Tok Bilong God i Helpim Man Long Makim Poroman Marit

“Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.”​—⁠SONG 32:⁠8.

1. I mas i gat wanem ol samting bilong marit i ken kamap gutpela?

OL MAN i kirap paitim kundu. Wanpela meri i save gut long singsing i bungim nek wantaim pairap bilong ol kundu. Dispela i kamapim musik i gutpela tru long harim. Tupela man i rausim ol hevipela katon long wanpela bikpela trak. Wanpela i tromoi katon i go long poroman bilong em, na em i no hatwok long kisim katon na i wet long kisim narapela. I luk olsem i no hatwok liklik long mekim dispela tupela samting. Tasol i no gat wanpela man bai traim mekim ol dispela samting sapos em i no mekim traim pastaim, o em i no gat poroman i save gut long mekim dispela wok, o i no gat man bilong lainim em gut. Na olsem tasol, taim marit i wok gut, ating i luk olsem dispela samting i kamap nating tasol. Tasol bilong marit i ken kamap gutpela, man i mas i gat gutpela poroman, na tupela i mas wok gut wantaim, na kisim gutpela tok bilong stiaim ol. Tru tumas, em i bikpela samting long kisim gutpela tok bilong stiaim marit.

2. (a) Husat i kamapim marit? Em i maritim tupela bilong mekim wanem? (b) Ol man i bin stretim marit bilong sampela long wanem kain rot?

² Em pasin bilong yangpela man o meri singel long tingting long kisim poroman marit​—⁠olsem poroman bilong stap wantaim inap longpela taim. Kirap long taim God Jehova i bin kamapim marit, em pasin bilong ol man na meri long marit. Tasol namba wan man, Adam, em i no makim poroman marit bilong em. Jehova i mekim gutpela pasin sori na i givim meri long em. (Stat 2:​18-24) Jehova i laik bai tupela i kamapim ol pikinini bambai ol manmeri i ken pulap long graun. Bihain long dispela namba wan marit, papamama bilong planti man na meri i makim poroman na stretim marit bilong ol; sampela papamama i mekim olsem taim yangpela man na meri ol i orait long dispela. (Stat 21:21; 24:​2-4, 58; 38:6; Josua 15:​16, 17) Long nau tu long sampela kantri em pasin bilong ples bilong ol man long papamama i makim poroman marit, tasol planti man long nau i save makim poroman marit bilong ol yet.

3. Man i mas tingim wanem samting taim em i makim poroman marit?

³ Man o meri i mas makim poroman marit bilong em olsem wanem? Sampela ol i save tingim naispela skin​—⁠samting ol i ting i gutpela long lukim. Sampela ol i laik kisim mani kago, ol i laik painim poroman em inap lukautim ol gut na baim ol samting ol i laik kisim. Tasol yu ting dispela tupela samting tasol inap mekim na tupela bai stap amamas na belgut wantaim? Sindaun 31:30 i tok: “Wanpela meri inap givim switpela tok long yumi, tasol pasin bilong en i narakain. Na maski meri i luk nais tru, em i no inap i stap olsem oltaim. Mobeta yumi litimapim nem bilong meri i save aninit long Bikpela.” Dispela ves i kamapim wanpela bikpela samting: Tingim Jehova taim yu makim poroman marit.

God i Givim Gutpela Tok Bilong Stiaim Yumi

4. God i givim wanem samting bilong helpim man long makim poroman marit?

⁴ Gutpela Papa bilong yumi long heven, Jehova, em i bin givim Tok bilong em bilong stiaim yumi long olgeta samting. Em i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” (Aisaia 48:17) Olsem na yumi no kirap nogut long lukim ol gutpela tok bilong Baibel em inap longtaim pinis ol i bin helpim ol man long makim poroman marit. Jehova i laik bai marit bilong yumi i stap longtaim na yumi kisim amamas insait long en. Olsem na em i bin givim ol samting bilong helpim yumi long save gut long ol dispela tok na bihainim. Em i gutpela Man bilong wokim yumi, olsem na i stret em i helpim yumi olsem, a?​—⁠Song 19:⁠8.

