Kamapim Famili i Stap Strong Long Ol Samting Bilong Spirit
“Stretim gut ol pikinini bilong yupela na skulim ol long tok bilong Bikpela.”—EFESUS 6:4.
1. God i laik bai ol famili i stap olsem wanem? Tasol wanem samting i kamap?
“YUPELA i mas kamap planti na i go sindaun long olgeta hap bilong graun.” (Stat 1:28) Taim God Jehova i mekim dispela tok long Adam tupela Iv, em i kamapim pasin bilong i stap olsem famili. (Efesus 3:14, 15) Dispela namba wan man na meri inap tingting olsem bihain ol pikinini bilong ol bai pulap long dispela graun—em ol wanblut bilong ol i gutpela olgeta na i stap amamas long Paradais na wanbel long lotuim Man bilong wokim ol. Tasol Adam tupela Iv i mekim sin, na ol man i pulap long dispela graun ol i no daun long God na bihainim stretpela pasin. (Rom 5:12) I no longtaim na i stap bilong ol famili i bagarap, na pasin birua na pait i kamap na i no gat pasin sori insait long famili—ol dispela pasin i strong moa nau long taim bilong “las de.”—2 Timoti 3:1-5; Stat 4:8, 23; 6:5, 11, 12.
2. Ol pikinini bilong Adam inap mekim wanem ol samting? Tasol ol i mas mekim wanem bilong kamapim famili i stap strong long ol samting bilong spirit?
2 God i wokim Adam tupela Iv i kamap olsem em yet. Maski Adam i kamap sinman, Jehova i larim em long kamapim ol pikinini. (Stat 1:27; 5:1-4) Olsem papa bilong ol, ol pikinini bilong Adam ol inap pilim wanem pasin i gutpela na lain long skelim wanem pasin i stret na wanem pasin i no stret. Ol inap lain long pasin bilong lotuim Man bilong wokim ol na save olsem em i bikpela samting long ol i laikim God long bel, tingting, na strong olgeta bilong ol. (Mak 12:30; Jon 4:24; Jems 1:27) Na tu, ol inap lain long ‘bihainim stretpela pasin, na laikim tru ol arapela man, na daunim tingting bilong ol yet na i stap wanbel wantaim God.’ (Maika 6:8) Tasol ol i gat sin, olsem na ol i mas tingim moa yet dispela ol samting bambai ol inap kamapim famili i stap strong long ol samting bilong spirit.
Makim Hap Taim Bilong Helpim Ol
3. Olsem wanem ol papamama i ken makim hap “taim” bilong helpim ol pikinini long kamap Kristen?
3 Long dispela taim bilong planti hevi tru, ol papamama i mas wok strong bambai ol pikinini i ken “laikim tru” Jehova na nolaik tru long “pasin nogut.” (Song 97:10) Ol papamama i gat gutpela tingting ol bai makim hap “taim” bilong mekim dispela wok. (Efesus 5:15-17) Sapos yu wanpela papa o mama, yu inap mekim dispela olsem wanem? Pastaim yu mas skelim gut “wanem ol samting i bikpela samting tru,” olsem wok bilong skulim ol pikinini bilong yu. (Filipai 1:10, 11, NW ) Namba tu, lusim sampela samting long sindaun bilong yu. Ating yu mas lusim sampela wok samting em ol i no bikpela samting tumas. O ating yu mas rausim sampela kago samting em yu save lusim bikpela hap taim bilong lukautim. Yu papa o mama Kristen, bai yu no bel hevi long yu bin wok strong long helpim ol pikinini long kamap bikpela na stap aninit long God.—Sindaun 29:15, 17.
