Tingting Bilong God Long Stretpela Pasin

“Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”​—⁠AISAIA 48:⁠17.

1, 2. (a) Planti man i gat wanem tingting long bihainim stretpela pasin bilong marit? (b) Ol Kristen i ting olsem wanem?

LONG nau, long planti hap bilong graun, ol man i ting em i samting bilong olgeta wan wan olsem ol i laik bihainim stretpela pasin o nogat. Ol man i ting sapos narapela i laikim narapela, i stret tupela i ken mekim maritpasin, na maritpasin i no samting bilong ol marit tasol, nogat. Ol i ting sapos i no gat man i kisim hevi long pasin ol i laik mekim, i no gat rong long ol yet i makim wanem kain pasin ol bai bihainim. Ol i ting narapela i no ken skelim narapela long pasin ol i mekim, na ol i no ken tru skelim ol long ol samting bilong mekim maritpasin.

² Ol man i kisim save pinis long Jehova ol i gat narapela tingting. Ol i amamas long bihainim tok bilong Baibel, long wanem, ol i laikim tumas Jehova na ol i laik mekim ol samting em i laikim. Ol i save Jehova i laikim ol, na ol tok em i givim long ol em bilong helpim ol gut tru na bai ol i stap amamas. (Aisaia 48:17) God em i as bilong laip, olsem na i stret ol man i mas bihainim ol tok em i givim bilong stiaim ol long ol samting ol i mekim long bodi bilong ol, olsem ol samting bilong maritpasin, em rot bilong kamapim pikinini.

Wanpela Presen God i Givim

3. Kristendom i bin lainim ol man olsem wanem long maritpasin? Tasol Baibel i tok wanem?

³ Tasol tok bilong sampela insait long Kristendom (ol lotu i holim nating nem Kristen) i narapela kain long tingting bilong ol man​—⁠ol dispela lotu i bin lainim ol man olsem maritpasin em i samting nogut, na i no stret, na namba wan sin ol i bin mekim long gaden Iden em taim Iv i grisim Adam long mekim maritpasin wantaim em. Dispela tok i no stret wantaim tok bilong Baibel. Baibel i tok long tupela olsem “man na meri bilong em.” (Stat 2:​25, NW ) God i tokim ol long kamapim pikinini, em i tok: “Yupela i mas kamap planti na i go sindaun long olgeta hap bilong graun.” (Stat 1:28) Em i no stret long God i tokim Adam na Iv long kamapim pikinini na bihain em i givim strafe long ol taim ol i bihainim tok bilong em.​—⁠Song 19:⁠8.

4. Bilong wanem God i givim strong long ol manmeri bilong mekim maritpasin?

⁴ Long dispela tok God i bin givim long papamama bilong yumi bilong pastaim tru, na em i givim long Noa na ol pikinini man bilong em, yumi kisim save olsem namba wan as bilong mekim maritpasin em bilong kamapim ol pikinini. (Stat 9:⁠1) Tasol olsem Baibel i kamapim, i no olsem ol wokboi bilong God i marit pinis ol i mas mekim maritpasin long taim ol i laik kamapim pikinini tasol, nogat. Maritpasin i save inapim laik bilong skin na bel na givim amamas long tupela marit. Em i rot bilong ol long kamapim bikpela pasin sori long poroman bilong ol.​—⁠Stat 26:​8, 9; Sindaun 5:​18, 19; 1 Korin 7:​3-5.

Ol Lo Bilong God

5. God i putim wanem tambu long mekim maritpasin?

⁵ Laik long mekim maritpasin em i wanpela presen i kam long God, tasol i gat lo i save bosim dispela pasin. Na insait long marit ol i mas bihainim as tingting bilong dispela lo. (Efesus 5:​28-30; 1 Pita 3:​1, 7) I tambu tru long mekim maritpasin sapos yu no marit yet. Baibel i tok klia tru long dispela samting. Lo God i bin givim long lain Israel i tok: “Yupela ol marit, yupela i no ken mekim pasin pamuk.” (Kisim Bek 20:14) Bihain, Jisas i bungim “pasin pamuk” na “pasin bilong pamuk wantaim ol marit” wantaim “ol tingting nogut” i save kamap long bel bilong man na mekim em i kamap doti. (Mak 7:​21, 22) Spirit holi i kirapim aposel Pol long tokim ol Kristen long Korin olsem: “Oltaim yupela i mas i stap longwe long pasin pamuk.” (1 Korin 6:18) Long pas em i raitim long ol Hibru, Pol i tok: “Marit em i gutpela samting tru, na yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i mekim ol kain kain pasin pamuk.”​—⁠Hibru 13:⁠4.

