Wokabaut Wantaim God—Taim Yumi Kirap Nupela Long Mekim
“Yupela i mas i go klostu tru long God, na em bai i kam klostu tru long yupela.”—JEMS 4:8.
1, 2. I gat wanem as na yu inap tok, em i gutpela samting tru long yumi inap mekim wok bilong Jehova?
DISPELA man i bin i stap kalabus na karim hevi inap planti yia. Orait nau em i mas i go sanap long ai bilong king bilong dispela kantri. Kirap long dispela taim, ol samting i kamap kwiktaim, na i olsem wantu tasol na dispela kalabusman i kisim wok long wanpela strongpela king tru, winim ol narapela king bilong graun. Em nau, dispela man bipo em i stap kalabus, em i kisim wanpela wok i gat bikpela namba tru na bikpela nem. Josep—dispela man bipo ol i bin pasim sen long lek bilong em—nau em i wokabaut wantaim wanpela king!—Stat 41:14, 39-43; Song 105:17, 18.
2 Long nau ol man i gat rot long mekim wok bilong wanpela man i winim tru king bilong Isip. God Antap Tru i singautim yumi olgeta long mekim wok bilong em. Man! Em i gutpela samting tru, a? Yumi kirap nogut long yumi inap mekim wok bilong Jehova na kamap olsem pren bilong em, em dispela God i gat olgeta strong! Taim Baibel i stori long Jehova, em i kolim ol samting olsem bikpela strong tru, na lait i gat ol gutpela kala long en olsem renbo, na ol naispela ston i lait moa, na ol narapela samting i makim bel isi na gutpela pasin bilong em. (Esekiel 1:26-28; KTH 4:1-3) Pasin sori i insait long olgeta samting em i save mekim long ol man. (1 Jon 4:8) Em i no save tok giaman, nogat tru. (Namba 23:19) Na tu, Jehova i no save lusim ol man i stap gut long em. (Song 18:25) Sapos yumi stretim ol pasin bilong yumi na bihainim ol stretpela lo bilong em, orait bai yumi stap amamas long nau na i stap bilong yumi bai i gat as bilong en, na yumi inap tingting long kisim laip i stap oltaim. (Jon 17:3) I no gat wanpela king bilong dispela graun em inap givim ol samting long yumi olsem ol dispela gutpela samting na gutpela wok Jehova i laik givim long yumi.
3. Olsem wanem Noa i bin wokabaut wantaim God?
3 Long bipo yet, Noa i strong long bihainim ol pasin i stret wantaim laik bilong God na ol samting God i laik mekim. Baibel i stori long em olsem: “Noa em i gutpela man, na wokabaut bilong en i stret long ai bilong God. Em i pren tru bilong God.” (Stat 6:9) Tru, yumi save Noa i no wokabaut tru wantaim Jehova, long wanem, i no gat wanpela man “i bin lukim God. Nogat tru.” (Jon 1:18) Tasol Noa i mekim olgeta samting olsem God i bin tokim em long mekim. Noa i bin givim laip bilong em olgeta long mekim laik bilong Jehova, olsem na em i pas gut wantaim God i Gat Olgeta Strong na em i stap pren tru bilong Em. Long nau planti milion manmeri ol i bihainim pasin bilong Noa na ol i wokabaut wantaim God—olsem ol i bihainim ol pasin i stret wantaim ol lo na tok Jehova i givim long yumi. Orait yumi mas mekim wanem bilong kirap na bihainim dispela rot?
Yumi Mas Kisim Stretpela Save
4. Jehova i save skulim lain bilong em olsem wanem?
4 Bilong wokabaut wantaim Jehova, pastaim yumi mas save long em. Profet Aisaia i tok profet olsem: “Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na i winim olgeta arapela maunten. Na olgeta lain manmeri bai i kam bung long en. Ol lain manmeri bilong olgeta hap bai i tok olsem, ‘Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ Ol bai i tok olsem, long wanem, Jerusalem bai i stap ples bilong Bikpela i skulim ol manmeri na autim tok bilong em long ol.” (Aisaia 2:2, 3) Tru tumas, yumi inap bilip tru olsem Jehova bai skulim olgeta man ol i laik wokabaut long rot em i makim. Jehova i bin givim Tok bilong em, olsem Baibel, long yumi, na em i save helpim yumi long kisim gut ol dispela tok. Wanpela rot bilong em long mekim olsem, em dispela “wokboi i gat gutpela tingting.” (Matyu 24:45-47) Jehova i save mekim wok long dispela gutpela “wokboi” bilong skulim yumi long ol samting bilong spirit, na em i mekim olsem long rot bilong ol buk na nius samting i kamapim ol tok bilong Baibel, na long ol miting Kristen, na long rot bilong mekim Baibel-stadi wantaim ol man long haus bilong ol yet, no gat pe. Na long rot bilong spirit holi bilong em, God i save helpim lain bilong em long kisim gut ol tok bilong em long Baibel.—1 Korin 2:10-16.
