Ripot Long Wok Bilong Kingdom
Mekim Wok Long Kain Kain Rot
LONG olgeta hap bilong graun ol man i save long wok bilong ol Witnes Bilong Jehova long skulim ol man long Baibel. Na ol Witnes i save kamapim ol narapela wok tu na dispela i save helpim ol manmeri. Ol man i bin amamas long dispela wok ol Witnes i bin mekim, olsem ol dispela stori i kam long Ekwado i kamapim.
◻ Ol man i bosim wanpela bikpela faktori bilong wokim glas, ol i laik kamapim wanpela kos bilong skulim ol wokman bilong ol olsem famili i bikpela samting. Dairekta bilong bosim wok bilong helpim ol manmeri i singautim sampela pris Katolik long mekim toktok long dispela bung, tasol ol i no kam. Wanpela pris i tokim em olsem wan wan pris tasol i gat save long toktok long dispela samting, olsem na no gat wanpela inap kam. Wanpela meri Witnes i save wok long dispela faktori i harim tok long dispela samting na em i stretim tok wantaim wanpela brata i save autim tok long ol hap i gat bisnis long i go lukim ol man long dispela faktori.
Long de bihain stret, dispela brata i go lukim dairekta na i soim em long kos em i redim bilong mekim stadi. Brata i soim em lista bilong ol tok em i kisim long ol buk bilong Sosaiti Was Taua. Dairekta i kirap nogut long dispela samting. Em i makim 3-pela tok bilong stori long en. Em i makim tok i stori long pasin bilong wok gut wantaim ol narapela man, na bihainim stretpela pasin long ples wok, na bihainim stretpela pasin insait long famili. Dairekta i stretim rot bambai ol Witnes i ken toktok long olgeta wokman long dispela 3-pela tok.
Ol i skelim ol wokman i go long 7-pela grup na i gat 30 long ol wan wan grup, na bihain 3-pela brata i gat save ol i kamapim ol dispela tok long ol wokman. Orait wanem samting i kamap? Planti wokman i askim ol brata long i go lukim ol long haus bilong ol, na ol brata i tilim 216 buk long ol bilong helpim ol man long stadi long Baibel. Ol bosman i kirap nogut long dispela samting na ol i askim ol Witnes long redim gen ol narapela tok bilong kamapim long ol wokman.
◻ I no longtaim i go pinis na Ekwado i kamapim wanpela lo i orait long lainim lotu long skul. Wanpela sista i mekim wok misineri em i go lukim namba wan bos bilong wanpela komyuniti skul na askim em long dispela nupela lo i wok gut o olsem wanem. Dispela bosmeri i tok olsem ol i bin traim long kirapim wanpela program long mekim lotu long Maria, tasol dispela samting i no kamap. Taim sista i tok olsem dispela kain pasin bilong lotu inap kamapim hevi long ol narapela pikinini i no Katolik, dispela bosmeri i wanbel long tok bilong em. Orait nau misineri i tok: “Tasol mipela i gat wanpela program bilong skulim ol man long ol stretpela lo i stap long Baibel na dispela i no bilong kirapim man long bihainim wanpela lotu.” Bosmeri i tok: “Wanem taim bai yu kam? Bai yu kam hap tumora?” Misineri i soim buk Harim Tok Bilong Bikpela Tisa long em, na tupela i pasim tok olsem ol bai skelim dispela sapta “Ol Man Bilong Bel Isi Ol i Amamas.”
Taim misineri i kam bek, em i lusim 3-pela aua long go lukim 7-pela narapela narapela klasrum, na dispela bosmeri tu i stap na harim ol tok. Taim em i pinis long toktok wantaim gret 5, wanpela sumatin i tok: “Misis, plis yu mas i go lukim gret 6. Oltaim ol i laik kirapim pait na paitim mipela!” Wanpela tisa i tok: “Pait em wanpela bikpela hevi tru. Yumi mas i gat sampela taim moa bilong toktok long dispela.”
Ol i stretim tok long mekim gobek long dispela skul na toktok long sampela samting moa olsem bihainim tok na giaman. Inap long nau, gutpela samting i kamap long dispela wok. Long nau, taim dispela sista misineri i wokabaut long rot, ol pikinini i save ran i kam na tok gude long em na askim em long sampela tok bilong Baibel. Na sampela i stori long ol papamama bilong ol long em. Na tu, em i kirapim pinis Baibel-stadi wantaim 2-pela bilong ol dispela skulmanki.