Sanap Strong na Bilip tru

‘Lukim! Bikpela Lain Manmeri!’

I GAT wanpela askim ol wokboi bilong Jehova i hatwok long save long bekim bilong en inap long planti yia. Inap longpela taim ol i bin skelim Baibel bilong painim bekim bilong dispela askim. Planti taim ol i toktok long dispela samting. Orait, bihain ol i painim bekim, na dispela bekim i givim bikpela amamas long ol manmeri i sindaun long wanpela kibung long Wosington, D. C., long 1935.

Wanpela askim tasol i as bilong ol dispela toktok, em i olsem: Husat dispela bikpela lain o “planti manmeri tru” em Kamapim Tok Hait 7:9 i stori long en? Ol dispela bilipman bai kisim laip long heven o nogat?

Wanpela Askim Bilong Bipo Yet

Kirap long taim bilong aposel Jon i kam inap long taim bilong yumi, ol Kristen i laik save dispela “planti manmeri tru” i makim husat. Ol Sumatin Bilong Baibel i bin i gat tingting olsem bikpela lain manmeri i makim nambatu lain bilong go long heven. Em lain i save long tok tru bilong Baibel, tasol ol i no gat strongpela tingting long autim tok long ol narapela.

Tasol i gat narapela lain man i poroman gut wantaim ol Kristen God i bin makim long spirit holi, na ol i givim bel tru long autim tok. Ol i no gat tingting liklik long go long heven. Ol gutpela samting ol i wet long kisim i olsem dispela pablik-tok “Planti Milion Man i Stap Nau Ol i No Ken i Dai,” i stori long en. Em wanpela tok lain bilong Jehova i kamapim long 1918 i go inap long 1922. Lain manmeri dispela tok i stori long en, ol bai kisim laip oltaim long graun.

Wastaua (tok Inglis) bilong Oktoba 15, 1923, i stori long tok piksa bilong Jisas long ol sipsip na meme na tok: “Ol sipsip i makim ol manmeri em spirit holi i no bin makim ol long go long heven, tasol ol i laikim stretpela pasin, na ol bilip olsem Jisas Krais em i Bikpela, na ol i wetim ol gutpela samting wok king bilong em bai kamapim.”​—⁠Matyu 25:​31-46.

Sampela Lait Moa i Kamap

Long 1931, wanpela buk (Vindication, Buk Wan) i stori long Esekiel sapta 9 na tok olsem ol man i kisim mak long pes bilong abrusim bagarap long taim bilong pinis, ol i makim ol sipsip bilong tok piksa bilong Jisas. Narapela buk ol i prinim long 1932 (Vindication, Buk Tri) i stori long stretpela pasin bilong wanpela man i no bilong lain Israel, em Jonadap. Jonadap i kalap long karis bilong Jehu, em king bilong Israel em God i bin makim, na Jonadap i lukim Jehu i givim bel long bagarapim ol man i bihainim lotu giaman. (2 King 10:​15-28) Buk i tok: “Jonadap i makim o em i piksa bilong wanpela lain manmeri i stap nau long graun na [ol] i no wanbel wantaim oganaisesen bilong Satan. Ol i kamapim klia olsem ol i laikim stretpela pasin, na Jisas bai lukautim ol na bai ol i abrusim bagarap long Armagedon, na Jisas bai helpim ol long taim bilong bikpela hevi na givim laip oltaim long ol long graun. Em ol lain ‘sipsip.’ ”

Long 1934, Wastaua i kamapim klia olsem ol Kristen i bilip long stap oltaim long graun, ol i mas dediket long Jehova na kisim baptais. Lait o nupela save long dispela lain bilong stap long graun i lait gut tru, winim long bipo!​—⁠Sindaun 4:⁠18.

Bikpela Lait Tru i Kamap

Long dispela taim stretpela save long tok bilong Kamapim Tok Hait 7:​9-17 i laik kamap klia tru. (Song 97:11) Wastaua i tok ol i laik bai kibung bilong Me 30 i go inap long Jun 3, 1935, long Wosington, D.C., U.S.A., i “mekim gut bel na helpim” ol lain em Jonadap i piksa bilong ol. Na tru tumas, dispela kibung i mekim olsem!

Tok “Bikpela Lain Manmeri,” i kirapim tru bel bilong 20,000 manmeri i stap long dispela kibung. Long dispela tok J. F. Rutherford i kamapim tok bilong Baibel i soim olsem ol lain bilong nau i makim “ol arapela sipsip,” ol i makim tu dispela “planti manmeri tru” long Kamapim Tok Hait 7:⁠9. (Jon 10:16) Taim em i laik pinisim dispela tok, em i kamapim askim olsem: “Olgeta manmeri i bilip olsem ol i bilong stap oltaim long graun, plis inap yupela i sanap?” Taim bikpela hap bilong ol lain i stap long dispela kibung i sanap, Rutherford i tok: “Lukim! Bikpela lain manmeri!” Pastaim ol man i no mekim wanpela toktok, tasol bihain liklik ol i singaut na amamas. Long de bihain, 840 nupela Witnes Bilong Jehova i kisim baptais, bikpela hap bilong ol i bilong dispela bikpela lain manmeri.

Ol i Bikpela Lain Tru

Paslain long 1935, i gat wanpela lain i wok long go bikpela, em ol man i amamas long harim tok bilong Baibel, na ol i givim bel long autim tok na ol i laik stap oltaim long paradais long graun. Ol i no gat tingting long go long heven, long wanem, God i no givim dispela tingting long ol. Taim dispela lain i kamapim klia ol i insait long dispela bikpela lain manmeri bilong ol arapela sipsip, dispela i makim olsem wok bilong God long makim 144,000 Kristen long spirit holi i pinis long 1935.​—⁠KTH 7:⁠4.

Taim Namba Tu Pait i kirap, Satan i wok strong tru long pasim wok bilong bungim ol manmeri i bilong bikpela lain. Planti kantri i putim sampela tambu long wok bilong autim tok long Kingdom. Long dispela taim bilong hevi na paslain liklik long em i dai long 1942, J. F. Rutherford i tok: “I luk olsem bikpela lain manmeri bai i no bikpela tumas olsem mipela tingim pastaim.”

Tasol blesing bilong God i mekim na dispela lain i go bikpela. Ol lain God i bin makim wantaim ol lain sipsip i poromanim ol, ol i “sanap strong na bilip tru,” na inapim wok bilong kamapim ol disaipel. (Kolosi 4:​12, NW; Matyu 24:14; 28:​19, 20) Long 1946 i gat 176,456 Witnes Bilong Jehova i wok long autim tok​—⁠planti bilong ol i bilong ol bikpela lain. Long yia 2000, i winim 6,000,000 Witnes i givim bel long wok bilong Jehova long 235 kantri​—⁠em wanpela bikpela lain manmeri tru! Na dispela namba i wok yet long i go bikpela.