Litimapim Nem Bilong Jehova
NANCY i tok: “Inap sampela mun nau mi no kisim amamas liklik long wok autim tok mi mekim—mi pilim olsem mi mekim wankain samting tasol long olgeta de.”a Inap 10-pela yia em i bin mekim wok painia, em wok bilong autim gutnius long olgeta de. Tasol em i tok: “Mi no amamas long dispela samting i painim mi. I olsem mi autim nating ol tok bilong Kingdom—mi no givim bel tumas long mekim. Bai mi mekim wanem?”
Tingim tu Keith, em wanpela elda long wanpela kongrigesen bilong ol Witnes Bilong Jehova. Em i kirap nogut taim meri bilong em i tok: “Ating yu wok long tingim narapela samting. Long beten nau tasol yu mekim, yu bin tok tenkyu long kaikai, tasol em i no taim bilong kaikai!” Keith i tok: “Em nau, mi lukim olsem taim mi beten, mi save beten nating.”
Yu no laik bai ol tok yu mekim bilong litimapim nem bilong God Jehova i kamap olsem samting yu mas mekim tasol, nogat. Yu laik kamapim ol tok i stap long bel bilong yu, em ol tok i makim olsem yu pilim tru ol gutpela samting God i bin mekim long yu. Tasol samting yu pilim long bel em i no wanpela samting yu inap pasim na rausim olsem wanpela laplap, nogat. Samting yu pilim em i mas stap insait tru long bel bilong yu. Olsem wanem bel bilong yumi inap kirapim yumi long tenkyu? Song 103 inap helpim yumi long dispela samting.
King Devit bilong Israel bilong bipo em i raitim Song 103. Em i kirapim dispela song olsem: “Mi mas litimapim nem bilong Bikpela. Yes, bodi na tingting na olgeta samting i stap insait long mi i mas litimapim gutpela nem bilong Bikpela.” (Song 103:1) Wanpela buk i stori long dispela tok “litimapim nem bilong Bikpela” na i tok, sampela taim, “dispela i makim olsem man i laikim tumas God na i tenkyu long em.” Devit i laik litimapim nem bilong Jehova, long wanem, em i laikim tru Em na tenkyu long Em, olsem na Devit i tokim bodi na tingting na olgeta samting i stap insait long em—olsem em yet—long “litimapim nem bilong Bikpela.” Tasol wanem samting i bin kirapim bel bilong Devit long laikim tru na tenkyu long dispela God em i lotu long em?
Devit i tok moa: “Mi no ken lusim tingting long ol gutpela samting [Jehova] i bin mekim long mi.” (Song 103:2) Olsem na man i tenkyu long Jehova em i mas tingim tingim na pilim tru “ol gutpela samting em i bin mekim.” Devit i tingim wanem ol samting Jehova i bin mekim? Sapos man i lukluk long ol samting God Jehova i bin wokim—olsem sapos long nait, taim ples antap i klin tru, em i lukim ol planti planti sta i pulap long skai—dispela inap kirapim em long tenkyu long Man bilong wokim ol dispela samting. Taim Devit i lukim ol gutpela gutpela sta long skai, em i pilim tru. (Song 8:3, 4; 19:1) Tasol long Song 103, Devit i tingim sampela narapela kain wok bilong Jehova.
Jehova “i Save Lusim Olgeta Sin Bilong Mi”
Long dispela song, Devit i stori long ol samting God i bin mekim bilong kamapim sori bilong em long yumi. Devit i toktok pinis long nambawan bikpela samting i go pas long ol dispela samting, olsem: “[Jehova] i save lusim olgeta sin bilong mi.” (Song 103:3) Devit i save pinis em i wanpela sinman. Taim profet Natan i tokaut pinis long pasin pamuk Devit i bin mekim wantaim Batseba, Devit i tok: “Mi mekim sin long yu [Jehova] . . . Mi mekim pasin nogut long ai bilong yu.” (Song 51:4) Devit i pilim tru rong bilong em na em i beten: “God, yu as bilong sori, yu ken marimari long mi. Yu gat bikpela marimari tru, olsem na mi laik yu rausim olgeta pasin nogut bilong mi. Yu wasim mi olgeta, na bai pasin nogut i no i stap moa long mi. Rausim sin bilong mi na mi ken kamap klin.” (Song 51:1, 2) Ating Devit i tenkyu tru taim God i rausim sin bilong em! Em i wanpela sinman bilong graun, olsem na em i mekim sampela rong moa, tasol olgeta taim em i save tanim bel, na kisim ol tok bilong stretim em, na stretim pasin bilong em. Devit i tingting long ol gutpela samting God i bin mekim long em na dispela i bin kirapim em long litimapim nem bilong Jehova.
