Pasin Daun—Dispela Pasin i Save Kamapim Bel Isi
Sindaun bilong yumi bai i gutpela tru sapos olgeta man i bihainim pasin daun. Bai ol man i no pul tumas long narapela, ol wan wan long famili i no kros tumas, ol bisnis i no resis tumas long winim narapela bisnis, na ol lain i no pait tumas. Olsem wanem? Yu gat laik long sindaun namel long kain man olsem?
OL WOKBOI tru bilong God Jehova ol i wok long redi long stap long nupela taim em i tok promis pinis long kamapim—long dispela taim olgeta man bai ting olsem pasin daun em i wanpela gutpela pasin na i makim ol man i gat bun; i no olsem mak bilong ol man i no gat bun, nogat. (2 Pita 3:13) Tasol long nau tu ol wokboi bilong God i wok long kisim pasin daun. Bilong wanem? Long wanem, em wanpela pasin Jehova i laik bai ol i mas kisim. Profet bilong em, Maika, i tok: “Bikpela i tokim yumi pinis long ol gutpela pasin, na em i laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol.”—Maika 6:8.
Man i gat pasin daun em i olsem: Em i no ting em i nambawan tru, na em i no hambak long save bilong em na long ol wok em i bin mekim na long ol kago samting bilong em. Na tu, olsem wanpela bikpela buk i tok, man i gat pasin daun em i save “stap insait long ol lo.” Man i gat pasin daun em i no save kalapim lo bilong gutpela pasin em i mas bihainim. Na tu, em i save olsem em i no inap long mekim olgeta samting na i gat sampela samting em i no ken mekim. Em i save i gat sampela samting i no stret long em i ken kisim. Yumi save laikim tru kain man olsem, a? Wanpela man bilong Inglan bilong raitim ol stori, Joseph Addison, em i tok: “Yumi save amamas tru long man i mekim pasin daun.”
Pasin daun i no wanpela pasin i stap long skin bilong yumi ol man bilong graun. Yumi mas wok strong long kisim dispela pasin. Bilong strongim bel bilong yumi, Tok Bilong God i stori long sampela samting i bin kamap em ol i kamapim ol narapela narapela rot bilong mekim pasin daun.
Tupela King i Gat Pasin Daun
Devit, em wanpela wokboi bilong Jehova i stap gut long em, em i yangpela man taim ol i makim em long kamap king bilong Israel long bihain. Man i holim wok king, em Sol, em i putim bikpela hevi long Devit—em i traim kilim Devit i dai na Devit i mas stap olsem wanpela ranaweman.—1 Samuel 16:1, 11-13; 19:9, 10; 26:2, 3.
Maski ol dispela hevi i painim em, Devit i save olsem taim em i wok long lukautim laip bilong em, i gat sampela samting em i no ken mekim. Wanpela taim long ples drai nating, Devit i pasim Abisai long kilim i dai King Sol em i slip i stap. Em i tok i no stret tru long ai bilong Jehova sapos em i “bagarapim dispela king [Jehova] i bin makim.” (1 Samuel 26:8-11) Devit i save em i no wok bilong em yet long rausim Sol long mekim wok king. Em nau, Devit i mekim pasin daun—em i no kalapim lo bilong stretpela pasin em i mas bihainim. Olsem tasol, ol wokboi bilong God long nau ol i save, long ai bilong Jehova, i gat sampela samting ol i no ken mekim, maski laip bilong ol inap lus.—Aposel 15:28, 29; 21:25.
Pikinini man bilong King Devit, em Solomon, taim em i yangpela em tu i mekim pasin daun, tasol long narapela kain samting liklik. Taim Solomon i kisim wok king, em i pilim olsem em i no inap mekim dispela bikpela wok. Em i beten: “O God, Bikpela bilong mi, yu bin larim mi i kisim ples bilong papa bilong mi, tasol mi manki nating na mi no save long wanem pasin mi mas mekim bilong bosim ol manmeri.” Solomon i save em i sot long save. Em i gat pasin daun; em i no ting em i nambawan tru. Solomon i askim Jehova long givim em gutpela tingting na save, na Jehova i givim long em.—1 King 3:4-12.
Mesaia na Man i Go Pas Long Em
Inap olsem 1,000 yia bihain long taim bilong Solomon, Jon Bilong Baptais i mekim wanpela wok i redim rot bilong Mesaia. Jon em man bilong go pas long dispela Man God i makim, olsem na em i truim tok profet long Baibel. Em inap tok hambak long dispela gutpela wok em i kisim. Na tu, em i wanblut bilong Mesaia, olsem na em i gat rot long kisim biknem sapos em i laik. Tasol Jon i no mekim olsem. Em i tokim ol man em i no gutpela man inap long em i ken lusim string i pasim su bilong Jisas. Na taim Jisas i kam long wara Jordan bilong kisim baptais, Jon i tok: “Mobeta mi kisim baptais long yu. Olsem wanem na yu kam long mi?” Dispela i makim olsem Jon i no man bilong hambak. Em i gat pasin daun.—Matyu 3:14; Malakai 4:5, 6; Luk 1:13-17; Jon 1:26, 27.