5. Wanem samting i bikpela samting bilong helpim ol marit long stap amamas oltaim?

⁵ Taim Jehova i kamapim marit, em i laik bai tupela i stap wantaim inap oltaim. (Mak 10:​6-12; 1 Korin 7:​10, 11) Olsem na em i “no laikim tru pasin bilong brukim marit.” Sapos wanpela i mekim “pasin pamuk,” long dispela as tasol God i orait long tupela marit i ken katim marit. (Malakai 2:​13-16; Matyu 19:⁠9) Olsem na wok bilong makim poroman marit em i wanpela bikpela samting tru yumi mekim, na yumi no ken ting em i liklik samting tasol. Taim man i tingting long marit dispela em i wanpela bikpela samting tru em i tingting long mekim, long wanem, marit inap kamapim bikpela amamas o bel hevi. Sapos man i maritim gutpela poroman, dispela inap mekim na i stap bilong em i kamap gutpela moa na em i stap belgut, tasol sapos em i maritim poroman nogut, dispela inap kamapim ol hevi i no gat pinis bilong en. (Sindaun 21:19; 26:21) Bilong marit i ken stap amamas oltaim, em i bikpela samting long bihainim gutpela tingting taim yu makim poroman na redi long stap wantaim em inap oltaim, long wanem, taim God i kamapim marit, em i laik bai tupela i wanbel na wok gut wantaim.​—⁠Matyu 19:⁠6.

6. Bilong wanem ol yangpela man na meri i mas was gut taim ol i makim poroman marit? Olsem wanem ol i ken bihainim gutpela tingting na makim poroman marit?

⁶ Em i bikpela samting long ol yangpela man na meri i mas was gut, nogut gutpela skin bilong narapela na ol laik bilong skin i paulim tingting bilong ol taim ol i laik makim poroman marit. Tru tumas, sapos ol dispela samting tasol i as bilong marit, kwiktaim pasin bilong tingting nogut o pasin bilong nolaik tru long narapela inap kamap. (2 Samuel 13:15) Tasol yumi inap lain long laikim tru poroman bilong yumi inap oltaim, taim yumi wok long save gut long em na long yumi yet tu. Yumi mas save tu olsem ol samting i gutpela bilong helpim yumi, ating em i no ol samting em pastaim bel i gat laik long kisim. (Jeremaia 17:⁠9) Olsem na tok bilong God long Baibel bilong stiaim yumi i bikpela samting tru. Baibel i helpim yumi long save long pasin bilong skelim na makim gut ol samting yumi laik mekim. Man bilong raitim Song i kamapim tingting bilong Jehova na i tok: “Bikpela i tok olsem, ‘Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.’ ” (Song 32:8; Hibru 4:12) Marit i ken inapim laik bilong yumi long stap wantaim poroman i save laikim yumi tru, tasol marit i gat ol hevi bilong en tu, na bilong winim ol dispela hevi ol marit i mas i gat pasin bilong man i bikpela pinis na gutpela tingting.

7. Bilong wanem sampela ol i no harim gutpela tok bilong Baibel long ol samting bilong makim poroman marit? Pasin bilong sakim tok inap kamapim wanem samting?

⁷ Em i savepasin long bihainim tok em Man bilong kamapim marit i mekim long ol samting bilong makim poroman marit. Tasol ating yumi sakim tok em papamama o ol elda Kristen i givim long yumi, em Baibel i as bilong dispela tok. Yumi inap ting ol i no pilim tru tingting bilong yumi, na ol strongpela laik bilong bel bilong yumi inap kirapim yumi long bihainim ol dispela laik. Tasol bihain, taim ol hevi bilong wan wan de i kamap, yumi inap bel hevi long yumi no bin bihainim gutpela tok narapela i bin givim bilong helpim yumi. (Sindaun 23:19; 28:26) Ating marit bilong yumi bai i no gat pasin bilong laikim tru poroman, na yumi hatwok long lukautim ol pikinini, na ating poroman marit bilong yumi i no bilip. Sori tru sapos samting bilong givim bikpela amamas long man i kamap samting bilong givim bikpela bel hevi!