6. Long Baibel, wanem insait bilong dispela tok “pasin pamuk”?

⁶ Wanem insait bilong dispela tok “pasin pamuk”? Ol i kisim dispela tok long wanpela tok Grik ol i kolim por·neiʹa, na sampela taim ol i mekim wok long dispela tok bilong makim maritpasin namel long tupela i no marit yet. (1 Korin 6:⁠9) Long Matyu 5:32 na Matyu 19:​9, i gat bikpela insait moa bilong en na i makim pamuk wantaim ol marit, mekim maritpasin wantaim ol wanblut, na mekim pasin sem wantaim ol animal. I gat sampela narapela pasin sem namel long tupela i no marit yet, olsem pasin bilong putim sem long maus o as bilong narapela na pasin bilong pilai pilai long sem bilong narapela, ol tu i olsem pasin por·neiʹa. Baibel i tokaut klia o kamapim sampela tok i makim olsem olgeta dispela kain pasin i no stret.​—⁠Wok Pris 20:​10, 13, 15, 16; Rom 1:​24, 26, 27, 32.a

Ol Lo Bilong God Long Ol Stretpela Pasin Inap Helpim Yu

7. Taim yumi bihainim stretpela pasin dispela i save helpim yumi olsem wanem?

⁷ Sampela taim em i hatwok long ol sinman long bihainim ol lo bilong Jehova long ol samting bilong maritpasin. Wanpela saveman bilong lain Juda, em Maimonides (1135-1204) i tok: “No gat narapela lo long Tora [Lo Bilong Moses] i hatwok moa long bihainim olsem dispela lo i tambuim pasin bilong mekim maritpasin wantaim wanblut na ol narapela pasin pamuk.” Tasol sapos yumi bihainim tok bilong God, em bai helpim yumi tru. (Aisaia 48:18) Olsem: Taim yumi bihainim tok long ol dispela samting bai yumi no kisim ol sik bilong pamuk, em sampela kain sik olsem i no gat marasin bilong oraitim na ol inap kilim man i dai.b Na meri i no kisim bel nating. Na tu, taim yumi bihainim gutpela tingting bilong God, bai bel bilong yumi i no gat tok. Yumi mekim olsem na bai yumi amamas long yumi yet, na tu, ol narapela, olsem ol wanblut, na poroman marit, na ol pikinini, na ol brata sista Kristen bai amamas long yumi. Na tu, taim yumi bihainim tok bilong God bai yumi gat stretpela tingting long maritpasin na dispela bai helpim yumi long i stap amamas insait long marit bilong yumi. Wanpela meri Kristen i tok: “Tok i tru bilong Baibel i save lukautim yumi gut tru. Mi wet long marit, na taim mi marit pinis bai mi amamas long tokim man Kristen mi maritim olsem mi bin stap stret.”

8. Olsem wanem stretpela pasin bilong yumi inap helpim lotu i tru?

⁸ Taim yumi bihainim stretpela pasin, dispela inap daunim sampela tingting kranki bilong ol man long lotu i tru na kirapim ol long kam long dispela God yumi save lotuim. Aposel Pita i tok: “Yupela i mas wokabaut stret namel long ol haiden. Na sapos ol i tok nogut long yupela, bihain ol bai i lukim gutpela pasin bilong yupela, na ol bai i litimapim nem bilong God long dispela de em bai i kam bilong kotim ol manmeri.” (1 Pita 2:12) Maski ol man i no save lotuim Jehova ol i no laik luksave o orait long stretpela pasin yumi bihainim, yumi ken save Papa bilong yumi long heven i save lukim, na em i orait long en, na em i amamas long ol samting yumi mekim bilong bihainim tok bilong em.​—⁠Sindaun 27:11; Hibru 4:⁠13.

9. Bilong wanem yumi mas strong long bihainim tok God i givim bilong stiaim yumi, maski yumi no klia olgeta long as bilong en? Stori long dispela.