4. Wanem samting inap helpim famili long stap wanbel wantaim?
4 Pasin bilong lusim hap taim wantaim ol pikinini bilong yu na mekim ol samting bilong spirit, dispela em i gutpela wok tru na wanpela gutpela rot bilong helpim famili long stap wanbel wantaim. Tasol yu no ken mekim dispela samting long wan wan taim tasol. Yu mas makim taim stret bilong stap wantaim ol pikinini. Tasol i no olsem yupela i stap long wankain haus tasol, na olgeta wan wan i mekim ol samting bilong em yet, nogat. Ol pikinini i save stap gut tru taim papamama i mekim sampela samting wantaim ol long olgeta wan wan de. Ol papamama i mas mekim planti samting bilong kamapim klia olsem ol i laikim na tingim tru ol pikinini. Paslain long tupela marit i laik kamapim ol pikinini, ol i mas tingim gut dispela bikpela wok. (Luk 14:28) Sapos ol i mekim olsem, ol bai no ting wok bilong mekim bikpela long ol pikinini em i wanpela wok ol i mas mekim tasol. Ol bai ting em i wanpela gutpela wok tru.—Stat 33:5; Song 127:3.
Lainim Ol Long Rot Bilong Tok na Pasin Bilong Yu
5. (a) Bilong lainim ol pikinini long laikim tru Jehova, papamama yet i mas mekim wanem? (b) Lo 6:5-7 i tokim ol papamama long mekim wanem?
5 Bilong yu ken lainim pikinini bilong yu long laikim tru Jehova, yu yet i mas laikim tru Jehova. Pasin bilong laikim tru God bai kirapim yu long bihainim gut olgeta tok bilong em. Bai yu ‘stretim gut ol pikinini bilong yu na skulim ol long tok bilong Bikpela.’ (Efesus 6:4) God i tokim ol papamama long stap olsem gutpela piksa long ol pikinini i ken bihainim, na toktok gut wantaim ol, na lainim ol. Lo 6: 5-7 i tok: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela. Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” Sapos yu skulim ol pikinini planti taim, ol bai save na pilim tru ol lo bilong God. Long dispela rot ol pikinini bai pilim pasin bilong yu long laikim tru Jehova, na dispela bai kirapim ol tu long pas gut wantaim em.—Sindaun 20:7.
6. Ol pikinini i save bihainim pasin bilong papamama, na olsem wanem dispela samting inap helpim ol papamama long skulim ol?
6 Ol pikinini i amamas long kisim save. Ol i save putim yau na lukluk long ol samting na kwiktaim ol i save bihainim pasin bilong yu. Taim ol i lukim olsem yu no save wok strong long kisim planti mani kago, dispela i save helpim ol long bihainim tok bilong Jisas. Yu lainim ol long ol i mas tingim ol samting bilong Kingdom bilong God pastaim na ol i no ken tingting planti long ol samting bilong skin. (Matyu 6:25-33) Taim yu mekim ol gutpela tok long tok tru bilong Baibel, long kongrigesen bilong God, na long ol elda, yu lainim ol pikinini bilong yu long rispektim Jehova na long tingim tru ol samting bilong spirit em i save givim. Ol pikinini i save lukim hariap sapos pasin bilong yu i pait wantaim tok bilong yu, olsem na pasin bilong yu i mas strongim tok bilong yu, na tok na pasin bilong yu i mas kamapim klia olsem yu save tingim tru ol samting bilong spirit. Em i wanpela gutpela samting tru taim ol papamama i lukim olsem gutpela pasin bilong ol i bin kirapim pikinini bilong ol long givim bel long Jehova!—Sindaun 23:24, 25.
7, 8. Wanem stori i kamapim klia olsem papamama i mas kirap skulim ol pikinini taim ol i liklik yet? Husat i mekim na dispela wok i karim gutpela kaikai?
7 Stori bilong wanpela famili long Veneswela i kamapim klia olsem ol papamama i mas kirap skulim ol pikinini taim ol i liklik yet. (2 Timoti 3:15) Em stori bilong tupela yangpela marit, Félix na Mayerlín. Tupela i mekim wok painia. Taim pikinini man bilong ol, em Felito, i kamap, ol i wok strong long helpim em long kamap man i lotu tru long Jehova. Mayerlín i kirap ritim buk Baibel Stori Buk Bilong Mi long Felito, em buk ol Witnes Bilong Jehova i wokim. Taim Felito i liklik yet, em i luksave long Moses na sampela narapela man long dispela buk.