Pasin Bilong Givim Bel Long God—⁠Em Bikpela Samting

8. Olsem wanem pasin bilong givim bel long God i helpim marit long stap gut na kamapim amamas?

⁸ Tru, taim bel bilong tupela wantaim i kirapim ol long laikim tru narapela narapela, dispela i strongim marit. Tasol taim tupela i gat wankain tingting long ol bikpela samting, dispela i bikpela samting moa bilong helpim marit long stap gut na kamapim amamas. Pasin bilong tupela wantaim long givim bel long God Jehova i mekim na tupela bai pas gut na stap wanbel wantaim, i no gat narapela samting inap helpim ol long stap gut olsem. (Saveman 4:12) Taim tupela marit Kristen i givim bel long trupela lotu bilong Jehova, ol i save stap wanbel long ol samting bilong spirit, na tingting, na stretpela pasin. Ol i stadi wantaim long Tok Bilong God. Ol i beten wantaim, na dispela i mekim na ol i stap wanbel. Ol i go wantaim long ol miting Kristen na mekim wok autim tok wantaim. Olgeta dispela samting i helpim ol long pas gut long ol samting bilong spirit, na dispela i helpim ol long pas gut wantaim. Na bikpela samting moa, Jehova bai blesim tupela.

9. Abraham i mekim wanem bilong painim poroman marit bilong Aisak? Wanem samting i kamap?

⁹ Bilipman Abraham i givim bel long God, olsem na taim em i mas painim poroman marit bilong pikinini man bilong em Aisak, Abraham i laik mekim ol samting God i orait long en. Abraham i tokim gutpela wokboi bilong em olsem: “Yu mas promis long nem bilong God, Bikpela bilong heven na graun, olsem, bai yu no makim wanpela meri bilong pikinini bilong mi namel long ol meri bilong Kenan, dispela graun mi stap long en. Yu mas go bek long as ples bilong mi na painim wanpela meri namel long ol lain bilong mi yet, na bringim em i kam, bai em i ken maritim pikinini bilong mi, Aisak. . . . Bikpela bai i salim ensel bilong en i go pas long yu long as ples bilong mi, olsem na bai yu inap kisim meri bilong pikinini bilong mi.” Rebeka em i gutpela meri tru na Aisak i laikim em tumas.​—⁠Stat 24:​3, 4, 7, 14-21, 67.

10. Baibel i tok ol man na meri marit i mas mekim wanem?

¹⁰ Sapos yumi ol Kristen i singel, pasin bilong givim bel long God inap helpim yumi long kamapim ol pasin i helpim yumi long inapim ol lo bilong Baibel long ol samting bilong marit. Aposel Pol i kolim sampela lo em man marit na meri marit i mas bihainim: ‘Yupela meri, yupela i mas aninit long ol man bilong yupela, olsem yupela i save aninit long Bikpela. Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios. Yupela man, yupela i mas laikim tru ol meri bilong yupela, olsem yupela i save laikim bodi bilong yupela yet. Yupela man wan wan yupela i mas laikim tru meri bilong yupela, olsem yupela i save laikim yupela yet. Na meri i mas i stap aninit long man bilong en na mekim gutpela pasin long em.’ (Efesus 5:​22-33) Olsem yumi inap lukim, tok bilong Pol i kamapim klia olsem em i bikpela samting long laikim tru narapela na rispektim em. Bilong bihainim dispela tok yumi mas daun na pret long Jehova. Ol marit i mas tingting strong long stap gut wantaim poroman long gutpela taim na long taim nogut. Ol Kristen i tingting long marit, ol i mas inap long mekim olsem.

Skelim Wanem Taim i Gutpela Long Marit

11. (a) Baibel i tok i gutpela long man i marit long wanem taim? (b) Wanem stori i kamapim klia olsem em i savepasin long bihainim tok bilong Baibel i stap long 1 Korin 7:⁠36?

¹¹ Em i bikpela samting long save long wanem taim yumi redi long marit. Baibel i no tok man i mas i gat hamas krismas na em inap long marit, long wanem, yumi ol man i narapela narapela kain. Tasol Baibel i tok em i gutpela long abrusim taim em ‘laik bilong skin i strong tumas,’ em taim laik bilong mekim maritpasin i kamap strong na dispela inap paulim gutpela tingting. (1 Korin 7:36) Michelle i tok: “Sampela taim i hatwok long bihainim dispela tok taim mi lukim ol pren bilong mi ol i raun wantaim boipren na gelpren na ol i marit, na planti bilong ol i gat 17 krismas samting. Tasol mi tingim olsem dispela tok i kam long Jehova, na em i save tokim yumi long mekim ol samting i save helpim yumi. Taim mi wet na mi no marit hariap, mi inap wok long pas gut wantaim Jehova na lain long planti samting, em ol samting man i no inap kisim save long en taim em i gat 17 krismas samting. Sampela yia bihain, mi gat save long mekim ol wok na karim ol hevi i save kamap insait long marit.”

