Askim

Aisaia sapta 53 i gat wanpela bikpela tok profet long Mesaia. Ves 10 i tok: “Bikpela yet i bin [“amamas long,” NW] daunim wokman bilong en na mekim em i karim pen.” Wanem insait bilong dispela tok?

Em i no hatwok long save bilong wanem wanpela askim inap kamap long dispela tok long Aisaia 53:10. Ol Kristen tru i no save ting olsem God bilong yumi i gat pasin sori na pasin isi em inap amamas long daunim o givim pen long wanpela man, a? Baibel i kamapim as na yumi ken bilip olsem God i no save amamas long givim pen long ol man i no gat asua. (Lo 32:4; Jeremaia 7:​30, 31) Long bipo yet na i kam inap nau, ating sampela taim Jehova i bin larim pen na hevi i kamap long ol man, na oltaim dispela i stret wantaim gutpela tingting na save bilong em na pasin bilong em long laikim tru ol narapela. Tasol yumi save, Jehova i no mekim na Jisas, em dispela Pikinini em i laikim tumas, i mas karim pen, nogat. Orait wanem insait bilong dispela ves?

Taim yumi kaunim dispela ves olgeta, dispela bai helpim yumi long kisim insait bilong dispela tok, na bai yumi lukim tupela tok olsem “amamas” na “i gat laik.” Aisaia 53:10 i tok: “Bikpela yet i bin [“amamas long,” NW] daunim wokman bilong en na mekim em i karim pen, long wanem, sapos wokman i givim laip bilong em yet olsem ofa bilong tekewe sin bilong ol manmeri, orait laip bilong en bai i go longpela tru na em bai i lukim ol tumbuna pikinini bilong en. Na long wok em i mekim, wokman bai i mekim ol samting Bikpela i gat laik bilong mekim, na em bai i mekim ol dispela samting i kamap gut.”

Bikpela tok Baibel i laik kamapim i olsem, dispela samting “Bikpela i gat laik bilong mekim,” olsem i stap long pinis bilong ves, em i tok long ol samting Jehova i laik mekim long rot bilong Kingdom. Taim Jehova i kamapim dispela laik bilong em, dispela bai kamapim long ples klia olsem Jehova i nambawan Bos, na sin yumi kisim long papamama em bai pinis long skin bilong ol manmeri i bihainim tok bilong God. (1 Stori 29:11; Song 83:18; Aposel 4:24; Hibru 2:​14, 15; 1 Jon 3:⁠8) Tasol bilong mekim dispela wok, Pikinini bilong God i mas kamap man na givim skin bilong em olsem ofa bilong baim bek ol man. Yumi save, taim Jisas i mekim olsem, em i kisim pen. Baibel i tok, “em i karim pen, na dispela i skulim em tru long pasin bilong bihainim tok bilong God.” Olsem na taim Jisas i karim pen, dispela i bin helpim em tu.​—⁠Hibru 5:​7-9.

Jisas i save pinis, em bai kisim pen long dispela rot em i laik bihainim. Dispela i kamap klia long tok bilong em i stap long Jon 12:​23, 24, em i tok: “Taim bilong Pikinini Bilong Man i laik kisim biknem, em i kamap pinis nau. Tru tumas mi tokim yupela, sapos pikinini wit i no pundaun long graun na i dai, orait em wanpela tasol bai i stap. Tasol sapos em i dai, orait em bai i kamap na karim planti kaikai.” Em nau, Jisas i save em i mas holimpas bilip bilong em i go inap long em i dai. Em i tok moa olsem: “ ‘Nau bel bilong mi i hevi na mi tingting planti. Na bai mi tok wanem? Ating bai mi tok, “Papa, yu ken tekewe dispela samting i laik kamap long mi nau”? Nogat. Mi no ken tok olsem. Dispela taim bilong hevi i mas kamap long mi. Long dispela as tasol mi kam. Papa, yu ken mekim nem bilong yu i kamap bikpela.’ Jisas i tok pinis na wanpela tok i kam daun long heven olsem, ‘Mi mekim nem bilong mi i kamap bikpela pinis, na bai mi mekim olsem gen.’ ”​—⁠Jon 12:​27, 28; Matyu 26:​38, 39.

Em nau, dispela tok i helpim yumi long kisim gut tok bilong Aisaia 53:10. Jehova i save pinis, taim Pikinini bilong em i wok long mekim ol samting em i mas mekim long graun, i olsem Jehova i mas daunim em. Tasol Jehova i tingim gutpela samting tru bai kamap long dispela wok, olsem na em i amamas long ol dispela samting i mas painim Jisas. Long dispela pasin i olsem Jehova ‘i amamas long daunim,’ o larim ol man i daunim, Mesaia. Na Jisas tu i amamas long ol samting em inap mekim na em i bin mekim tru. Tru tumas, olsem laspela tok bilong Aisaia 53:10 i tok, ‘wokman i mekim ol samting Bikpela i gat laik bilong mekim, na em i mekim ol dispela samting i kamap gut.’