Yu Save Soim Olsem Yu Tenkyu?
Long wanpela haus misineri long Wes afrika, i gat wanpela dok, nem bilong em Tedi. Taim man i tromoi abus i go long Tedi, wantu em i daunim—em i no pilim swit bilong en—em i kisim long maus na daunim tasol. San i hat na dok i pulim win hariap hariap na em i wetim sampela abus moa. Taim abus i pinis, em i baut na wokabaut i go.
I no gat wanpela taim Tedi i kamapim olsem em i tenkyu long samting em i kisim. Tasol i no gat man i wetim em long mekim olsem. Em i dok tasol.
TRU, yumi no wetim ol animal i tenkyu long yumi, tasol yumi laik bai ol man i mas mekim olsem. Tasol i no planti man i bihainim pasin bilong tenkyu long narapela. Planti man i wok long kisim olgeta samting ol inap kisim na planti samting moa antap long dispela. Yumi no ken kirap nogut long dispela samting. Baibel i tok profet olsem long taim bilong las de, bai ol man i no tenkyu.—2 Timoti 3:1, 2.
Tasol ol wokboi bilong God i gat narapela kain tingting. Ol i bihainim tok bilong aposel Pol, em i tokim ol wanbilip bilong em: “Yupela i mas tenkyu.”—Kolosi 3:15.
Jehova i Soim Olsem Em i Tenkyu
God Jehova em i nambawan gutpela piksa bilong pasin bilong soim olsem em i pilim tru ol samting narapela i mekim. Tingim tingting bilong em long ol gutpela wokboi bilong em. Pol i tokim ol Kristen Hibru: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet.”—Hibru 6:10.
Baibel i stori long planti man em Jehova i pilim tru ol samting ol i bin mekim. Em i mekim gut long Abraham long rot bilong mekim ol lain tumbuna pikinini bilong em i kamap planti tru “olsem ol sta bilong skai na olsem wesan bilong nambis.” (Stat 22:17) Jehova i pilim tru pasin bilong Jop long sanap strong long traim, olsem na em i kamapim bek ol mani kago bilong em, “dabolim olgeta samting em i bin i gat bipo.” (Jop 42:10) Ol samting Jehova i bin mekim long man long ol planti tausen yia i go pinis em i kamapim long ples klia olsem dispela tok em i tru: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”—2 Stori 16:9.
God i amamas long ol man i bihainim laik bilong em na em i laik mekim gut long ol—dispela em i wanpela bikpela pasin bilong em. Ol Kristen i mas bilip God i save mekim olsem. Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, . . . em i mas bilip olsem God i save mekim gut tru long ol man i wok long painim em.”—Hibru 11:6.
Sapos Jehova i no mekim olsem, na em i mekim hatpela pasin na wok long skelim skelim pasin bilong yumi, bai yumi no inap winim kot bilong em. Bipo tru, man bilong raitim Song i kamapim klia dispela samting olsem: “Sapos yu kaunim olgeta sin bilong mipela bai husat inap long winim kot bilong yu?” (Song 130:3) Jehova i save pilim tru ol samting yumi mekim, na em i no wok long skelim skelim pasin bilong yumi. Em i laikim tru ol man i mekim wok bilong em. Em i kamapim olsem em i amamas long yumi.
Jisas—Em Man Bilong Pilim Tru Samting Narapela i Mekim
Krais Jisas i bihainim stret ol pasin bilong Papa bilong em i stap long heven, na em i soim olsem em i tenkyu long samting ol man i bilip ol i mekim. Tingim samting i bin kamap long tempel long Jerusalem: “Jisas i lukluk i stap, na em i lukim ol maniman i kam putim ol ofa bilong ol i go daun long bokis mani bilong tempel. Na em i lukim wanpela rabismeri, man bilong en i dai pinis, em i tromoi tupela liklik mani i go long bokis. Na Jisas i tok, ‘Mi tok tru long yupela, dispela rabismeri, man bilong en i dai pinis, em i givim bikpela mani moa, i winim mani olgeta dispela lain manmeri i bin givim. Dispela olgeta manmeri ol i gat planti mani i stap, na ol i tromoi hap tasol i go long bokis. Tasol dispela meri em i sot tru, na em i tromoi olgeta mani em i holim bilong baim kaikai bilong en.’ ”—Luk 21:1-4.
Dispela mani em i liklik tru, na i liklik moa yet taim yumi skelim wantaim mani ol maniman i putim. Ating ol narapela i stap long dispela taim, ol i no lukim dispela rabismeri. Tasol Jisas i lukim em. Em i tingim i stap bilong em. Jisas i lukim dispela meri na em i pilim tru dispela gutpela samting em i mekim.