5. Bilong wanem tok i tru bilong Baibel i gutpela samting tru?
5 Yumi no save tromoi mani bilong kisim tok i tru bilong Baibel, tasol dispela tok em i gutpela samting tru. Taim yumi stadi long Tok Bilong God, yumi kisim save long ol samting bilong God yet—olsem nem bilong em, ol pasin bilong em, ol samting em i laik mekim, na ol samting em i save mekim long ol man. Na yumi kisim bekim bilong ol bikpela askim long i stap bilong yumi, olsem: Yumi stap bilong mekim wanem? Bilong wanem God i save larim pen na hevi i stap? Wanem samting bai painim yumi long bihain? Bilong wanem yumi save go lapun na yumi dai? Na tu, yumi kisim save long ol samting God i laik bai yumi mekim, olsem yumi mas wokabaut olsem wanem na bai em i ken orait long yumi. Na yumi kisim save olsem ol lo em i laik bai yumi mas bihainim, ol i no hatpela lo, na taim yumi bihainim, ol i save helpim yumi gut tru. Sapos God i no skulim yumi, bai yumi no inap save gut long ol dispela samting.
6. Stretpela save bilong Baibel i helpim yumi long bihainim wanem rot?
6 Tok i tru bilong Baibel i gat strong na i save kirapim yumi long senisim pasin na wokabaut bilong yumi. (Hibru 4:12) Taim yumi no kisim save yet long Baibel, yumi bin wokabaut “long pasin nogut bilong dispela graun,” na yumi no save long narapela rot. (Efesus 2:2) Tasol stretpela save bilong Baibel i makim narapela rot bilong yumi bambai yumi inap “wokabaut long pasin bilong ol manmeri tru bilong Bikpela, na bai em i laikim olgeta pasin bilong [yumi].” (Kolosi 1:10) Em i samting bilong amamas tru taim yumi kirap nupela long wokabaut wantaim Jehova, em nambawan gutpela Man tru, winim olgeta narapela long heven na graun!—Luk 11:28.
Tupela Bikpela Samting—Dediket na Baptais
7. Taim yumi stadi long Tok Bilong God, wanem tok i tru long pasin bilong ol man long bosim graun i kamap ples klia?
7 Taim yumi wok long kisim save long Baibel, yumi kirap long skelim ol samting ol man bilong graun i save mekim, na i stap bilong yumi tu, wantaim ol tok bilong Baibel. Taim yumi mekim olsem, wanpela bikpela tok i tru i kamap ples klia. Long bipo yet profet Jeremaia i tokaut long dispela tok i tru, olsem: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Ol man bilong graun—em yumi olgeta—i mas larim God i soim rot long yumi.
8. (a) Wanem samting i save kirapim ol man long dediket long God? (b) Dediket Kristen em i wanem samting?
8 Sapos yumi pilim gut dispela bikpela samting, orait dispela bai kirapim yumi long go long Jehova na bai em i ken soim rot long yumi. Na taim yumi laikim tru God, dispela bai kirapim yumi long givim laip bilong yumi long em, olsem dediket long em. Bilong dediket long God, yumi mas beten long em na tok promis olsem yumi bai mekim wok bilong em na wokabaut long rot bilong em long olgeta taim. Taim yumi mekim olsem, yumi bihainim pasin bilong Jisas, em i bin givim em yet long Jehova bilong mekim laik bilong em.—Hibru 10:7.
9. Bilong wanem ol man i save dediketim laip bilong ol long Jehova?
9 God Jehova i no save subim wanpela man long dediket long em, nogat. (Skelim wantaim 2 Korin 9:7.) Na tu, God i no laik bai bel bilong man i kirap nating na em i dediketim laip bilong em long God, nogat. Taim man i no kisim baptais yet, em i mas kamap wanpela disaipel, na bilong mekim olsem, em i mas wok strong long kisim save. (Matyu 28:19, 20) Pol i tokim ol man i dediket pinis long God olsem ol i mas ‘givim bodi bilong ol long God olsem ofa i stap laip na i holi na God i save laikim, em wok bilong God ol i mekim wantaim stretpela tingting.’ (Rom 12:1, NW) Na taim yumi laik dediket long Jehova, yumi save mekim wok long dispela stretpela tingting bilong yumi. Taim yumi kisim save long ol samting yumi mas mekim taim yumi dediket pinis, na yumi skelim gut dispela samting long stretpela tingting, em nau, long laik bilong yumi yet yumi dediketim laip bilong yumi long God, na yumi amamas long mekim olsem.—Song 110:3.
