Askim
God i makim “ples tambu tru” long wanem taim, olsem Daniel 9:24 i tok profet long en?
Daniel 9:24-27 i tok profet long taim “dispela bikman God i bin makim”—em Krais—bai kamap. Dispela tok profet long makim “ples tambu tru” em i no tok long makim Rum Tambu Tru bilong haus lotu bilong God long Jerusalem. Nogat. Dispela tok “ples tambu tru” i makim ples tru bilong God long heven—olsem Rum Tambu Tru long heven—long bikpela haus lotu spirit bilong Jehova.a—Hibru 8:1-5; 9:2-10, 23.
Haus lotu spirit bilong God i kirap mekim wok long wanem taim? Tingim samting i bin kamap, taim Jisas i kisim baptais long 29 C.E. Kirap long dispela taim, Jisas i truim ol tok bilong Song 40:6-8. Bihain aposel Pol i makim olsem Jisas i bin beten long God olsem: “Yu no laik bai ol i kilim abus na mekim ofa. Tasol yu bin redim wanpela bodi bilong givim long mi.” (Hibru 10:5) Jisas i save olsem God i “no laik” bai ol i wok yet long kilim ol animal na mekim ol ofa long haus lotu long Jerusalem. Long wanem, Jehova i redim wanpela bodi bilong Jisas i gutpela olgeta bilong em i ken givim olsem ofa. Jisas i kamapim bel bilong em na em i tok moa olsem: “God, mi kam pinis. Olsem bipo ol i raitim tok long mi long buk. Nau mi kam pinis bilong bihainim laik bilong yu.” (Hibru 10:7) Na Jehova i mekim wanem samting? Gutnius Matyu i raitim i tok: “Jisas i kisim baptais pinis, na kwiktaim em i lusim wara na i kam antap. Na heven i op, na em i lukim Spirit bilong God i kam daun olsem wanpela bilong ol dispela kain pisin ol i kolim balus, na i kam i stap long em. Na long heven wanpela maus i singaut olsem, ‘Dispela em i Pikinini bilong mi. Mi laikim em tumas. Bel bilong mi em i amamas long em.’ ”—Matyu 3:16, 17.
God Jehova i orait long Jisas i laik givim bodi bilong em olsem ofa na dispela i makim olsem i gat wanpela alta i kamap pinis na i winim tru dispela alta i stap long haus lotu bilong God long Jerusalem. Dispela em alta bilong “laik” bilong God o rot God i wokim bilong em i ken orait long Jisas i givim bodi bilong em olsem ofa. (Hibru 10:10) Taim God i kapsaitim spirit holi long Jisas, dispela i makim olsem nau God i kamapim wanpela samting i olsem haus lotu bilong em long spirit.b Olsem na long taim Jisas i kisim baptais, God i makim ples bilong em yet long heven i kamap olsem “ples tambu tru” insait long bikpela haus lotu bilong em long spirit.
[Ol Futnot]
a Bilong kisim save long ol wan wan samting bilong haus lotu spirit bilong God, lukim Wastaua bilong Julai 1, 1996, pes 14-19.
b Buk Pay Attention to Daniel’s Prophecy! long pes 195 i mekim kain tok olsem.
[Piksa long pes 27]
God i makim “ples tambu tru” long taim Jisas i kisim baptais