Yu Go Insait Pinis Long Malolo Bilong God?
“Man i go insait long . . . malolo bilong God, em i pinisim wok bilong en na i malolo.”—HIBRU 4:10.
1. Bilong wanem yumi olgeta i laik kisim malolo?
MALOLO. Em wanpela tok i swit tru long yau bilong yumi, a? Nau yumi stap long taim bilong ol man i hariap hariap long mekim ol samting, olsem na planti bilong yumi i amamas sapos yumi inap kisim liklik malolo. Maski yumi yangpela o lapun, marit o singel, ol samting yumi mekim long olgeta de i mekim na ating yumi kisim hevi na skin i no gat strong moa. Long ol man i gat sampela bagarap long skin o ol i sik, olgeta wan wan de i gat hatwok tru. Olsem Baibel i tok, “olgeta samting God i bin wokim, olgeta i pilim pen . . . na olgeta i krai nogut i stap, i kam inap long nau.” (Rom 8:22) Man i save malolo i no olsem em i lesman. Malolo em i wanpela samting olgeta man i mas kisim.
2 God Jehova yet i kisim malolo. Buk Stat i tok: “God i wokim skai na graun na ol planti samting i stap long en. Long de namba 7 God i lukim olgeta wok bilong en i pinis, na em i malolo long dispela de.” Jehova i makim “de namba 7” olsem wanpela bikpela de, long wanem, Baibel i tok moa olsem: “God i tambuim de namba 7 na em i tok olsem de namba 7 bilong olgeta wik em i bikpela de bilong em yet.”—Stat 2:1-3.
God i Malolo Long Wok Bilong Em
3. I gat wanem ol as na God i no gat wok long kisim malolo?
3 Bilong wanem God i malolo long “de namba 7”? I no olsem strong bilong em i pinis na em i mas malolo, nogat. Jehova “i gat olgeta strong” na “strong bilong en i no save slek na pinis.” (Aisaia 40:26, 28) Na i no olsem God i mas lusim wok inap liklik hap taim na kisim malolo, o em i mas kisim liklik malolo long dispela wok, nogat. Long wanem, Jisas i tok: “Papa bilong mi em i save wok oltaim i kam inap long nau. Na mi tu mi save wok.” (Jon 5:17) Yumi save, “God em i Spirit” na i no olsem em i mas kisim ol samting ol man i mas kisim olsem kaikai, wara, slip, na malolo samting.—Jon 4:24.
4. Olsem wanem “de namba 7” i narapela kain long ol 6-pela “de” i go pinis?
4 Olsem wanem yumi ken kisim save long as na God i malolo long “de namba 7”? Yumi mas tingim wanpela samting olsem: Maski God i amamas tru long ol samting em i wokim pinis insait long bikpela hap taim bilong ol 6-pela “de” bilong wokim ol samting, em i blesim “de namba 7” na tokaut olsem dispela de i “holi.” Wanpela buk (Concise Oxford Dictionary) i kolim insait bilong dispela tok “holi” olsem “dediket o makim man bilong mekim wok bilong (wanpela god o sampela wok bilong lotu).” Olsem na pasin bilong Jehova long blesim “de namba 7” na tokaut olsem dispela de i holi, em i makim olsem “de namba 7” na “malolo” bilong em i insait long ol samting God i laik mekim bilong kamapim laik holi bilong em, na i no olsem em i mas malolo. Dispela tupela samting i insait long laik bilong em olsem wanem?
5. God i wokim wanem ol samting insait long 6-pela “de” bilong wokim ol samting?
5 Insait long dispela 6-pela “de” i go pinis, God i bin wokim olgeta lo samting i save helpim graun long kamapim kaikai na ol man na animal i ken i stap long graun. Long nau ol saientis i wok long kisim save long ol dispela gutpela samting. Klostu long pinis bilong “de namba 6,” God i wokim namba wan man na meri na em i putim tupela long “wanpela gaden i stap long Iden, long hap bilong sankamap.” Orait, nau God i tokaut long laik bilong em long ol man na long graun long wanpela tok profet olsem: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.”—Stat 1:28, 31; 2:8.
6. (a) Long pinis bilong “de namba 6,” God i ting olsem wanem long ol samting em i bin wokim? (b) Olsem wanem “de namba 7” i holi?