Orait nau yumi ken stori long narapela samting i bin kamap, em wanpela manimeri, Maria, i insait long en. Jisas i sindaun i stap long tebol na dispela meri i kisim sanda i gat bikpela pe tru long en na kapsaitim long lek na het bilong Jisas. Sampela i toktok planti long dispela samting em i mekim. Ol i tok sapos ol i bin larim ol man i baim dispela sanda, orait mani ol i kisim long en bai ol inap mekim wok long en bilong helpim ol rabisman. Jisas i tok wanem? Em i tok: “Yupela larim dispela meri. Watpo yupela i givim hevi long en? Em i bin mekim gutpela pasin tru long mi. Mi tok tru long yupela, long olgeta hap graun ol i go long en na autim gutnius, ol bai i toktok tu long samting dispela meri i bin mekim, na ol bai i tingting long em.”—Mak 14:3-6, 9; Jon 12:3.
Jisas i no krai na toktok planti olsem ol i no bin mekim narapela wok long dispela sanda i gat bikpela pe, nogat. Em i pilim tru dispela gutpela samting Maria i mekim, olsem Maria i kamapim klia olsem em i laikim tru Jisas na em i bilip long em. Stori bilong dispela i stap long Baibel bilong ol man i ken tingim dispela gutpela samting em i bin mekim. Dispela tupela stori na sampela moa i kamapim klia olsem Jisas em i man bilong pilim tru ol samting narapela i mekim.
Sapos yu wanpela wokboi bilong God, yu ken bilip olsem, God Jehova na Krais Jisas, tupela i pilim tru ol wok yu mekim bilong helpim lotu i tru. Dispela samting i pulim yumi long go klostu long ol na i kirapim yumi long bihainim pasin bilong ol na kamapim olsem yumi tenkyu long ol.
Satan i Skelim Pasin Bilong God
Orait nau yumi ken tingim stori bilong wanpela man i no save tenkyu—em Satan. Satan i no pilim ol gutpela samting God i bin mekim, na em i kirapim pasin bilong bikhet long God. Samting nogut i kamap long dispela.
Satan i wok long skelim skelim pasin bilong God, na bihain em i wok long kirapim ol narapela long kisim dispela pasin. Tingim ol samting i bin kamap long gaden Iden. Jehova i wokim pinis namba wan man na meri, na putim ol long gutpela gaden paradais, na em i bin tokim ol: “Yu ken kaikai pikinini bilong olgeta diwai bilong dispela gaden.” Tasol i gat wanpela samting ol i no ken mekim. God i tok: “Yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.”—Stat 2:16, 17.
Tasol bihain liklik, Satan i sutim tok long Jehova, olsem em i no man yumi ken bilip long em. Em i laik bai Iv i no pilim ol gutpela samting Jehova i save mekim; em i laik bai Iv i kirap na bikhet long Jehova, olsem Satan yet i bin mekim. Satan i askim em: “Ating God i tambuim yutupela long kaikai pikinini bilong olgeta diwai bilong gaden, a?” (Stat 3:1) Dispela tok i makim olsem God i pasim Iv long kisim wanpela gutpela samting em inap long opim ai bilong em na mekim em i kamap wankain olsem God yet. Iv i no soim olsem em i tenkyu long ol planti blesing Jehova i bin givim long em, na em i kirap na laikim samting i tambu.—Stat 3:5, 6.
Planti man i save long ol samting nogut i bin kamap long dispela. Tru, meri hia i kisim nem Iv, “long wanem, em i tumbuna mama bilong olgeta manmeri” i stap laip, tasol em i tumbuna mama tu bilong olgeta manmeri i save dai. Olgeta manmeri i bin kisim sin long Adam, na dispela sin i kamapim indai.—Stat 3:20; Rom 5:12.
Bihainim Pasin Bilong God na Krais
Tingim olsem wanem Satan na Jisas i narapela narapela kain. Baibel i stori long Satan olsem em “man bilong kotim ol brata bilong yumi, [na] em i bin kotim ol long ai bilong God bilong yumi long san na long nait.” (KTH 12:10) Jisas “oltaim em inap tru long kisim bek ol manmeri i kam klostu long God long nem bilong em, long wanem, em i stap laip oltaim, na em i save beten long God long helpim ol.”—Hibru 7:25.
Satan i save kotim ol wokboi bilong God. Jisas i pilim tru ol samting ol i mekim na em i beten long God i ken helpim ol. Ol Kristen i save bihainim pasin bilong Krais, olsem na ol i mas wok long painim ol gutpela pasin long narapela, na tingim gut na amamas long narapela. Long dispela rot ol i kamapim olsem ol i tenkyu long God Jehova, em dispela Man i makim nambawan rot long pasin bilong pilim tru samting narapela i mekim.—1 Korin 11:1.
[Piksa long pes 17]
Jisas i tokaut olsem em i pilim tru dispela gutpela samting Maria i mekim