8 Na taim Felito i yangpela tru, em yet i kirap autim tok. Em inapim laik bilong em long kamap pablisa i autim tok bilong Kingdom, na bihain em i kisim baptais. Bihain, Felito i kamap wanpela painia oltaim. Papamama bilong em i tok: “Taim mipela i lukim pikinini man bilong mipela i wok long kamap strong, mipela i save olsem Jehova na ol gutpela tok bilong em i mekim na dispela samting i kamap.”
Helpim Pikinini Long Kamap Strong Long Ol Samting Bilong Spirit
9. Bilong wanem yumi mas tok tenkyu long ol samting wokboi i gat gutpela tingting i save givim bilong skulim yumi long ol samting bilong spirit?
9 I gat planti nius, na planti handet buk, na planti tausen Web-sait bilong Intenet em ol i stori long pasin bilong mekim bikpela long pikinini. Wanpela stori bilong nius Newsweek i tok long ol pikinini, em i tok planti taim ‘tok bilong ol dispela buk na nius samting i pait wantaim. Na bai yu tingting planti moa yet taim yu kisim save olsem tok yu ting yu inap bilip long en, dispela tok i no stret liklik.’ Yumi tok tenkyu tru long Jehova long em i bin givim planti samting bilong skulim na helpim ol famili long ol samting bilong spirit! Olsem wanem? Yu save kisim olgeta samting bilong spirit em wokboi i gat gutpela tingting i save givim?—Matyu 24:45-47.
10. Olsem wanem gutpela famili-stadi inap helpim papamama na ol pikinini?
10 Wanpela bikpela samting em olsem: Famili i mas mekim oltaim famili-stadi em olgeta inap i stap bel isi long en. Bilong famili-stadi i ken skulim na strongim famili na ol i amamas long en, em i bikpela samting long redim gut ol tok yupela bai stadi long en. Taim papamama i kirapim ol pikinini long toktok, ol i kisim save long ol tingting i stap long bel bilong ol. Sapos olgeta long famili i amamas na wetim taim bilong famili-stadi, dispela i makim olsem stadi i save wok gut.
11. (a) Papamama inap helpim ol pikinini long putim wanem ol mak? (b) Wanem samting i kamap taim wanpela liklik meri long Japan i wok strong long inapim mak em i bin putim?
11 Ol mak bilong spirit inap helpim famili long kamap strong, na papamama i mas helpim ol pikinini long putim ol kain mak olsem. Ol gutpela mak bilong winim em pasin bilong ritim Baibel long olgeta de, autim gutnius long olgeta mun, na mekim ol samting bilong dediket na baptais. Sampela narapela mak bilong winim em mekim wok bilong God long olgeta de olsem painia, wok long Betel, o wok misineri. Taim Ayumi, em wanpela liklik meri long Japan, i skul long komiuniti-skul, em i putim mak olsem em i laik autim tok long olgeta wanklas bilong em. Bilong kirapim tingting bilong tisa na ol wanklas, em i kisim tok orait long putim sampela buk bilong Baibel long laibreri. Dispela i mekim na insait long 6-pela yia em i stap long komiuniti-skul, em i lukautim 13 Baibel-stadi. Wanpela sumatin na sampela bilong famili bilong em ol i kisim baptais na kamap Kristen.