6 Taim “de namba 6” bilong wokim ol samting i laik pinis, Baibel i tok: “God i lukim olgeta dispela samting i gutpela, na em i amamas tru.” (Stat 1:31) God i amamas long ol samting em i bin wokim. Olsem na em i malolo, o lusim, wok bilong em long ol samting bilong graun. Long dispela taim Paradais i olsem wanpela gutpela gaden na ol samting long en i stret olgeta, tasol dispela gaden i karamapim liklik hap graun tasol, na tupela manmeri tasol i stap long en. Bikpela hap taim i mas lus bambai graun na ol manmeri bai inapim laik bilong God. Long dispela as, em i makim “de namba 7” bambai ol samting em i bin wokim long 6-pela “de” i go pinis i ken kamapim ol samting i stret wantaim laik holi bilong God. (Skelim wantaim Efesus 1:11.) Taim “de namba 7” i laik pinis, graun olgeta bai stap olsem wanpela paradais na ol manmeri i gutpela olgeta bai stap long en inap long olgeta taim bihain. (Aisaia 45:18) God i makim, o dediketim, “de namba 7” bilong kamapim laik bilong em long ol samting bilong dispela graun na ol manmeri. Olsem na dispela “de” i “holi.”
7. (a) Olsem wanem God i malolo long “de namba 7”? (b) Taim “de namba 7” i laik pinis ol samting bai stap olsem wanem?
7 God i malolo long wokim ol samting long “de namba 7.” I olsem em i lusim wok bilong em na em i larim ol samting em i bin wokim long kamapim laik bilong em. Em i bilip tru olsem long pinis bilong “de namba 7” olgeta samting bai stap stret wankain olsem laik bilong em. Na maski sampela hevi i bin kamap, ol bai pinis. Ol manmeri i bihainim tok ol bai kisim gutpela samting taim laik bilong God i kamap tru. I no gat wanpela samting inap pasim dispela, long wanem, God i blesim “de namba 7,” na em i mekim dispela de i kamap “holi.” Man! Gutpela samting tru i wetim ol manmeri i bihainim tok!
Ol Israel i No Go Insait Long Malolo Bilong God
8. Ol Israel i kirap tingim de Sabat long wanem taim? Ol i mekim olsem wanem?
8 Lo bilong Jehova long wok na malolo i helpim lain Israel. Taim God i no givim yet Lo long ol Israel long maunten Sainai, em i tokim ol long maus bilong Moses: “Harim gut, mi Bikpela, mi givim yupela dispela de bilong malolo. Olsem na long de namba 6 bai mi givim yupela kaikai inap long tupela de. Orait na long de namba 7 olgeta manmeri i mas i stap long haus sel. I no gat wanpela man o meri i ken lusim banis bilong en.” Olsem na “bihain ol i malolo long de namba 7.”—Kisim Bek 16:22-30.
9. Bilong wanem yumi ken ting ol Israel i amamas long lo bilong Sabat?
9 Dispela pasin bilong malolo long de namba 7 em i nupela samting long ol Israel em nau tasol God i bin kisim bek ol long wok kalabus long Isip. Tru, ol Isip na sampela narapela lain ol i bin makim ol hap taim i gat 5-pela i go inap 10-pela de long en, tasol ol Israel i wok kalabus long Isip, na yumi save ol Isip i no ken larim ol i kisim wanpela de malolo. (Skelim wantaim Kisim Bek 5:1-9.) Olsem na yumi ken ting ol Israel i amamas long kisim dispela de malolo. Ol i no ken ting lo bilong Sabat i givim hevi long ol o pasim ol, nogat; ol i mas amamas long bihainim dispela lo. Bihain God i tokim ol olsem de Sabat i mas kirapim ol long tingim taim ol i bin wok kalabus long Isip na em i kisim bek ol long dispela hap.—Lo 5:15.
