Yu Inap Winim Bel Hevi Bilong i Stap Wanpis
HUSAT man inap tok olsem i no gat wanpela taim em i bin bel hevi long i stap wanpis? Planti samting inap mekim na yumi pilim olsem yumi stap wanpis. Tasol pasin bilong i stap wanpis inap kamapim bikpela bel hevi moa long ol meri em ol i no bin marit, o man bilong ol i dai pinis, o ol i bin katim marit.
Olsem: Wanpela yangpela meri Kristen, nem bilong em Frances, em i tok: “Taim mi kisim pinis 23 krismas, i luk olsem olgeta pren bilong mi ol i marit pinis, na mi stap wanpis.”a Dispela bel hevi bilong i stap wanpis inap kamap bikpela moa taim planti yia moa i lus na i hatwok moa long painim poroman marit. Sandra, nau em i gat 48 krismas samting, em i tok: “Mi no bin tingting olsem oltaim mi bai stap wanpis, na mi gat laik yet long marit sapos rot i op.” Angela, em i gat 55 krismas samting, em i tok: “Mi no bin pasim tok long i stap wanpis, tasol ol samting i bin kamap olsem. I no gat planti brata singel long hap ol i bin makim mi long mekim wok painia salim long en.”
Em i gutpela samting tru olsem planti meri Kristen ol i no laik marit, long wanem, ol i givim bel long bihainim tok bilong Jehova long “maritim man i bilip long Bikpela.” (1 Korin 7:39) Sampela ol i lain gut long pasin bilong i stap singel, tasol sampela narapela ol i pilim olsem dispela laik bilong marit na kamapim pikinini i save kamap strong moa long olgeta yia. Sandra i tok: “Oltaim mi pilim olsem mi sot long wanpela samting, long wanem, mi no gat poroman marit.”
Ol narapela samting tu, olsem wok bilong lukautim lapun papamama, ol inap mekim bel hevi bilong stap wanpis i bikpela moa. Sandra i tok: “Mi no marit, olsem na famili bilong mi i pilim olsem em wok bilong mi long lukautim lapun papamama bilong mipela. Inap 20 yia olgeta mi bin mekim bikpela wok moa long lukautim ol, maski mipela i 6-pela pikinini long famili. Sapos mi bin gat poroman marit bilong helpim mi, ating i stap bilong mi long dispela taim bai i no hatwok tumas.”
Frances i kolim narapela samting i save mekim em i bel hevi long i stap wanpis. Em i tok: “Sampela taim ol man i save askim mi stret olsem, ‘Bilong wanem yu no marit yet?’ Kain tok olsem i save mekim na mi pilim olsem em asua bilong mi yet na mi stap singel. Klostu olgeta bung bilong marit mi go long en, wanpela bai kamapim askim mi no laik tru long harim, em olsem: ‘Wanem taim bai yu marit?’ Dispela i save kirapim mi long tingting olsem, ‘Sapos ol brata i strong long ol samting bilong spirit ol i no laikim mi, orait ating mi no gat ol gutpela pasin Kristen o mi no gat gutpela skin.’ ”
Olsem wanem yumi inap daunim bel hevi bilong i stap wanpis? Ol narapela inap mekim wanem bilong helpim lain i gat dispela hevi?
Bilip Tru Long Jehova
Man bilong raitim song i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 55:22) Long tok Hibru, insait bilong dispela tok “hevi” i olsem “skel,” na em i makim ol hevi yumi karim long i stap bilong yumi i olsem skel bilong yumi yet. Jehova tasol i save gut long ol dispela hevi bilong yumi, na em inap givim strong long yumi bilong karim ol dispela hevi. Pasin bilong bilip na wet long God Jehova i bin helpim Angela long karim bel hevi bilong i stap wanpis. Em i stori long wok bilong em long autim tok fultaim na em i tok: “Taim mi kirap long mekim wok painia, mi na poroman bilong mi long wok painia mitupela i stap longwe long kongrigesen. Mipela i lain long pasin bilong bilip olsem Jehova bai helpim mipela, na oltaim dispela pasin i bin helpim mi. Taim mi kisim tingting olsem ol gutpela samting i no inap kamap, mi save toktok long Jehova na em i save helpim mi. Ol tok bilong Song 23 i save mekim gut bel bilong mi na mi save ritim planti taim.”