Yumi tu i sinman, a? (Rom 5:12) Aposel Pol tu i tok: “Tru, long tingting bilong mi, mi laikim tumas lo bilong God. Tasol mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi. O sori, dispela hevi i bagarapim tru tingting bilong mi! Husat bai i helpim mi na mi lusim dispela bodi bilong i dai?” (Rom 7:22-24) Yumi ken tenkyu olsem Jehova i no wok long tingim tingim ol rong bilong yumi! Taim yumi tanim bel na askim em long lusim tingting long ol dispela rong, em i amamas long rausim.
Devit i tingim dispela samting: “[Jehova] i save mekim orait olgeta sik bilong mi.” (Song 103:3) Bilong yumi ken kamap orait gen, God i mas lusim tingting long ol rong yumi mekim na i gat narapela samting tu em i mekim. Em i mas pinisim “olgeta sik”—olsem ol samting nogut i bin kamap long rot bilong sin. Long nupela taim Jehova bai kamapim, em bai pinisim olgeta samting nogut i bin kamap long sin, olsem sik na dai. (Aisaia 25:8; KTH 21:1-4) Tasol long nau tu, God i wok long oraitim ol man i gat sik long ol samting bilong spirit. Sampela, bel bilong ol i kotim ol, na sampela, ol i no stap gut wantaim em. Yumi “no ken lusim tingting” long ol samting Jehova i mekim pinis bilong helpim yumi olgeta wan wan.
Em i “Kisim Bek Mi na Mi No i Dai”
Devit i tok: “Bikpela i bin kisim bek mi [long matmat—Siol, o Hades] na mi no i dai.” (Song 103:4) Taim Devit i no kamap king yet long Israel, Devit i save olsem bagarap na i dai inap painim em. Olsem: King bilong Israel, em Sol, em i bel nogut long Devit na em i laik kilim Devit i dai, na sampela taim em i bin mekim traim olsem. (1 Samuel 18:9-29; 19:10; 23:6-29) Ol Filistia tu i laik bai Devit i mas i dai. (1 Samuel 21:10-15) Tasol long olgeta taim, Jehova i kisim bek em long ‘matmat.’ Ating Devit i tenkyu tru taim em i tingting long ol dispela gutpela samting God i bin mekim long em!
Olsem wanem long yu yet? Taim bikpela bel hevi i kamap long yu o wanpela long famili i dai, Jehova i bin helpim yu long karim ol dispela hevi? O yu bin harim stori bilong sampela Witnes bilong em long taim bilong yumi, em i bin kisim bek ol long i dai? Ating yu bin pilim tru sampela stori yu bin kaunim long nius Wastaua i stori long Jehova i bin kisim bek sampela man. I gutpela sapos yu lusim hap taim bilong tingim na pilim tru ol dispela gutpela samting trupela God i bin mekim, a? Na i gat as na yumi olgeta i ken tenkyu long Jehova olsem em bai kirapim bek ol man i dai pinis.—Jon 5:28, 29; Aposel 24:15.
Jehova i givim laip long yumi, na ol samting bambai yumi ken amamas long i stap laip. Man bilong raitim Song i tok long God olsem “em i save marimari na sori moa yet long mi.” (Song 103:4) Taim yumi gat hevi, Jehova i no lusim yumi, nogat; em i helpim yumi long rot bilong oganaisesen bilong em long graun, na long rot bilong ol elda, o wasman, insait long kongrigesen. Ol dispela helpim i save inapim yumi long karim ol hevi na yumi no pilim olsem yumi samting nating. Ol wasman Kristen i tingim tru ol sipsip. Ol i wok long strongim ol man i sik na bel hevi na ol i mekim olgeta samting ol inap mekim bilong strongim bek ol man i bin pundaun. (Aisaia 32:1, 2; 1 Pita 5:2, 3; Jut 22, 23) Spirit bilong Jehova i kirapim ol dispela wasman long marimari na sori long lain sipsip. Jehova i save “marimari na sori moa yet” long yumi na dispela i givim biknem long yumi! Yumi no ken lusim tingting long ol samting em i bin mekim, na yumi mas litimapim nem holi bilong Jehova.