⁹ Taim yumi bilip long God yumi bilip olsem em i save long wanem samting inap helpim yumi tru, maski yumi no save gut long as bilong ol samting em i tokim yumi long mekim. Yumi ken tingim wanpela lo i stap long Lo Bilong Moses. Dispela lo i tok taim ol soldia i pekpek ol i mas go ausait long kem na wokim hul long graun bilong pekpek long en na bihain karamapim hul gen. (Lo 23:​13, 14) Ating ol Israel i no klia long as bilong dispela lo; ating sampela i ting i no gat as bilong en. Tasol nau ol dokta i save olsem dispela lo i lukautim ol, na wara i stap gutpela na ol i no kisim ol kain kain sik em ol binatang i save karim. Na olsem tasol, i gat kain kain as na God i tok ol manmeri i marit pinis ol tasol i ken mekim maritpasin, olsem: Ol bai stap gut long samting bilong spirit, na stap stret long ai bilong ol man, na bel bai stap isi, na skin wantaim tingting bai stap gut. Orait nau bai yumi tingim sampela stori bilong Baibel long sampela i bin stap stret.

Josep​​—⁠Em i Bihainim Stretpela Pasin na Kisim Blesing

10. Husat i singautim Josep long mekim pasin pamuk? Josep i mekim wanem?

¹⁰ Ating yu save pinis long stori bilong Josep, em pikinini man bilong Jekop. Taim em i gat 17 krismas em i stap wokboi nating bilong Potifar, em i kepten bilong ol soldia i save was long bikpela haus bilong king bilong Isip. Jehova i mekim gut long Josep na bihain Potifar i makim em bilong bosim olgeta samting bilong em. Taim Josep i gat 20 krismas samting, em “i gat strongpela bodi na em i luk nais tru.” Meri bilong Potifar i aigris long em na i laik grisim em long slip wantaim em. Josep i tokaut stret long tingting bilong em, em i tok sapos em i mekim dispela pasin i olsem em i mekim nogut long bosman bilong em, na tu em i “mekim sin long ai bilong God.” Bilong wanem Josep i gat dispela tingting?​—⁠Stat 39:​1-9.

11, 12. Long taim bilong Josep i no gat wanpela lo God i bin raitim i tambuim pasin pamuk na pasin bilong bagarapim marit, olsem na Josep i kisim dispela tingting olsem wanem?

¹¹ I no olsem Josep i pret long ol man bai painimaut samting em i mekim na dispela i as na em i gat dispela tingting. Nogat. Famili bilong Josep i stap longwe, na papa bilong em i ting Josep i dai pinis. Sapos em i mekim pasin pamuk, famili bilong em ol i no inap save. Na ating Potifar na ol wokboi bilong en ol i no inap save long dispela samting, long wanem, sampela taim ol i no save stap long haus. (Stat 39:11) Tasol Josep i save em i no inap haitim dispela kain pasin long God.

¹² Ating Josep i wok long tingting gut long ol pasin bilong Jehova em i save long en. Em i save long tok Jehova i bin mekim long gaden Iden olsem: “Man i save lusim papamama na i pas wantaim meri bilong en, na tupela i kamap wanpela bodi tasol.” (Stat 2:24) Na tu, ating Josep i save long tok Jehova i bin givim long wanpela king bilong Filistia i laik grisim Sara, em tumbuna bilong Josep, long slip wantaim em. Jehova i tokim dispela king olsem: “Dispela meri yu kisim, em i marit pinis. Olsem na bai yu dai. . . . Na mi yet mi bin pasim yu na yu no bin slip wantaim dispela meri na mekim sin long ai bilong mi.” (Stat 20:​3, 6) Tru, inap long dispela taim Jehova i no bin raitim wanpela lo long maritpasin, tasol tingting bilong em long marit em i klia. Stretpela tingting bilong Josep, wantaim laik bilong em long mekim ol samting Jehova i laikim, i kirapim em long sakim pasin pamuk.

13. Ating wanem samting i mekim na Josep i no inap abrusim meri bilong Potifar?

¹³ Tasol meri bilong Potifar em i strong tru long slip wantaim Josep na long “olgeta de” em i askim em long mekim olsem. Bilong wanem Josep i no wok long abrusim dispela meri? Long wanem, em i wanpela wokboi nating na em i gat wok em i mas mekim, na em i no inap senisim sindaun bilong em yet. Ol samting ol i painim pinis taim ol i digim graun long dispela hap i kamapim klia olsem insait long ol haus bilong Isip, taim man i laik i go long ol rum i olsem bakstua em i mas wokabaut insait long hap bilong haus ol man i save stap long en. Olsem na ating Josep i no inap abrusim meri bilong Potifar.​—⁠Stat 39:⁠10.