12. Long wanem rot ol pikinini inap kisim bikpela helpim tru long ol miting Kristen?
12 Bilong stap strong long ol samting bilong spirit, yumi mas i go oltaim long ol miting tu. Aposel Pol i tokim ol wanbilip long ol “i no ken lusim pasin bilong bung wantaim, olsem sampela man i save mekim.” Dispela i no ken kamap pasin bilong yumi, long wanem, ol yangpela na ol lapun tu i kisim planti gutpela samting taim ol i go oltaim long ol miting Kristen. (Hibru 10:24, 25; Lo 31:12) Ol pikinini i mas lain long putim gut yau. Em i bikpela samting tu long redim ol tok bilong miting, long wanem, pasin bilong bekim tok i mekim na ol miting bai helpim yumi tru. Taim liklik pikinini i kirap bekim tok, ating pastaim em i bekim sampela sotpela tok o ritim liklik hap bilong paragraf, tasol sapos papamama i lainim em long painim ol bekim na bekim tok long toktok bilong em yet, orait dispela bai helpim pikinini moa yet. Olsem wanem? Yupela ol papamama i stap olsem gutpela piksa na oltaim yupela i save bekim gut ol tok? I gutpela samting tu sapos olgeta wan wan long famili i gat Baibel bilong em yet, buk singsing, na buk o nius samting em ol i skelim long miting.
13, 14. (a) Bilong wanem papamama i mas wok wantaim ol pikinini long wok autim tok? (b) Wanem samting inap mekim na wok autim tok i helpim na givim amamas long ol pikinini?
13 Ol papamama i gat gutpela tingting ol bai stiaim ol pikinini long yusim strong bilong ol long mekim wok bilong Jehova, na helpim ol long mekim wok autim tok i kamap bikpela samting long i stap bilong ol. (Hibru 13:15) Taim papamama i autim tok wantaim pikinini bilong ol, long dispela rot tasol ol inap lainim ol pikinini bambai ol i ken kamap wokman i ‘autim stret tok tru bilong God, na bai em i no gat sem long ai bilong man.’ (2 Timoti 2:15) Orait olsem wanem long yu? Sapos yu wanpela papa o mama, yu save helpim pikinini bilong yu long redi long mekim wok autim tok? Taim yu mekim olsem, dispela bai helpim ol pikinini long mekim gut dispela wok na kisim amamas long en.
14 Bilong wanem em i gutpela long papamama na ol pikinini i wok wantaim long autim tok? Long wanem, long dispela rot ol pikinini i ken lukim na bihainim pasin bilong papamama. Na long wankain taim, papamama i ken lukluk long pikinini i gat wanem kain tingting, pasin, na save long mekim wok autim tok. Kisim ol pikinini bilong yu i go wantaim yu long mekim kain kain wok autim tok. Sapos inap, givim paus bilong wok autim tok long wan wan pikinini, na lainim em long lukautim gut dispela paus. Taim yu skulim na strongim oltaim ol pikinini, ol bai tingim tru wok autim tok, na ol bai ting wok autim tok em i wanpela rot bilong kamapim klia pasin bilong laikim tru God na ol man.—Matyu 22:37-39; 28:19, 20.
Stap Strong Long Ol Samting Bilong Spirit
15. Em i bikpela samting long famili i mas stap strong long ol samting bilong spirit, olsem na yu ken mekim wanem bilong helpim famili long stap olsem?
15 Em i bikpela samting tru long famili i stap strong long ol samting bilong spirit. (Song 119:93) Wanpela rot bilong mekim olsem, em pasin bilong toktok wantaim famili bilong yu long ol samting bilong spirit long olgeta taim. Olsem wanem? Yu save toktok wantaim ol long teks bilong de? Em pasin bilong yu long toktok long ol ekspiriens bilong wok autim tok o long sampela tok bilong nupela Wastaua na Kirap! taim “yupela i wokabaut long rot”? ‘Taim yu malolo na long taim yu wok’ yu save beten na tok tenkyu long Jehova long laip yu kisim long olgeta wan wan de, na long planti gutpela samting em i save givim? (Lo 6:6-9) Taim ol pikinini bilong yu i lukim pasin bilong yu long laikim tru God long olgeta samting yu mekim, dispela bai helpim ol long pilim tru tok i tru.