10. Olsem wanem dediket na baptais i save poroman wantaim?
10 Taim yumi tasol i stap, yumi beten long God na kamapim bel bilong yumi, olsem yumi laik wokabaut long rot em i makim. Orait taim yumi mekim pinis, nau yumi mas mekim narapela samting. Yumi kisim baptais long wara bilong kamapim long ol man olsem yumi dediket pinis. Dispela em i olsem wanpela tokaut long yumi bin tok promis long mekim laik bilong God. Taim Jisas i kirap mekim wok bilong em long graun long autim tok, em i go long Jon na kisim baptais, olsem na em i makim pasin yumi mas bihainim. (Matyu 3:13-17) Bihain, Jisas i givim wok long lain bilong em bilong kamapim ol disaipel na baptaisim ol. Olsem na dediket na baptais em tupela bikpela samting em olgeta man i mas mekim sapos ol i laik wokabaut wantaim Jehova.
11, 12. (a) Olsem wanem yumi ken tok, baptais i kain olsem bung bilong marit? (b) Olsem wanem yumi ken tok, pasin i stap namel long yumi na Jehova i wankain olsem pasin i stap namel long man marit na meri bilong em?
11 Taim man i kamap wanpela disaipel bilong Krais i dediket na baptais pinis, dispela i kain olsem long taim man i marit. Long planti kantri, taim man i laik marit, pastaim em i mas mekim sampela samting. Em i bungim wanpela meri, na narapela i wok long save gut long narapela, na nau tupela i gat laik long marit. Bihain ol i makim tupela bilong marit. Orait nau bung bilong marit i kamap na dispela i kamapim long ples klia samting tupela i bin pasim tok long mekim taim tupela tasol i stap—olsem tupela bai marit na sindaun wantaim olsem man na meri marit. Dispela bung bilong marit yet i makim kirap bilong dispela taim tupela i sindaun wantaim olsem tupela marit na pas gut wantaim. Dispela de i makim kirap bilong dispela marit bilong tupela. Na olsem tasol, baptais i makim olsem man i kirap long bihainim rot bilong givim bel olgeta long Jehova na wokabaut wantaim em olsem man i dediket pinis.
12 Tingim narapela samting i wankain. Bihain long de tupela i marit, dispela pasin olsem man i laikim tru meri na meri i laikim tru man, em i mas kamap strong moa. Bilong pas gut tru wantaim, tupela i no ken tingim laik bilong ol yet tasol—narapela i mas tingim narapela na wok long strongim marit bilong tupela. Tru, yumi no marit long God, tasol taim yumi baptais pinis, yumi mas wok long strongim pasin bilong yumi long pas gut wantaim Jehova. Em i lukim na amamas long ol wok yumi mekim, olsem yumi wok strong long mekim laik bilong em, na em i save kam klostu long yumi. Disaipel Jems i tok: “Yupela i mas i go klostu tru long God, na em bai i kam klostu tru long yupela.”—Jems 4:8.
Bihainim Lek Bilong Jisas
13. Taim yumi wokabaut wantaim God, yumi mas bihainim pasin bilong husat?
13 Bilong wokabaut wantaim Jehova, yumi mas bihainim pasin Krais Jisas i bin mekim. Aposel Pita i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:21) Jisas em i gutpela man olgeta, tasol yumi nogat, olsem na yumi no inap bihainim stret pasin bilong em. Tasol Jehova i laik bai yumi wok strong long bihainim pasin bilong Jisas inap tru long mak bilong yumi. Orait nau yumi ken toktok long 5-pela samting long i stap bilong Jisas na wok bilong em, em ol Kristen i dediket pinis ol i mas wok strong long bihainim.
14. Yumi mas mekim wanem na bai yumi save long Tok Bilong God?
14 Jisas i gat stretpela save long Tok Bilong God na em i save gut tru long en. Taim Jisas i mekim wok bilong em long graun, planti taim em i kamapim ol tok i stap long Ol Skripsa Hibru. (Luk 4:4, 8) Tru, ol hetman nogut bilong lotu long taim bilong em ol tu i kamapim ol tok bilong Baibel. (Matyu 22:23, 24) Tasol Jisas i narapela kain long ol—em i kisim gut insait bilong ol dispela tok, na em i bihainim. Em i save long olgeta tok bilong Lo, na em i save tu long ol samting Lo i makim. Taim yumi wok strong long bihainim pasin bilong Jisas, yumi mas wok strong tu long kisim gut tok bilong Baibel, na pilim tru as bilong dispela tok. Sapos yumi mekim olsem, orait bai yumi inap kamap olsem ol wokman God i orait long ol, na yumi inap “autim stret tok tru bilong God.”—2 Timoti 2:15.