14. (a) Wanem samting i painim Josep taim em i ranawe pinis long meri bilong Potifar? (b) Josep i stap gut long Jehova, olsem na Jehova i bin mekim gut long em olsem wanem?

¹⁴ Wanpela de i kamap na tupela tasol i stap long haus. Meri bilong Potifar i laik holim Josep na em i singaut olsem: “Yu kam slip wantaim mi.” Josep em i ranawe. Meri bilong Potifar i bel nogut long Josep, long wanem, em i sakim em, olsem na em i sutim tok long Josep olsem em i traim long reipim em. Wanem samting i kamap? Yu ting wantu Jehova i mekim gut long Josep, long wanem, em i bin stap gut long em? Nogat. Ol i putim Josep long kalabus na pasim sen long lek bilong en. (Stat 39:​12-20; Song 105:18) Jehova i lukim dispela samting i no stret na bihain em i stretim rot bilong Josep i ken lusim kalabus, na i go sindaun long haus bilong king. Em i kamap nambatu bikman bilong Isip na em i maritim wanpela meri na ol i kamapim ol pikinini. (Stat 41:​14, 15, 39-45, 50-52) Na tu, 3,500 yia i go pinis ol i bin raitim stori bilong ol samting i painim Josep na pasin bilong em long i stap gut long God, na olgeta wokboi bilong God i bin kamap bihain ol inap skelim. Em i bin bihainim ol stretpela lo bilong God na em i kisim ol gutpela blesing tru! Em i wankain long nau, ating yumi no inap kisim gutpela samting wantu taim yumi bihainim stretpela pasin, tasol yumi ken save Jehova i lukim na em bai blesim yumi long taim stret.​—⁠2 Stori 16:⁠9.

Jop Em i Mekim “Strongpela Promis”

15. Wanem insait bilong dispela “strongpela promis” Jop i bin mekim?

¹⁵ Narapela man i bin stap gut long God, em Jop. Taim Jop i karim ol hevi Satan i putim long em, Jop i skelim ol samting em i bin mekim long laip bilong em na em i tok em i orait long kisim bikpela strafe sapos em i bin brukim lo bilong Jehova na mekim pasin pamuk samting. Jop i tok: “Mi bin mekim strongpela promis pinis olsem, mi no ken aigris long ol meri.” (Jop 31:⁠1) Em olsem Jop i laik tok em i gat strongpela tingting long i stap gut long God, olsem na em i mekim strongpela promis olsem em i no ken aigris long ol meri. Tru, em inap lukim ol meri taim em i raun long olgeta de na ating em bai helpim ol sapos ol i gat hevi. Tasol aigris na tingting long mekim maritpasin wantaim ol i tambu tru. Taim ol hevi i no painim em yet, em i stap olsem maniman, na “em i gat biknem i winim biknem bilong ol arapela man long ol kantri bilong hap sankamap.” (Jop 1:⁠3) Tasol em i no mekim wok long strong bilong mani bilong em long pulim planti meri. Em i klia tru, olsem em i no bin tingting liklik long mekim pasin pamuk wantaim ol yangpela meri.

16. (a) Bilong wanem Jop i stap olsem gutpela piksa ol Kristen i marit pinis ol i ken bihainim? (b) Olsem wanem pasin bilong ol man long taim bilong Malakai i narapela kain olgeta long pasin bilong Jop? Olsem wanem long pasin bilong ol man long nau?

¹⁶ Olsem na long gutpela taim na long taim nogut Jop i bin bihainim stretpela pasin. Jehova i lukim na em i mekim gut tru long em. (Jop 1:10; 42:12) Jop i stap olsem gutpela piksa tru ol Kristen i marit ol i ken bihainim! Tru tumas, i gat as na Jehova i laikim em tru! Tasol long nau pasin bilong planti manmeri i klostu wankain olsem pasin bilong ol manmeri long taim bilong Malakai. Profet Malakai i no orait liklik long pasin planti man marit i mekim long poroman marit bilong ol, olsem lusim ol na maritim ol yangpela meri. Ol dispela meri marit, man bilong ol i bin lusim ol, aiwara bilong ol i kapsait antap long alta bilong Jehova, na em i no laikim tru ol man i bin “mekim nogut” long poroman marit bilong ol.​—⁠Malakai 2:​13-16.

