‘Taim Bilong Mekim Olgeta Samting i Kamap Nupela Gen’ i Klostu Pinis!
Paslain liklik long taim Jisas i go long heven, sampela gutpela disaipel bilong em ol i askim em olsem: “Bikpela, ating nau long dispela taim bai yu mekim kantri Israel i kamap strong gen na i gat king i bosim em, o nogat?” Bekim bilong Jisas i kamapim klia olsem bikpela hap taim bai pinis pastaim na bihain Kingdom bai kamap. Insait long dispela hap taim, ol disaipel bilong em ol i gat bikpela wok bilong mekim. Ol bai autim tok bilong Jisas “long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.”—Aposel 1:6-8.
OL I no inap mekim dispela wok insait long sampela de, o wik, o mun tasol. Tasol wantu, ol disaipel i kirap mekim wok autim tok. Tasol ol i laik save yet long wok bilong God long mekim olgeta samting i kamap nupela gen. Aposel Pita i tok long dispela samting long wanpela bikpela lain manmeri i bung long Jerusalem. Em i tok: “Yupela i mas senisim tingting nogut bilong yupela, na tanim bel, na bai God i rausim ol sin bilong yupela. Sapos yupela i mekim olsem, orait Bikpela bai i givim nupela strong long yupela. Na em bai i salim dispela man em i makim bilong kisim bek ol manmeri bilong en, na em bai i kam long yupela. Dispela man God i makim bilong helpim yupela, em Jisas tasol. Nau em i mas i stap long heven na wetim dispela taim God i makim bilong mekim olgeta samting i kamap nupela gen, olsem bipo yet em i bin tok long maus bilong ol profet.”—Aposel 3:19-21.
Long dispela taim “bilong mekim olgeta samting i kamap nupela gen,” ol man bai kisim “nupela strong” i kam long Jehova. Wok bilong mekim olgeta samting i kamap nupela gen, em Baibel i tok profet long en, i gat tupela hap bilong en. Namba wan hap em olsem: Ol samting bilong spirit bai kamap gutpela gen, em dispela samting nau i wok long kamap. Na bihain long dispela, olsem namba tu hap, graun bai kamap gutpela ples Paradais.
Taim Bilong Mekim Olgeta Samting i Kamap Nupela Gen i Kirap
Aposel Pita i tokim dispela lain manmeri long Jerusalem olsem Jisas “i stap long heven.” Em i stap olsem i go inap long 1914, em long dispela taim Jisas i kisim strong bilong mekim wok king olsem King God i makim. Long dispela taim, olsem Pita i tok profet, Jehova bai “salim” Pikinini bilong em, olsem Em bai larim Jisas i mekim bikpela wok bilong em bilong kamapim laik bilong God. Baibel i mekim tok piksa bilong stori long dispela samting: “Na [oganaisesen bilong God long heven] i karim pikinini man, em pikinini God i makim [Kingdom bilong God long han bilong Jisas Krais] bilong holim stik ain na bosim strong olgeta lain manmeri.”—KTH 12:5.
Tasol ol lain man i no laik daun long wok king bilong Krais. Tru tumas, ol i birua long lain bilong Krais i stap long graun, nau ol i save kolim ol olsem ol Witnes Bilong Jehova. Olsem ol aposel bilong bipo, ol Witnes i mekim wok bilong “autim tok bilong Jisas.” (KTH 12:17) Pasin bilong birua long wok ol dispela gutpela Kristen i mekim i kamap long planti kantri. Long 1918, ol i putim long kot sampela brata i go pas long wok long hetkota bilong Sosaiti Was Taua long Bruklin, Nu Yok. Ol i sutim tok giaman long ol na kot i makim ol long kalabus inap longpela taim. Inap liklik taim i luk olsem wok bilong autim gutnius long nau “long olgeta hap bilong graun” bai i no kamap gutpela.—KTH 11:7-10.
Tasol ol dispela brata bilong hetkota i kalabus, ol i lusim kalabus long 1919, na bihain kot i tok ol i no bin mekim rong. Kwiktaim ol i kirap gen long mekim wok bilong spirit i kamap gutpela. Kirap long dispela taim, lain bilong Jehova i bin kisim planti gutpela samting bilong spirit.
Ol i kirap mekim bikpela wok long lainim ol manmeri bilong olgeta lain long bihainim ol tok Krais i bin tokim ol disaipel bilong em long mekim. (Matyu 28:20) Em i gutpela samting tru long lukim ol man, em bipo pasin bilong ol i olsem bilong animal, ol i senisim pasin na tingting bilong ol! Ol i lusim pasin bilong olpela bel, em dispela samting i save kamapim “pasin bilong kros na belhat,” na “tok nogut long ol arapela,” na “mekim toktok i doti,” na ol i kamap nupela man na long rot bilong “gutpela save” God ‘i mekim ol i kamap nupela.’ Tok bilong profet Aisaia i wok long kamap tru long nau long ol samting bilong spirit: “Ol weldok [ol man bipo i gat pasin olsem bilong weldok] na ol pikinini sipsip [ol man i gat pasin isi] bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim.”—Kolosi 3:8-10; Aisaia 11:6, 9.
Sampela Samting Moa Bai Kamap Nupela Gen!
Wok bilong mekim olgeta samting i kamap nupela gen i bin kamapim paradais bilong spirit long nau, na tu, klostu nau graun bilong yumi bai kamap wanpela paradais. Liklik hap bilong graun i bin stap olsem Paradais taim Jehova i bin putim tupela tumbuna bilong yumi, Adam na Iv, long gaden Iden. (Stat 1:29-31) Olsem na yumi ken tok Paradais bai kamap gen long graun. Tasol taim dispela samting i no kamap yet, ol lotu giaman i bagarapim nem bilong God ol i mas pinis pastaim. Ol lain politik bilong dispela graun bai pinisim ol. (KTH 17:15-18) Bihain long dispela, ol lain politik na wok bisnis wantaim ol lain i save helpim wok bilong ol, bai ol i bagarap. Na bihain, laspela birua bilong God—Satan na ol spirit nogut bilong em—ol bai kalabus inap wan tausen yia, em insait long dispela hap taim God bai mekim olgeta samting i kamap nupela. Long dispela taim, “ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap.” (Aisaia 35:1) Bai i no gat wanpela samting i bagarapim sindaun bilong ol man. (Aisaia 14:7) Planti milion manmeri i dai pinis, bai ol i kirap bek na kisim laip long graun. Ofa bilong Krais bai helpim olgeta man long kamap gutpela. (KTH 20:12-15; 22:1, 2) Bai i no gat ol aipas, o yaupas, o lek nogut. “Bai i no gat wanpela man i tok: ‘Mi gat sik.’ ” (Aisaia 33:24, NW ) Bihain liklik long Taim Bilong Wan Tausen Yia Bilong Krais i Stap King, Satan na ol spirit nogut bilong em bai lusim kalabus inap liklik taim na ol bai lukim olsem wanem God i bin kamapim laik bilong em long graun long dispela taim. Bihain, bai ol i bagarap na pinis olgeta.—KTH 20:1-3.
Taim dispela wan tausen yia bilong mekim olgeta samting i kamap nupela i pinis, “olgeta samting i gat laip” bai litimapim nem bilong Jehova, na ol bai mekim olsem inap oltaim oltaim. (Song 150:6) Olsem wanem? Yu bai stap wantaim dispela lain? Yu inap stap wantaim ol.