15. Olsem wanem Jisas i stap olsem gutpela piksa long toktok wantaim ol man long God?
15 Krais Jisas i toktok wantaim ol narapela long Papa bilong em i stap long heven. Ol save bilong Jisas long Tok Bilong God, em i no pasim dispela save bilong em yet, nogat. Ol birua bilong em tu i save kolim em “Tisa,” long wanem, long olgeta hap em i go long en, em i save toktok wantaim ol narapela long Jehova na ol samting Em i laik mekim. (Matyu 12:38) Jisas i autim tok long ol man i bung insait long banis bilong tempel, na long ol liklik haus lotu, na ol taun, na ol liklik ples nabaut. (Mak 1:39; Luk 8:1; Jon 18:20) Taim em i skulim ol man, em i mekim long pasin marimari na gutpela pasin, na em i mekim pasin sori long ol man em i helpim ol. (Matyu 4:23) Ol man i bihainim pasin bilong Jisas ol tu i save painim kain kain hap na kain kain rot bilong skulim ol man long God Jehova na ol gutpela samting tru em i laik mekim.
16. Jisas i stap olsem wanem wantaim ol narapela i save lotuim Jehova?
16 Jisas i pas gut wantaim ol narapela i save lotuim Jehova, olsem pren tru bilong ol. Wanpela taim Jisas i toktok wantaim bikpela lain manmeri, na mama wantaim ol brata bilong em i no bilip ol i kam bilong toktok wantaim em. Baibel i stori long dispela na i tok: “Wanpela man i tokim em, ‘Harim. Mama bilong yu wantaim ol brata bilong yu ol i sanap ausait, na ol i laik toktok wantaim yu.’ Tasol Jisas i bekim tok bilong dispela man olsem, ‘Husat em i mama bilong mi? Na husat em i brata bilong mi?’ Na em i makim ol disaipel bilong en long han na i tok, ‘Lukim mama bilong mi wantaim ol brata bilong mi. Long wanem, man o meri i save bihainim laik bilong Papa bilong mi i stap long heven, em i brata na susa na mama bilong mi.’ ” (Matyu 12:47-50) Dispela i no makim olsem Jisas i givim baksait long famili bilong em, nogat, long wanem, ol samting i kamap bihain long dispela i kamapim klia olsem em i no bin mekim olsem. (Jon 19:25-27) Tasol dispela stori i soim yumi olsem Jisas i laikim tru ol wanbilip bilong em. Long nau tu, ol man i wokabaut wantaim God ol i save poroman wantaim ol narapela wokman bilong Jehova na laikim ol tru.—1 Pita 4:8.
17. Jisas i gat wanem tingting long mekim laik bilong Papa bilong em long heven? Dispela i mas mekim wanem long yumi?
17 Jisas i mekim laik bilong God na long dispela rot em i kamapim klia olsem em i laikim tru Papa bilong em long heven. Jisas i bihainim tok bilong Jehova long olgeta samting. Em i tok: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” (Jon 4:34) Krais i tok tu olsem: “Oltaim mi save mekim ol samting [God] i laikim.” (Jon 8:29) Jisas i laikim tumas Papa bilong em long heven, olsem na “em i daunim em yet na i bihainim tok bilong God, i go inap long em i dai, yes, inap long em i dai long diwai.” (Filipai 2:8) Olsem na Jehova i mekim gut tru long Jisas na i givim bikpela namba na biknem long em—Jehova tasol i winim em. (Filipai 2:9-11) Na yumi tu, taim yumi bihainim ol lo bilong God na mekim laik bilong em, yumi save kamapim klia olsem yumi laikim em tru.—1 Jon 5:3.
