Helpim Ol Meri Em Man Bilong Ol i Dai Pinis Long Karim Hevi Bilong Ol
WANPELA stori bilong ol meri wanpis em planti man i save long en, em stori bilong Baibel long Rut na tambu mama bilong em Naomi. Man bilong dispela tupela meri ol i dai pinis. Man bilong Naomi i dai, na i no dispela samting tasol i painim em, tupela pikinini man bilong em tu ol i dai, na wanpela bilong ol em man bilong Rut. Naomi na Rut i stap namel long lain bilong wokim gaden, ol man i save go pas long mekim ol bikpela wok, olsem na i stap bilong tupela i nogut.—Rut 1:1-5, 20, 21.
Tasol Naomi i gat wanpela gutpela pren na meri bilong mekim gut bel bilong em na em i no laik lusim Naomi—em tambu meri bilong em Rut. Rut i winim “7-pela pikinini man,” long wanem, Rut i laikim tru Naomi, na tu, em i laikim tru God. (Rut 4:15) Taim Naomi i tokim Rut long go bek long famili na ol pren bilong em long Moap, Rut i mekim wanpela gutpela tok tru i kamapim pasin bilong em long stap gut long Naomi. Em i tok: “Olgeta ples yu go long en, mi tu bai mi go long en. Olgeta ples yu stap long en, mi tu bai mi stap long en. Lain bilong yu bai i kamap lain bilong mi. Na God bilong yu bai i kamap God bilong mi. Ples yu dai long en, mi tu bai mi dai long en, na ol i ken planim mi long dispela ples. Mi no ken larim wanpela samting i brukim mitupela. Dai tasol i ken brukim mitupela. Tru antap, sapos mi no bihainim olgeta dispela tok nau mi mekim, orait God i ken mekim save tru long mi.”—Rut 1:16, 17.
God Jehova i tingim pasin bilong Rut. Em i blesim sindaun bilong Naomi na Rut, na bihain Rut i maritim Boas bilong lain Israel. Pikinini bilong ol i kamap wanpela tumbuna papa bilong Jisas Krais, na Naomi i lukautim gut dispela pikinini bilong ol, kain olsem em i lukautim pikinini bilong em yet. Dispela stori i kamapim klia pasin bilong Jehova long tingim tru ol meri wanpis i go klostu long em na bilip long em. Na tu, Baibel i tok Jehova i save tingim tru ol man i save helpim ol meri wanpis long karim hevi bilong ol. Orait, olsem wanem yumi inap helpim ol meri wanpis i stap namel long yumi long nau?—Rut 4:13, 16-22; Song 68:5.
Helpim Ol Tasol No Ken Bosim Ol
Taim yu laik helpim wanpela meri wanpis, kamapim klia ol samting yu laik mekim bilong helpim em, tasol yu no ken strong na bosim em. Na yu no ken tok olsem, “Sapos yu sot long wanpela samting, tokim mi long dispela samting.” I olsem yu tokim wanpela man i kol na hangre, “Yu go putim laplap bilong hatim skin bilong yu, na yu go kisim kaikai na pulapim bel bilong yu,” tasol yu no mekim wanpela samting bilong helpim em. (Jems 2:16) Planti man i no save askim narapela long helpim ol taim ol i sot long sampela samting, ol i stap isi tasol na karim hevi. Bilong yumi inap helpim ol kain man olsem, yumi mas i gat gutpela tingting na luksave long ol samting ol i sot long en. Tasol sapos yu go pas na kirap bosim i stap bilong meri wanpis, dispela inap bagarapim bel bilong em o kamapim hevi namel long yutupela. Olsem na Baibel i tok yumi mas bihainim stretpela tingting taim yumi mekim ol samting wantaim ol narapela. Baibel i kirapim yumi long tingim ol narapela man, tasol em i tok tu olsem yumi no ken bosim ol samting bilong ol.—Filipai 2:4; 1 Pita 4:15.
Rut i bihainim stretpela tingting olsem taim em i stap wantaim Naomi. Rut i stap gut long tambu mama bilong em, tasol em i no subim em long mekim ol samting o bosim em. Em i go pas long mekim ol gutpela samting, olsem painim kaikai bilong Naomi na bilong em yet, tasol em i bihainim tu tok bilong Naomi.—Rut 2:2, 22, 23; 3:1-6.