10 Sapos ol Israel, em ol i bin lusim Isip wantaim Moses, i bihainim ol lo bilong God, ol inap i go insait long ‘graun i gat planti gris na kaikai’ em God i bin tok promis long givim long ol. (Kisim Bek 3:8) Long dispela ples ol inap kisim malolo tru, ol i no ken kisim malolo long de Sabat tasol, nogat; ol bai kisim malolo long olgeta samting long i stap bilong ol. (Lo 12:9, 10) Tasol dispela samting i no bin kamap. Aposel Pol i tok long ol olsem: “Husat ol dispela lain bipo ol i harim maus bilong God, na ol i bikhet na sakim tok bilong em? Em olgeta manmeri Moses i bringim ol i go lusim Isip. Ol tasol i mekim dispela pasin. Na God i belhat long husat inap long 40 yia? Em i belhat long ol dispela manmeri i mekim sin, na ol i dai, na bodi bilong ol i stap long hap i no gat man. Em i belhat long ol dispela lain tasol. God i tingting long wanem ol lain na em i tok tru antap ol bai i no inap i go insait long . . . malolo bilong en? Em dispela ol manmeri i bin sakim tok bilong em. Em i tok long ol tasol. Olsem na yumi save, ol dispela manmeri i no bilip long God, na long dispela as tasol ol i no inap i go insait long . . . malolo God i laik bringim ol i go long en.”—Hibru 3:16-19.
10, 11. (a) Sapos ol Israel i bihainim tok, ol inap wetim wanem gutpela samting? (b) Bilong wanem ol Israel i no inap i go insait long malolo bilong God?
11 Dispela i skulim yumi long wanpela bikpela samting! Ol i no bilip long Jehova, olsem na dispela lain i no go insait long malolo bilong God em i bin promis long givim long ol. Ol i bagarap long ples drai nating. Ol i no pilim olsem ol i tumbuna pikinini bilong Abraham na ol i insait long laik bilong God long mekim gut long olgeta manmeri bilong graun. (Stat 17:7, 8; 22:18) Ol i no mekim ol samting i stret wantaim laik bilong God, nogat; ol i larim ol samting bilong graun na laik bilong ol yet i pulim nabaut tingting bilong ol. Nogut yumi bihainim pasin nogut bilong ol!—1 Korin 10:6, 10.
I Gat Malolo i Stap Yet
12. Ol Kristen long taim bilong ol aposel inap wetim yet wanem samting? Na ol inap kisim olsem wanem?
12 Taim Pol i kamapim pinis olsem ol Israel i lus long go insait long malolo bilong God, long wanem, ol i no bilip, nau em i toktok long ol wanbilip bilong em. Olsem Hibru 4:1-5 i stori long en, em i strongim bel bilong ol na tok “God i bin promis long bringim yumi tu i go insait long . . . malolo” bilong em. Pol i kirapim ol long bilip long “gutnius,” long wanem, ol “manmeri i bilip long God, em bai i larim [ol] i go insait long . . . malolo bilong en.” God i rausim pinis Lo long rot bilong ofa Jisas i bin mekim bilong baim bek ol man, olsem na Pol i no stori long malolo bilong skin ol Israel i bin kisim long de Sabat. (Kolosi 2:13, 14) Pol i kamapim tok bilong Stat 2:2 na Song 95:11, bilong kirapim ol Kristen Hibru long go insait long malolo bilong God.
13 Ol inap i go insait long malolo bilong God na dispela i mas i stap olsem “gutnius” long ol Kristen Hibru, wankain olsem malolo long de Sabat i mas i stap olsem “gutnius” long ol Israel bilong bipo. Olsem na Pol i kirapim ol wanbilip bilong em long ol i no ken mekim wankain popaia olsem ol Israel i bin mekim long ples drai nating. Em i kolim tok nau i stap long Song 95:7, 8, na em i kamapim tok “nau,” maski longpela taim tru i go pinis na God i malolo long wokim ol samting. (Hibru 4:6, 7) Pol i laik skulim yumi long wanem samting? Em i laik kamapim long ples klia olsem “de namba 7,” em God i bin makim bilong larim laik bilong em long ol samting bilong graun na ol manmeri i kamap, dispela de i stap yet. Olsem na em i bikpela samting ol wanwok Kristen bilong em ol i wok wantaim dispela laik bilong God na ol i no bihainim tasol ol wok bilong helpim ol yet. Na em i mekim gen tok lukaut olsem: “Yupela i no ken pasim strong bel bilong yupela.”