Man bilong raitim Song, em Devit, i stori moa olsem: “Olgeta taim mi stap long graun Bikpela i save givim ol gutpela samting long mi na inapim mi. Em i mekim olsem na mi kamap yangpela gen na mi stap strong olsem tarangau.” (Song 103:5) Ol samting Jehova i givim long yumi em inap helpim yumi long stap amamas na belgut. Yumi kisim save long tok i tru na dispela yet em i wanpela gutpela samting tru i winim olgeta narapela samting, na em inap givim bikpela amamas long yumi! Na tingim bikpela amamas yumi kisim long dispela wok Jehova i bin givim long yumi bilong autim tok na kamapim ol disaipel. Yumi amamas tru taim yumi painim wanpela man i gat laik long kisim save long trupela God na yumi helpim dispela man long kisim save long Jehova na litimapim nem bilong em! Tasol maski ol man long hap bilong yumi ol i harim tok o nogat, em gutpela samting tru yumi inap insait long wanpela wok bilong mekim holi nem bilong Jehova na kamapim klia olsem em i Nambawan Bos bilong heven na graun.
Yumi wok yet long autim tok bilong Kingdom bilong God, tasol sampela taim ating bun bilong yumi i slek, a? Tasol Jehova i wok long helpim ol wokman bilong em long kamap strong gen, na em i mekim ol i olsem “tarangau” i gat ol strongpela pul na ol inap flai i go antap tru. Yumi tenkyu olsem gutpela Papa bilong yumi long heven em i givim “strong” long yumi bambai yumi inap mekim yet wok bilong autim tok long olgeta wan wan de!—Aisaia 40:29-31.
Olsem: Clara i wok mani long olgeta de, na tu, em i save lusim 50 aua samting long olgeta mun long mekim wok autim tok. Em i tok: “Sampela taim skin bilong mi i les, tasol sapos mi bin stretim tok wantaim narapela long autim tok wantaim em, orait mi save taitim bun na mi go. Taim mi kamap pinis long teritori, long olgeta taim mi save kisim nupela strong.” Ating yu tu i bin kisim dispela strong em Jehova i save givim long yumi taim yumi mekim dispela wok Kristen. I gutpela sapos bel i kirapim yu long mekim tok olsem Devit i bin mekim long kirap bilong dispela song: “Mi mas litimapim nem bilong Bikpela. Yes, bodi na tingting na olgeta samting i stap insait long mi i mas litimapim gutpela nem bilong Bikpela.”
Jehova i Kisim Bek Lain Bilong Em
Man bilong raitim Song i tok tu olsem: “Bikpela i mekim stretpela wok bilong helpim ol manmeri taim ol i stap aninit long pasin nogut bilong ol arapela man. Na em i kirapim ol bek gen na ol i stap gut. Bipo em i tokim Moses long ol samting em i laik mekim. Na em i larim ol manmeri bilong Israel i lukim ol strongpela wok em i mekim.” (Song 103:6, 7) Ating Devit i tingting long “pasin nogut” ol Isip i bin mekim long ol Israel long taim bilong Moses. Taim Devit i tingim tingim ol samting Jehova i laik mekim bilong kisim bek ol Israel na em i tokim Moses long en, ating dispela i kirapim bel bilong Devit long tenkyu.
Sapos yumi tingting long ol samting God i bin mekim long ol Israel, dispela bai kirapim bel bilong yumi tu long tenkyu. Tasol yumi no ken lusim tingting long tingim ol samting i bin painim ol wokman bilong Jehova nau long taim bilong yumi, em stori bilong sampela i stap long sapta 29 na 30 long buk Jehovah’s Witnesses—Proclaimers of God’s Kingdom. Ol stori i stap long dispela buk na sampela buk moa bilong Sosaiti Was Taua i helpim yumi long tingim ol samting Jehova i bin mekim bilong helpim lain bilong em long nau long karim hevi na sanap strong long taim ol man i bin bung na pait long ol, na ol gavman i kalabusim ol, tambuim wok bilong ol, na putim ol long ol bikpela banis kalabus na ol i mas mekim wok olsem lain kalabus. Na sampela ol i bin karim bikpela hevi long ol kantri i gat bikpela pait i bin kamap long en, olsem Barundi, Laibiria, Ruanda, na kantri bipo ol i bin kolim Yugoslavia. Taim ol man i bin mekim pasin birua long ol gutpela wokman bilong God, olgeta taim Jehova i bin strongim ol. Sapos yumi wok long tingim ol dispela samting em bikpela God bilong yumi, Jehova, i bin mekim, dispela bai mekim wankain samting long yumi olsem pasin bilong tingim God i kisim bek lain bilong em long Isip i bin mekim long Devit.