Yangpela Meri i Stap Stret

17. Olsem wanem yangpela meri Sulam i stap olsem ‘wanpela gaden i gat banis na man i no ken i go long en’?

¹⁷ Wanpela yangpela meri Sulam em tu i bin stap gut long Jehova. Em i yangpela na i gat naispela skin, na wanpela yangpela wasman bilong sipsip na maniman King Solomon bilong Israel ol i laikim em. Song Bilong Solomon i kamapim naispela stori bilong dispela yangpela meri bilong Sulam na olsem wanem em i bin stap stret, na long dispela as ol lain i save long em ol i tingim em olsem wanpela gutpela meri. Spirit bilong God i bin kirapim Solomon long raitim stori bilong dispela meri Sulam, maski meri i bin sakim em. Dispela wasman bilong sipsip em meri Sulam i laikim tumas, em i tingim tru pasin bilong meri Sulam long bihainim stretpela pasin. Em i tok meri Sulam i olsem “wanpela gaden i gat banis, na i no gat man i ken i go long en.” (Solomon 4:12) Long Israel long bipo ol gaden i gat kain kain sayor samting, na ol plaua i gat naispela smel, na ol bikpela diwai. Ol kain gaden olsem i gat banis i raunim, na bilong go insait i gat dua ol i save lokim. (Aisaia 5:⁠5) Long tingting bilong yangpela wasman bilong sipsip, stretpela pasin na naispela skin bilong yangpela meri Sulam i kain olsem wanpela naispela gaden. Em i stap stret olgeta. Dispela meri bai laikim tru na givim bel bilong em long man bihain em bai maritim, na ol narapela man, nogat.

18. Ol stori bilong Josep, Jop, na yangpela meri Sulam i kirapim yumi long tingim wanem samting?

¹⁸ Long bihainim stretpela pasin, yangpela meri Sulam i stap olsem gutpela piksa tru ol meri Kristen bilong nau i ken bihainim. Jehova i bin lukim na amamas long stretpela pasin bilong yangpela meri Sulam na em i mekim gut long dispela meri olsem em i bin mekim long Josep na Jop. Bilong stiaim yumi, stori bilong ol samting ol i bin mekim bilong i stap gut long God, em i stap long Baibel. Tru, ol samting yumi mekim bilong i stap gut long God ol i no inap raitim long Baibel, tasol Jehova i gat “wanpela buk” em i save raitim nem bilong ol man i wok long mekim laik bilong em. Yumi no ken lusim tingting olsem Jehova em i lukluk long ol samting yumi mekim na em i amamas long yumi wok strong long bihainim stretpela pasin.​—⁠Malakai 3:⁠16.

19. (a) Yumi mas i gat wanem tingting long bihainim stretpela pasin? (b) Stori i kamap bihain long dispela bai toktok long wanem samting?

¹⁹ Maski ol man i no bilip ol i tok bilas long yumi, yumi amamas long bihainim tok bilong Man bilong wokim yumi. Yumi bihainim ol stretpela pasin bilong marit i gutpela moa, em ol pasin bilong God. Em i samting bilong amamas long en, olsem wanpela gutpela samting tru. Taim yumi bihainim stretpela pasin, yumi inap amamas long God i mekim gut long yumi, na yumi inap bilip olsem bai yumi kisim ol gutpela blesing long olgeta taim bihain. Tasol yumi inap mekim wanem bilong bihainim stretpela pasin? Tok i kamap bihain bai stori long bekim bilong dispela bikpela askim.

[Ol Futnot]

Yu Inap Stori Long Dispela?

• Baibel i tok wanem long maritpasin?

• Long Baibel, wanem insait bilong dispela tok “pasin pamuk”?

• Taim yumi bihainim stretpela pasin dispela i save helpim yumi olsem wanem?

• Bilong wanem Josep, Jop, na yangpela meri Sulam ol i stap olsem gutpela piksa ol Kristen bilong nau i ken bihainim?

[Piksa long pes 9]

Josep em i ranawe long pasin pamuk

[Piksa long pes 10]

Yangpela meri Sulam i stap olsem ‘wanpela gaden i gat banis na man i no ken go long en’

[Piksa long pes 11]

Jop i bin mekim “strongpela promis”