14 Na tu, Pol i kamapim klia olsem dispela “malolo” em God i bin promis long givim long ol i no olsem ol Israel bai sindaun tasol long Graun Bilong Promis na Josua i hetman bilong ol. (Josua 21:44) Pol i tok: “Sapos bipo Josua i bin givim malolo long ol, orait bihain God bai i no inap tok long narapela de.” Pol i tingim dispela samting, na em i tok moa: “Olsem na yumi save, ol manmeri bilong God bai i gat malolo i stap yet, em i olsem malolo bilong de Sabat.” (Hibru 4:8, 9) Dispela “malolo bilong de Sabat” em wanem samting?
Go Insait Long Malolo Bilong God
15, 16. (a) Wanem insait bilong dispela tok “malolo bilong de Sabat”? (b) Wanem insait bilong dispela tok ‘malolo long wok bilong yumi yet’?
15 Dispela tok “malolo bilong de Sabat” ol i tanim long wanpela tok Grik insait bilong en i olsem “malolo.” (Baibel Kingdom Interlinear) Profesa William Lane i tok: “Ol i kisim dispela hap tok long lo bilong Sabat i kamap insait long lotu Juda na Kisim Bek 20:8-10 i as bilong en, na i tok malolo na pasin bilong litimapim nem bilong God i poroman wantaim . . . [Sabat] em bikpela taim bilong amamas, taim ol i lotuim God na litimapim nem bilong em.” Olsem na dispela malolo God i bin promis long givim long ol em i no taim bilong malolo long wok bilong skin tasol, em wok i mekim skin i les na i no gat as bilong en, nogat. Dispela malolo i taim bilong amamas long mekim wok bilong God i litimapim nem bilong em.
16 Dispela samting i kamap ples klia long narapela tok Pol i mekim, olsem: “Man i go insait long . . . malolo bilong God, em i pinisim wok bilong en na i malolo, olsem bipo God i pinisim wok bilong em yet na i malolo.” (Hibru 4:10) I no olsem strong bilong God i pinis na em i malolo long de namba 7, nogat. Em i lusim wok bilong em long wokim ol samting long graun bambai ol samting em i wokim pinis i ken wok long kamap gutpela tru na givim biknem long em. God i bin wokim yumi, olsem na yumi tu i mas insait long ol samting em i laik mekim. Yumi mas ‘malolo long ol wok bilong yumi yet,’ olsem yumi no ken kamapim stretpela pasin bilong yumi long ai bilong God long ol wok bilong yumi bambai em i ken kisim bek yumi, nogat. Yumi mas bilip olsem ofa bilong Krais Jisas tasol inap helpim yumi na God bai kisim bek yumi, na long rot bilong em olgeta samting bai kamap stret wantaim laik bilong God.—Efesus 1:8-14; Kolosi 1:19, 20.
Tok Bilong God i Gat Strong
17. Yumi no ken mekim wanem pasin olsem ol Israel bilong skin i bin mekim?
17 Ol Israel i no go insait long malolo bilong God, long wanem, ol i sakim tok bilong God na ol i no gat bilip. Olsem na Pol i kirapim ol Kristen Hibru olsem: “Yumi mas wok strong bilong i go insait long dispela . . . malolo. Nogut wanpela man i bihainim dispela pasin bilong sakim tok, olsem bipo ol i mekim, na em bai i pundaun na i lus.” (Hibru 4:11) Klostu olgeta Juda long taim bilong ol aposel i no bilip long Jisas, na planti bilong ol i bin kisim nogut tru taim ol pasin na lo bilong lain Juda i pinis long yia 70 C.E. Em i bikpela samting tru olsem yumi bilip long tok promis bilong God long nau!
18 Yumi gat ol gutpela as na yumi ken bilip tru long tok bilong Jehova. Pol i tok: “Tok bilong God em i gat laip, na em i wok strong i stap. Em i sap moa, na i winim bainat i gat tupela sap. Dispela tok i save sutim man na i go insait tru. Em i go kamap stret long dispela hap tewel na spirit i bruk, na long ol dispela hap skru na kru bilong bun i pas wantaim. Olsem na em i save gut tru long olgeta tingting na laik bilong bel bilong yumi.” (Hibru 4:12) Tru tumas, tok bilong God “i sap moa, na i winim bainat i gat tupela sap.” Ol Kristen Hibru i mas tingim ol samting i painim ol tumbuna bilong ol. Ol i no tingim tok bilong Jehova olsem ol bai bagarap long ples drai nating, na ol i traim long go insait long Graun Bilong Promis. Tasol Moses i givim tok lukaut long ol olsem: “Sapos yupela i go, bai yupela i pait long ol Amalek na ol Kenan na bai ol i kilim yupela i dai.” Taim ol Israel i bikhet na strong long go insait, “ol Amalek na ol Kenan i lusim ples maunten na i kam daun na pait long ol Israel na winim ol. Na ol i ranim ol Israel i go inap long taun Horma.” (Namba 14:39-45) Tok bilong Jehova i sap moa, na i winim bainat i gat tupela sap, na sapos long laik bilong em yet wanpela man i sakim dispela tok, ol samting nogut bai painim em.—Galesia 6:7-9.