Taim Jisas i baptais pinis, em i kirap mekim wok bilong God long olgeta de—em i autim gutpela tok bilong Kingdom bilong God. Tasol maski Jisas i gutpela man olgeta, em i tok: “Mi no inap mekim wanpela samting long tingting bilong mi yet. . . . Mi no save bihainim laik bilong mi yet. Nogat. Mi bihainim laik bilong Papa, em i bin salim mi na mi kam.” Na tu, Jisas i no ting long kisim biknem long ol man, nogat; long olgeta samting em i mekim em i givim biknem long Jehova. (Jon 5:30, 41-44) Tru tumas, em i mekim gutpela pasin daun!
Em nau, yumi save ol wokboi bilong Jehova i stap gut long em—Devit, Solomon, Jon Bilong Baptais, na Krais Jisas tu—ol i mekim pasin daun. Ol i no tok hambak na ting ol yet i nambawan, nogat; ol i stap insait long ol stretpela lo. Ol i mekim pasin daun na long dispela as ol wokboi bilong Jehova long nau ol i mas kisim na kamapim dispela pasin. Tasol i gat sampela as moa na ol i mas mekim olsem.
Long dispela taim nogut yumi stap long en, pasin daun inap helpim gut ol Kristen tru. Dispela pasin inap helpim ol long stap bel isi wantaim God Jehova, na ol narapela, na ol yet.
Stap Bel Isi Wantaim God Jehova
Bilong stap bel isi wantaim Jehova, yumi mas bihainim ol lo em i makim bilong lotu tru long em. Tupela tumbuna bilong yumi bilong pastaim, Adam na Iv, ol i kalapim lo bilong God, na ol i namba wan man na meri i gat pasin antap. Dispela i mekim na ol i no stap gut moa wantaim Jehova, na ol i lusim gutpela ples sindaun bilong ol, na ol gutpela samting ol inap kisim long bihain, na laip bilong ol yet. (Stat 3:1-5, 16-19) Man! Ol i lusim planti gutpela samting!
Bilong lotu tru long God, i gat sampela samting yumi no ken mekim, olsem na stori bilong Adam na Iv i mas givim tingting long yumi. Olsem: Baibel i tok “Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, na ol stilman, na ol man i save mangal long ol samting bilong ol arapela man, na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God.” (1 Korin 6:9, 10) Long gutpela tingting Jehova i bin tambuim yumi long mekim ol dispela samting, long wanem, em i laik bai yumi stap gut, na yumi bihainim gutpela tingting taim yumi bihainim ol dispela lo. (Aisaia 48:17, 18) Sindaun 11:2 i tok: “Ol man i gat gutpela tingting i save daunim ol yet.”
Olsem wanem sapos wanpela lain lotu i tok yumi ken kalapim ol dispela lo na stap bel isi yet wantaim God? Sapos olsem, orait yumi save dispela lain i wok long giamanim yumi. Tasol pasin daun em inap helpim yumi long pas gut wantaim God Jehova.
Stap Bel Isi Wantaim Ol Narapela
Pasin daun i helpim yumi long stap bel isi wantaim ol narapela. Olsem: Taim ol papamama i kamapim olsem samting ol i kisim pinis em inap long ol, na ol i putim ol samting bilong spirit i go pas long ol narapela samting, ating ol pikinini bilong ol, ol tu bai mekim olsem. Ol bai amamas long ol samting ol i holim pinis, maski sampela taim ol i no kisim olgeta samting ol i laikim. Famili i no wok long kisim planti planti samting, olsem na bel isi i stap namel long ol.
Ol brata i gat wok long lukautim kongrigesen ol i mas was gut na bihainim pasin daun—nogut ol i mekim wok nogut long namba bilong ol. Pol i tokim ol Kristen: “Bihainim pasin i stret olsem buk bilong God i tok long en, na yupela i no ken kalapim dispela tok.” (1 Korin 4:6) Ol elda bilong kongrigesen ol i save ol i no ken strong long ol narapela i mas bihainim rot ol yet i laik bihainim long mekim ol samting. Bilong kirapim ol narapela long bihainim stretpela pasin long ol samting bilong klos, bilas, o amamas, ol i save mekim wok long Tok Bilong God. (2 Timoti 3:14-17) Taim ol lain bilong kongrigesen i lukim ol elda i bihainim ol lo bilong Baibel na ol i no kalapim, dispela i kirapim ol long daun long ol dispela man na i helpim kongrigesen long i stap wanbel na mekim gutpela pasin sori.