Tru, samting i stret bilong helpim wanpela man i no helpim narapela. Sandra, em pastaim yumi stori long em, em i tok: “Mi kisim ol samting i gutpela long helpim mi; em ol gutpela pren i kam na stap wantaim mi.” Tasol Elaine, em pastaim yumi stori long em, em i no olsem, em i laikim hap taim bilong em yet i stap wanpela. Olsem na taim yumi laik helpim narapela, yumi mas bihainim gutpela tingting na larim em i stap wanpis taim em i laik stap olsem, na redi long helpim em taim em i mas kisim helpim.
Famili i Mas Helpim Em
Sapos meri wanpis i gat famili, gutpela pasin sori bilong ol inap mekim bikpela samting bilong helpim meri wanpis long karim hevi bilong em. Ating sampela bilong famili inap mekim bikpela samting bilong helpim meri wanpis, winim ol narapela, tasol olgeta inap mekim sampela samting. Baibel i tok: “Sapos dispela meri i gat ol pikinini bilong em yet o ol tumbuna pikinini, orait yu mas helpim ol long save gut olsem, namba wan wok bilong ol long ai bilong God em wok bilong lukautim gut dispela mama bilong ol. Long dispela pasin ol i ken bekim olgeta hatwok bipo papamama bilong ol i bin mekim bilong helpim ol. God i laikim tumas dispela kain pasin.”—1 Timoti 5:4.
Ating planti taim ol narapela i mas givim mani samting bilong helpim meri wanpis. Wan wan meri wanpis tasol i gat mani bilong ol i ken lukautim ol yet, na sampela tasol inap kisim helpim long gavman. Olsem na taim meri wanpis i sot long sampela samting, famili i mas helpim em. Sapos wanpela meri wanpis i no gat famili bilong helpim em o ol i no inap helpim em, Baibel i kirapim ol wanlotu long helpim em: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol.”—Jems 1:27.
Ol man i bihainim ol dispela tok bilong Baibel, ol i givim biknem na “mekim gutpela pasin long” ol meri wanpis. (1 Timoti 5:3) Pasin bilong givim biknem long man i makim olsem yumi daun long em. Taim yumi givim biknem long ol man, ol bai pilim olsem yumi tingim ol, na laikim ol, na litimapim nem bilong ol. Ol bai i no inap ting ol narapela i helpim ol, long wanem, em i wanpela wok tasol ol i mas mekim. Maski Rut yet i bin stap wanpis, em i tingim tru Naomi na long gutpela pasin sori em i amamas long lukautim Naomi long ol samting bilong skin na mekim gut bel bilong em. Dispela gutpela pasin bilong Rut i mekim na em i kisim gutpela nem, na man em i laik maritim i tok olsem: “Olgeta manmeri long ples, ol i save olsem yu gutpela meri.” (Rut 3:11) Na tu, pasin bilong Naomi long laikim tru God, na bihainim pasin isi, na tingim tru pasin bilong Rut long helpim em, ol dispela samting i mekim na Rut i amamas long helpim em. Naomi i stap olsem gutpela piksa ol meri wanpis long nau ol i ken bihainim!
Go Klostu Long God
Tru, famili na ol pren i no inap pinisim olgeta bel hevi em indai bilong poroman marit i kamapim. Olsem na em i bikpela samting long meri wanpis i go klostu long “Papa bilong yumi, na em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi.” (2 Korin 1:3, 4) Tingim Ana, em i wanpela meri wanpis i givim bel long God, na em i gat 84 krismas taim mama i karim Jisas.
Ana i bin marit inap 7-pela yia tasol taim man bilong em i dai, na bilong daunim pasin bilong stap bel hevi, Ana i givim bel long ol wok bilong Jehova. “Ana i no save lusim tempel. Em i save tambu long kaikai na i beten i stap, na em i holim wok bilong God long san na long nait.” (Luk 2:36, 37) Olsem wanem? Jehova i tingim pasin bilong Ana long givim bel long em? Yes, em i tingim! Jehova i kamapim pasin sori bilong em long wanpela gutpela rot. Em i larim Ana i lukim dispela bebi em bihain em bai kamap Man bilong kisim bek ol manmeri. Dispela i amamasim na mekim gut bel bilong Ana! Samting i painim em i olsem Song 37:4 i tok long en: “Yu mas amamas long Bikpela, na em bai i givim yu ol samting yu laikim tru.”