Tingim tu gutpela pasin sori Jehova i save mekim bilong kisim bek yumi long ol hevi bilong sin yumi karim. Em i bin opim rot na bai “blut bilong Krais” i ken “pinisim asua bilong yumi na yumi save olsem yumi stap klin tru long ai bilong God.” (Hibru 9:14) Taim yumi mekim sin na yumi tanim bel na askim God long lusim ol rong bilong yumi long rot bilong blut bilong Krais i bin kapsait, God i save tekewe ol dispela rong na ol i stap longwe tumas—olsem ‘hap bilong sankamap i stap longwe tru long hap bilong san i go daun’—na em i orait gen long yumi. Na tingim ol gutpela samting Jehova i bin givim long yumi, olsem ol miting Kristen, ol brata sista yumi ken bung wantaim ol na ol i strongim yumi, ol wasman long kongrigesen, na ol buk em Baibel i as bilong en yumi kisim long rot bilong “wokboi i gat gutpela tingting.” (Matyu 24:45) Ol dispela samting Jehova i bin mekim, ol i helpim yumi long pas gut wantaim em, a? Devit i tok: “Bikpela i save sori moa yet long yumi na oltaim em i marimari long yumi. Em i no save belhat kwiktaim, na em i save laikim tru yumi. . . . Yumi inap kisim pe nogut bilong sin bilong yumi, tasol em i no save givim dispela pe nogut long yumi. Yumi bin mekim planti pasin nogut, na em inap bekim bikpela hevi long yumi tasol em i no save mekim olsem.” (Song 103:8-14) Pasin bilong tingim tingim gutpela pasin sori Jehova i save mekim long yumi bai kirapim yumi long givim biknem long em na litimapim nem holi bilong em.
‘Olgeta Samting Bikpela i Bin Wokim, Litimapim Nem Bilong Em’
Jehova i no inap i dai, em “God i save stap oltaim oltaim,” tasol “laip bilong yumi manmeri” i sotpela tru—“olsem gras.” Devit i tingim dispela samting na em i tok: “Bikpela i save marimari oltaim oltaim long ol manmeri i aninit long en. Na em i mekim gutpela pasin long ol lain tumbuna i kamap bihain tu. Na sapos ol i bihainim kontrak bilong Bikpela, na ol i bihainim olgeta lo bilong em, orait em i save kolim ol stretpela manmeri.” (Stat 21:33; Song 103:15-18) Jehova i no save lusim tingting long ol man i stap aninit long em. Na bihain, em bai givim laip i stap oltaim oltaim long ol.—Jon 3:16; 17:3.
Devit i tenkyu long Jehova i stap King na em i tok: “Bikpela i stap king long heven, na em i bos bilong olgeta samting.” (Song 103:19) Maski inap planti yia Jehova i bin mekim wok king long rot bilong kingdom bilong Israel hia long graun, sia king bilong em i stap long heven. Jehova em i Man bilong wokim olgeta samting, olsem na em i Nambawan Bos bilong heven na graun na ol samting em i laik mekim long heven na long graun em i mekim.
Devit i kirapim ol ensel long heven tu, olsem: “Yupela olgeta ensel bilong Bikpela, yupela i gat bikpela strong. Yupela i save bihainim tok bilong em, yupela i save putim yau gut long tok bilong en. Orait yupela i mas litimapim nem bilong Bikpela. Yupela ol wokman bilong Bikpela, yupela i stap long heven na i save bihainim laik bilong em, yupela litimapim nem bilong em. Yupela olgeta samting Bikpela i bin wokim, na i stap long olgeta hap, na em yet i stap king bilong yupela, litimapim nem bilong Bikpela. Na mi tu mi mas litimapim nem bilong em.” (Song 103:20-22) Taim yumi tingim ol pasin sori Jehova i mekim long yumi, dispela i mas kirapim yumi long litimapim nem bilong em, a? Na yumi ken bilip olsem taim yumi yet i litimapim nem bilong em, God bai harim, maski nek i bung wantaim planti narapela na ol gutpela ensel tu long mekim tok i litimapim nem bilong God. Yumi mas givim bel olgeta long litimapim nem bilong Papa bilong yumi long heven, na olgeta taim yumi mas mekim gutpela tok long em. Em nau, yumi mas tingim gut tok bilong Devit em i tok: “Mi mas litimapim nem bilong Bikpela.”
[Futnot]
a Mipela i senisim sampela nem.
[Piksa long pes 23]
Devit i tingim tingim ol pasin sori God i bin mekim. Yu tu yu save mekim olsem?