Aposel Pol i bin karim wanpela bikpela hevi. Inap 3-pela taim em i bin ‘beten strong long Bikpela i ken rausim dispela nil i sutim skin bilong em.’ God i no bin wokim mirakel bilong helpim Pol, tasol Pol i kisim tok promis olsem pasin marimari bilong God bai strongim em. (2 Korin 12:7-9) Pol i kisim save long ol samting tru tru i helpim man long stap amamas. Bihain em i tok: “Mi save pinis long pasin bilong i stap isi, maski mi gat planti kaikai o mi stap hangre, na maski mi gat planti samting o mi sot long ol samting. Olgeta kain samting i ken kamap long mi, na mi save stap isi yet na belgut tasol. Krais i save strongim mi, na long strong bilong em mi inap mekim olgeta samting.”—Filipai 4:12, 13.
Olsem wanem yumi inap kisim strong i kam long God taim yumi pilim olsem yumi stap wanpis? Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Sandra i bin bihainim dispela tok. Em i tok: “Mi stap singel, olsem na planti taim mi save stap mi yet. Dispela i mekim na planti taim rot i op bilong mi ken beten long Jehova. Mi pilim olsem mi pas gut wantaim em na mi inap tokim em long olgeta hevi bilong mi na ol samting mi amamas long en.” Na Frances i tok: “Wok bilong sakim tingting olsem ol gutpela samting i no inap kamap i save hatwok tru long mekim long strong bilong mi yet. Tasol taim mi autim ol dispela tingting bilong mi long Jehova, dispela i save helpim mi tru. Mi bilip tru olsem Jehova i amamas long save long olgeta samting em ol inap helpim mi long ol samting bilong spirit na long ol samting mi pilim long bel.”—1 Timoti 5:5.
“Helpim Ol Arapela Long Karim Hevi Bilong Ol”
Long lain brata Kristen, i no olsem ol i no gat helpim bilong karim hevi bilong ol. Aposel Pol i tok: “Yupela i mas helpim ol arapela long karim hevi bilong ol. Long dispela pasin bai yupela inapim tru lo bilong Krais.” (Galesia 6:2) Long rot bilong bung wantaim ol wanlain Kristen, yumi inap kisim dispela “gutpela tok” bilong strongim bel bilong yumi, na helpim yumi long daunim bel hevi bilong i stap wanpis.—Sindaun 12:25.
Tingim tu stori bilong Baibel long pikinini meri bilong Hetman Jepta bilong Israel. Taim em i no winim yet pait long ol lain Amon, Jepta i mekim tok promis long givim i go long Jehova husat man o meri i lusim haus bilong em pastaim bilong tok amamas long em. Tasol pikinini meri bilong Jepta i namba wan long i kam bungim em. (Hetman 11:30, 31, 34-36) Maski dispela i makim olsem em bai stap singel na em bai daunim laik bilong em long kamapim famili, pikinini meri bilong Jepta i daun long dispela tok promis na em i go mekim wok long haus lotu long Silo inap long laip olgeta bilong em. Yu ting ol narapela i no bin tingim samting em i bin mekim? Nogat: “Ol yangpela meri bilong Israel i save lusim ples na i go na krai [“tok amamas,” NW ] long pikinini meri bilong Jepta, dispela man bilong Gileat. Ol yangpela meri Israel i save mekim dispela pasin inap long 4-pela de long olgeta yia.” (Hetman 11:40) Yes, gutpela tok amamas inap strongim bel bilong man i kisim dispela tok. Olsem na yumi mas mekim gutpela tok amamas long ol narapela.