12. Bilong wanem em i no savepasin long marit taim yu yangpela yet?

¹² Ol man i hariap long marit taim ol i yangpela yet, planti taim laik bilong ol bai senis taim ol i wok long kamap bikpela moa. Ol bai kisim save olsem ol samting ol i bin laikim long bipo i no bikpela samting moa. Wanpela yangpela Kristen i tingting strong long em bai marit taim em i gat 16 krismas. Bubu meri bilong em i bin marit taim em i gat 16 krismas, na mama bilong em tu i bin mekim olsem. Dispela yangpela meri i gat laik long wanpela yangpela man, tasol man i no laik maritim em long dispela taim, olsem na dispela yangpela meri i maritim narapela man i gat laik long maritim em. Tasol bihain meri i bel hevi tru long em i bin marit hariap.

13. Ol man i marit taim ol i yangpela yet planti bilong ol i sot long wanem ol samting?

¹³ Taim yu tingting long marit, em i bikpela samting long kisim gutpela tingting long ol samting bilong marit. Taim tupela i marit taim ol i yangpela yet, planti hevi inap painim tupela em ol i no redi long karim. Ating ol i no gat save na gutpela tingting long karim ol hevi bilong marit na ol hevi bilong wok bilong mekim bikpela long ol pikinini. Yumi mas marit taim yumi redi pinis long skin, na tingting, na ol samting bilong spirit long stap gut wantaim poroman.

14. Man i mas i gat wanem samting na bai em i ken stretim ol hevi bilong marit?

¹⁴ Pol i tok ol man i marit ol “bai i painim planti hevi long laip bilong ol.” (1 Korin 7:28) Ol hevi bai kamap, long wanem, pasin bilong tupela i narapela narapela, na ol i no gat wankain tingting long ol samting. Yumi gat sin, olsem na ating i hatwok long mekim ol samting Baibel i tokim ol marit long mekim. (1 Korin 11:3; Kolosi 3:​18, 19; Taitus 2:​4, 5; 1 Pita 3:​1, 2, 7) Man i mas i gat tingting bilong man i bikpela pinis na stap strong long ol samting bilong spirit bambai bel i ken kirapim em long painim na bihainim tok bilong God bilong stretim ol hevi long gutpela pasin sori.

15. Papamama i ken mekim wanem bilong redim pikinini bilong ol long ol samting bilong marit? Stori long dispela.

¹⁵ Bilong redim ol pikinini long ol samting bilong marit, papamama i mas helpim ol long save olsem em i bikpela samting long bihainim tok bilong God. Ol papamama i ken mekim gutpela wok long Baibel na ol buk na nius Kristen bilong helpim pikinini bilong ol long save olsem, ol yet o poroman ol i laik maritim i redi long marit o nogat.a Blossom i gat 18 krismas, em i ting em i laikim tru wanpela yangpela man long kongrigesen bilong em. Em i wanpela painia, na tupela i gat laik long marit. Tasol papamama bilong Blossom i tokim em long wet inap wanpela yia, long wanem, ol i ting em i yangpela tumas long marit. Bihain Blossom i tok: “Mi amamas tru long mi bin harim dispela gutpela tok. Insait long wanpela yia, mi wok long kisim tingting bilong man i bikpela pinis, na mi lukim olsem dispela yangpela man i no gat ol pasin bilong gutpela poroman marit. Bihain em i lusim oganaisesen, na mi abrusim wanpela samting em inap bagarapim tru i stap bilong mi. Mi amamas tru long papamama bilong mi ol i gat gutpela tingting na mi inap bilip long tok bilong ol!”

“Maritim Man i Bilip Long Bikpela”

16. (a) Olsem wanem pasin bilong “maritim man i bilip long Bikpela” inap putim traim long Kristen? (b) Taim Kristen i laik maritim man i no bilip, em i mas tingting long wanem samting?