19. Tok bilong God i save “sutim” man olsem wanem? Bilong wanem yumi mas save God bai skelim ol samting yumi mekim?
19 Tok bilong God “i save sutim man na i go insait tru. Em i go kamap stret long dispela hap tewel na spirit i bruk, na long ol dispela hap skru na kru bilong bun i pas wantaim”! Em i go insait tru long tingting na bel bilong ol man, i olsem em i go insait long kru i stap insait tru long bun! Maski ol Israel i kamap fri na lusim kalabus long Isip ol i bin tok ol bai bihainim Lo, tasol Jehova i save, long bel ol i no pilim ol samting em i bin givim long ol na ol lo bilong em. (Song 95:7-11) Ol i no bin mekim laik bilong em, nogat; ol i tingting long inapim ol laik bilong skin bilong ol. Olsem na ol i no go insait long malolo bilong God, ol i bagarap long ples drai nating. Yumi mas larim dispela i skulim yumi, long wanem, “i no gat wanpela samting God i bin wokim, em inap hait long pes bilong God. Nogat tru. Olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.” (Hibru 4:13) Olsem na yumi mas wok long inapim dediket bilong yumi long Jehova na yumi no ken “surik na lus. Nogat tru.”—Hibru 10:39.
20. Klostu nau wanem samting bai kamap? Nau yumi mas mekim wanem bambai yumi inap i go insait long malolo bilong God?
20 Tru “de namba 7”—de malolo bilong God—i stap yet, tasol God i tingim ol samting bilong graun na ol manmeri long kamapim laik bilong em. Klostu nau, King Mesaia, Krais Jisas, em bai pinisim ol man i birua long laik bilong God, na em bai pinisim Satan tu. Long Taim Bilong Wan Tausen Yia Bilong Krais i Stap King, Jisas na 144,000 wanwok king bilong em ol bai mekim na graun na ol manmeri bai kamap olsem God i laik ol i mas kamap. (KTH 14:1; 20:1-6) Nau em taim bilong yumi long kamapim long ples klia olsem yumi givim bel tru long bihainim laik bilong God Jehova. Yumi no ken kamapim stretpela pasin bilong yumi long ai bilong God long ol wok bilong yumi, na mekim ol samting bilong helpim yumi yet, nogat; nau em taim bilong ‘malolo long ol wok bilong yumi’ na long givim bel olgeta long mekim wok bilong Kingdom. Taim yumi mekim olsem na yumi stap gut long Papa bilong yumi long heven, em Jehova, bai yumi inap kisim ol gutpela samting malolo bilong God bai kamapim long nau na long olgeta taim bihain.
Yu Inap Stori Long Dispela?
◻ Bilong wanem God i malolo long “de namba 7”?
◻ Ol Israel inap i go insait long wanem malolo? Bilong wanem ol i no go insait long en?
◻ Yumi mas mekim wanem bambai yumi inap i go insait long malolo bilong God?
◻ Olsem wanem tok bilong God i gat laip, na i gat strong, na i sap moa winim bainat i gat tupela sap?
2. Jehova i kirap malolo long wanem taim?
13. Taim Pol i kolim tok bilong Song 95, bilong wanem em i kolim tok “nau”?
14. Olsem wanem Pol i kamapim klia olsem “malolo” bilong God i stap yet?
18. (a) Pol i kamapim wanem ol as na yumi ken bilip tru long tok bilong God? (b) Olsem wanem tok bilong God i “sap moa, na i winim bainat i gat tupela sap”?
[Piksa long pes 16, 17]
Ol Israel i bin bihainim de Sabat, tasol ol i no go insait long malolo bilong God. Yu save long as bilong en?