16. Wanem gutpela samting bai kamap sapos papamama i soim ol pikinini long pasin bilong painim save?
16 Sampela taim ol pikinini i mas kisim tok i helpim ol long karim ol hevi na ol narapela samting i save kamap. Tasol no ken tokim ol oltaim long ol samting ol i mas mekim. Ating sampela taim i gutpela long soim ol long rot bilong painim tingting bilong God long ol samting na kirapim ol yet long painim stretpela save. Pasin bilong lainim ol pikinini long mekim gutpela wok long olgeta buk samting em ‘gutpela wokboi’ i save givim, dispela bai helpim ol long pas gut wantaim Jehova. (1 Samuel 2:21b) Na taim ol i tokim ol narapela bilong famili long ol samting ol i kisim save long en, dispela i save strongim famili moa yet long ol samting bilong spirit.
Bilip Tru Long Jehova
17. Bilong wanem ol papa o mama wanpis i no ken bel hevi tumas long wok bilong helpim ol pikinini long kamap Kristen?
17 Olsem wanem long ol famili i gat papa o mama tasol? Ol dispela famili i hatwok moa long mekim bikpela long ol pikinini. Tasol yupela ol papa o mama wanpis, no ken bel hevi! Wok bilong yupela inap kamap gutpela, olsem planti papa na mama wanpis i bin kamapim klia. Ol i bilip long God, na ol i bihainim gut ol tok bilong em, na ol i bin kamapim ol gutpela pikinini i strong long ol samting bilong spirit. (Sindaun 22:6) Tru, ol papa o mama wanpis em ol i Kristen, ol i mas bilip tru long Jehova. Ol i mas bilip olsem em bai helpim ol.—Song 121:1-3.
18. Ol papamama i mas mekim wanem bilong helpim tingting na skin bilong ol pikinini? Tasol wanem samting i bikpela samting?
18 Papamama i gat gutpela tingting ol i save olsem ‘i gat taim bilong lap na taim bilong singsing.’ (Saveman 3:1, 4) Bilong tingting na skin bilong pikinini i ken kamap gutpela, em i bikpela samting long malolo na painim gutpela amamas. Gutpela musik na pasin bilong mekim ol singsing i litimapim nem bilong Jehova bai helpim pikinini long kisim gutpela tingting, na dispela inap mekim bikpela wok bilong helpim em long pas gut wantaim Jehova. (Kolosi 3:16) Taim pikinini i yangpela em taim bilong em long lain long pret na daun long Jehova bambai em i ken amamas long stap inap oltaim long Paradais long graun.—Galesia 6:8.
19. Bilong wanem ol papamama i ken bilip tru olsem Jehova bai blesim hatwok bilong ol long mekim bikpela long ol pikinini?
19 Jehova i laik bai olgeta famili Kristen i stap wanbel na stap strong long ol samting bilong spirit. Sapos yumi laikim tru God na givim bel long bihainim Tok bilong em, orait em bai blesim hatwok bilong yumi na strongim yumi long bihainim tok bilong em. (Aisaia 48:17; Filipai 4:13) Tingim olsem nau yu gat rot long skulim na lainim pikinini bilong yu, tasol bihain bai yu no gat rot gen long mekim olsem. Olsem na givim bel tru long bihainim Tok Bilong God, na Jehova bai blesim hatwok bilong yu long kamapim famili i stap strong long ol samting bilong spirit.
Yumi Lainim Wanem Samting?
• Bilong wanem em i bikpela samting long makim hap taim bilong skulim ol pikinini?
• Bilong wanem ol papamama i mas i stap olsem gutpela piksa?
• Wanem sampela bikpela rot bilong helpim ol pikinini long kamap strong long ol samting bilong spirit?
• Olsem wanem famili inap i stap strong long ol samting bilong spirit?
[Ol Piksa long pes 24, 25]
Ol famili i stap strong long ol samting bilong spirit ol i save stadi oltaim long Baibel, go long ol miting Kristen, na autim tok wantaim