God i Helpim Man Long Rot Bilong Ol Wanbilip
Elaine i tok: “Inap longpela taim bihain long David i dai, mi pilim pen, kain olsem naip i tanim insait long bel bilong mi. Mi ting mi gat sik long bel. Wanpela de pen i go bikpela tru na mi ting mi mas go lukim dokta. Wanpela sista bilong spirit, em pren i gat gutpela tingting, em i tok nogut bel hevi bilong mi i as bilong dispela pen, na em i kirapim mi long beten askim Jehova long helpim na mekim gut bel bilong mi. Wantu tasol mi bihainim tok bilong em, na long bel mi beten askim Jehova long strongim mi long karim hevi bilong mi. Na em i mekim olsem!” Isi isi Elaine i kirap pilim orait liklik, na bihain dispela pen tu i pinis.
Ol elda bilong kongrigesen inap mekim gutpela pasin pren long ol meri wanpis i bel hevi. Taim ol i bihainim gutpela tingting na strongim ol meri wanpis long samting bilong spirit na mekim gut bel bilong ol, ol elda inap helpim ol long pas gut wantaim Jehova maski ol i gat ol hevi. Sapos meri wanpis i sot long sampela samting long skin, ol elda i ken stretim rot bilong meri i ken kisim sampela helpim. Ol kain elda olsem i gat pasin sori na gutpela tingting, ol i “olsem ples hait ol manmeri i ken i go na hait long en long taim bilong bikpela win na ren.”—Aisaia 32:2; Aposel 6:1-3.
Nupela King Bilong Graun Bai Pinisim Bel Hevi
Dispela pikinini em lapun Ana i amamas long lukim inap 2 tausen yia i go pinis, em i kamap King bilong Kingdom bilong God long heven. Klostu nau dispela gavman bai pinisim olgeta samting i save kamapim bel hevi, olsem indai. Kamapim Tok Hait 21:3, 4 i stori long dispela samting olsem: “Harim. Nau haus bilong God i stap wantaim ol manmeri. . . . Em bai mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Yu lukim olsem ol dispela ves i tok long “manmeri”? Em nau, ol manmeri bai i no dai moa na kisim ol bikpela bel hevi indai i save kamapim.
Tasol i gat sampela gutpela samting moa! Baibel i tok promis olsem ol man i dai pinis ol bai kirap bek. “Taim i laik kamap na olgeta manmeri i stap long matmat ol bai i harim maus bilong [Jisas], na ol bai i lusim matmat na i kam ausait.” (Jon 5:28, 29) Olsem Lasarus em Jisas i bin kirapim long matmat, ol lain i kirap bek bai stap olsem man tru, ol bai no stap olsem ol spirit. (Jon 11:43, 44) Ol manmeri i “mekim gutpela pasin” bihain long ol i kirap bek, ol bai kamap gutpela olgeta na Jehova bai lukautim ol olsem papa bilong ol na givim ol “samting long olgeta inap long ol i stap gut.”—Song 145:16.
Ol manmeri em wanpela bilong famili bilong ol dai pinis, pasin bilong bilip tru long kirap bek i mekim gut bel bilong ol. (1 Tesalonaika 4:13) Olsem na sapos yu wanpela meri wanpis, yu mas “beten oltaim” bilong God i ken mekim gut bel bilong yu na helpim yu long karim kain kain hevi bilong yu. (1 Tesalonaika 5:17; 1 Pita 5:7) Na lusim sampela hap taim bilong ritim Baibel long olgeta de bilong ol tingting bilong God i ken mekim gut bel bilong yu. Sapos yu mekim ol dispela samting, bai yu yet i lukim pasin bilong Jehova long helpim yu long painim bel isi, maski yu gat ol hevi bilong meri em man bilong em i dai pinis.
[Rait long pes 5]
Bilong helpim narapela yu mas larim em i stap wanpis taim em i laik stap olsem, na redi long helpim em taim em i mas kisim helpim
[Piksa long pes 7]
God i blesim lapun Ana i stap wanpis