na dispela i helpim em long stretim sampela hevi bilong em. Dispela pikinini meri, nem bilong em Akemi, em i save sindaun klostu long Tokyo. Papamama bilong em i bin bihainim ol lo bilong Baibel taim ol i skulim em, na long tok bilong ol na pasin bilong ol, ol i helpim pikinini meri bilong ol long kisim pasin bilong laikim tru Jehova na ol narapela man. Ol i tingim ol hevi bai painim em long skul, olsem na ol i wok strong long skulim em na bai em i ken redi long karim ol dispela hevi. Tasol taim Akemi i go nupela yet long komyuniti skul, sampela wanskul i ting em i “narapela kain,” long wanem, taim em i laik kaikai em i save beten, na em i save bihainim maus bilong bel na em i no insait long sampela samting i no stret long tok bilong Baibel. Orait i no longtaim na sampela bikhetmanki long skul i kirap mekim kain kain samting long em, olsem taim skul i pinis long apinun ol i save banisim em na solapim pes bilong em, na tanim han bilong em, na tok bilas long em.
Tasol liklik Akemi i no bekim nogut long ol, na em i no pret long ol tu. Em i wok strong long bihainim ol tok em papamama i bin skulim em long en. Em i bihainim gutpela pasin na em i gat strongpela bel, na dispela i mekim na planti wanskul i tingim em i gutpela pikinini. Ol i tokim tisa long ol samting ol dispela manki i mekim long em, na kirap long dispela taim ol i no mekim nogut moa long em long skul.
Orait, wanem samting i bin helpim Akemi long winim dispela hevi? Em dispela stretpela save na gutpela tingting na savepasin em papamama i bin skulim em gut long en. Em i save gut long pasin bilong Jisas long sanap strong na karim ol hevi, na dispela i kirapim em long bihainim pasin bilong Jisas. Baibel i helpim em long save olsem sampela man i save mekim ol pasin i no stret, long wanem, ol i no gat save, na dispela i kirapim em long nolaik tru long rong ol dispela bikhetmanki i mekim, tasol em i no ken nolaik tru long ol dispela manki yet.—Luk 23:34; Rom 12:9, 17-21.
Tru, ol papamama i no laik lukim pikinini bilong ol i kisim hevi olsem ol narapela i tok bilas long em na mekim nogut long em. Tasol ating yu inap pilim amamas papamama bilong Akemi i kisim taim ol i harim stori bilong ol samting i bin kamap. Ol kain pikinini olsem, ol i gutpela blesing tru papamama i kisim long Jehova.—Song 127:3; 1 Pita 1:6, 7.
Stap Isi na Wetim Jehova
Tasol bilong kisim ol blesing long Jehova, sampela taim yu mas wetim taim bilong em long mekim. Jehova i save long samting yu sot long en na em i save givim long yu long taim dispela samting inap helpim yu tru. (Song 145:16; Saveman 3:1; Jems 1:17) Sapos yu man bilong laikim prut, orait bai yu ting olsem wanem sapos man bilong lukautim yu i givim sampela prut long yu long taim ol i no orait yet? Maski em wanpela apel, o orens, o narapela kain prut, yu laik bai em i mau na i gat bikpela wara bilong en na i swit, a? Na i olsem tu long Jehova—samting yu sot long en, em i save givim long yu long taim stret bilong en—em i no givim hariap tumas o bihaintaim tumas.
Tingim ol samting i bin painim Josep. Maski em i no bin mekim wanpela rong, em i stap kalabus long Isip long wanpela rum kalabus nogut insait long graun. Wanpela wankalabus bilong em, em man bilong lukautim wain bilong king, em i gat tingting olsem em bai lusim kalabus, na em i tok promis olsem em bai tokim king long Josep. Tasol taim em i lusim pinis kalabus, em i lusim tingting olgeta long Josep. I olsem Jehova i lusim pinis Josep. Tasol tupela yia bihain em i lusim kalabus, na bihain em i kamap namba tu bos bilong Isip. Josep i no bin les, nogat. Em i wetim Jehova. Olsem na Jehova i mekim gut tru long em, na em i mekim long wanpela rot i helpim ol Israel na ol Isip tu bambai ol i ken i stap laip na i no ken bagarap.—Stat 39:1–41:57.
Masashi em i wanpela elda long noten Japan. Tru, em i no stap kalabus long wanpela ples nogut, tasol em i mas wetim Jehova. Bilong wanem? Long wanem, kirap long taim ol i bin kamapim Skul Bilong Lainim Wok Bilong Lukautim Kongrigesen, em i gat strongpela tingting long i go long dispela skul. Em i beten strong tru long dispela samting. Ol i singautim poroman bilong em long wok painia long go long dispela skul, tasol ol i no singautim Masashi, maski em i gat bikpela laik tru long go. Em i bel hevi stret long dispela samting.
Tasol em i kirap mekim sampela samting bilong daunim dispela bel hevi bilong em. Em i wok long stadi long Baibel na ol buk samting em Sosaiti Was Taua i wokim—em i kaunim ol tok i stori long pasin daun na bosim gut bel. Em i stretim tingting bilong em, olsem na em i kisim amamas long wok painia bilong em. Orait bihain em i kisim wanpela pas i singautim em long go long dispela skul; em i no ting dispela samting bai kamap.
Em i bin kisim ol pasin olsem no ken les kwik, na pasin daun, olsem na ol samting em i lainim long skul i helpim em gut tru—ating sapos long pastaim yet em i bin i go, dispela skul i no inap helpim em gut olsem. Bihain, Masashi i kisim gutpela wok olsem wasman bilong raun na helpim ol brata bilong em. Tru tumas, Jehova i save long ol samting Masashi i sot long en, na em i givim long Masashi long taim dispela samting inap helpim em gut.
Wok Long Painim Ol Blesing Bilong Em
Olsem na Jehova i no olsem dispela man bilong lukautim haus marasin. Tru, ating yumi no pilim olsem Jehova i save lukautim yumi na tingim yumi, tasol em i save mekim gutpela pasin long yumi long kain kain rot—long kain taim na kain rot i save helpim yumi gut tru. Olsem na yu mas wok long painim ol blesing bilong em. Yu mas save, i gat planti as na yu mas tenkyu long Jehova. Yu bin kisim ol samting yu mas kisim bambai yu ken i stap laip yet long dispela graun. Yu bin kisim save long Jehova na long ol pasin bilong em i nambawan olgeta. Yu bin kisim gutpela tingting. Na yu bin kisim pasin bilong skelim gut ol samting long tingting. Dispela olgeta samting i helpim yu long i stap gutpela na i stap amamas.
Bilong kisim moa yet ol blesing bilong Jehova, yu mas wok yet long stadi long Baibel long olgeta taim. Beten askim Jehova long helpim yu long kisim gut na bihainim ol gutpela gutpela tok i stap long Baibel. Ol dispela samting bai helpim yu long kamap olsem maniman long ol samting bilong spirit, na bai yu no sot long wanpela samting. Yes, ol dispela samting bai mekim na bai yu stap amamas na belgut long nau, na bai yu kisim laip i stap oltaim long nupela taim bai kamap long bihain.—Jon 10:10; 1 Timoti 4:8, 9.
[Piksa long pes 23]
Ol blesing bilong Jehova i gutpela samting tru, winim gol