Bilong Wanem Yumi Mas i Gat Man Bilong Helpim Yumi?

“MI BIRUA long em na mi bin tok nogut long em,” em tok bilong wanpela man em bipo em i man bilong pasin antap na pait. Em i bin tok bilas long nem bilong Krais, na long pasin nogut tru em i bin pretim na bagarapim ol disaipel bilong Krais Jisas i aninit long God. Em i pilim tru dispela samting na em i tok: ‘Tasol em i sori long mi.’ Yumi kirap nogut, dispela man bilong mekim nogut tru long ol narapela, bihain em i kamap gutpela aposel Kristen Pol.​​—⁠1 Timoti 1:​12-​16; Aposel 9:​1-​19.

I no olgeta man i bin mekim kain pasin nogut olsem Pol i bin mekim. Tasol yumi olgeta i no inapim ol stretpela lo bilong God. Bilong wanem i olsem? Long wanem, “olgeta man i bin mekim sin, na olgeta i no inap i stap olsem piksa i soim biknem na strong bilong God.” (Rom 3:​23, NW) Na tu, em i no hatwok long yumi bel hevi tru, na yumi ting olsem yumi man nogut na God i no inap marimari long yumi. Taim Pol i bin tingim ol laik nogut i stap long skin bilong em, em i tok: “O sori, dispela hevi i bagarapim tru tingting bilong mi! Husat bai i helpim mi na mi lusim dispela bodi bilong i dai?” Em yet i bekim dispela askim na em i tok: “Mi tenkyu long God! Long han bilong Jisas Krais, Bikpela bilong yumi, em bai i helpim mi.”​—⁠Rom 7:​24, 25.

Olsem wanem stretpela Man bilong wokim yumi, em inap helpim ol man i gat sin? (Song 5:⁠4) Tingim tok bilong Pol, em i tok: “Mi tenkyu long God! Long han bilong Jisas Krais, Bikpela bilong yumi, em bai i helpim mi.” Narapela man em God i bin marimari long em, em i tok: “Sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta. Em yet i bin mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Em i mekim bilong helpim olgeta manmeri i stap long graun.”​—⁠1 Jon 2:​1, 2.

Bilong wanem ol i kolim Krais olsem ‘Helpim i stap wantaim Papa’? Na olsem wanem Jisas i “mekim wok bilong tekewe sin bilong yumi”?

Bilong Wanem i Mas i Gat Man Bilong Helpim Yumi?

Jisas i kam long graun “bilong givim laip bilong em bilong baim bek planti manmeri.” (Matyu 20:28) Dispela tok baim bek i makim pe bilong helpim wanpela man o wanpela samting long kamap fri. Long tok Hibru dispela tok “baim bek” i makim pasin bilong karamapim, o tekewe, ol sin. (Song 78:38) Long tok Grik, olsem long Matyu 20:​28, ol i mekim wok long dispela tok bilong makim pe ol birua i singaut long en bilong kisim bek ol man ol i bin holim long pait o bilong helpim ol wokman nating i kamap fri. Bilong inapim mak bilong stretpela pasin, ol i mas givim wanpela samting olsem senis bilong narapela samting i gat wankain pe.

Ol manmeri i kalabus long sin, long wanem, namba wan man i bikhet long God. Olsem Buk Stat sapta 3 i kamapim, long laik bilong em yet dispela man i gutpela olgeta​—⁠em Adam​—⁠em i bikhet long God Jehova. Taim em i mekim olsem, em i baim em yet na ol pikinini bilong em i no kamap yet, ol i go kalabus long sin na i dai. Olsem na long dispela rot Adam na ol pikinini bilong em ol i lus long kisim presen bilong i stap olsem man i gutpela olgeta.​​—⁠Rom 5:​12, 18, 19; 7:​14.

Long Israel bilong bipo, God i stretim rot bambai ol ofa bilong animal i ken tekewe o karamapim sin bilong ol manmeri. (Wok Pris 1:4; 4:​20, 35) Laip bilong wanpela animal ol i bin givim olsem ofa i olsem senis bilong laip bilong man i mekim sin. (Wok Pris 17:11) Olsem na “Bikpela De Bilong mekim ofa bilong Tekewe Sin Bilong Ol Manmeri” ol inap kolim tu olsem “de bilong baim bek man.”​​—⁠Wok Pris 23:​26-​28.

Ol animal i no gutpela olsem man, olsem na “blut bilong ol bulmakau man na bilong ol meme, em i no inap tru long tekewe sin [olgeta].” (Hibru 10:​1-4) Bilong ofa i gat strong long tekewe sin olgeta, pe bilong ofa i mas wankain long ol samting Adam i bin lusim. Bilong inapim stretpela lo, wanpela man i gutpela olgeta (Krais Jisas) em i mas givim laip bilong em olsem ofa bilong inapim samting narapela man i gutpela olgeta (Adam) em i bin lusim. Laip bilong wanpela man i gutpela olgeta, dispela samting tasol inap kamap olsem pe bilong kisim bek ol pikinini bilong Adam long kalabus em namba wan papa bilong ol i bin salim ol i go long en. Bilong inapim mak bilong stretpela lo, ol i mas givim laip olsem pe o bekim bilong laip.​—⁠Kisim Bek 21:​23-​25.

Taim Adam i mekim sin na Jehova i makim strafe bilong em, olsem em i mas i dai, em i no bin kamapim yet pikinini, olsem na taim ol i kamap ol tu i mas i dai. Jisas, em man i nambawan olgeta, em “narapela Adam i kamap bihain tru,” na long laik bilong em yet em i no kamapim wanpela famili tru. (1 Korin 15:45) Taim em i dai olsem man i nambawan olgeta, em i no bin kamapim yet sampela pikinini. Olsem na yumi ken tok ol pikinini em inap kamapim ol i dai wantaim em. Jisas i kisim famili bilong Adam i gat sin na i wok long i dai, i kamap olsem famili bilong em yet. Em inap tru long kamapim wanpela famili bilong em yet, tasol em i no mekim. Taim em i givim laip bilong em i nambawan olgeta olsem ofa, Jisas i baim bek olgeta manmeri i kamap long Adam bambai ol inap kamap olsem famili bilong Em, na dispela i mekim na em i kamap long ol olsem “Papa bilong i stap oltaim oltaim.”​​—⁠Aisaia 9:​6, 7.

Ofa bilong Jisas bilong baim bek ol man i opim rot long ol manmeri i bihainim tok bilong God long God i ken marimari long ol na ol inap kisim laip oltaim. Olsem na aposel Pol i tok: “Sin i save givim pe long ol wokboi bilong en. Dispela pe em dai tasol. Tasol God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.” (Rom 6:23) Yumi gat laik long litimapim nem bilong Jehova long gutpela pasin sori na marimari em i kamapim long rot bilong ofa bilong baim bek ol man, na dispela ofa em i bikpela pe tru em yet na Pikinini bilong em ol i givim. (Jon 3:16) Na yumi ken bilip tru olsem taim Jisas i kirap bek i go long heven na em i givim pe bilong dispela ofa long God, em i kamap olsem ‘Helpim i stap wantaim Papa.’a (Hibru 9:​11, 12, 24; 1 Pita 3:​18) Tasol olsem wanem Jisas i stap olsem helpim bilong yumi long heven long nau?

[Futnot]

[Piksa long pes 4]

Nambawan gutpela laip Jisas i bin givim olsem ofa i kamap olsem pe bilong baim bek ol pikinini bilong Adam