Tok Long Kirap Bek Bilong Jisas i Sanap Long Kot
Asbisop bilong Kantaberi bilong Sios Bilong Inglan i tok: “Mi ken tok stret long yupela olsem yumi inap bilip long Jisas i bin stap tru . . . , tasol yumi no inap holim wankain bilip olsem na tok God i bin kirapim bek Em long matmat.”
APOSEL Pol i no bin holim tupela tingting long kirap bek bilong Jisas. Long sapta 15 bilong namba wan pas em i raitim long ol wanwok Kristen i stap long Korin bilong bipo, em i tok: “Bikpela tok tru mi bin givim long yupela, em dispela tok mi yet mi bin kisim bipo. Em i olsem. Krais i bin i dai bilong rausim olgeta sin bilong yumi, olsem tok i stap long buk bilong God. Na ol i putim em long matmat, na long de namba 3 em i kirap bek, olsem tok i stap long buk bilong God.”—1 Korin 15:3, 4.
Bilip long kirap bek bilong Jisas Krais i bin kirapim ol disaipel bilong em long autim gutnius long olgeta hap bilong ol Grik na ol Rom—“long olgeta manmeri i stap long graun.” (Kolosi 1:23) Kirap bek bilong Jisas i as tru bilong bilip Kristen.
Long pastaim yet, planti man i holim tupela tingting na ol i no bilip olsem Jisas i kirap bek pinis. Planti Juda i ting ol disaipel bilong Jisas i tok bilas long God taim ol i tokaut olsem dispela man ol i bin nilim long diwai em i dispela Man God i Makim. Na planti Grik em ol i bin skul gut ol i bilip long tewel i no save dai, olsem na ol i ting dispela tok bilong kirap bek i kranki tru.—Aposel 17:32-34.
Ol Man i Holim Tupela Tingting Long Nau
I no longtaim i go pinis na sampela saveman em ol i tok ol i Kristen ol i bin wokim ol buk na nius i tok kirap bek bilong Jisas i wanpela stori nating, na ol i bin kamapim bikpela tok pait long dispela samting. Sampela narapela saveman ol i laik save long “Jisas, dispela man i bin i stap tru long bipo,” ol i tok ol stori bilong Gutnius olsem matmat i stap nating na Jisas i kamap long ai bilong ol disaipel bilong em taim em i kirap bek pinis, em ol stori nating ol man yet i kamapim bihain tru long taim Jisas i dai pinis bilong helpim dispela tok olsem em i pikinini bilong God.
Olsem: Skelim tingting bilong wanpela saveman bilong Jemani, Gerd Lüdemann, em i wanpela profesa bilong Nupela Testamen na em i raitim buk What Really Happened to Jesus—A Historical Approach to the Resurrection. Em i tok, kirap bek bilong Jisas i “wanpela stori i no gat as bilong en” na man i holim “tingting bilong saiens long ol samting bilong graun” em i mas sakim dispela stori.
Profesa Lüdemann i tok, dispela stori bilong Krais i bin kamap long aposel Pita bihain long em i kirap bek pinis em i wanpela driman Pita i bin lukim, long wanem, em i wok long krai sori na bel bilong em i gat tok long em i tokaut olsem em i no save liklik long Jisas. Na Lüdemann i tok moa, as na winim 500 bilipman i bin lukim Jisas long wanpela taim em long wanem ol i gat “bikpela amamas tru.” (1 Korin 15:5, 6) Planti saveman i tok ol stori bilong Baibel long Jisas bihain long taim em i kirap bek pinis ol i kamap long tingting bilong ol disaipel yet na dispela i helpim ol long tingim ol wok bilong spirit ol inap mekim na wok strong long autim tok.
Planti man i no laik save long ol tok pait i kamap long ol stori. Tasol yumi olgeta i mas tingim stori bilong kirap bek bilong Jisas. Bilong wanem? Long wanem, sapos em i no bin kirap bek, dispela i makim olsem tok giaman i as bilong bilip Kristen. Tasol sapos i tru Jisas i bin kirap bek, orait dispela i makim olsem tok i tru i as bilong bilip Kristen. Ol dispela samting bai helpim yumi long bilip tru long ol tok bilong Krais na ol tok promis bilong em. Na tu, sapos i gat kirap bek, indai i no inap bagarapim yumi olgeta, nogat; em i wanpela birua yumi inap long winim.—1 Korin 15:55.
[Piksa Kredit Lain long pes 3]
From the Self-Pronouncing Edition of the Holy Bible, containing the King James and the Revised versions