Na tu, i gutpela sapos yumi tingim pasin bilong Jisas. Maski i no pasin bilong ol man Juda long toktok wantaim ol meri, Jisas i bin lusim sampela hap taim na bung wantaim Maria na Marta. Ating man bilong tupela i dai pinis o ol i no bin marit. Jisas i laik bai tupela wantaim i kisim ol gutpela samting bilong spirit long rot bilong stap pren bilong em. (Luk 10:38-42) Yumi inap bihainim pasin bilong Jisas taim yumi tingim ol sista spirit i no marit na singautim ol long insait wantaim yumi long ol bung bilong amamas, na taim yumi stretim rot bilong wok wantaim ol long autim tok. (Rom 12:13) Olsem wanem? Ol i amamas long ol man i tingim ol olsem? Wanpela sista i tok: “Mi save olsem ol brata i laikim mi na ol i amamas long mi, tasol mi save bel gut moa yet taim ol i mekim samting i kamapim olsem ol i tingim mi yet.”
Sandra i tok: “Mipela i no gat famili bilong mipela yet, olsem na em i bikpela samting moa long mipela i mas i gat lain bilong laikim mipela, na mipela i mas pilim olsem mipela i insait long famili bilong ol brata sista spirit.” Jehova i save tingim tru ol wanpis, na yumi wok bung wantaim em taim yumi mekim ol samting i kirapim ol long pilim olsem yumi laikim ol. (1 Pita 5:6, 7) Pasin yumi mekim i no inap lus nating, long wanem, “sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.”—Sindaun 19:17.
‘Olgeta Man Wan Wan Bai Karim Hevi Bilong Pasin Ol Yet i Mekim’
Tru, ol narapela inap helpim ol wanpis na samting ol i mekim inap strongim bel bilong ol, tasol “olgeta man wan wan bai i karim hevi bilong pasin ol yet i mekim.” (Galesia 6:5) Tasol taim yumi karim hevi bilong i stap wanpis, yumi mas was gut long ol samting em inap bagarapim yumi. Olsem: Bel hevi bilong i stap wanpis inap daunim yumi olgeta sapos yumi no laik toktok gut na kamapim bel bilong yumi long ol narapela. Tasol, pasin sori inap helpim yumi long winim bel hevi bilong i stap wanpis. (1 Korin 13:7, 8) Pasin bilong givim ol samting bilong yumi long helpim ol narapela em i nambawan rot bilong kisim amamas—maski yumi gat wanem kain sindaun. (Aposel 20:35) Wanpela sista painia i save wok strong i tok: “Mi no gat bikpela taim bilong tingting tumas long mi stap wanpis. Taim mi pilim olsem mi gat wok bilong mekim, dispela i mekim na mi no save pilim bel hevi bilong stap wanpis.”
Na tu, yumi mas was gut na no ken larim bel hevi bilong i stap wanpis i daunim yumi olgeta na yumi kirap bung wantaim ol poroman nogut. Olsem: Sori tru, sapos laik bilong marit i pasim tingting bilong yumi na yumi no tingim ol hevi i save kamap long maritim poroman i no wanbilip, na i nogut moa sapos dispela laik i pasim yumi long tingim tok bilong Baibel long abrusim kain marit olsem! (2 Korin 6:14) Wanpela meri Kristen em i bin katim marit i tok: “I gat wanpela samting em i nogut moa long pasin bilong i stap singel. Em pasin bilong maritim poroman i no stret long yu maritim.”
Long nau, i luk olsem yumi mas karim ol hevi yumi no inap stretim. Helpim i kam long God inap strongim yumi long karim bel hevi bilong i stap wanpis. Taim yumi mekim wok bilong Jehova, yumi ken bilip tru olsem bihain God bai inapim tru olgeta laik bilong yumi.—Song 145:16.
[Futnot]
a Mipela i senisim nem bilong ol meri em mipela i kamapim tok bilong ol.
[Ol Piksa long pes 28]
Yumi inap winim bel hevi bilong i stap wanpis long rot bilong givim ol samting bilong yumi long helpim ol narapela