18. Olsem wanem Jisas i stap olsem gutpela piksa long pasin bilong beten?
18 Jisas em i man bilong beten. Taim em i kisim baptais em i beten. (Luk 3:21) Taim em i laik makim 12-pela aposel bilong em, em i beten long nait olgeta i go inap tulait. (Luk 6:12, 13) Jisas i bin skulim ol disaipel long pasin bilong beten. (Luk 11:1-4) Long nait paslain long taim em i dai, em i beten askim God long helpim ol disaipel, na em i beten wantaim ol. (Jon 17:1-26) Beten em i bikpela samting tru long Jisas, na beten i mas i stap olsem bikpela samting tru long yumi, long wanem, yumi disaipel bilong em. Em i gutpela samting tru long yumi inap toktok wantaim King bilong heven na graun long rot bilong beten! Na tu, Jehova i save harim ol beten bilong yumi. Yumi save long dispela, long wanem, Jon i tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. Olsem na yumi no save pret long God. Nogat. Yumi save go klostu long em. Yumi save, em i save harim olgeta beten bilong yumi. Olsem na taim yumi askim em long givim wanpela samting long yumi, yumi save olsem yumi kisim tru dispela samting.”—1 Jon 5:14, 15.
19. (a) Wanem ol pasin bilong Jisas yumi mas bihainim? (b) Taim yumi kisim save long i stap na wok bilong Jisas, dispela i helpim yumi olsem wanem?
19 Taim yumi glasim gut i stap na wok bilong Krais Jisas taim em i stap long graun, dispela inap lainim yumi long planti samting! Tingim ol gutpela pasin em i kamapim: pasin sori, marimari, mekim gut long man, strong, skelim ol samting long stretpela tingting, isi long ol man, pasin daun, i no pret, na i no tingting long helpim em yet tasol. Taim yumi wok long kisim save long Jisas, bai yumi kisim bikpela laik long i stap disaipel bilong em na stap gut long em. Na taim yumi kisim save long Jisas, yumi save go klostu tru long Jehova, long wanem, Jisas em i piksa tru bilong Papa bilong em long heven. Em i pas gut tru wantaim Jehova, olsem na em inap tok: “Man i lukim mi, em i lukim Papa.”—Jon 14:9.
Bilip Olsem God Bai Strongim Yu
20. Yumi mas mekim wanem na bai yumi inap wokabaut gut wantaim Jehova?
20 Taim ol pikinini i kirap lain long wokabaut, lek bilong ol i guria na i no strong. Olsem wanem ol i save lain long wokabaut gut? Ol i mas mekim mekim planti taim na no ken les. Orait, ol man i wokabaut wantaim Jehova ol i save wok strong na bai ol i ken wokabaut gut. Ol tu i mas mekim mekim planti taim na bai ol i ken lain gut long mekim, na ol i no ken les. Pol i kamapim klia olsem yumi mas strong long wokabaut wantaim God na no ken les. Em i tok: “Ol brata, mipela i bin soim yupela olgeta pasin yupela i mas wokabaut long en bilong bihainim laik bilong God, na yupela i save bihainim ol dispela pasin. Tasol nau mipela i laik strongim bel bilong yupela tru na tokim yupela long nem bilong Bikpela Jisas long yupela i mas mekim ol dispela pasin moa moa yet.”—1 Tesalonaika 4:1.
21. Taim yumi wokabaut wantaim Jehova, yumi inap kisim wanem ol gutpela samting?
21 Sapos yumi givim bel olgeta long God, em bai helpim yumi long wokabaut yet wantaim em. (Aisaia 40:29-31) Olgeta samting ol lain bilong dispela graun inap givim long yumi, ol i samting nating taim yumi skelim wantaim ol gutpela samting God i save givim long ol man i wokabaut long rot em i makim. Em dispela Man i save ‘skulim yumi na soim yumi stretpela rot yumi mas bihainim na bai yumi stap gut. Sapos yumi harim tok bilong em, orait yumi inap i stap gut na oltaim laip bilong yumi bai i pulap long amamas, olsem wara i ran oltaim na i no save pinis. Na stretpela pasin bilong yumi bai i kamap strong oltaim olsem solwara i save bruk long nambis.’ (Aisaia 48:17, 18) God i singautim yumi long wokabaut wantaim em, na sapos yumi mekim olsem, bai yumi stap bel isi wantaim em inap oltaim oltaim.
Bai Yu Bekim Olsem Wanem?
◻ Bilong wanem em i gutpela samting tru long yumi inap wokabaut wantaim trupela God?
◻ Bilong wanem stadi, dediket, na baptais em ol samting yumi save mekim taim yumi kirap nupela long wokabaut wantaim God?
◻ Olsem wanem yumi ken bihainim lek bilong Jisas?
◻ Olsem wanem yumi save, Jehova bai strongim yumi taim yumi wokabaut wantaim em?
[Ol Piksa long pes 13]
Stadi, dediket, baptais, em ol samting yumi save mekim taim yumi kirap nupela long wokabaut wantaim God