¹⁶ Tok Jehova i givim long ol Kristen i klia tru: “Maritim man i bilip long Bikpela.” (1 Korin 7:39) Dispela tok inap putim traim long ol papamama Kristen na pikinini bilong ol. Olsem wanem dispela inap traim ol? Ating ol yangpela i gat laik long marit, tasol insait long kongrigesen i no gat poroman ol inap maritim, o i luk olsem i no gat poroman bilong maritim. Long sampela hap namba bilong ol meri singel i winim namba bilong ol man singel, o i no gat poroman i gutpela long maritim. Ating wanpela yangpela man long kongrigesen i no dediket pinis em i gat laik long wanpela yangpela meri Kristen (o wanpela meri i gat laik long man Kristen), na ating dispela meri na papamama bilong em ol i no tingting strong long bihainim lo bilong Jehova. Long kain taim olsem em i gutpela long tingim pasin bilong Abraham. Wanpela samting Abraham i mekim bilong stap gut long God i olsem: Em i stretim ol samting bilong pikinini bilong em Aisak i ken maritim meri i lotu tru long Jehova. Aisak i mekim wankain samting long pikinini man bilong em Jekop. Olgeta dispela man i bin taitim bun bilong mekim olsem, tasol Jehova i amamas long ol na em i blesim ol.​—⁠Stat 28:​1-4.

17. Sapos Kristen i maritim man i no bilip, bilong wanem dispela inap kamapim ol samting nogut? Wanem samting em i nambawan bikpela as bilong “maritim man i bilip long Bikpela”?

¹⁷ Wan wan taim poroman marit i no bilip, em i kamap Kristen. Tasol ol Kristen i maritim poroman i no bilip, marit bilong planti lain olsem i kamapim planti samting nogut. Ol man o meri i pas wantaim man i no bilip, ol i no gat wankain bilip, na ol i no bihainim wankain lo, na ol i no putim wankain mak bilong winim. (2 Korin 6:14) Dispela inap mekim na tupela i no toktok gut wantaim na stap amamas. Olsem: Wanpela meri Kristen i bel hevi tru, long wanem, taim em i lusim miting na i go bek long haus, em i no inap toktok wantaim man i no wanbilip long ol samting bilong spirit. Tasol bikpela samting moa i olsem: Bilong stap gut long Jehova, yumi mas “maritim man i bilip long Bikpela.” Taim yumi bihainim Tok Bilong God, bel bilong yumi i no kotim yumi, long wanem, yumi mekim “pasin em i laikim.”​—⁠1 Jon 3:​21, 22.

18. Taim wanpela i tingting long marit, em i mas tingim wanem ol bikpela samting? Bilong wanem em i mas mekim olsem?

¹⁸ Taim wanpela i tingting long marit, nambawan samting em i mas tingting long en i olsem: Poroman em i laik maritim i save bihainim stretpela pasin na tingim ol samting bilong spirit o nogat. Ol gutpela pasin Kristen, na pasin bilong laikim tru God na givim bel long em, dispela i bikpela samting tru, winim gutpela skin. God bai orait long ol man i tingim na mekim ol samting ol i mas mekim bilong kamap poroman marit i stap strong long ol samting bilong spirit. Na nambawan gutpela samting bilong strongim tupela long stap gut wantaim, em pasin bilong tupela wantaim long givim bel long God na larim em i stiaim ol. Dispela bai litimapim nem bilong Jehova, na kirap bilong marit i gat strongpela as bilong en na dispela bai helpim marit long stap gut inap oltaim.

[Futnot]

Bai Yu Bekim Olsem Wanem?

• Bilong wanem tok bilong God i mas stiaim man taim em i laik painim gutpela poroman marit?

• Olsem wanem pasin bilong givim bel long God i helpim tupela long pas gut wantaim?

• Papamama i ken mekim wanem bilong redim pikinini bilong ol long ol samting bilong marit?

• Bilong wanem em i bikpela samting long “maritim man i bilip long Bikpela”?

[Ol Piksa long pes 17]

Bihainim tok bilong God taim yu laik makim poroman marit, dispela inap kamapim bikpela amamas

[Ol Piksa long pes 18]

Kristen i “maritim man i bilip long Bikpela” bai kisim planti blesing