Stap Bel Isi Wantaim Yumi Yet
Ol man i bihainim pasin daun, bel bilong ol i save stap isi. Man i gat pasin daun em i no tingting strong long kisim namba. Tasol ating em i laik putim sampela mak em i ken winim. Olsem: Ating em i laik mekim sampela wok moa bilong God, tasol em i wet long God, na sapos em i kisim sampela wok Kristen moa, em i givim biknem long Jehova long dispela samting. Em i no ting em i bin kisim long strong bilong em yet. Dispela i helpim man i gat pasin daun long go klostu moa long Jehova, em i God i “as bilong pasin bilong bel isi.”—Filipai 4:9.
Olsem wanem sapos sampela taim yumi pilim olsem ol narapela i no tingim yumi? Nogut yumi bihainim pasin antap na kamapim dispela samting long ol narapela—mobeta yumi bihainim pasin daun na larim tasol, a? Ol man i bihainim pasin daun ol i no strong long kisim namba. Olsem na ol i stap bel isi wantaim ol yet, na dispela i helpim ol long stap gut long bel na long skin bilong ol.
Lain Long Kisim na Holimpas Pasin Daun
Adam na Iv i mekim pasin antap—em wanpela pasin ol i givim long ol pikinini bilong ol. Wanem samting inap helpim yumi long abrusim dispela rong tupela tumbuna bilong yumi bilong pastaim ol i mekim? Olsem wanem yumi inap kisim pasin daun?
Pastaim yumi mas kisim stretpela save long yumi yet na Jehova, em Man bilong wokim olgeta samting long heven na graun. I no gat wanpela samting yumi bin mekim i winim ol samting God i bin mekim, a? Jehova i givim askim long gutpela wokboi bilong em, Jop: “Taim mi wokim na strongim as bilong dispela graun, yu stap we? Sapos yu save gut long ol dispela samting, yu mas tokim mi.” (Jop 38:4) Jop i no inap bekim dispela askim. Yumi tu i sot long save, na i gat sampela samting yumi no inap long mekim. I gutpela sapos yumi tokaut olsem i gat sampela samting yumi sot long en, a?
Na tu, Baibel i tok: “Dispela graun wantaim olgeta samting i stap long en, em olgeta i bilong Bikpela tasol. Olgeta ples na olgeta manmeri bilong ples, ol tu i bilong em.” “Olgeta wel abus bilong bus na olgeta bulmakau i stap long olgeta maunten,” ol tu i bilong Jehova. Jehova inap tok: “Ol silva na gol i stap long olgeta kantri, em i bilong mi tasol.” (Song 24:1; 50:10; Hagai 2:8) I no gat wanpela samting yumi holim i wankain olsem ol samting Jehova i holim, a? Na man i maniman tru, winim olgeta narapela man, i no gat as na em i ken hambak na litimapim nem bilong em yet long ol samting em i holim! Olsem na sapos yumi gat gutpela tingting, bai yumi bihainim dispela tok aposel Pol i givim long ol Kristen long Rom: “Long marimari bilong en God i bin makim mi bilong mekim wok bilong en, olsem na mi laik givim dispela tok lukaut long yupela olgeta wan wan. Yupela i no ken ting save na pasin bilong yupela i winim ol arapela. Nogat.”—Rom 12:3.
Yumi ol wokboi bilong God i gat laik long kisim pasin daun, olsem na yumi mas beten askim God long helpim yumi long kisim ol gutpela pasin em spirit holi i kamapim—laikim tru ol narapela, amamas, stap bel isi, i no belhat kwik, helpim ol man, mekim gutpela pasin long ol, bilip, stap isi, na bosim skin. (Luk 11:13; Galesia 5:22, 23) Bilong wanem? Long wanem, olgeta wan wan bilong ol dispela pasin bai helpim yumi long mekim pasin daun. Olsem: Pasin bilong laikim ol narapela bai helpim yumi long daunim pasin bilong hambak na pasin bilong ting yumi nambawan tru. Na pasin bilong bosim skin bai helpim yumi long tingting gut pastaim—nogut yumi mekim pasin antap.
Yumi mas lukaut gut! Long olgeta taim yumi mas was gut, nogut yumi mekim pasin antap. Tupela bilong ol king yumi stori pinis long ol, i gat sampela taim na ol i no mekim pasin daun. King Devit i no tingting gut na em i kirap kwik na kaunim ol manmeri long Israel, em samting Jehova i no orait long en. King Solomon i kamap man i no mekim pasin daun na em i kirap lotuim ol god giaman.—2 Samuel 24:1-10; 1 King 11:1-13.
Pasin nogut bilong nau i stap yet, olsem na bilong mekim pasin daun, oltaim yumi mas was i stap. Tasol hatwok bilong yumi bai kamapim gutpela samting. Long nupela taim God bai kamapim, olgeta man bai bihainim pasin daun. Ol bai ting pasin daun i mak bilong ol man i gat bun, em i no mak bilong ol man i no gat bun. Man! Taim olgeta man na meri na ol famili i stap bel isi, long wanem, ol i save bihainim pasin daun, sindaun bilong yumi bai i gutpela tru!
[Piksa long pes 23]
Jisas i mekim pasin daun na givim biknem long Jehova long olgeta samting em i mekim